10–BOB
Kumush karnaylar
1 Egamiz Musoga aytdi: 2 “Sen ikkita kumush karnay yasattir, karnaylar zarb urib yasalgan boʻlsin. Bu karnaylar jamoani yigʻish hamda yoʻlga chiqish vaqtini eʼlon qilish uchun kerak boʻladi. 3 Karnaylarning ikkalasi chalinganda, butun jamoa sening oldingga — Uchrashuv chodiri kiraverishi oldiga toʻplansin. 4 Karnayning bittasi chalinganda esa, Isroil qabilalarining yoʻlboshchilari sening oldingga yigʻilib kelishsin. 5 Karnay qisqa chalinganda, sharqdagi qarorgohda turgan qabilalar yoʻlga chiqishsin. 6 Ikkinchi marta qisqa chalinganda esa, janubdagi qarorgohda turgan qabilalar yoʻlga chiqishsin. Karnayning qisqa sadosi yoʻlga chiqish kerakligini bildiradi . 7 Jamoani yigʻish lozim boʻlganda esa, karnaylar boshqacha sado chiqarib chalinsin. 8 Karnayni Horunning oʻgʻillari, ruhoniylar chalishlari lozim. Bu amr sizlar uchun va sizlarning avlodlaringiz uchun doimiy qonun–qoidadir.
9 Yurtingizga bostirib kelgan dushmanga qarshi jangga otlanayotganingizda, xatardan darak berib karnaylarni chalinglar. Shunda Men, Egangiz Xudo, sizlarga yordam berib, sizlarni dushmanlaringiz qoʻlidan xalos qilaman. 10 Shuningdek, xursandchilik kunlaringizda — belgilangan bayramlaringizda va oy boshida qurbonliklar kuydirganingizda hamda tinchlik qurbonliklarini keltirganingizda karnaylarni chalinglar. Shunda Men, Egangiz Xudo, sizlarga yordam beraman. Zotan, Men Egangiz Xudoman.”
Isroil xalqi Sinaydan ketadi
11 Isroil xalqi Misrdan chiqqandan keyin, ikkinchi yilning ikkinchi oyi yigirmanchi kunida bulut Muqaddas ahd chodiri tepasidan koʻtarildi. 12 Shundan soʻng Isroil xalqi Sinay sahrosidan yoʻlga chiqdi . Nihoyat, bulut Poron choʻlida toʻxtadi. 13 Ular birinchi marta Egamizning Muso orqali bergan amriga koʻra, yoʻlga chiqqan edilar. 14 Birinchi boʻlib, Ominadav oʻgʻli Naxshoʻn boshchiligida Yahudo qarorgohida turgan qabilalar oʻz bayrogʻi ostida guruh–guruh boʻlib yoʻlga chiqishdi. 15 Issaxor qabilasiga Zuvor oʻgʻli Natanil boshchilik qilar edi. 16 Zabulun qabilasiga Xalon oʻgʻli Eliyob boshchilik qilar edi.
17 Shundan keyin Muqaddas chodir yigʻishtirib olindi. Gershon va Marori urugʻlari Chodirni koʻtarib, yoʻlga chiqishdi. 18 Keyin Shaduvor oʻgʻli Elizur boshchiligida Ruben qarorgohida turgan qabilalar oʻz bayrogʻi ostida guruh–guruh boʻlib yoʻlga chiqishdi. 19 Shimoʻn qabilasiga Zurishaday oʻgʻli Shalumiyol boshchilik qilar edi. 20 Gad qabilasiga Duvel oʻgʻli Eliasaf boshchilik qilar edi. 21 Keyin Chodirning muqaddas ashyolarini koʻtargan Qohot urugʻi yoʻlga chiqdi. Ular qarorgoh quriladigan joyga yetib borgunlaricha, Muqaddas chodir oʻrnatib boʻlinishi kerak edi. 22 Keyin Omihud oʻgʻli Elishama boshchiligida Efrayim qarorgohida turgan qabilalar oʻz bayrogʻi ostida guruh–guruh boʻlib yoʻlga chiqishdi. 23 Manashe qabilasiga Padozur oʻgʻli Gamaliyol boshchilik qilardi. 24 Benyamin qabilasiga Gidoʻnax oʻgʻli Avidon boshchilik qilardi.
