4–BOB
Dushmanlar Maʼbadning qayta qurilishiga toʻsqinlik qiladilar
1 Yahudo va Benyamin qabilasining gʻanimlari: “Surgundan qaytib kelganlar Isroil xalqining Xudosi — Egamiz Maʼbadini qayta qurayotgan ekanlar”, degan xabarni eshitib qolishdi. 2 Ular Zarubabelning va urugʻboshilarning oldiga kelib, shunday dedilar: “Biz ham sizlarga qoʻshilib Xudoyingizning uyini quraylik, chunki biz ham, sizlar singari, Xudoyingizga sajda qilamiz. Ossuriya shohi Isarxaddoʻn bizni bu yerga olib kelgandan buyon Xudoyingizga qurbonlik qilib kelyapmiz.” 3 Lekin Zarubabel, Yoshua va Isroilning boshqa urugʻboshilari ularga shunday deb javob berdilar: “Sizlar Xudoyimizga uyni biz bilan birga qurmaysizlar. Isroil xalqining Xudosi — Egamiz uchun uyni oʻzimiz quramiz. Fors shohi Kurush buni bizga buyurgan.”
4 Shundan keyin mahalliy xalqdan boʻlgan bu gʻanimlar Yahudo xalqini sarosimaga solib, qoʻrqitishga va qurilish ishlaridan qaytarishga harakat qilishdi. 5 Ular amaldorlarga pora berib, Fors shohi Kurushning butun hukmronligi davomida Maʼbadni qayta qurish rejalariga qarshilik qilib keldilar. Bu ahvol to Doro taxtni egallab, Fors shohi boʻlgunga qadar davom etgan edi.
Yahudiylar yana qarshiliklarga duch keladilar
6 Bir necha yildan keyin shoh Axashverash taxtga chiqdi. Axashverash hukmronligining boshlarida, gʻanimlar Yahudo yurti va Quddus shahrida yashayotgan yahudiylarga qarshi aybnoma yozdilar.
7 Hatto keyinroq — Fors shohi Artaxshas hukmronligi davrida ham Bishlam, Mitradot, Toʻval va ularning boshqa sheriklari shohga maktub yozdilar. Maktub oramiycha yozilib, tarjima qilindi .
8 Keyin hokim Raxum va kotib Shimshay ham shoh Artaxshasga Quddus aholisini qoralab maktub yozdi. Maktub shunday soʻzlar bilan boshlangan edi:
9 “Hokim Raxumdan, kotib Shimshaydan va ularning boshqa sheriklari — hakamlar, yoʻlboshchilar, amaldorlar, Eraxliklar, Bobilliklar, Shushanliklar, yaʼni Elam xalqidan, 10 shuningdek, ulugʻ va qudratli shoh Oʻsnapar Samariya shaharlariga va Furot daryosining gʻarbidagi viloyatga olib kelib oʻrnashtirgan turli xalqlardan maktub.”
11 Ular yuborgan maktubning mazmuni quyidagicha edi:
“Shoh Artaxshas janobi oliylari! Biz — Furot daryosining gʻarbidagi viloyatda istiqomat qiluvchi qullaringiz sizga salom yoʻllamoqdamiz.
12 Janobi oliylariga shu narsa maʼlum boʻlsinkim, sizning qoʻl ostingizdagi boshqa oʻlkalardan Quddusga kelib oʻrnashgan yahudiylar isyonkor, bexosiyat shaharni qaytadan tiklamoqdalar. Ular poydevor yotqizib, tez orada shahar devorlarini ham qurib tugatadilar. 13 Janobi oliylarini shundan xabardor qilmoqchimizki, agar shahar qaytadan qurilib, devorlari ham bitsa, yahudiylar oʻlpon, soliq va xiroj toʻlamay qoʻyadilar. Natijada shohlikning daromadi kamayib ketadi.
14 Saroyning tuziga biz ham sherik boʻlganimiz uchun shohimizning sharmanda boʻlishiga qarab oʻtirishimiz bizga toʻgʻri kelmaydi. Shuning uchun maktub joʻnatib, shohimizni xabardor qilmoqchi boʻldik. 15 Siz farmon bering: ota–bobolaringizning yilnomalarini koʻrib chiqishsin. Bu shahar gʻalayon makoni boʻlganini oʻsha yilnomalardan topasiz. Bu shahar ilgaridan hukmdorlar va viloyat hokimlariga qarshi bosh koʻtarib, koʻp muammolar tugʻdirgan, shu sababli vayron qilingan edi. 16 Biz janobi oliylariga shuni maʼlum qilib qoʻymoqchimizki, agar bu shahar qayta qurilib, devorlari bitsa, Furot daryosining gʻarbidagi bu viloyatga egalik qila olmay qolasiz.”
