1–BOB
Duoyi salom
1 Iso Masihga qilgan xizmatim tufayli qamoqda boʻlgan men — Pavlusdan hamda birodarimiz Timoʻtiydan sevikli hamkorimiz Filimoʻnga salom! 2 Singlimiz Affiya bilan safdoshimiz Arxippusga, shuningdek, xonadoningda yigʻilib turadigan imonlilar jamoatiga ham salom yoʻllaymiz. 3 Otamiz Xudo va Rabbimiz Iso Masih sizlarga inoyat va tinchlik ato qilsin.
Xudoga shukrona
4 Ey Filimoʻn, men ibodat qilganimda seni eslab, har doim Xudoyimga shukur aytaman. 5 Chunki sening Rabbimiz Isoga boʻlgan imoning va barcha aziz birodarlarga boʻlgan muhabbating haqida eshitib turibman. 6 Ibodatim shuki, birgalikda baham koʻrayotgan imonimiz sening hayotingda samara bersin. Iso Masih uchun qilishimiz kerak boʻlgan yaxshiliklarni chuqurroq tushunishingga olib kelsin. 7 Birodarim, sen tufayli birodarlarning koʻngli tinch. Sening mehr–muhabbating menga katta sevinch va tasalli berdi.
Pavlus qul Oʻnisimus uchun iltimos qiladi
8 Filimoʻn, sen ham, men ham Masihga ishonamiz. Shuning uchun men senga, oʻz burchingni bajargin, deb buyurishga haddim sigʻadi. 9 Ammo sen meni yaxshi koʻrganing uchun iltimos qilishni afzal koʻrdim. Iso Masih tufayli qamoqda boʻlgan, yoshi oʻtib qolgan men, Pavlus, 10 mahbusligimda imon orqali menga oʻgʻil boʻlib qolgan Oʻnisimus uchun sendan iltimos qilyapman. 11-12 Oʻnisimus bir vaqtlar senga foydasiz edi. Endi esa u senga ham, menga ham foydalidir . Koʻzimning oqu qorasiday boʻlib qolgan Oʻnisimusni sening oldingga qaytarib yubordim.
13 Men Xushxabarni targʻib qilganim uchun qamoqda yotibman. Oʻnisimusning yonimda qolishini, sening oʻrningga menga xizmat qilishini xohlar edim. 14 Ammo sening roziligingsiz hech bir ish qilishni xohlamadim, chunki sening iltifotingni majburiy emas, balki ixtiyoriy boʻlishini istadim. 15 Balki, sen Oʻnisimusni abadiy qaytarib olishing uchun u sendan vaqtinchalik ajralgandir . 16 Endi u senga faqatgina qul emas, balki quldan yuqori, sevikli birodaringdir. Men uni juda qadrlayman. Ishonchim komilki, u senga qul sifatida ham, Rabbimiz Iso orqali birodaring sifatida ham yanada qadrliroqdir.
17 Agar sen meni Rabbimiz xizmatidagi safdoshing deb bilsang, Oʻnisimusni meni qabul qilganday qabul qilgin. 18 Mabodo, u senga zarar keltirgan boʻlsa yoki sendan qarzdor boʻlsa, buni mening zimmamga yukla. 19 Men, Pavlus, quyidagini oʻz qoʻlim bilan yozyapman : men qarzingni toʻlayman. Sen oʻz hayoting uchun mendan qarzdor ekanligingni aytishimning esa hojati yoʻq. 20 Ha, birodarim, Rabbimiz Iso tufayli mendan bu iltifotingni ayama! Masih haqi–hurmati jonimga oro kirgin! 21 Sen mening soʻzlarimga quloq solib, aytganlarimni qilasan, ha, bundan ham koʻprogʻini bajarasan, deb ishonganim uchun bularni yozdim.
22 Bundan tashqari, menga biror turar joy ham tayyorlab qoʻygin. Chunki Xudo ibodatlaringizni eshitib, meni yana sizlarning oldingizga qaytarishiga ishonaman.
Soʻnggi salomlar
23-24 Men bilan birga Iso Masih nomi uchun mahbus boʻlgan Epafras, hamkorlarim Mark , Aristarxus, Dimas, Luqo senga salom yoʻllayaptilar.
