2–BOB
Jamoatdagi yoshu qarilarga va qullarga nasihatlar
1 Titus, sen sogʻlom taʼlimot asosida nasihat qil. 2 Yoshi katta erkaklarga ayt: ular mayxoʻrlikka berilmagan, hurmatga sazovor, vazmin, imonda mustahkam, mehribon va sabr–toqatli boʻlsinlar.
3 Yoshi katta ayollarga ham tayinla, ular sharafli hayot kechirsinlar. Gʻiybat qilmasinlar, mayxoʻrlikka ruju qoʻymasinlar. Har qanday xayrli ishda ibrat koʻrsatib, 4 kelinlarga pand–nasihat qilsinlar, ularga oʻz erlari va farzandlarini sevishni, 5 vazmin, iffatli, roʻzgʻorga jonkuyar, mehribon, erlariga boʻysunadigan boʻlishni oʻrgatsinlar. Shunda hech kim Xudoning kalomini yomonlamaydi.
6 Yigitlarni ham bosiq boʻlishga undagin. 7 Har bir ishda yurish–turishing bilan oʻzing ularga oʻrnak boʻlgin. Taʼlim berganingda samimiy va jiddiy boʻl. 8 Toʻgʻri taʼlim bergin, shunda tanqidning oldini olgan boʻlasan va raqiblarimiz biz haqimizda yomon soʻz aytolmay, uyatga qoladilar.
9 Qullarga oʻrgat, ular doim oʻz xoʻjayinlariga itoat etib, ularni mamnun qilsinlar. Gap qaytarmasinlar, 10 oʻgʻrilik qilmasinlar, har qanday vaziyatda toʻgʻri yoʻl tutib, ishonchga sazovor boʻlsinlar. Shunda qullar xulq–atvori bilan najotkorimiz Xudo haqidagi taʼlimotning tengi yoʻq goʻzalligini namoyon etadilar.
11 Zero, Xudo butun insoniyatga najot yoʻlini ochib berib, Oʻz inoyatini koʻrsatdi. 12-13 Bu inoyat orqali Xudo bizga shuni oʻrgatadiki, biz xudosiz hayotdan va dunyoviy orzu–ehtiroslardan voz kechishimiz kerak. Axir, bizning ajoyib umidimiz bor: biz najotkorimiz Iso Masihning kelishiga va buyuk Xudoning ulugʻvorligini koʻrishga umid bogʻlaganmiz. Masihning kelishini kutar ekanmiz, bu oʻtkinchi hayotimizda nafsni tiyishimiz, toʻgʻri va taqvodor hayot kechirishimiz lozim. 14 Axir, Iso Masih bizni barcha illatlarimizdan xalos qilish uchun Oʻz jonini fido qildi. U bizni poklab, Oʻziga tegishli boʻlgan, yaxshilik qilishga bagʻishlangan aziz bir xalq qildi.
15 Aytganlarimning hammasini sen jamoatdagilarga oʻrgat. Xudo bergan hokimiyat bilan ularga nasihat qil, tanbeh ber. Seni birontasi kamsitishiga yoʻl qoʻyma.
2–БОБ
Жамоатдаги ёшу қариларга ва қулларга насиҳатлар
1 Титус, сен соғлом таълимот асосида насиҳат қил. 2 Ёши катта эркакларга айт: улар майхўрликка берилмаган, ҳурматга сазовор, вазмин, имонда мустаҳкам, меҳрибон ва сабр–тоқатли бўлсинлар.
3 Ёши катта аёлларга ҳам тайинла, улар шарафли ҳаёт кечирсинлар. Ғийбат қилмасинлар, майхўрликка ружу қўймасинлар. Ҳар қандай хайрли ишда ибрат кўрсатиб, 4 келинларга панд–насиҳат қилсинлар, уларга ўз эрлари ва фарзандларини севишни, 5 вазмин, иффатли, рўзғорга жонкуяр, меҳрибон, эрларига бўйсунадиган бўлишни ўргатсинлар. Шунда ҳеч ким Худонинг каломини ёмонламайди.
6 Йигитларни ҳам босиқ бўлишга ундагин. 7 Ҳар бир ишда юриш–туришинг билан ўзинг уларга ўрнак бўлгин. Таълим берганингда самимий ва жиддий бўл. 8 Тўғри таълим бергин, шунда танқиднинг олдини олган бўласан ва рақибларимиз биз ҳақимизда ёмон сўз айтолмай, уятга қоладилар.
9 Қулларга ўргат, улар доим ўз хўжайинларига итоат этиб, уларни мамнун қилсинлар. Гап қайтармасинлар, 10 ўғрилик қилмасинлар, ҳар қандай вазиятда тўғри йўл тутиб, ишончга сазовор бўлсинлар. Шунда қуллар хулқ–атвори билан нажоткоримиз Худо ҳақидаги таълимотнинг тенги йўқ гўзаллигини намоён этадилар.
11 Зеро, Худо бутун инсониятга нажот йўлини очиб бериб, Ўз иноятини кўрсатди. 12-13 Бу иноят орқали Худо бизга шуни ўргатадики, биз худосиз ҳаётдан ва дунёвий орзу–эҳтирослардан воз кечишимиз керак. Ахир, бизнинг ажойиб умидимиз бор: биз нажоткоримиз Исо Масиҳнинг келишига ва буюк Худонинг улуғворлигини кўришга умид боғлаганмиз. Масиҳнинг келишини кутар эканмиз, бу ўткинчи ҳаётимизда нафсни тийишимиз, тўғри ва тақводор ҳаёт кечиришимиз лозим. 14 Ахир, Исо Масиҳ бизни барча иллатларимиздан халос қилиш учун Ўз жонини фидо қилди. У бизни поклаб, Ўзига тегишли бўлган, яхшилик қилишга бағишланган азиз бир халқ қилди.
15 Айтганларимнинг ҳаммасини сен жамоатдагиларга ўргат. Худо берган ҳокимият билан уларга насиҳат қил, танбеҳ бер. Сени биронтаси камситишига йўл қўйма.
