6–BOB
Quddus dushmanlar qurshovida
1 Egamiz shunday deydi:
“Ey Benyamin nasli,
Joningizni qutqaringlar!
Quddusdan qochib chiqinglar!
Taxuva shahrida burgʻu chalinglar!
Bayt–Xakerem shahrida olov yoqib, belgi koʻrsatinglar.
Ana, shimoldan bir falokat kelyapti,
Dahshatli bir halokat yaqinlashyapti.
2 Qiz Quddus goʻzal va latofatlidir,
Ammo Men uni yoʻq qilib tashlayman.
3 Shahar atrofiga joylashib olgan choʻponlarday,
Dushmanlar Quddusni qamal qiladi.
Har biri oʻz lashkari uchun joy tanlaydi.
4 Ular shunday deb aytishadi:
«Quddusga qarshi jangga tayyorlaninglar!
Boʻla qolinglar, kunduz kuni ularga hujum qilamiz!
Shoʻrimiz qursin! Kun ham botyapti,
Oqshom soyalari boʻy choʻzib qoldi.
5 Endi tunda hujum qilamiz,
Shahardagi qalʼalarni vayron etamiz!»”
6 Sarvari Olam dushman lashkariga shunday demoqda:
“Daraxtlarini kesinglar ,
Quddus devoriga qiyalatib tuproq uyinglar .
Bu shahar jazolanishi kerak,
Shahar zoʻravonlikka toʻlib–toshgan.
7 Buloqdan suv qaynab chiqqani singari,
Quddusdan qabihliklar qaynab chiqyapti.
Zoʻravonligu buzgʻunchilik sadolari eshitilyapti.
U yerda koʻrganim xastaligu yaralar.
8 Ey Quddus, esingni yigʻib olgin,
Yoʻqsa, Men sendan yuz oʻgiraman.
Seni tashlandiq bir joyga aylantiraman,
Yurtingni huvullatib qoʻyaman.
9 Dushmanlaringga aytaman,
Ular seni ship–shiydam qiladilar,
Bir shingil uzumi qolmagan tokka oʻxshatib qoʻyadilar.”
Sarvari Olamning kalomi shudir.
Isyonkor Isroil
10 Ey Egam! Kimga gapiray, kimni ogohlantiray?!
Kim mening gaplarimga quloq soladi?!
Qara, ularning quloqlari yopiq ,
Ular hech narsani eshitmaydi.
Sening soʻzingdan ular xafa boʻladi,
Uni eshitishni xush koʻrmaydi.
11 Ammo ichim Sening gʻazabingga toʻlgan edi,
Jahlimni tiyishdan charchadim.
Egamiz menga shunday dedi:
“Gʻazabimni koʻchadagi bolalarga sochgin,
Toʻdalashib turgan yigitlarga sochgin.
Gʻazabim erkagu ayollarga tushadi,
Munkillagan qariyalar ham undan qochib qutulmaydi.
12 Uylari, dalalari va xotinlari
Boshqa birovlarga beriladi.
Men bu yurt aholisiga qarshi qoʻl koʻtaraman,
— deb aytmoqda Egamiz. —
13 Ular kichkinasidan tortib, kattasigacha,
Nafsini tiyolmay harom yoʻl bilan pul topishadi.
Paygʻambardan tortib, ruhoniygacha —
Hammasi tovlamachilik qilishadi.
14 Xalqimning yaralarini yuzaki davolashadi.
Ahvol ogʻir bir paytda «hammasi yaxshi», deb aytishadi.
15 Jirkanch ishlari uchun uyaladilarmi?
Yoʻq, uyalmaydilar!
Qizarish degan narsani bilmaydilar,
Shuning uchun boshqalarday halok boʻladilar.
Ha, ularni jazolab, xonavayron qilaman.”
Egamizning kalomi shudir.
Isroil Xudoning yoʻlidan ozadi
16 Egamiz Oʻz xalqiga shunday deb aytmoqda:
“Chorrahalarda turib qarang,
Qadimgi yoʻllar haqida soʻrang,
Yaxshi yoʻl qayerda ekanligini bilib oling.
Oʻsha yoʻldan yuring,
Shunda koʻnglingiz taskin topadi.
Ammo sizlar: «Yoʻq, u yoʻldan yurmaymiz», dedingizlar.
17 Men sizlarga qoʻriqchilar qoʻydim,
«Qoʻriqchilar burgʻusining jangovar sadosiga quloq solinglar»,
Deb sizlarga tayinladim.
Sizlar esa: «Ularga quloq solmaymiz!» deb aytdingizlar.
18 Shuning uchun, ey xalqlar, eshiting!
Xalqim ne holga tushishini bilib oling.
19 Ey zamin, quloq sol!
Men bu xalqning boshiga kulfat keltiraman,
Yomon niyatlarining oqibati shudir.
Zotan, ular soʻzlarimga kirmadilar,
Qonunlarimni rad etdilar.