25 Rabbimiz Iso Masihning inoyati sizlarga yor boʻlsin .
1–БОБ
Дуойи салом
1 Исо Масиҳга қилган хизматим туфайли қамоқда бўлган мен — Павлусдан ҳамда биродаримиз Тимўтийдан севикли ҳамкоримиз Филимўнга салом! 2 Синглимиз Аффия билан сафдошимиз Архиппусга, шунингдек, хонадонингда йиғилиб турадиган имонлилар жамоатига ҳам салом йўллаймиз. 3 Отамиз Худо ва Раббимиз Исо Масиҳ сизларга иноят ва тинчлик ато қилсин.
Худога шукрона
4 Эй Филимўн, мен ибодат қилганимда сени эслаб, ҳар доим Худойимга шукур айтаман. 5 Чунки сенинг Раббимиз Исога бўлган имонинг ва барча азиз биродарларга бўлган муҳаббатинг ҳақида эшитиб турибман. 6 Ибодатим шуки, биргаликда баҳам кўраётган имонимиз сенинг ҳаётингда самара берсин. Исо Масиҳ учун қилишимиз керак бўлган яхшиликларни чуқурроқ тушунишингга олиб келсин. 7 Биродарим, сен туфайли биродарларнинг кўнгли тинч. Сенинг меҳр–муҳаббатинг менга катта севинч ва тасалли берди.
Павлус қул Ўнисимус учун илтимос қилади
8 Филимўн, сен ҳам, мен ҳам Масиҳга ишонамиз. Шунинг учун мен сенга, ўз бурчингни бажаргин, деб буюришга ҳаддим сиғади. 9 Аммо сен мени яхши кўрганинг учун илтимос қилишни афзал кўрдим. Исо Масиҳ туфайли қамоқда бўлган, ёши ўтиб қолган мен, Павлус, 10 маҳбуслигимда имон орқали менга ўғил бўлиб қолган Ўнисимус учун сендан илтимос қиляпман. 11-12 Ўнисимус бир вақтлар сенга фойдасиз эди. Энди эса у сенга ҳам, менга ҳам фойдалидир . Кўзимнинг оқу қорасидай бўлиб қолган Ўнисимусни сенинг олдингга қайтариб юбордим.
13 Мен Хушхабарни тарғиб қилганим учун қамоқда ётибман. Ўнисимуснинг ёнимда қолишини, сенинг ўрнингга менга хизмат қилишини хоҳлар эдим. 14 Аммо сенинг розилигингсиз ҳеч бир иш қилишни хоҳламадим, чунки сенинг илтифотингни мажбурий эмас, балки ихтиёрий бўлишини истадим. 15 Балки, сен Ўнисимусни абадий қайтариб олишинг учун у сендан вақтинчалик ажралгандир . 16 Энди у сенга фақатгина қул эмас, балки қулдан юқори, севикли биродарингдир. Мен уни жуда қадрлайман. Ишончим комилки, у сенга қул сифатида ҳам, Раббимиз Исо орқали биродаринг сифатида ҳам янада қадрлироқдир.
17 Агар сен мени Раббимиз хизматидаги сафдошинг деб билсанг, Ўнисимусни мени қабул қилгандай қабул қилгин. 18 Мабодо, у сенга зарар келтирган бўлса ёки сендан қарздор бўлса, буни менинг зиммамга юкла. 19 Мен, Павлус, қуйидагини ўз қўлим билан ёзяпман : мен қарзингни тўлайман. Сен ўз ҳаётинг учун мендан қарздор эканлигингни айтишимнинг эса ҳожати йўқ. 20 Ҳа, биродарим, Раббимиз Исо туфайли мендан бу илтифотингни аяма! Масиҳ ҳақи–ҳурмати жонимга оро киргин! 21 Сен менинг сўзларимга қулоқ солиб, айтганларимни қиласан, ҳа, бундан ҳам кўпроғини бажарасан, деб ишонганим учун буларни ёздим.
22 Бундан ташқари, менга бирор турар жой ҳам тайёрлаб қўйгин. Чунки Худо ибодатларингизни эшитиб, мени яна сизларнинг олдингизга қайтаришига ишонаман.
Сўнгги саломлар
23-24 Мен билан бирга Исо Масиҳ номи учун маҳбус бўлган Эпафрас, ҳамкорларим Марк , Аристархус, Димас, Луқо сенга салом йўллаяптилар.
25 Раббимиз Исо Масиҳнинг инояти сизларга ёр бўлсин .
