3–BOB
Yahyo choʻmdiruvchining kelishi
1 Oʻsha kunlarda Yahyo choʻmdiruvchi Yahudiya choʻlida vaʼz qila boshladi. 2 U odamlarga: “Tavba qilinglar, chunki Osmon Shohligi yaqinlashdi!” deb aytardi. 3 Yahyo toʻgʻrisida Ishayo paygʻambar shunday degan edi:
“Choʻlda bir ovoz yangramoqda:
«Egamizga yoʻl hozirlang,
Unga toʻgʻri yoʻl oching!»”
4 Yahyo tuya junidan toʻqilgan kiyim kiyib, charm kamar taqib yurardi . Uning yeguligi chigirtka va yovvoyi asal edi. 5 Uning oldiga Quddus shahri va Yahudiya oʻlkasining qolgan hamma joylaridan hamda Iordan daryosi atroflaridan odamlar kelardi. 6 Ular gunohlarini eʼtirof etishar, Yahyo esa ularni Iordan suviga choʻmdirardi.
7 Farziy va sadduqiy mazhablaridan boʻlgan koʻp odamlar suvga choʻmdirilish uchun kelayotganlarini Yahyo koʻrib, dedi: “Hoy, ilonlar zoti! Boshingizga kelayotgan Xudo gʻazabidan qochib qutulasiz, deb sizlarga kim uqtirdi? 8 Tavbaga yarasha ish tutinglar! 9 Oʻzingizcha: «Biz Ibrohim naslidanmiz», deb aytishni xayolingizga ham keltirmanglar! Sizlarga shuni aytay: Xudo mana bu toshlardan Ibrohimga avlod tiklashga qodir. 10 Hozirdanoq daraxtlar ildizida bolta yotibdi. Yaxshi meva bermagan har bir daraxt kesilib, olovga tashlanadi. 11 Tavba qilganingizni koʻrsatish uchun men sizlarni suvga choʻmdiryapman. Lekin mendan ham qudratliroq boʻlgan bir Zot ortimdan kelmoqda. Men Uning choriqlarini koʻtarib yurishga ham arzimayman. U sizlarni Muqaddas Ruhga va olovga choʻmdiradi. 12 Uning panshaxasi qoʻlida tayyor turibdi. U Oʻz xirmonini shopiradi: bugʻdoyini omborga toʻplab, somonni esa soʻnmas oʻtda yondirib yuboradi.”
Iso suvga choʻmdiriladi
13 Shu orada Iso Jalila hududidan Iordan daryosi boʻyiga bordi. U Yahyo tomonidan suvga choʻmdirilmoqchi edi. 14 Lekin Yahyo Isoni toʻxtatmoqchi boʻlib dedi:
— Aslida Siz meni suvga choʻmdirishingiz kerak! Siz boʻlsangiz mening oldimga keldingiz!
15 Iso unga dedi:
— Keling, bu safar shunday boʻla qolsin. Axir, biz Xudoning irodasini toʻla bajarishimiz zarur.
Shundan keyin Yahyo rozi boʻldi. 16 Iso suvga choʻmdirildi. U suvdan chiqqan zahoti, osmon ochilib ketdi va Iso Oʻz ustiga Xudoning Ruhi kaptar shaklida tushib qoʻnganini koʻrdi. 17 Shu payt osmondan: “Bu Mening sevikli Oʻgʻlimdir , Undan nihoyatda mamnunman ”, degan ovoz keldi.
3–БОБ
Яҳё чўмдирувчининг келиши
1 Ўша кунларда Яҳё чўмдирувчи Яҳудия чўлида ваъз қила бошлади. 2 У одамларга: “Тавба қилинглар, чунки Осмон Шоҳлиги яқинлашди!” деб айтарди. 3 Яҳё тўғрисида Ишаё пайғамбар шундай деган эди:
“Чўлда бир овоз янграмоқда:
«Эгамизга йўл ҳозирланг,
Унга тўғри йўл очинг!»”
4 Яҳё туя жунидан тўқилган кийим кийиб, чарм камар тақиб юрарди . Унинг егулиги чигиртка ва ёввойи асал эди. 5 Унинг олдига Қуддус шаҳри ва Яҳудия ўлкасининг қолган ҳамма жойларидан ҳамда Иордан дарёси атрофларидан одамлар келарди. 6 Улар гуноҳларини эътироф этишар, Яҳё эса уларни Иордан сувига чўмдирарди.
7 Фарзий ва саддуқий мазҳабларидан бўлган кўп одамлар сувга чўмдирилиш учун келаётганларини Яҳё кўриб, деди: “Ҳой, илонлар зоти! Бошингизга келаётган Худо ғазабидан қочиб қутуласиз, деб сизларга ким уқтирди? 8 Тавбага яраша иш тутинглар! 9 Ўзингизча: «Биз Иброҳим наслиданмиз», деб айтишни хаёлингизга ҳам келтирманглар! Сизларга шуни айтай: Худо мана бу тошлардан Иброҳимга авлод тиклашга қодир. 10 Ҳозирданоқ дарахтлар илдизида болта ётибди. Яхши мева бермаган ҳар бир дарахт кесилиб, оловга ташланади. 11 Тавба қилганингизни кўрсатиш учун мен сизларни сувга чўмдиряпман. Лекин мендан ҳам қудратлироқ бўлган бир Зот ортимдан келмоқда. Мен Унинг чориқларини кўтариб юришга ҳам арзимайман. У сизларни Муқаддас Руҳга ва оловга чўмдиради. 12 Унинг паншахаси қўлида тайёр турибди. У Ўз хирмонини шопиради: буғдойини омборга тўплаб, сомонни эса сўнмас ўтда ёндириб юборади.”
Исо сувга чўмдирилади
13 Шу орада Исо Жалила ҳудудидан Иордан дарёси бўйига борди. У Яҳё томонидан сувга чўмдирилмоқчи эди. 14 Лекин Яҳё Исони тўхтатмоқчи бўлиб деди:
— Аслида Сиз мени сувга чўмдиришингиз керак! Сиз бўлсангиз менинг олдимга келдингиз!
15 Исо унга деди:
— Келинг, бу сафар шундай бўла қолсин. Ахир, биз Худонинг иродасини тўла бажаришимиз зарур.
Шундан кейин Яҳё рози бўлди. 16 Исо сувга чўмдирилди. У сувдан чиққан заҳоти, осмон очилиб кетди ва Исо Ўз устига Худонинг Руҳи каптар шаклида тушиб қўнганини кўрди. 17 Шу пайт осмондан: “Бу Менинг севикли Ўғлимдир , Ундан ниҳоятда мамнунман ”, деган овоз келди.
