2–BOB
Xudoning inoyati tufayli hayotga erishish
1 Sizlar bir vaqtlar gunohlaru ayblaringiz tufayli ruhan oʻlik edingizlar. 2 Sizlar bu dunyoning odatlari boʻyicha, yovuz ruhiy kuchlarning hokimi boʻlgan shaytonga boʻysunib, gunohga botib yashardingiz. Xudoga itoat qilmay yashayotganlarning yuraklarida amal qilayotgan shaytondir. 3 Biz ham bir vaqtlar xudbin istaklarimizni qondirib yashar edik. Tana ehtiroslariga va bemaʼni oʻy–xayollarga berilib yashaydigan, barcha odamzod kabi, tabiatan Xudoning qahr–gʻazabiga loyiq boʻlgan itoatsiz insonlar edik. 4 Ammo mehr–shafqatga boy Xudo Oʻzining bizga boʻlgan buyuk muhabbatini quyidagicha koʻrsatdi: 5 garchi biz gunohlarimiz tufayli ruhan oʻlik boʻlsak ham, Xudo bizni Masih bilan birga tiriltirdi. Biz Xudoning inoyati tufayli qutqarilganmiz. 6 Xudo bizni Masih bilan birga tiriltirdi va bizga samoda U bilan birga joy berdi. Bular Iso Masih tufayli amalga oshdi. 7 Xudoning inoyati behad moʻl ekanligi to abad namoyon boʻlishi uchun, U bizga Iso Masih orqali mehr–shafqat koʻrsatdi. 8 Axir, sizlar Xudodan inoyat topib, imon orqali najot topgansiz. Bu Xudoning inʼomidir, sizning yutugʻingiz emas. 9 Yana hech kim: “Men savob ishlarim tufayli qutulganman”, deb maqtanmasin. 10 Axir, biz Xudoning ijodimiz. Xudo bizni xayrli ishlar qilishimiz uchun Iso Masih orqali yaratdi, bu ishlarni biz uchun azaldanoq tayyorlab qoʻygan edi.
Iso Masih orqali xalqlar birlashadi
11 Esingizda boʻlsin, sunnat qilingan yahudiylar bir vaqtlar siz — gʻayriyahudiy boʻlganlarni “sunnatsiz” deb atardilar. Vaholanki, yahudiylarning sunnati faqatgina jismoniy sunnat edi. 12 Oʻsha paytda sizlar Masihni bilmas edingizlar, Isroil xalqiga tegishli emasdingiz. Xudoning Isroil xalqi bilan tuzgan ahdlariga va bergan vaʼdalariga begona boʻlib, bu dunyoda umidsiz va Xudosiz yashar edingiz. 13 Sizlar oldin Xudodan uzoq edingiz, endi esa Iso Masih orqali, Uning toʻkilgan qoni tufayli Xudoga yaqinlashdingiz.
14-15 Masihning Oʻzi bizning tinchlik manbaimizdir. U Oʻz tanasini fido qilib, yahudiylar va gʻayriyahudiylarni birlashtirdi, ularning orasidagi adovat devorini qulatdi. Iso Masih yahudiylarga berilgan qonunni va uning amrlariyu qoidalarini bekor qildi. Masih tufayli gʻayriyahudiylar bilan yahudiylar birlashib, yangi bir xalq boʻldilar, shunday qilib Masih tinchlik oʻrnatdi. 16 Xochdagi oʻlimi orqali Masih gʻayriyahudiylarni ham, yahudiylarni ham Xudo bilan yarashtirdi–da, ularning orasidagi adovatni yoʻq qildi. 17 Masih kelib, sizlarga — oldin Xudodan uzoq boʻlganlarga ham, Xudoga yaqin boʻlganlarga ham tinchlik Xushxabarini eʼlon qildi. 18 Masih tufayli endi hammamiz bir Ruh orqali Otamiz Xudoning huzuriga kira olamiz.
19 Demak, sizlar endi begona ham, kelgindi ham emassizlar, balki Xudoning aziz xalqi qatoridasiz, Uning xonadoni aʼzosi boʻldingizlar. 20 Sizlar xuddi bir binodaysizlar. Bu binoning asosi havoriylaru paygʻambarlardir . Binoning tamal toshi esa Iso Masihning Oʻzidir. 21 Bu imorat Rabbimiz Iso Masih orqali bir boʻlib, yuksalib boradi va Unga bagʻishlangan muqaddas maʼbad boʻladi. 22 Iso Masihga tegishli boʻlganingiz uchun sizlar ham bu imoratning bir qismisiz. Bu imoratni Xudoning Ruhi Oʻziga maskan qilib oladi.
