2–BOB
1 Yana xafagarchilik keltirmaslik uchun sizlarning oldingizga bormaslikka qaror qildim . 2 Axir, sizlarni xafa qilsam, menga xursandchilik keltiradiganlarni xafa qilgan boʻlaman–ku! Unday holda, kim meni xursand qiladi?! 3 Oldingi maktubni yozganimning sababi ham shudir, toki sizlarning oldingizga borganimda oramizda xafagarchilik boʻlmasin, axir, menga katta quvonch keltiradigan sizlar emasmi?! Ishonchim komilki, mening quvonchim sizlarning quvonchingizdir. 4 Sizlarni xafa qilish uchun emas, balki sizlarni qanchalik yaxshi koʻrishimni koʻrsatish uchun oʻsha maktubni yozgan edim. Uni chuqur qaygʻu, iztirob bilan, koʻz yosh toʻkib yozgan edim.
Gunoh qilgan odamni kechirish haqida
5 Meni xafa qilgan odam faqatgina meni emas, balki qaysidir darajada sizlarning hammangizni xafa qilgan boʻladi, ammo bu masalaga keragidan ortiq urgʻu bermaylik. 6 Axir, xafa qilgan odamga koʻpchilik tomonidan berilgan jazo yetarli. 7 Endi boʻlsa, uni kechirib, tasalli beringlar, toki u haddan ortiq qaygʻurib, tushkunlikka tushmasin. 8 Sizlardan oʻtinaman, unga boʻlgan mehr–muhabbatingizni koʻrsating.
9 Oldingi maktubimni yozishdan yana bir maqsadim shu edi: sizlar har jihatdan itoatkor ekanmisiz yoki yoʻqmi, shuni bilmoqchi edim. 10 Sizlar biror kishini kechirsangiz, men ham uni kechiraman. Birortasi kechirishim kerak boʻladigan ayb ish qilgan boʻlsa, sizlarning manfaatingizni koʻzlab, Masihning huzurida uni kechiraman. 11 Shaytonga aldanib qolmaylik, axir, uning fitnalaridan bexabar emasmiz–ku!
Pavlus Troas shahrida bezovta boʻladi
12 Masih haqidagi Xushxabarni eʼlon qilish uchun Troas shahriga borganimda, Egamiz menga yoʻl ochib bergan edi. 13 Ammo koʻnglim notinch edi, chunki birodarim Titusni u yerda topa olmadim. Shuning uchun u yerdagilar bilan xayrlashib, Makedoniyaga joʻnadim.
Masih orqali qozoniladigan gʻalaba
14 Xudoga shukur! Xudo bizga Masihning tantanali yurishida ishtirok etishni nasib qildi. Atirning hidi qanday taralsa, xuddi shu singari, har yerda va har doim Xudo biz orqali Oʻzi haqidagi xabarni tarqatmoqda. 15 Masih haqidagi Xushxabarni yoyar ekanmiz, biz najot topadiganlar orasida ham, halok boʻladiganlar orasida ham Xudoga xush keladigan tutatqi nazrining hidiga oʻxshaymiz. 16 Bu hid halok boʻladiganlar uchun oʻlim hididir, najot topadiganlar uchun esa hayotbaxsh xushboʻy hiddir. Bunday yuksak masʼuliyatga Xudo bizni loyiq topdi. 17 Mana, biz koʻpchilik kabi, Xudoning kalomini bozorga solmaymiz. Aksincha, Xudo tomonidan yuborilgan va Masih xizmatida boʻlgan kishilardek, Xudoning koʻzi oldida sof koʻngil bilan voizlik qilmoqdamiz.
2–БОБ
1 Яна хафагарчилик келтирмаслик учун сизларнинг олдингизга бормасликка қарор қилдим . 2 Ахир, сизларни хафа қилсам, менга хурсандчилик келтирадиганларни хафа қилган бўламан–ку! Ундай ҳолда, ким мени хурсанд қилади?! 3 Олдинги мактубни ёзганимнинг сабаби ҳам шудир, токи сизларнинг олдингизга борганимда орамизда хафагарчилик бўлмасин, ахир, менга катта қувонч келтирадиган сизлар эмасми?! Ишончим комилки, менинг қувончим сизларнинг қувончингиздир. 4 Сизларни хафа қилиш учун эмас, балки сизларни қанчалик яхши кўришимни кўрсатиш учун ўша мактубни ёзган эдим. Уни чуқур қайғу, изтироб билан, кўз ёш тўкиб ёзган эдим.
Гуноҳ қилган одамни кечириш ҳақида
5 Мени хафа қилган одам фақатгина мени эмас, балки қайсидир даражада сизларнинг ҳаммангизни хафа қилган бўлади, аммо бу масалага керагидан ортиқ урғу бермайлик. 6 Ахир, хафа қилган одамга кўпчилик томонидан берилган жазо етарли. 7 Энди бўлса, уни кечириб, тасалли беринглар, токи у ҳаддан ортиқ қайғуриб, тушкунликка тушмасин. 8 Сизлардан ўтинаман, унга бўлган меҳр–муҳаббатингизни кўрсатинг.
9 Олдинги мактубимни ёзишдан яна бир мақсадим шу эди: сизлар ҳар жиҳатдан итоаткор эканмисиз ёки йўқми, шуни билмоқчи эдим. 10 Сизлар бирор кишини кечирсангиз, мен ҳам уни кечираман. Бирортаси кечиришим керак бўладиган айб иш қилган бўлса, сизларнинг манфаатингизни кўзлаб, Масиҳнинг ҳузурида уни кечираман. 11 Шайтонга алданиб қолмайлик, ахир, унинг фитналаридан бехабар эмасмиз–ку!
Павлус Троас шаҳрида безовта бўлади
12 Масиҳ ҳақидаги Хушхабарни эълон қилиш учун Троас шаҳрига борганимда, Эгамиз менга йўл очиб берган эди. 13 Аммо кўнглим нотинч эди, чунки биродарим Титусни у ерда топа олмадим. Шунинг учун у ердагилар билан хайрлашиб, Македонияга жўнадим.
Масиҳ орқали қозониладиган ғалаба
14 Худога шукур! Худо бизга Масиҳнинг тантанали юришида иштирок этишни насиб қилди. Атирнинг ҳиди қандай таралса, худди шу сингари, ҳар ерда ва ҳар доим Худо биз орқали Ўзи ҳақидаги хабарни тарқатмоқда. 15 Масиҳ ҳақидаги Хушхабарни ёяр эканмиз, биз нажот топадиганлар орасида ҳам, ҳалок бўладиганлар орасида ҳам Худога хуш келадиган тутатқи назрининг ҳидига ўхшаймиз. 16 Бу ҳид ҳалок бўладиганлар учун ўлим ҳидидир, нажот топадиганлар учун эса ҳаётбахш хушбўй ҳиддир. Бундай юксак масъулиятга Худо бизни лойиқ топди. 17 Мана, биз кўпчилик каби, Худонинг каломини бозорга солмаймиз. Аксинча, Худо томонидан юборилган ва Масиҳ хизматида бўлган кишилардек, Худонинг кўзи олдида соф кўнгил билан воизлик қилмоқдамиз.
