26–BOB
Maʼbad darvozabonlari va ularning vazifalari
1 Maʼbad darvozasida xizmat qilish uchun quyidagi levilar tayinlangan edi:
Koʻrax naslidagi Osif xonadonidan — Kori oʻgʻli Mashalmiyo.
2 Mashalmiyoning yetti oʻgʻli bor edi: toʻngʻichi — Zakariyo, ikkinchisi — Yodiyol, uchinchisi — Zabadiyo, toʻrtinchisi — Yatniyol, 3 beshinchisi — Elam, oltinchisi — Yohuxanon va yettinchisi — Elixoʻnay.
4-5 Xudo Obidadomni barakalab, unga sakkiz oʻgʻil bergan edi: toʻngʻich oʻgʻli — Shamayo, ikkinchisi — Yohuzabad, uchinchisi — Yoʻx, toʻrtinchisi — Soxor, beshinchisi — Natanil, oltinchisi — Omiyol, yettinchisi — Issaxor va sakkizinchisi — Fullatay.
6 Obidadomning toʻngʻichi Shamayoning ham oʻgʻillari bor edi. Ular nihoyatda qobiliyatli boʻlganlari uchun oʻzlarining ota xonadonida urugʻboshilar edilar. 7 Ularning ismlari Oʻtnax, Rafail, Obid va Elzabad edi. Shamayoning qarindoshlari Elixu bilan Samaxiyo ham nihoyatda qobiliyatli edilar. 8 Obidadomning bu avlodi jami oltmish ikki kishini tashkil qilib, hammasi qobiliyatli, oʻz xizmatiga layoqatli edilar.
9 Mashalmiyoning oʻgʻillari va aka–ukalari oʻn sakkiz kishini tashkil qilib, hammasi qobiliyatli edilar.
10 Marori naslidan boʻlgan Xoʻsaxning toʻrt oʻgʻli bor edi. Uning Shimri degan oʻgʻli yoʻlboshchi edi. Shimri toʻngʻich oʻgʻil boʻlmasa ham, otasi uni yoʻlboshchi qilgan edi. 11 Xoʻsaxning ikkinchi oʻgʻli — Xilqiyo, uchinchisi — Tavaliyo va toʻrtinchisi Zakariyo edi. Xoʻsax xonadonining oʻn uch aʼzosi Maʼbad darvozabonlari boʻlib xizmat qilar edilar.
12 Darvozabonlar xonadonlari boʻyicha guruhlarga boʻlingan edilar. Ular Egamizning uyida xizmat qilayotgan boshqa levilar singari oʻz vazifalariga ega edilar. 13 Har bir xonadon katta–kichikligiga qaramay qurʼa tashlab , qoʻriqlaydigan darvozasini aniqlab oldi.
14 Sharq tomondagi darvoza uchun qurʼa tashlanganda, qurʼa Mashalmiyoga tushdi. Soʻngra oʻgʻli Zakariyo uchun qurʼa tashlandi, unga shimol tomondagi darvoza tushdi. Zakariyo dono maslahatchi edi. 15 Obidadom uchun qurʼa tashlanganda, unga janub tomondagi darvoza tushdi. Oʻgʻillari uchun qurʼa tashlanganda, ularga omborxonani qoʻriqlash tushdi. 16 Gʻarb tomondagi darvoza va yuqori yoʻl ustidagi Shallexet darvozasi uchun qurʼa tashlanganda, qurʼa Shupim bilan Xoʻsaxga tushdi. Darvozabonlar oʻz xizmatini belgilangan vaqtda, ketma–ketlikda uzluksiz ravishda bajarishlari lozim edi. 17 Sharq tomondagi darvozada kuniga oltita darvozabon, shimol tomondagi darvozada toʻrtta, janub tomondagi darvozada ham toʻrtta darvozabon turardi. Shuningdek, ikkita omborxonada ikkitadan darvozabon turardi. 18 Gʻarb tomondagi hovliga kelsak, yoʻlakda toʻrtta darvozabon, hovlining ichida esa ikkita darvozabon turardi.
19 Koʻrax va Marori naslidan boʻlgan darvozabonlarga mana shu qoʻriqchilik vazifasi topshirilgan edi.
Boshqa levilar va ularning vazifalari
20 Oxiyo boshchiligidagi boshqa levilar Xudoning uyidagi xazinalar va nazr qilingan hadyalar xazinalari uchun masʼul edilar. 21 Gershon urugʻidan boʻlgan Lubnax Yoxiyolning otasi edi. Lubnaxning naslidan bir necha urugʻboshilar chiqdi. 22 Yoxiyolning oʻgʻillari Zatom bilan Yoʻel Egamizning uyidagi xazinalar uchun masʼul edilar.
