29–BOB
Misr haqida bashorat
1 Surgun boʻlgan paytimizning oʻninchi yili oʻninchi oyining oʻn ikkinchi kunida Egamiz menga Oʻz soʻzini ayon qildi: 2 “Ey inson, Misr firʼavniga yuzlan. Unga va butun Misr xalqiga qarshi bashorat qilib ayt: 3 «Egamiz Rabbiy shunday demoqda: ey Misr firʼavni, Men senga qarshiman. Sen Nil havzalarida choʻzilib yotgan bamisoli buyuk ajdarhodirsan. Sen: ‘Nil daryosi mening shaxsiy mulkim, uni oʻzim uchun yaratganman’, deb aytasan. 4 Ammo Men jagʻlaringga ilmoqlar solaman. Teringdagi tangachalaringga baliqlarni yopishtiraman. Seni tangachalaringga yopishgan baliqlar bilan birga quruqlikka tortib chiqaraman. 5 Men seni va havzalaringdagi hamma baliqlarni sahroga uloqtirib tashlayman. Sen ochiq maydonda yotasan. Seni olib, koʻmadigan odam boʻlmaydi. Men seni dasht hayvonlariyu osmon qushlariga yem qilib beraman. 6 Shunda butun Misr xalqi Egangiz Men ekanligimni bilib oladi.
Sen xalqim Isroil uchun qamish hassaday boʻlding. 7 Ular seni ushlaganda, sen yorilib, qoʻllarini kesib yubording. Senga suyanganlarida sinib, bellarini chiqarib yubording .
8 Shu bois Egamiz Rabbiy aytmoqda: Men sening boshingga qilich keltiraman, odamu hayvonlaringni qilich tigʻidan oʻtkazaman. 9 Butun Misr yurtini tashlandiq xarobazorga aylantiraman. Oʻshanda Egangiz Men ekanligimni bilib olasizlar.
Sen: ‘Nil meniki, men oʻzim uni yaratdim’, deb aytganing uchun, 10 Men senga va sening barcha havzalaringga qarshi chiqaman. Butun Misr yurtini tamomila xarob qilaman. Migdoldan tortib, to Savanaygacha va janubdagi Habashiston hududigacha hamma yerlarini tashlandiq qilaman. 11 Odam u yerga oyogʻini bosmaydi, hayvonlar ham u yerdan yurmaydi. Qirq yil mobaynida u yerda hech kim yashamaydi. 12 Men Misr yurtini dunyodagi eng xarob yurtga aylantiraman. U yerdagi shaharlar qirq yil mobaynida tashlandiq boʻlib yotadi, vayronalari boshqa shaharlardan battar boʻladi. Men Misrliklarni xalqlar orasiga tarqatib tashlayman, boshqa yurtlarga quvib yuboraman.»
13 Firʼavnga yana ayt: «Egamiz Rabbiy shunday demoqda: qirq yil oʻtgach, Men xalqlar orasiga tarqatib yuborgan Misrliklarni yigʻib olaman. 14 Ularni yana farovonlikka erishtirib, oʻz ona yurti Patroʻsga olib kelaman. Ularning shohligi ojiz bir shohlik boʻladi. 15 Ha, ular dunyoning eng ojiz shohligi boʻlib, hech qachon boshqa xalqlardan ustun boʻla olmaydi. Men ularni shu qadar zaif qilib qoʻyamanki, ular oʻz hukmini boshqa xalqlarga oʻtkaza olmay qoladi. 16 Xalqim Isroil endi hech qachon oʻz umidini Misrga bogʻlamaydi. Ular Misrdan yordam soʻrab, gunoh qilganlarini doimo eslarida tutadilar. Oʻshanda Misrliklar Egangiz Rabbiy Men ekanligimni bilib oladilar.»”
Shoh Navuxadnazar Misrni bosib oladi
17 Surgun boʻlgan paytimizning yigirma yettinchi yili birinchi oyining birinchi kunida Egamiz menga Oʻz soʻzini ayon qildi: 18 “Ey inson, Bobil shohi Navuxadnazar Tirga qarshi shiddatli urush olib bordi . Bobil lashkarining sochlari toʻkilib, yelkalari shilinib yalligʻlandi. Ammo qilgan mehnatlariga yarasha ular Tirdan hech qanday oʻlja ololmadilar. 19 Shu bois Misr yurtini Bobil shohi Navuxadnazarga beraman, — deb aytmoqda Egamiz Rabbiy. — U Misrni talon–taroj qilib, u yerdagi boyliklarni oʻzi bilan olib ketadi. Misr boyliklari Bobil lashkari uchun mehnat haqi boʻladi. 20 Ha, Men Misr yurtini Bobil shohiga mehnat haqi qilib berdim, chunki u va uning lashkari Mening xizmatimni qildilar, — deb aytmoqda Egamiz Rabbiy. 21 — Oʻsha kuni Men Isroil xalqining qudratini tiklayman . Bu soʻzlarimni xalqimga yetkazishing uchun Men senga kuch beraman. Oʻshanda Egangiz Men ekanligimni ular bilib oladilar.”