20 Shava yurtidan keltirilgan ziravorlarni nima qilaman?!
Olis yurtdan olib kelingan xushboʻy qamishni nimaga ishlataman?!
Xalqimning kuydiriladigan nazrlarini Men qabul qilmayman,
Qurbonliklaridan xushnud boʻlmayman.”
21 Shu sababdan Egamiz demoqda:
“Men bu xalqning oyogʻiga toʻgʻonoq solaman,
Ular qoqilib yiqiladilar.
Otalar farzandlari bilan birga,
Qoʻshnilar yor–birodarlari bilan birga halok boʻladilar.”
Shimoldan bosqinchilar keladi
22 Egamiz shunday demoqda:
“Ana, shimoldagi yurtdan olomon kelmoqda,
Dunyoning chetidan buyuk bir xalq qoʻzgʻalmoqda.
23 Kamonu nayzalar bilan qurollangandir ular,
Shafqat qilmaydigan zolimdir u odamlar.
Ular otlarini yeldiradi,
Toʻlqinlangan dengizday guvullab keladi.
Ey qiz Quddus, ular qarshingda saf tortadilar,
Jang qilishga shay boʻlib turadilar.”
24 Odamlar shunday dedi:
“Ular haqidagi bu xabarni eshitdik,
Madorimiz qolmadi.
Dard tutgan ayol kabi,
Azobu iztirob chekdik.
25 Dalalarga bormanglar,
Koʻchalarda yurmanglar!
Dushman qilichini tutgan.
Atrofni dahshat qamragan.”
26 Ey xalqim, qizalogʻim!
Qanorga oʻranib, kulga belangin .
Yolgʻiz farzand uchun aza tutgandek,
Achchiq–achchiq yigʻlagin.
Ana, halok etuvchi kelyapti,
U toʻsatdan bizga hujum qiladi.
27 Egamiz shunday dedi:
“Ey Yeremiyo, xalqimni tekshirgin,
Temirni sinaganday ularni sinagin,
Tutgan yoʻllarini bilib olgin.
28 Ularning hammasi oʻjar va beboshdir,
Birovlarga tuhmat qilib yuradilar.
Bagʻirlari mis va temir kabi qattiq,
Hammasi buzgʻunchilik qiladilar.
29 Ana, bosqonga toʻxtovsiz dam berilmoqda,
Oʻchoqdagi olov lovullab yonmoqda.
Ammo bunday olov ham ularni tozalay olmadi,
Ular fosiqligicha qoldi.
30 Ularni «sifatsiz kumush» deb ataydilar,
Axir, Men ularni rad etdim.”
6–БОБ
Қуддус душманлар қуршовида
1 Эгамиз шундай дейди:
“Эй Бенямин насли,
Жонингизни қутқаринглар!
Қуддусдан қочиб чиқинглар!
Тахува шаҳрида бурғу чалинглар!
Байт–Хакерем шаҳрида олов ёқиб, белги кўрсатинглар.
Ана, шимолдан бир фалокат келяпти,
Даҳшатли бир ҳалокат яқинлашяпти.
2 Қиз Қуддус гўзал ва латофатлидир,
Аммо Мен уни йўқ қилиб ташлайман.
3 Шаҳар атрофига жойлашиб олган чўпонлардай,
Душманлар Қуддусни қамал қилади.
Ҳар бири ўз лашкари учун жой танлайди.
4 Улар шундай деб айтишади:
«Қуддусга қарши жангга тайёрланинглар!
Бўла қолинглар, кундуз куни уларга ҳужум қиламиз!
Шўримиз қурсин! Кун ҳам ботяпти,
Оқшом соялари бўй чўзиб қолди.
5 Энди тунда ҳужум қиламиз,
Шаҳардаги қалъаларни вайрон этамиз!»”
6 Сарвари Олам душман лашкарига шундай демоқда:
“Дарахтларини кесинглар ,
Қуддус деворига қиялатиб тупроқ уйинглар .
Бу шаҳар жазоланиши керак,
Шаҳар зўравонликка тўлиб–тошган.
7 Булоқдан сув қайнаб чиққани сингари,
Қуддусдан қабиҳликлар қайнаб чиқяпти.
Зўравонлигу бузғунчилик садолари эшитиляпти.
У ерда кўрганим хасталигу яралар.
8 Эй Қуддус, эсингни йиғиб олгин,
Йўқса, Мен сендан юз ўгираман.
Сени ташландиқ бир жойга айлантираман,
Юртингни ҳувиллатиб қўяман.
9 Душманларингга айтаман,
Улар сени шип–шийдам қиладилар,
Бир шингил узуми қолмаган токка ўхшатиб қўядилар.”
Сарвари Оламнинг каломи шудир.
Исёнкор Исроил
10 Эй Эгам! Кимга гапирай, кимни огоҳлантирай?!
Ким менинг гапларимга қулоқ солади?!
Қара, уларнинг қулоқлари ёпиқ ,
Улар ҳеч нарсани эшитмайди.