2–БОБ
Худонинг инояти туфайли ҳаётга эришиш
1 Сизлар бир вақтлар гуноҳлару айбларингиз туфайли руҳан ўлик эдингизлар. 2 Сизлар бу дунёнинг одатлари бўйича, ёвуз руҳий кучларнинг ҳокими бўлган шайтонга бўйсуниб, гуноҳга ботиб яшардингиз. Худога итоат қилмай яшаётганларнинг юракларида амал қилаётган шайтондир. 3 Биз ҳам бир вақтлар худбин истакларимизни қондириб яшар эдик. Тана эҳтиросларига ва бемаъни ўй–хаёлларга берилиб яшайдиган, барча одамзод каби, табиатан Худонинг қаҳр–ғазабига лойиқ бўлган итоатсиз инсонлар эдик. 4 Аммо меҳр–шафқатга бой Худо Ўзининг бизга бўлган буюк муҳаббатини қуйидагича кўрсатди: 5 гарчи биз гуноҳларимиз туфайли руҳан ўлик бўлсак ҳам, Худо бизни Масиҳ билан бирга тирилтирди. Биз Худонинг инояти туфайли қутқарилганмиз. 6 Худо бизни Масиҳ билан бирга тирилтирди ва бизга самода У билан бирга жой берди. Булар Исо Масиҳ туфайли амалга ошди. 7 Худонинг инояти беҳад мўл эканлиги то абад намоён бўлиши учун, У бизга Исо Масиҳ орқали меҳр–шафқат кўрсатди. 8 Ахир, сизлар Худодан иноят топиб, имон орқали нажот топгансиз. Бу Худонинг инъомидир, сизнинг ютуғингиз эмас. 9 Яна ҳеч ким: “Мен савоб ишларим туфайли қутулганман”, деб мақтанмасин. 10 Ахир, биз Худонинг ижодимиз. Худо бизни хайрли ишлар қилишимиз учун Исо Масиҳ орқали яратди, бу ишларни биз учун азалданоқ тайёрлаб қўйган эди.
Исо Масиҳ орқали халқлар бирлашади
11 Эсингизда бўлсин, суннат қилинган яҳудийлар бир вақтлар сиз — ғайрияҳудий бўлганларни “суннатсиз” деб атардилар. Ваҳоланки, яҳудийларнинг суннати фақатгина жисмоний суннат эди. 12 Ўша пайтда сизлар Масиҳни билмас эдингизлар, Исроил халқига тегишли эмасдингиз. Худонинг Исроил халқи билан тузган аҳдларига ва берган ваъдаларига бегона бўлиб, бу дунёда умидсиз ва Худосиз яшар эдингиз. 13 Сизлар олдин Худодан узоқ эдингиз, энди эса Исо Масиҳ орқали, Унинг тўкилган қони туфайли Худога яқинлашдингиз.
14-15 Масиҳнинг Ўзи бизнинг тинчлик манбаимиздир. У Ўз танасини фидо қилиб, яҳудийлар ва ғайрияҳудийларни бирлаштирди, уларнинг орасидаги адоват деворини қулатди. Исо Масиҳ яҳудийларга берилган қонунни ва унинг амрларию қоидаларини бекор қилди. Масиҳ туфайли ғайрияҳудийлар билан яҳудийлар бирлашиб, янги бир халқ бўлдилар, шундай қилиб Масиҳ тинчлик ўрнатди. 16 Хочдаги ўлими орқали Масиҳ ғайрияҳудийларни ҳам, яҳудийларни ҳам Худо билан яраштирди–да, уларнинг орасидаги адоватни йўқ қилди. 17 Масиҳ келиб, сизларга — олдин Худодан узоқ бўлганларга ҳам, Худога яқин бўлганларга ҳам тинчлик Хушхабарини эълон қилди. 18 Масиҳ туфайли энди ҳаммамиз бир Руҳ орқали Отамиз Худонинг ҳузурига кира оламиз.
19 Демак, сизлар энди бегона ҳам, келгинди ҳам эмассизлар, балки Худонинг азиз халқи қаторидасиз, Унинг хонадони аъзоси бўлдингизлар. 20 Сизлар худди бир бинодайсизлар. Бу бинонинг асоси ҳаворийлару пайғамбарлардир . Бинонинг тамал тоши эса Исо Масиҳнинг Ўзидир. 21 Бу иморат Раббимиз Исо Масиҳ орқали бир бўлиб, юксалиб боради ва Унга бағишланган муқаддас маъбад бўлади. 22 Исо Масиҳга тегишли бўлганингиз учун сизлар ҳам бу иморатнинг бир қисмисиз. Бу иморатни Худонинг Руҳи Ўзига маскан қилиб олади.
