31–BOB
Yoshua — Musoning davomchisi
1 Muso butun Isroil xalqiga yuqoridagi soʻzlarni aytib boʻlgandan keyin, 2 shunday dedi :
— Hozir 120 yoshdaman, men sizlarni janglarga boshlab bora olmayman. Egamiz menga: “Sen Iordanning narigi tomoniga oʻtmaysan”, deb aytgan. 3 Sizlar Egangiz Xudoning boshchiligida Iordanning narigi tomoniga oʻtasizlar. Egangiz u yerda yashaydigan xalqlarni yoʻq qiladi. Sizlar ularning yurtiga egalik qilasizlar. Egamizning vaʼdasiga koʻra, Yoshua sizlarning yoʻlboshchingiz boʻladi. 4 Egamiz Amor xalqining shohlari Oʻg bilan Sixoʻnni magʻlub qilib, ularning yurtini yoʻq qilganday, bu xalqlarni ham xuddi shunday yoʻq qiladi. 5 Egamiz bu xalqlarni sizlarning qoʻlingizga topshiradi. Ularni xuddi men buyurganimday qilishingiz shart. 6 Dadil va botir boʻlinglar, ulardan qoʻrqmanglar, vahimaga tushmanglar. Egangiz Xudoning Oʻzi sizlar bilan birga boradi, sizlarni tashlab ketmaydi, sizlarni tark etmaydi.
7 Muso Yoshuani chaqirib, butun Isroil xalqi oldida unga shunday dedi:
— Dadil va botir boʻl. Egamiz, bu yurtni ota–bobolaringizga, avlodlaringizga beraman, deb qasam ichib vaʼda qilgan. Bu xalq bilan oʻsha yurtga sen kirasan. Sen orqali ular oʻsha yurtni mulk qilib olishadi . 8 Egamizning Oʻzi sening oldingda boradi, Uning Oʻzi sen bilan birga boʻladi, seni tashlab ketmaydi, tark etmaydi. Qoʻrqma, vahimaga tushma.
Har yetti yilda qonun oʻqiladi
9 Muso mana shu qonunni yozib, uni Egamizning Ahd sandigʻini olib yuradigan Levi avlodidan boʻlgan ruhoniylarga va Isroilning hamma oqsoqollariga berdi. 10 Soʻngra Muso ularga shunday amr qildi:
— Har yettinchi yilning oxirida, qarzlaringizdan kechish yili Chayla bayramini nishonlaganingizda mana shu qonunni oʻqinglar. 11 Egangiz Xudoning tanlagan joyiga, Uning huzuriga yigʻiladigan jamiki Isroil xalqiga bu qonunni baland ovoz bilan oʻqib beringlar. 12 Buning uchun erkagu ayolni, bola–chaqani, shahringizdagi musofirlarni, boringki, butun xalqni yigʻinglar. Ular eshitib oʻrganishsin, Egangiz Xudodan qoʻrqishsin. Mana shu qonunning barcha soʻzlarini bitta qoldirmay bajarishsin. 13 Sizlar Iordanni kechib, mulk qilib oladigan yurtda yashar ekansiz, umringiz davomida shunday qilinglar. Toki qonunni bilmaydigan bolalaringiz qonunni eshitib, Egangiz Xudodan qoʻrqishni oʻrganishsin.
Musoga berilgan oxirgi yoʻl–yoʻriqlar
14 Egamiz Musoga dedi:
— Oʻliming yaqinlashib qoldi, Yoshuani chaqir, ikkovingiz Uchrashuv chodiriga kelinglar. Men unga koʻrsatmalarimni beraman.
Muso bilan Yoshua Uchrashuv chodiriga borib turishdi. 15 Keyin Egamiz chodirning kirish joyida, ustun shaklidagi bulut ichida koʻrindi. 16 Egamiz Musoga aytdi: “Sening vaqti–soating yaqinlashib qoldi. Bu xalq esa boradigan yurtda Menga bevafolik qiladi, oʻsha yurtning begona xudolariga sajda qiladi. Ular Meni tark etadilar, ular bilan qilgan ahdimni buzadilar. 17 Shunda ularga gʻazabimni sochaman, ularni tark etib, yuzimni oʻgiraman. Ular oson olinadigan oʻljaday boʻlib qolishadi, koʻp kulfat va ofatlar boshlariga kelgan kuni: «Xudoyimiz oramizda boʻlmagani uchun shu kulfatlar boshimizga tushmadimikin?!» deyishadi. 18 Ular boshqa xudolarga ergashib, qilgan qabihliklari uchun, Men albatta ulardan yuzimni oʻgiraman.
19 Endi quyidagi qoʻshiq soʻzlarini yozib ol. Uni butun Isroil xalqiga oʻrgat. Bu qoʻshiq doimo ularning ogʻzida boʻlsin, Isroil xalqiga qarshi Mening guvohim boʻlsin. 20 Men ularni, ota–bobolariga qasam ichib vaʼda berganimday, sut va asal oqib yotgan yurtga olib kiraman. Ular yeb toʻyib semiradilar, keyin boshqa xudolarga yuz buradilar, oʻsha xudolarga xizmat qiladilar. Mendan yuz oʻgirib, ahdimni buzadilar. 21 Boshlariga koʻp kulfat va ofatlar kelganda, bu qoʻshiq ularga qarshi guvoh boʻladi. Chunki ularning avlodlari bu qoʻshiqni ogʻzilaridan tushirmaydi. Men qasam ichib, vaʼda bergan yurtga ularni olib kirmasimdan oldin, hozirdanoq niyatlarini bilib turibman.”