29–БОБ
Миср ҳақида башорат
1 Сургун бўлган пайтимизнинг ўнинчи йили ўнинчи ойининг ўн иккинчи кунида Эгамиз менга Ўз сўзини аён қилди: 2 “Эй инсон, Миср фиръавнига юзлан. Унга ва бутун Миср халқига қарши башорат қилиб айт: 3 «Эгамиз Раббий шундай демоқда: эй Миср фиръавни, Мен сенга қаршиман. Сен Нил ҳавзаларида чўзилиб ётган бамисоли буюк аждарҳодирсан. Сен: ‘Нил дарёси менинг шахсий мулким, уни ўзим учун яратганман’, деб айтасан. 4 Аммо Мен жағларингга илмоқлар соламан. Терингдаги тангачаларингга балиқларни ёпиштираман. Сени тангачаларингга ёпишган балиқлар билан бирга қуруқликка тортиб чиқараман. 5 Мен сени ва ҳавзаларингдаги ҳамма балиқларни саҳрога улоқтириб ташлайман. Сен очиқ майдонда ётасан. Сени олиб, кўмадиган одам бўлмайди. Мен сени дашт ҳайвонларию осмон қушларига ем қилиб бераман. 6 Шунда бутун Миср халқи Эгангиз Мен эканлигимни билиб олади.
Сен халқим Исроил учун қамиш ҳассадай бўлдинг. 7 Улар сени ушлаганда, сен ёрилиб, қўлларини кесиб юбординг. Сенга суянганларида синиб, белларини чиқариб юбординг .
8 Шу боис Эгамиз Раббий айтмоқда: Мен сенинг бошингга қилич келтираман, одаму ҳайвонларингни қилич тиғидан ўтказаман. 9 Бутун Миср юртини ташландиқ харобазорга айлантираман. Ўшанда Эгангиз Мен эканлигимни билиб оласизлар.
Сен: ‘Нил меники, мен ўзим уни яратдим’, деб айтганинг учун, 10 Мен сенга ва сенинг барча ҳавзаларингга қарши чиқаман. Бутун Миср юртини тамомила хароб қиламан. Мигдолдан тортиб, то Саванайгача ва жанубдаги Ҳабашистон ҳудудигача ҳамма ерларини ташландиқ қиламан. 11 Одам у ерга оёғини босмайди, ҳайвонлар ҳам у ердан юрмайди. Қирқ йил мобайнида у ерда ҳеч ким яшамайди. 12 Мен Миср юртини дунёдаги энг хароб юртга айлантираман. У ердаги шаҳарлар қирқ йил мобайнида ташландиқ бўлиб ётади, вайроналари бошқа шаҳарлардан баттар бўлади. Мен Мисрликларни халқлар орасига тарқатиб ташлайман, бошқа юртларга қувиб юбораман.»
13 Фиръавнга яна айт: «Эгамиз Раббий шундай демоқда: қирқ йил ўтгач, Мен халқлар орасига тарқатиб юборган Мисрликларни йиғиб оламан. 14 Уларни яна фаровонликка эриштириб, ўз она юрти Патрўсга олиб келаман. Уларнинг шоҳлиги ожиз бир шоҳлик бўлади. 15 Ҳа, улар дунёнинг энг ожиз шоҳлиги бўлиб, ҳеч қачон бошқа халқлардан устун бўла олмайди. Мен уларни шу қадар заиф қилиб қўяманки, улар ўз ҳукмини бошқа халқларга ўтказа олмай қолади. 16 Халқим Исроил энди ҳеч қачон ўз умидини Мисрга боғламайди. Улар Мисрдан ёрдам сўраб, гуноҳ қилганларини доимо эсларида тутадилар. Ўшанда Мисрликлар Эгангиз Раббий Мен эканлигимни билиб оладилар.»”
Шоҳ Навухадназар Мисрни босиб олади
17 Сургун бўлган пайтимизнинг йигирма еттинчи йили биринчи ойининг биринчи кунида Эгамиз менга Ўз сўзини аён қилди: 18 “Эй инсон, Бобил шоҳи Навухадназар Тирга қарши шиддатли уруш олиб борди . Бобил лашкарининг сочлари тўкилиб, елкалари шилиниб яллиғланди. Аммо қилган меҳнатларига яраша улар Тирдан ҳеч қандай ўлжа ололмадилар. 19 Шу боис Миср юртини Бобил шоҳи Навухадназарга бераман, — деб айтмоқда Эгамиз Раббий. — У Мисрни талон–тарож қилиб, у ердаги бойликларни ўзи билан олиб кетади. Миср бойликлари Бобил лашкари учун меҳнат ҳақи бўлади. 20 Ҳа, Мен Миср юртини Бобил шоҳига меҳнат ҳақи қилиб бердим, чунки у ва унинг лашкари Менинг хизматимни қилдилар, — деб айтмоқда Эгамиз Раббий. 21 — Ўша куни Мен Исроил халқининг қудратини тиклайман . Бу сўзларимни халқимга етказишинг учун Мен сенга куч бераман. Ўшанда Эгангиз Мен эканлигимни улар билиб оладилар.”