23 Imrom, Izxor, Xevron va Uziyol urugʻlariga ham vazifalar taqsimlanib berildi.
24 Muso oʻgʻli Gershomning urugʻidan Shavuvol Maʼbadning bosh xazinaboni edi. 25 Gershomning ukasi Eliazarning nasli quyidagilar edi: Eliazarning oʻgʻli — Raxaviyo, Raxaviyoning oʻgʻli — Yeshayo, Yeshayoning oʻgʻli — Yoram, Yoramning oʻgʻli — Zixri va Zixrining oʻgʻli — Shalumoʻt. 26 Shalumoʻt va uning xonadoni Egamizga nazr qilingan hadyalar xazinasi uchun masʼul edi. Bu xazinada shoh Dovudning, urugʻboshilar, mingboshilar, yuzboshilar va lashkarboshilarning Xudoga nazr qilgan hadyalari saqlanar edi. 27 Ular jangda qoʻlga kiritgan oʻljaning bir qismini Egamizning uyini taʼminlash uchun nazr qilardilar. 28 Shalumoʻt va uning xonadoni barcha hadyalar uchun masʼul edilar. Valiy Shomuil, Kish oʻgʻli Shoul, Nar oʻgʻli Abnur va Zeruya oʻgʻli Yoʻab nazr qilgan hadyalar ham ularning nazorati ostida edi.
29 Izxor naslidan Xonaniyo va uning oʻgʻillari Isroil xalqi uchun maʼmurlar va hakamlar qilib tayinlandilar. Ular Maʼbaddan tashqarida xizmat qilishardi.
30 Xevron naslidan Xashaviyo va uning 1700 nafar qobiliyatli qarindoshi ham maʼmurlar qilib tayinlandilar. Ular Iordan daryosining gʻarb tomonidagi qabilalar uchun masʼul boʻlib, Egamizning va shohning xizmatiga oid masalalarni yechishar edi. 31 Xevron naslidagi Yoriyo, nasabnoma maʼlumotiga koʻra, Xevron naslining yoʻlboshchisi edi. Dovud hukmronligining qirqinchi yilida nasabnomalarga oid barcha yozma maʼlumotlar koʻrib chiqilgan edi. Shunda Giladdagi Yazir shahrida Xevron nasli orasida qobiliyatli odamlar borligi aniqlandi. 32 Shoh Dovud Yoriyoni va uning 2700 nafar qobiliyatli qarindoshini maʼmurlar qilib tayinladi. Ular Iordan daryosining sharq tomonidagi Ruben, Gad va Manashe qabilasining yarmi uchun masʼul boʻlib, Xudoning va shohning xizmatiga oid barcha masalalarni hal qilishlari kerak edi.
26–БОБ
Маъбад дарвозабонлари ва уларнинг вазифалари
1 Маъбад дарвозасида хизмат қилиш учун қуйидаги левилар тайинланган эди:
Кўрах наслидаги Осиф хонадонидан — Кори ўғли Машалмиё.
2 Машалмиёнинг етти ўғли бор эди: тўнғичи — Закариё, иккинчиси — Ёдиёл, учинчиси — Забадиё, тўртинчиси — Ятниёл, 3 бешинчиси — Элам, олтинчиси — Ёҳуханон ва еттинчиси — Элихўнай.
4-5 Худо Обидадомни баракалаб, унга саккиз ўғил берган эди: тўнғич ўғли — Шамаё, иккинчиси — Ёҳузабад, учинчиси — Йўх, тўртинчиси — Сохор, бешинчиси — Натанил, олтинчиси — Омиёл, еттинчиси — Иссахор ва саккизинчиси — Фуллатай.
6 Обидадомнинг тўнғичи Шамаёнинг ҳам ўғиллари бор эди. Улар ниҳоятда қобилиятли бўлганлари учун ўзларининг ота хонадонида уруғбошилар эдилар. 7 Уларнинг исмлари Ўтнах, Рафаил, Обид ва Элзабад эди. Шамаёнинг қариндошлари Элиху билан Самахиё ҳам ниҳоятда қобилиятли эдилар. 8 Обидадомнинг бу авлоди жами олтмиш икки кишини ташкил қилиб, ҳаммаси қобилиятли, ўз хизматига лаёқатли эдилар.
9 Машалмиёнинг ўғиллари ва ака–укалари ўн саккиз кишини ташкил қилиб, ҳаммаси қобилиятли эдилар.
10 Марори наслидан бўлган Хўсахнинг тўрт ўғли бор эди. Унинг Шимри деган ўғли йўлбошчи эди. Шимри тўнғич ўғил бўлмаса ҳам, отаси уни йўлбошчи қилган эди. 11 Хўсахнинг иккинчи ўғли — Хилқиё, учинчиси — Тавалиё ва тўртинчиси Закариё эди. Хўсах хонадонининг ўн уч аъзоси Маъбад дарвозабонлари бўлиб хизмат қилар эдилар.