Сенинг сўзингдан улар хафа бўлади,
Уни эшитишни хуш кўрмайди.
11 Аммо ичим Сенинг ғазабингга тўлган эди,
Жаҳлимни тийишдан чарчадим.
Эгамиз менга шундай деди:
“Ғазабимни кўчадаги болаларга сочгин,
Тўдалашиб турган йигитларга сочгин.
Ғазабим эркагу аёлларга тушади,
Мункиллаган қариялар ҳам ундан қочиб қутулмайди.
12 Уйлари, далалари ва хотинлари
Бошқа бировларга берилади.
Мен бу юрт аҳолисига қарши қўл кўтараман,
— деб айтмоқда Эгамиз. —
13 Улар кичкинасидан тортиб, каттасигача,
Нафсини тиёлмай ҳаром йўл билан пул топишади.
Пайғамбардан тортиб, руҳонийгача —
Ҳаммаси товламачилик қилишади.
14 Халқимнинг яраларини юзаки даволашади.
Аҳвол оғир бир пайтда «ҳаммаси яхши», деб айтишади.
15 Жирканч ишлари учун уяладиларми?
Йўқ, уялмайдилар!
Қизариш деган нарсани билмайдилар,
Шунинг учун бошқалардай ҳалок бўладилар.
Ҳа, уларни жазолаб, хонавайрон қиламан.”
Эгамизнинг каломи шудир.
Исроил Худонинг йўлидан озади
16 Эгамиз Ўз халқига шундай деб айтмоқда:
“Чорраҳаларда туриб қаранг,
Қадимги йўллар ҳақида сўранг,
Яхши йўл қаерда эканлигини билиб олинг.
Ўша йўлдан юринг,
Шунда кўнглингиз таскин топади.
Аммо сизлар: «Йўқ, у йўлдан юрмаймиз», дедингизлар.
17 Мен сизларга қўриқчилар қўйдим,
«Қўриқчилар бурғусининг жанговар садосига қулоқ солинглар»,
Деб сизларга тайинладим.
Сизлар эса: «Уларга қулоқ солмаймиз!» деб айтдингизлар.
18 Шунинг учун, эй халқлар, эшитинг!
Халқим не ҳолга тушишини билиб олинг.
19 Эй замин, қулоқ сол!
Мен бу халқнинг бошига кулфат келтираман,
Ёмон ниятларининг оқибати шудир.
Зотан, улар сўзларимга кирмадилар,
Қонунларимни рад этдилар.
20 Шава юртидан келтирилган зираворларни нима қиламан?!
Олис юртдан олиб келинган хушбўй қамишни нимага ишлатаман?!
Халқимнинг куйдириладиган назрларини Мен қабул қилмайман,
Қурбонликларидан хушнуд бўлмайман.”
21 Шу сабабдан Эгамиз демоқда:
“Мен бу халқнинг оёғига тўғоноқ соламан,
Улар қоқилиб йиқиладилар.
Оталар фарзандлари билан бирга,
Қўшнилар ёр–биродарлари билан бирга ҳалок бўладилар.”
Шимолдан босқинчилар келади
22 Эгамиз шундай демоқда:
“Ана, шимолдаги юртдан оломон келмоқда,
Дунёнинг четидан буюк бир халқ қўзғалмоқда.
23 Камону найзалар билан қуроллангандир улар,
Шафқат қилмайдиган золимдир у одамлар.
Улар отларини елдиради,
Тўлқинланган денгиздай гувиллаб келади.
Эй қиз Қуддус, улар қаршингда саф тортадилар,
Жанг қилишга шай бўлиб турадилар.”
24 Одамлар шундай деди:
“Улар ҳақидаги бу хабарни эшитдик,
Мадоримиз қолмади.
Дард тутган аёл каби,
Азобу изтироб чекдик.
25 Далаларга борманглар,
Кўчаларда юрманглар!
Душман қиличини тутган.
Атрофни даҳшат қамраган.”
26 Эй халқим, қизалоғим!
Қанорга ўраниб, кулга белангин .
Ёлғиз фарзанд учун аза тутгандек,
Аччиқ–аччиқ йиғлагин.
Ана, ҳалок этувчи келяпти,
У тўсатдан бизга ҳужум қилади.
27 Эгамиз шундай деди:
“Эй Еремиё, халқимни текширгин,
Темирни синагандай уларни синагин,
Тутган йўлларини билиб олгин.
28 Уларнинг ҳаммаси ўжар ва бебошдир,
Бировларга туҳмат қилиб юрадилар.
Бағирлари мис ва темир каби қаттиқ,
Ҳаммаси бузғунчилик қиладилар.
29 Ана, босқонга тўхтовсиз дам берилмоқда,
Ўчоқдаги олов ловуллаб ёнмоқда.
Аммо бундай олов ҳам уларни тозалай олмади,
Улар фосиқлигича қолди.
30 Уларни «сифатсиз кумуш» деб атайдилар,
Ахир, Мен уларни рад этдим.”