25 Eng oxirida Omishaday oʻgʻli Oxazar boshchiligida Dan qarorgohidagi qabilalar oʻz bayrogʻi ostida guruh–guruh boʻlib yoʻlga chiqishdi. Ular Isroil qarorgohlarining qorovullar boʻlinmasini tashkil qilishgan edi. 26 Osher qabilasiga Oxron oʻgʻli Paxiyol boshchilik qilardi. 27 Naftali qabilasiga Enan oʻgʻli Oxir boshchilik qilardi. 28 Isroil xalqi doim shu tartibda guruh–guruh boʻlib yoʻlga chiqar edi.
29 Muso oʻzining qaynagʻasi, Midiyonlik Yatro oʻgʻli Xoʻvovga dedi:
— Egamiz, sizlarga beraman, deb vaʼda qilgan yurtga biz ketyapmiz, siz ham biz bilan yuring. Egamiz bizga koʻp yaxshiliklarni vaʼda qilgan, agar biz bilan borsangiz, biz ham sizga yaxshilik qilamiz.
30 — Bormayman, — dedi Xoʻvov, — men oʻz yurtimga — oʻzimning qarindoshlarim oldiga qaytib ketaman.
31 — Iltimos, bizni tashlab ketmang! — dedi unga Muso. — Sahroning qaysi joyiga chodir tikish kerakligini siz bilasiz. Siz bizning koʻzimiz boʻlasiz. 32 Agar biz bilan birga borsangiz , Egamiz bizga qilgan hamma yaxshiliklarni siz bilan baham koʻramiz.
33 Ular Egamizning muqaddas togʻini tark etganlaridan soʻng, uch kun yoʻl yurishdi. Levilar chodir tikadigan joyini topish uchun Egamizning Ahd sandigʻini doimo oldinda koʻtarib borishardi. 34 Ular kunduz kuni yoʻl yurganlarida, Egamizning buluti ularning ustida borar edi. 35 Sandiq yoʻlga chiqqanda, Muso shunday derdi:
“Qoʻzgʻal, ey Egam,
Sening gʻanimlaring tumtaraqay boʻlsin.
Seni koʻrolmaganlar oldingdan qochib ketsin.”
36 Ahd sandigʻi toʻxtaganda esa Muso shunday derdi:
“Qayt, ey Egam,
Ming–minglab Isroil xalqi orasiga!”
10–БОБ
Кумуш карнайлар
1 Эгамиз Мусога айтди: 2 “Сен иккита кумуш карнай ясаттир, карнайлар зарб уриб ясалган бўлсин. Бу карнайлар жамоани йиғиш ҳамда йўлга чиқиш вақтини эълон қилиш учун керак бўлади. 3 Карнайларнинг иккаласи чалинганда, бутун жамоа сенинг олдингга — Учрашув чодири киравериши олдига тўплансин. 4 Карнайнинг биттаси чалинганда эса, Исроил қабилаларининг йўлбошчилари сенинг олдингга йиғилиб келишсин. 5 Карнай қисқа чалинганда, шарқдаги қароргоҳда турган қабилалар йўлга чиқишсин. 6 Иккинчи марта қисқа чалинганда эса, жанубдаги қароргоҳда турган қабилалар йўлга чиқишсин. Карнайнинг қисқа садоси йўлга чиқиш кераклигини билдиради . 7 Жамоани йиғиш лозим бўлганда эса, карнайлар бошқача садо чиқариб чалинсин. 8 Карнайни Ҳоруннинг ўғиллари, руҳонийлар чалишлари лозим. Бу амр сизлар учун ва сизларнинг авлодларингиз учун доимий қонун–қоидадир.
9 Юртингизга бостириб келган душманга қарши жангга отланаётганингизда, хатардан дарак бериб карнайларни чалинглар. Шунда Мен, Эгангиз Худо, сизларга ёрдам бериб, сизларни душманларингиз қўлидан халос қиламан. 10 Шунингдек, хурсандчилик кунларингизда — белгиланган байрамларингизда ва ой бошида қурбонликлар куйдирганингизда ҳамда тинчлик қурбонликларини келтирганингизда карнайларни чалинглар. Шунда Мен, Эгангиз Худо, сизларга ёрдам бераман. Зотан, Мен Эгангиз Худоман.”