12 Дарвозабонлар хонадонлари бўйича гуруҳларга бўлинган эдилар. Улар Эгамизнинг уйида хизмат қилаётган бошқа левилар сингари ўз вазифаларига эга эдилар. 13 Ҳар бир хонадон катта–кичиклигига қарамай қуръа ташлаб , қўриқлайдиган дарвозасини аниқлаб олди.
14 Шарқ томондаги дарвоза учун қуръа ташланганда, қуръа Машалмиёга тушди. Сўнгра ўғли Закариё учун қуръа ташланди, унга шимол томондаги дарвоза тушди. Закариё доно маслаҳатчи эди. 15 Обидадом учун қуръа ташланганда, унга жануб томондаги дарвоза тушди. Ўғиллари учун қуръа ташланганда, уларга омборхонани қўриқлаш тушди. 16 Ғарб томондаги дарвоза ва юқори йўл устидаги Шаллехет дарвозаси учун қуръа ташланганда, қуръа Шупим билан Хўсахга тушди. Дарвозабонлар ўз хизматини белгиланган вақтда, кетма–кетликда узлуксиз равишда бажаришлари лозим эди. 17 Шарқ томондаги дарвозада кунига олтита дарвозабон, шимол томондаги дарвозада тўртта, жануб томондаги дарвозада ҳам тўртта дарвозабон турарди. Шунингдек, иккита омборхонада иккитадан дарвозабон турарди. 18 Ғарб томондаги ҳовлига келсак, йўлакда тўртта дарвозабон, ҳовлининг ичида эса иккита дарвозабон турарди.
19 Кўрах ва Марори наслидан бўлган дарвозабонларга мана шу қўриқчилик вазифаси топширилган эди.
Бошқа левилар ва уларнинг вазифалари
20 Охиё бошчилигидаги бошқа левилар Худонинг уйидаги хазиналар ва назр қилинган ҳадялар хазиналари учун масъул эдилар. 21 Гершон уруғидан бўлган Лубнах Ёхиёлнинг отаси эди. Лубнахнинг наслидан бир неча уруғбошилар чиқди. 22 Ёхиёлнинг ўғиллари Затом билан Йўэл Эгамизнинг уйидаги хазиналар учун масъул эдилар.
23 Имром, Изхор, Хеврон ва Узиёл уруғларига ҳам вазифалар тақсимланиб берилди.
24 Мусо ўғли Гершомнинг уруғидан Шавувол Маъбаднинг бош хазинабони эди. 25 Гершомнинг укаси Элиазарнинг насли қуйидагилар эди: Элиазарнинг ўғли — Рахавиё, Рахавиёнинг ўғли — Ешаё, Ешаёнинг ўғли — Ёрам, Ёрамнинг ўғли — Зихри ва Зихрининг ўғли — Шалумўт. 26 Шалумўт ва унинг хонадони Эгамизга назр қилинган ҳадялар хазинаси учун масъул эди. Бу хазинада шоҳ Довуднинг, уруғбошилар, мингбошилар, юзбошилар ва лашкарбошиларнинг Худога назр қилган ҳадялари сақланар эди. 27 Улар жангда қўлга киритган ўлжанинг бир қисмини Эгамизнинг уйини таъминлаш учун назр қилардилар. 28 Шалумўт ва унинг хонадони барча ҳадялар учун масъул эдилар. Валий Шомуил, Киш ўғли Шоул, Нар ўғли Абнур ва Зеруя ўғли Йўаб назр қилган ҳадялар ҳам уларнинг назорати остида эди.
29 Изхор наслидан Хонаниё ва унинг ўғиллари Исроил халқи учун маъмурлар ва ҳакамлар қилиб тайинландилар. Улар Маъбаддан ташқарида хизмат қилишарди.
30 Хеврон наслидан Хашавиё ва унинг 1700 нафар қобилиятли қариндоши ҳам маъмурлар қилиб тайинландилар. Улар Иордан дарёсининг ғарб томонидаги қабилалар учун масъул бўлиб, Эгамизнинг ва шоҳнинг хизматига оид масалаларни ечишар эди. 31 Хеврон наслидаги Ёриё, насабнома маълумотига кўра, Хеврон наслининг йўлбошчиси эди. Довуд ҳукмронлигининг қирқинчи йилида насабномаларга оид барча ёзма маълумотлар кўриб чиқилган эди. Шунда Гиладдаги Язир шаҳрида Хеврон насли орасида қобилиятли одамлар борлиги аниқланди. 32 Шоҳ Довуд Ёриёни ва унинг 2700 нафар қобилиятли қариндошини маъмурлар қилиб тайинлади. Улар Иордан дарёсининг шарқ томонидаги Рубен, Гад ва Манаше қабиласининг ярми учун масъул бўлиб, Худонинг ва шоҳнинг хизматига оид барча масалаларни ҳал қилишлари керак эди.