17 Shoh quyidagicha javob joʻnatdi:
“Samariyada va Furot daryosining gʻarbidagi viloyatda istiqomat qilayotgan hokim Raxumga, kotib Shimshayga va ularning boshqa sheriklariga salom yoʻllayman.
18 Sizlar menga yuborgan maktub huzurimda tarjima qilinib, oʻqib eshittirildi. 19 Shunday qilib, mening farmonimga binoan, tekshiruv olib borildi va bu shahar oldindan shohlarga qarshi isyon koʻtargani aniqlandi. Haqiqatan ham, bu shahar isyonu gʻalayon makoni boʻlgan ekan. 20 Quddusda qudratli shohlar boʻlgan ekan. Ular Furot daryosining gʻarbidagi barcha yurtlarni boshqargan ekanlar, oʻsha yurtlardan oʻlpon, soliq va xiroj yiqqan ekanlar. 21 Shuning uchun yahudiylarga buyuringlar, ishni toʻxtatsinlar. Men farmon bermagunimcha shahar qayta qurilmasin. 22 Hushyor boʻlinglar: mening manfaatimga zarar keltiradigan ish boshqa qilinmasin.”
23 Shoh Artaxshasning maktubi Raxum, kotib Shimshay va ularning sheriklari huzurida oʻqilgach, ular shosha–pisha Quddusga bordilar, shahar qurilishini toʻxtatishga yahudiylarni majburladilar.
Maʼbaddagi qurilish ishlari qayta boshlanadi
24 Xudoning Quddusdagi uyini qayta qurish ishlari toʻxtatilgan edi. Fors shohi Doro hukmronligining ikkinchi yiligacha u yerda hech qanday ish qilinmadi.
4–БОБ
Душманлар Маъбаднинг қайта қурилишига тўсқинлик қиладилар
1 Яҳудо ва Бенямин қабиласининг ғанимлари: “Сургундан қайтиб келганлар Исроил халқининг Худоси — Эгамиз Маъбадини қайта қураётган эканлар”, деган хабарни эшитиб қолишди. 2 Улар Зарубабелнинг ва уруғбошиларнинг олдига келиб, шундай дедилар: “Биз ҳам сизларга қўшилиб Худойингизнинг уйини қурайлик, чунки биз ҳам, сизлар сингари, Худойингизга сажда қиламиз. Оссурия шоҳи Исархаддўн бизни бу ерга олиб келгандан буён Худойингизга қурбонлик қилиб келяпмиз.” 3 Лекин Зарубабел, Ёшуа ва Исроилнинг бошқа уруғбошилари уларга шундай деб жавоб бердилар: “Сизлар Худойимизга уйни биз билан бирга қурмайсизлар. Исроил халқининг Худоси — Эгамиз учун уйни ўзимиз қурамиз. Форс шоҳи Куруш буни бизга буюрган.”
4 Шундан кейин маҳаллий халқдан бўлган бу ғанимлар Яҳудо халқини саросимага солиб, қўрқитишга ва қурилиш ишларидан қайтаришга ҳаракат қилишди. 5 Улар амалдорларга пора бериб, Форс шоҳи Курушнинг бутун ҳукмронлиги давомида Маъбадни қайта қуриш режаларига қаршилик қилиб келдилар. Бу аҳвол то Доро тахтни эгаллаб, Форс шоҳи бўлгунга қадар давом этган эди.
Яҳудийлар яна қаршиликларга дуч келадилар
6 Бир неча йилдан кейин шоҳ Ахашвераш тахтга чиқди. Ахашвераш ҳукмронлигининг бошларида, ғанимлар Яҳудо юрти ва Қуддус шаҳрида яшаётган яҳудийларга қарши айбнома ёздилар.
7 Ҳатто кейинроқ — Форс шоҳи Артахшас ҳукмронлиги даврида ҳам Бишлам, Митрадот, Тўвал ва уларнинг бошқа шериклари шоҳга мактуб ёздилар. Мактуб орамийча ёзилиб, таржима қилинди .
