1–BOB
Maʼbadni qaytadan qurish toʻgʻrisida Egamizning amri
1 Shoh Doro hukmronligining ikkinchi yili oltinchi oyining birinchi kuni edi. Egamiz Xaggey paygʻambar orqali Yahudo hokimi Shaltiyol oʻgʻli Zarubabelga va oliy ruhoniy Yohuzadax oʻgʻli Yoshuaga quyidagi soʻzlarini ayon qildi:
2-3 Sarvari Olam shunday demoqda: “Bu xalq: «Egamizning uyini qurish vaqti hali kelgani yoʻq», deb aytadi. 4 Ey Isroil xalqi, Mening uyim vayron boʻlib yotganda , sizlar hashamatli uylarda yashashingizning vaqtimi?!” 5 Mana endi Sarvari Olam demoqda: “Oʻz ahvolingizga qarab, yaxshilab oʻylab koʻringlar–chi! 6 Koʻp ekib, kam oʻrasiz. Ovqat yeysiz–u, toʻymaysiz. Ichasiz, ammo chanqogʻingiz qonmaydi, ustingizga kiyasiz–u, isinolmaysiz. Kim pul ishlasa, uning puli yirtiq hamyonga tushadi.”
7 Sarvari Olamning kalomi shudir: “Oʻz ahvolingizga qarab, yaxshilab oʻylab koʻring, axir! 8 Togʻlarga chiqib, yogʻoch olib tushinglar–da, Mening uyimni quringlar. Men uni koʻrib zavqlanaman, u yerda ulugʻlanaman, — deydi Egamiz. 9 — Koʻp hosil olishni umid qilgan edingiz, mana kam oldingiz. Uyga olib kelganingizni sochib yubordim. Nima uchun?” Sarvari Olam shunday demoqda: “Mening uyim vayron boʻlib yotgan paytda, sizlar faqat oʻz uyingiz haqida oʻylaganingiz uchun shunday qildim. 10 Sizlarning dastingizdan osmondan shudring tushmadi, yer ham hosil bermadi. 11 Men dalalarga, qirli joylarga qurgʻoqchilik keltirib, don, uzum sharbati va zaytun moyini quritdim. Yerdan chiqqan barcha hosilni yoʻq qildim, odamlar va hayvonlarni qiyinchiliklarga duchor qildim. Insonlarning oʻz qoʻllari bilan qilgan mehnatlarini puchga chiqardim.”
Xalq Xudoning buyrugʻiga boʻysunadi
12 Shundan keyin Zarubabel, oliy ruhoniy Yoshua va surgundan qaytib kelgan barcha xalq oʻzlarining Egasi Xudoga itoat qilishdi. Oʻzlarining Egasi Xudo yuborgan Xaggey paygʻambarning soʻzlariga quloq solishdi, chunki ular Egamizdan qoʻrqardi.
13 Egamizning elchisi Xaggey Uning quyidagi soʻzlarini xalqqa yetkazdi:
— Egamizning kalomi shudir: “Men sizlar bilan birgaman.”
14 Yahudo hokimi Zarubabelni, oliy ruhoniy Yoshuani va surgundan qaytib kelgan butun xalqni Egamiz ruhlantirdi. Shunda ular hammalari kelib, oʻzlarining Xudosi, Sarvari Olamning uyini tiklashni boshladilar. 15 Shoh Doro hukmronligining ikkinchi yili oltinchi oyining yigirma toʻrtinchi kunida Maʼbadning qayta qurilishi boshlandi.
1–БОБ
Маъбадни қайтадан қуриш тўғрисида Эгамизнинг амри
1 Шоҳ Доро ҳукмронлигининг иккинчи йили олтинчи ойининг биринчи куни эди. Эгамиз Хаггей пайғамбар орқали Яҳудо ҳокими Шалтиёл ўғли Зарубабелга ва олий руҳоний Ёҳузадах ўғли Ёшуага қуйидаги сўзларини аён қилди:
2-3 Сарвари Олам шундай демоқда: “Бу халқ: «Эгамизнинг уйини қуриш вақти ҳали келгани йўқ», деб айтади. 4 Эй Исроил халқи, Менинг уйим вайрон бўлиб ётганда , сизлар ҳашаматли уйларда яшашингизнинг вақтими?!” 5 Мана энди Сарвари Олам демоқда: “Ўз аҳволингизга қараб, яхшилаб ўйлаб кўринглар–чи! 6 Кўп экиб, кам ўрасиз. Овқат ейсиз–у, тўймайсиз. Ичасиз, аммо чанқоғингиз қонмайди, устингизга киясиз–у, исинолмайсиз. Ким пул ишласа, унинг пули йиртиқ ҳамёнга тушади.”
7 Сарвари Оламнинг каломи шудир: “Ўз аҳволингизга қараб, яхшилаб ўйлаб кўринг, ахир! 8 Тоғларга чиқиб, ёғоч олиб тушинглар–да, Менинг уйимни қуринглар. Мен уни кўриб завқланаман, у ерда улуғланаман, — дейди Эгамиз. 9 — Кўп ҳосил олишни умид қилган эдингиз, мана кам олдингиз. Уйга олиб келганингизни сочиб юбордим. Нима учун?” Сарвари Олам шундай демоқда: “Менинг уйим вайрон бўлиб ётган пайтда, сизлар фақат ўз уйингиз ҳақида ўйлаганингиз учун шундай қилдим. 10 Сизларнинг дастингиздан осмондан шудринг тушмади, ер ҳам ҳосил бермади. 11 Мен далаларга, қирли жойларга қурғоқчилик келтириб, дон, узум шарбати ва зайтун мойини қуритдим. Ердан чиққан барча ҳосилни йўқ қилдим, одамлар ва ҳайвонларни қийинчиликларга дучор қилдим. Инсонларнинг ўз қўллари билан қилган меҳнатларини пучга чиқардим.”
Халқ Худонинг буйруғига бўйсунади
12 Шундан кейин Зарубабел, олий руҳоний Ёшуа ва сургундан қайтиб келган барча халқ ўзларининг Эгаси Худога итоат қилишди. Ўзларининг Эгаси Худо юборган Хаггей пайғамбарнинг сўзларига қулоқ солишди, чунки улар Эгамиздан қўрқарди.
13 Эгамизнинг элчиси Хаггей Унинг қуйидаги сўзларини халққа етказди:
— Эгамизнинг каломи шудир: “Мен сизлар билан биргаман.”
14 Яҳудо ҳокими Зарубабелни, олий руҳоний Ёшуани ва сургундан қайтиб келган бутун халқни Эгамиз руҳлантирди. Шунда улар ҳаммалари келиб, ўзларининг Худоси, Сарвари Оламнинг уйини тиклашни бошладилар. 15 Шоҳ Доро ҳукмронлигининг иккинчи йили олтинчи ойининг йигирма тўртинчи кунида Маъбаднинг қайта қурилиши бошланди.