Исроил халқи Синайдан кетади
11 Исроил халқи Мисрдан чиққандан кейин, иккинчи йилнинг иккинчи ойи йигирманчи кунида булут Муқаддас аҳд чодири тепасидан кўтарилди. 12 Шундан сўнг Исроил халқи Синай саҳросидан йўлга чиқди . Ниҳоят, булут Порон чўлида тўхтади. 13 Улар биринчи марта Эгамизнинг Мусо орқали берган амрига кўра, йўлга чиққан эдилар. 14 Биринчи бўлиб, Оминадав ўғли Нахшўн бошчилигида Яҳудо қароргоҳида турган қабилалар ўз байроғи остида гуруҳ–гуруҳ бўлиб йўлга чиқишди. 15 Иссахор қабиласига Зувор ўғли Натанил бошчилик қилар эди. 16 Забулун қабиласига Халон ўғли Элиёб бошчилик қилар эди.
17 Шундан кейин Муқаддас чодир йиғиштириб олинди. Гершон ва Марори уруғлари Чодирни кўтариб, йўлга чиқишди. 18 Кейин Шадувор ўғли Элизур бошчилигида Рубен қароргоҳида турган қабилалар ўз байроғи остида гуруҳ–гуруҳ бўлиб йўлга чиқишди. 19 Шимўн қабиласига Зуришадай ўғли Шалумиёл бошчилик қилар эди. 20 Гад қабиласига Дувел ўғли Элиасаф бошчилик қилар эди. 21 Кейин Чодирнинг муқаддас ашёларини кўтарган Қоҳот уруғи йўлга чиқди. Улар қароргоҳ қуриладиган жойга етиб боргунларича, Муқаддас чодир ўрнатиб бўлиниши керак эди. 22 Кейин Омиҳуд ўғли Элишама бошчилигида Эфрайим қароргоҳида турган қабилалар ўз байроғи остида гуруҳ–гуруҳ бўлиб йўлга чиқишди. 23 Манаше қабиласига Падозур ўғли Гамалиёл бошчилик қиларди. 24 Бенямин қабиласига Гидўнах ўғли Авидон бошчилик қиларди.
25 Энг охирида Омишадай ўғли Охазар бошчилигида Дан қароргоҳидаги қабилалар ўз байроғи остида гуруҳ–гуруҳ бўлиб йўлга чиқишди. Улар Исроил қароргоҳларининг қоровуллар бўлинмасини ташкил қилишган эди. 26 Ошер қабиласига Охрон ўғли Пахиёл бошчилик қиларди. 27 Нафтали қабиласига Энан ўғли Охир бошчилик қиларди. 28 Исроил халқи доим шу тартибда гуруҳ–гуруҳ бўлиб йўлга чиқар эди.
29 Мусо ўзининг қайнағаси, Мидиёнлик Ятро ўғли Хўвовга деди:
— Эгамиз, сизларга бераман, деб ваъда қилган юртга биз кетяпмиз, сиз ҳам биз билан юринг. Эгамиз бизга кўп яхшиликларни ваъда қилган, агар биз билан борсангиз, биз ҳам сизга яхшилик қиламиз.
30 — Бормайман, — деди Хўвов, — мен ўз юртимга — ўзимнинг қариндошларим олдига қайтиб кетаман.
31 — Илтимос, бизни ташлаб кетманг! — деди унга Мусо. — Саҳронинг қайси жойига чодир тикиш кераклигини сиз биласиз. Сиз бизнинг кўзимиз бўласиз. 32 Агар биз билан бирга борсангиз , Эгамиз бизга қилган ҳамма яхшиликларни сиз билан баҳам кўрамиз.
33 Улар Эгамизнинг муқаддас тоғини тарк этганларидан сўнг, уч кун йўл юришди. Левилар чодир тикадиган жойини топиш учун Эгамизнинг Аҳд сандиғини доимо олдинда кўтариб боришарди. 34 Улар кундуз куни йўл юрганларида, Эгамизнинг булути уларнинг устида борар эди. 35 Сандиқ йўлга чиққанда, Мусо шундай дерди:
“Қўзғал, эй Эгам,
Сенинг ғанимларинг тумтарақай бўлсин.
Сени кўролмаганлар олдингдан қочиб кетсин.”
36 Аҳд сандиғи тўхтаганда эса Мусо шундай дерди:
“Қайт, эй Эгам,
Минг–минглаб Исроил халқи орасига!”
