15–BOB
Ahd sandigʻini olib kelishga tayyorgarlik
1 Dovud oʻzi uchun Dovud qalʼasida uylar barpo qildi. Xudoning Sandigʻi uchun ham joy tayyorlab, chodir qurdi. 2 Keyin u shunday amr berdi: “Xudoning Sandigʻini faqat levilar koʻtarib yursin. Zero, Egamiz Oʻz Sandigʻini koʻtarib yurish uchun levilarni tanlagandir. Ularni Oʻziga abadiy xizmat qilish uchun tanlab olgandir.”
3 Dovud oʻzi tayyorlagan joyga Egamizning Sandigʻini olib kelish uchun jamiki Isroil xalqini Quddusda toʻpladi. 4 Soʻngra quyidagi Horun naslini va levilarni yigʻdi:
5 Qohot naslidan — urugʻboshi Uriyol va u bilan birga uning 120 nafar qarindoshi,
6 Marori naslidan — urugʻboshi Osoyoh va u bilan birga 220 nafar qarindoshi,
7 Gershon naslidan — urugʻboshi Yoʻel va u bilan birga 130 nafar qarindoshi,
8 Elizofon naslidan — urugʻboshi Shamayo va u bilan birga 200 nafar qarindoshi,
9 Xevron naslidan — urugʻboshi Eliyol va u bilan birga 80 nafar qarindoshi,
10 Uziyol naslidan — urugʻboshi Ominadav va u bilan birga 112 nafar qarindoshi.
11 Dovud ikkala ruhoniyni — Zodoʻx bilan Abuatarni, levilardan Uriyol, Osoyoh, Yoʻel, Shamayo, Eliyol va Ominadavni chaqirib, 12 ularga dedi: “Sizlar Levi qabilasining urugʻboshilarisiz. Shunday ekan, Isroil xalqining Xudosi — Egamizning Sandigʻini men tayyorlagan joyga olib kela olishingiz uchun oʻzlaringizni va levi birodarlaringizni poklanglar . 13 Oldingi safar Sandiqni levilar olib kelmagani uchun Egamiz Xudo bizdan qattiq gʻazablangan edi . Ha, biz Undan Sandiqni qanday olib kelishimiz kerakligini soʻramagan edik.”
14 Ruhoniylar va levilar Isroil xalqining Xudosi — Egamizning Sandigʻini olib kelish uchun oʻzlarini pokladilar. 15 Ular Egamizning Muso orqali bergan amriga muvofiq , Xudoning Sandigʻini xodalar bilan yelkalariga ortib, koʻtarib ketdilar.
16 Bulardan tashqari, Dovud Levi qabilasining urugʻboshilariga, qarindoshlaringiz orasidan sozandalarni tayinlang, deb buyurgan edi. Ular arfa, lira va zillarni chalib, bu musiqa asboblarining joʻrligida shodiyona qoʻshiqlar aytishlari kerak edi. 17 Levilar Marori urugʻidan quyidagi sozandalarni tayinlagan edilar: Yoʻel oʻgʻli Xaman, Barxiyo oʻgʻli Osif va Qushayo oʻgʻli Etxan. 18 Ularning yordamchilari qilib quyidagilar tayinlangan edi: Zakariyo, Yaziyol , Shamiromoʻt, Yoxiyol, Unno, Eliyob, Binayo, Masiyo, Mattitiyo, Elifaleh, Mixniyo hamda darvozabonlar Obidadom va Yaviyol. 19 Sozandalardan Xaman, Osif va Etxan bronza zillar chalishlari kerak edi. 20 Zakariyo, Aziyol, Shamiromoʻt, Yoxiyol, Unno, Eliyob, Masiyo va Binayo arfalarni chalishlari kerak edi . 21 Mattitiyo, Elifaleh, Mixniyo, Obidadom, Yaviyol va Ozaziyo esa sakkiz torli liralarni chalib, kuy ijrosida yetakchilik qilishlari kerak edi.
22 Levilarning boshligʻi Xonaniyo mohir sozanda boʻlgani uchun uni qoʻshiqchilar rahbari qilib tayinlagan edilar. 23-24 Ahd sandigʻini qoʻriqlash uchun Barxiyo, Elqana, Obidadom va Yoxiyo tayinlangan edilar. Ruhoniylar Shabaniyo, Yoshafat, Natanil, Emosay, Zakariyo, Binayo va Eliazar Xudoning Sandigʻi oldida karnaylar chalib borishlari kerak edi.
Ahd sandigʻi Quddusga keltiriladi
25 Dovud, Isroil oqsoqollari va mingboshilar Egamizning Ahd sandigʻini Obidadomning uyidan olib kelish uchun katta tantana bilan ketdilar. 26 Ahd sandigʻini koʻtarib kelayotgan levilarga Xudoning Oʻzi yordam berdi. Shu sababdan ular yettita buqa va yettita qoʻyni qurbonlik qildilar. 27 Sandiqni koʻtarib kelayotgan barcha levilar, qoʻshiqchilar va qoʻshiqchilar rahbari Xonaniyo singari, Dovud ham mayin zigʻirdan toʻqilgan rido kiyib olgan edi. Dovud ridodan tashqari ruhoniylarning muqaddas libosini ham kiygan edi. 28 Shunday qilib, butun Isroil xalqi sevinchli xitoblar bilan, arfa va lira kuylari hamda burgʻu, karnay, zillar sadolari ostida Egamizning Ahd sandigʻini olib keldi.
29 Ular Egamizning Sandigʻini Dovud qalʼasiga olib kirishayotganda, Shoulning qizi Mixal derazadan qarab turgan edi. U sakrab oʻynayotgan shoh Dovudni koʻrdi–yu, oʻz koʻnglida uni past koʻrdi.
