7–BOB
Yuzaki tutilgan roʻza hukm qilinadi
1 Shoh Doro hukmronligining toʻrtinchi yili toʻqqizinchi oyi — Xislav oyining toʻrtinchi kunida Egamiz Oʻz soʻzini Zakariyoga ayon qildi. 2 Bundan oldin Baytil aholisi Egamizdan iltifot soʻrash uchun Sarizar, Raxemmalek va ularning odamlarini Maʼbadga yuborib, shunday degan edi:
3 — Borib, Sarvari Olamning uyida boʻlgan ruhoniy va paygʻambarlardan soʻranglar: “Biz ancha yillardan beri Egamizning uyi vayron qilingan oyda qaygʻurib, roʻza tutib kelamiz. Shunday qilishda davom etaveraylikmi?”
4 Sarvari Olam Zakariyoga ayon qilgan soʻzida shunday dedi:
5 — Bu yurtdagi barcha odamlarga va ruhoniylarga ayt: “Ha, sizlar mana shu oʻtgan yetmish yil davomida beshinchi va yettinchi oylarda roʻza tutib, qaygʻurdingizlar. Ammo buni Men uchun emas, oʻzingiz uchun qilgan edingizlar! 6 Qorningizni toʻydirish uchun yeb–ichganingizday, oʻz manfaatingiz uchun roʻza tutib qaygʻurgansizlar. 7 Men, Egangiz, oʻtgan paygʻambarlar orqali aynan shu haqda sizlarni ogohlantirganman–ku! Oʻsha paytlarda Quddus va uning atrofidagi qishloqlar odamga toʻla edi. U yerda farovonlik hukm surar edi. Nagav choʻli va Yahudo qir etaklarida ham odamlar yashardilar.”
Surgunning sababi itoatsizlikdir
8 Egamiz Zakariyoga quyidagi soʻzlarni ayon qildi:
9 — Men, Sarvari Olam, shunday degan edim: “Adolatli hukm qilinglar. Bir–biringizga mehribon boʻlinglar, rahm–shafqat qilinglar. 10 Bevalarga, yetimlarga, musofirlarga, kambagʻallarga zulm qilmanglar. Bir–biringizga qarshi yovuz rejalar tuzmanglar.” 11 Ammo xalqim quloq solishdan bosh tortdi. Oʻjarlik qilib, eshitmaslik uchun quloqlarini berkitdi. 12 Men, Sarvari Olam, Oʻz Ruhim bilan paygʻambarlar orqali soʻzlarimni ayon qilganman. Ammo xalqim yuragini tosh qilib, qonun va oʻgitlarga quloq solmadi. Shuning uchun Men juda qattiq gʻazablandim.
13 “Men chaqirganimda ular eshitmagandilar, ular chaqirganda Men ham eshitmadim, — deydi Sarvari Olam. 14 — Men ularni oʻzlari tanimagan, bilmagan xalqlar orasiga sochib tashladim . Shunday qilib, ularning yurti vayron boʻldi. Na u yerga birov boradi, na u yerdan birov keladi. Oʻsha ajoyib yurt vayron boʻldi.”
7–БОБ
Юзаки тутилган рўза ҳукм қилинади
1 Шоҳ Доро ҳукмронлигининг тўртинчи йили тўққизинчи ойи — Хислав ойининг тўртинчи кунида Эгамиз Ўз сўзини Закариёга аён қилди. 2 Бундан олдин Байтил аҳолиси Эгамиздан илтифот сўраш учун Саризар, Рахеммалек ва уларнинг одамларини Маъбадга юбориб, шундай деган эди:
3 — Бориб, Сарвари Оламнинг уйида бўлган руҳоний ва пайғамбарлардан сўранглар: “Биз анча йиллардан бери Эгамизнинг уйи вайрон қилинган ойда қайғуриб, рўза тутиб келамиз. Шундай қилишда давом этаверайликми?”
4 Сарвари Олам Закариёга аён қилган сўзида шундай деди:
5 — Бу юртдаги барча одамларга ва руҳонийларга айт: “Ҳа, сизлар мана шу ўтган етмиш йил давомида бешинчи ва еттинчи ойларда рўза тутиб, қайғурдингизлар. Аммо буни Мен учун эмас, ўзингиз учун қилган эдингизлар! 6 Қорнингизни тўйдириш учун еб–ичганингиздай, ўз манфаатингиз учун рўза тутиб қайғургансизлар. 7 Мен, Эгангиз, ўтган пайғамбарлар орқали айнан шу ҳақда сизларни огоҳлантирганман–ку! Ўша пайтларда Қуддус ва унинг атрофидаги қишлоқлар одамга тўла эди. У ерда фаровонлик ҳукм сурар эди. Нагав чўли ва Яҳудо қир этакларида ҳам одамлар яшардилар.”
Сургуннинг сабаби итоатсизликдир
8 Эгамиз Закариёга қуйидаги сўзларни аён қилди:
9 — Мен, Сарвари Олам, шундай деган эдим: “Адолатли ҳукм қилинглар. Бир–бирингизга меҳрибон бўлинглар, раҳм–шафқат қилинглар. 10 Беваларга, етимларга, мусофирларга, камбағалларга зулм қилманглар. Бир–бирингизга қарши ёвуз режалар тузманглар.” 11 Аммо халқим қулоқ солишдан бош тортди. Ўжарлик қилиб, эшитмаслик учун қулоқларини беркитди. 12 Мен, Сарвари Олам, Ўз Руҳим билан пайғамбарлар орқали сўзларимни аён қилганман. Аммо халқим юрагини тош қилиб, қонун ва ўгитларга қулоқ солмади. Шунинг учун Мен жуда қаттиқ ғазабландим.
13 “Мен чақирганимда улар эшитмагандилар, улар чақирганда Мен ҳам эшитмадим, — дейди Сарвари Олам. 14 — Мен уларни ўзлари танимаган, билмаган халқлар орасига сочиб ташладим . Шундай қилиб, уларнинг юрти вайрон бўлди. На у ерга биров боради, на у ердан биров келади. Ўша ажойиб юрт вайрон бўлди.”