8 Кейин ҳоким Рахум ва котиб Шимшай ҳам шоҳ Артахшасга Қуддус аҳолисини қоралаб мактуб ёзди. Мактуб шундай сўзлар билан бошланган эди:
9 “Ҳоким Рахумдан, котиб Шимшайдан ва уларнинг бошқа шериклари — ҳакамлар, йўлбошчилар, амалдорлар, Эрахликлар, Бобилликлар, Шушанликлар, яъни Элам халқидан, 10 шунингдек, улуғ ва қудратли шоҳ Ўснапар Самария шаҳарларига ва Фурот дарёсининг ғарбидаги вилоятга олиб келиб ўрнаштирган турли халқлардан мактуб.”
11 Улар юборган мактубнинг мазмуни қуйидагича эди:
“Шоҳ Артахшас жаноби олийлари! Биз — Фурот дарёсининг ғарбидаги вилоятда истиқомат қилувчи қулларингиз сизга салом йўлламоқдамиз.
12 Жаноби олийларига шу нарса маълум бўлсинким, сизнинг қўл остингиздаги бошқа ўлкалардан Қуддусга келиб ўрнашган яҳудийлар исёнкор, бехосият шаҳарни қайтадан тикламоқдалар. Улар пойдевор ётқизиб, тез орада шаҳар деворларини ҳам қуриб тугатадилар. 13 Жаноби олийларини шундан хабардор қилмоқчимизки, агар шаҳар қайтадан қурилиб, деворлари ҳам битса, яҳудийлар ўлпон, солиқ ва хирож тўламай қўядилар. Натижада шоҳликнинг даромади камайиб кетади.
14 Саройнинг тузига биз ҳам шерик бўлганимиз учун шоҳимизнинг шарманда бўлишига қараб ўтиришимиз бизга тўғри келмайди. Шунинг учун мактуб жўнатиб, шоҳимизни хабардор қилмоқчи бўлдик. 15 Сиз фармон беринг: ота–боболарингизнинг йилномаларини кўриб чиқишсин. Бу шаҳар ғалаён макони бўлганини ўша йилномалардан топасиз. Бу шаҳар илгаридан ҳукмдорлар ва вилоят ҳокимларига қарши бош кўтариб, кўп муаммолар туғдирган, шу сабабли вайрон қилинган эди. 16 Биз жаноби олийларига шуни маълум қилиб қўймоқчимизки, агар бу шаҳар қайта қурилиб, деворлари битса, Фурот дарёсининг ғарбидаги бу вилоятга эгалик қила олмай қоласиз.”
17 Шоҳ қуйидагича жавоб жўнатди:
“Самарияда ва Фурот дарёсининг ғарбидаги вилоятда истиқомат қилаётган ҳоким Рахумга, котиб Шимшайга ва уларнинг бошқа шерикларига салом йўллайман.
18 Сизлар менга юборган мактуб ҳузуримда таржима қилиниб, ўқиб эшиттирилди. 19 Шундай қилиб, менинг фармонимга биноан, текширув олиб борилди ва бу шаҳар олдиндан шоҳларга қарши исён кўтаргани аниқланди. Ҳақиқатан ҳам, бу шаҳар исёну ғалаён макони бўлган экан. 20 Қуддусда қудратли шоҳлар бўлган экан. Улар Фурот дарёсининг ғарбидаги барча юртларни бошқарган эканлар, ўша юртлардан ўлпон, солиқ ва хирож йиққан эканлар. 21 Шунинг учун яҳудийларга буюринглар, ишни тўхтатсинлар. Мен фармон бермагунимча шаҳар қайта қурилмасин. 22 Ҳушёр бўлинглар: менинг манфаатимга зарар келтирадиган иш бошқа қилинмасин.”
23 Шоҳ Артахшаснинг мактуби Рахум, котиб Шимшай ва уларнинг шериклари ҳузурида ўқилгач, улар шоша–пиша Қуддусга бордилар, шаҳар қурилишини тўхтатишга яҳудийларни мажбурладилар.
Маъбаддаги қурилиш ишлари қайта бошланади
24 Худонинг Қуддусдаги уйини қайта қуриш ишлари тўхтатилган эди. Форс шоҳи Доро ҳукмронлигининг иккинчи йилигача у ерда ҳеч қандай иш қилинмади.