15–БОБ
Аҳд сандиғини олиб келишга тайёргарлик
1 Довуд ўзи учун Довуд қалъасида уйлар барпо қилди. Худонинг Сандиғи учун ҳам жой тайёрлаб, чодир қурди. 2 Кейин у шундай амр берди: “Худонинг Сандиғини фақат левилар кўтариб юрсин. Зеро, Эгамиз Ўз Сандиғини кўтариб юриш учун левиларни танлагандир. Уларни Ўзига абадий хизмат қилиш учун танлаб олгандир.”
3 Довуд ўзи тайёрлаган жойга Эгамизнинг Сандиғини олиб келиш учун жамики Исроил халқини Қуддусда тўплади. 4 Сўнгра қуйидаги Ҳорун наслини ва левиларни йиғди:
5 Қоҳот наслидан — уруғбоши Уриёл ва у билан бирга унинг 120 нафар қариндоши,
6 Марори наслидан — уруғбоши Осоёҳ ва у билан бирга 220 нафар қариндоши,
7 Гершон наслидан — уруғбоши Йўэл ва у билан бирга 130 нафар қариндоши,
8 Элизофон наслидан — уруғбоши Шамаё ва у билан бирга 200 нафар қариндоши,
9 Хеврон наслидан — уруғбоши Элиёл ва у билан бирга 80 нафар қариндоши,
10 Узиёл наслидан — уруғбоши Оминадав ва у билан бирга 112 нафар қариндоши.
11 Довуд иккала руҳонийни — Зодўх билан Абуатарни, левилардан Уриёл, Осоёҳ, Йўэл, Шамаё, Элиёл ва Оминадавни чақириб, 12 уларга деди: “Сизлар Леви қабиласининг уруғбошиларисиз. Шундай экан, Исроил халқининг Худоси — Эгамизнинг Сандиғини мен тайёрлаган жойга олиб кела олишингиз учун ўзларингизни ва леви биродарларингизни покланглар . 13 Олдинги сафар Сандиқни левилар олиб келмагани учун Эгамиз Худо биздан қаттиқ ғазабланган эди . Ҳа, биз Ундан Сандиқни қандай олиб келишимиз кераклигини сўрамаган эдик.”
14 Руҳонийлар ва левилар Исроил халқининг Худоси — Эгамизнинг Сандиғини олиб келиш учун ўзларини покладилар. 15 Улар Эгамизнинг Мусо орқали берган амрига мувофиқ , Худонинг Сандиғини ходалар билан елкаларига ортиб, кўтариб кетдилар.
16 Булардан ташқари, Довуд Леви қабиласининг уруғбошиларига, қариндошларингиз орасидан созандаларни тайинланг, деб буюрган эди. Улар арфа, лира ва зилларни чалиб, бу мусиқа асбобларининг жўрлигида шодиёна қўшиқлар айтишлари керак эди. 17 Левилар Марори уруғидан қуйидаги созандаларни тайинлаган эдилар: Йўэл ўғли Хаман, Бархиё ўғли Осиф ва Қушаё ўғли Этхан. 18 Уларнинг ёрдамчилари қилиб қуйидагилар тайинланган эди: Закариё, Язиёл , Шамиромўт, Ёхиёл, Унно, Элиёб, Бинаё, Масиё, Маттитиё, Элифалеҳ, Михниё ҳамда дарвозабонлар Обидадом ва Явиёл. 19 Созандалардан Хаман, Осиф ва Этхан бронза зиллар чалишлари керак эди. 20 Закариё, Азиёл, Шамиромўт, Ёхиёл, Унно, Элиёб, Масиё ва Бинаё арфаларни чалишлари керак эди . 21 Маттитиё, Элифалеҳ, Михниё, Обидадом, Явиёл ва Озазиё эса саккиз торли лираларни чалиб, куй ижросида етакчилик қилишлари керак эди.
22 Левиларнинг бошлиғи Хонаниё моҳир созанда бўлгани учун уни қўшиқчилар раҳбари қилиб тайинлаган эдилар. 23-24 Аҳд сандиғини қўриқлаш учун Бархиё, Элқана, Обидадом ва Ёхиё тайинланган эдилар. Руҳонийлар Шабаниё, Ёшафат, Натанил, Эмосай, Закариё, Бинаё ва Элиазар Худонинг Сандиғи олдида карнайлар чалиб боришлари керак эди.
Аҳд сандиғи Қуддусга келтирилади
25 Довуд, Исроил оқсоқоллари ва мингбошилар Эгамизнинг Аҳд сандиғини Обидадомнинг уйидан олиб келиш учун катта тантана билан кетдилар. 26 Аҳд сандиғини кўтариб келаётган левиларга Худонинг Ўзи ёрдам берди. Шу сабабдан улар еттита буқа ва еттита қўйни қурбонлик қилдилар. 27 Сандиқни кўтариб келаётган барча левилар, қўшиқчилар ва қўшиқчилар раҳбари Хонаниё сингари, Довуд ҳам майин зиғирдан тўқилган ридо кийиб олган эди. Довуд ридодан ташқари руҳонийларнинг муқаддас либосини ҳам кийган эди. 28 Шундай қилиб, бутун Исроил халқи севинчли хитоблар билан, арфа ва лира куйлари ҳамда бурғу, карнай, зиллар садолари остида Эгамизнинг Аҳд сандиғини олиб келди.
29 Улар Эгамизнинг Сандиғини Довуд қалъасига олиб киришаётганда, Шоулнинг қизи Михал деразадан қараб турган эди. У сакраб ўйнаётган шоҳ Довудни кўрди–ю, ўз кўнглида уни паст кўрди.