22 Muso oʻsha kuni qoʻshiqni yozib, Isroil xalqiga oʻrgatdi .
23 Egamiz Nun oʻgʻli Yoshuaga shunday amr qildi:
— Dadil va botir boʻl. Sen Isroil xalqini Men ularga vaʼda qilgan yurtga olib kirasan. Men sen bilan birga boʻlaman.
24 Muso qonunlarning hamma soʻzlarini oxirigacha yozib boʻlgach, 25 Egamizning Ahd sandigʻini olib yuradigan levilarga shunday buyruq berdi:
26 — Bu qonunlarni Egangiz Xudoning Ahd sandigʻi yoniga qoʻyinglar, oʻsha yerda sizlarga qarshi guvoh boʻlib tursin. 27 Men sizlarning itoatsizligingizni, oʻjarligingizni yaxshi bilaman. Borligimda Egamizga boʻysunmaysizlar–u, men oʻlganimdan keyin battar boʻlasizlar! 28 Qani, barcha qabila oqsoqollaringizni va nazoratchilaringizni oldimga yigʻib kelinglar. Men ularga shu soʻzlarni aytayin. Yer va osmon ularga qarshi guvoh boʻlsin. 29 Oʻlimimdan keyin sizlar buzilib ketishingizni, men koʻrsatgan yoʻldan chiqib ketishingizni bilaman. Boshingizga kulfatlar tushadi, chunki Egamizning oldida qabihliklar qilasizlar. Qilgan ishlaringiz bilan Uni gʻazablantirasizlar.
Musoning qoʻshigʻi
30 Muso jamiki Isroil jamoasi oldida quyidagi qoʻshiqni boshdan oxirgacha aytdi:
31–БОБ
Ёшуа — Мусонинг давомчиси
1 Мусо бутун Исроил халқига юқоридаги сўзларни айтиб бўлгандан кейин, 2 шундай деди :
— Ҳозир 120 ёшдаман, мен сизларни жангларга бошлаб бора олмайман. Эгамиз менга: “Сен Иорданнинг нариги томонига ўтмайсан”, деб айтган. 3 Сизлар Эгангиз Худонинг бошчилигида Иорданнинг нариги томонига ўтасизлар. Эгангиз у ерда яшайдиган халқларни йўқ қилади. Сизлар уларнинг юртига эгалик қиласизлар. Эгамизнинг ваъдасига кўра, Ёшуа сизларнинг йўлбошчингиз бўлади. 4 Эгамиз Амор халқининг шоҳлари Ўг билан Сихўнни мағлуб қилиб, уларнинг юртини йўқ қилгандай, бу халқларни ҳам худди шундай йўқ қилади. 5 Эгамиз бу халқларни сизларнинг қўлингизга топширади. Уларни худди мен буюрганимдай қилишингиз шарт. 6 Дадил ва ботир бўлинглар, улардан қўрқманглар, ваҳимага тушманглар. Эгангиз Худонинг Ўзи сизлар билан бирга боради, сизларни ташлаб кетмайди, сизларни тарк этмайди.
7 Мусо Ёшуани чақириб, бутун Исроил халқи олдида унга шундай деди:
— Дадил ва ботир бўл. Эгамиз, бу юртни ота–боболарингизга, авлодларингизга бераман, деб қасам ичиб ваъда қилган. Бу халқ билан ўша юртга сен кирасан. Сен орқали улар ўша юртни мулк қилиб олишади . 8 Эгамизнинг Ўзи сенинг олдингда боради, Унинг Ўзи сен билан бирга бўлади, сени ташлаб кетмайди, тарк этмайди. Қўрқма, ваҳимага тушма.
Ҳар етти йилда қонун ўқилади
9 Мусо мана шу қонунни ёзиб, уни Эгамизнинг Аҳд сандиғини олиб юрадиган Леви авлодидан бўлган руҳонийларга ва Исроилнинг ҳамма оқсоқолларига берди. 10 Сўнгра Мусо уларга шундай амр қилди:
— Ҳар еттинчи йилнинг охирида, қарзларингиздан кечиш йили Чайла байрамини нишонлаганингизда мана шу қонунни ўқинглар. 11 Эгангиз Худонинг танлаган жойига, Унинг ҳузурига йиғиладиган жамики Исроил халқига бу қонунни баланд овоз билан ўқиб беринглар. 12 Бунинг учун эркагу аёлни, бола–чақани, шаҳрингиздаги мусофирларни, борингки, бутун халқни йиғинглар. Улар эшитиб ўрганишсин, Эгангиз Худодан қўрқишсин. Мана шу қонуннинг барча сўзларини битта қолдирмай бажаришсин. 13 Сизлар Иорданни кечиб, мулк қилиб оладиган юртда яшар экансиз, умрингиз давомида шундай қилинглар. Токи қонунни билмайдиган болаларингиз қонунни эшитиб, Эгангиз Худодан қўрқишни ўрганишсин.
Мусога берилган охирги йўл–йўриқлар
14 Эгамиз Мусога деди:
— Ўлиминг яқинлашиб қолди, Ёшуани чақир, икковингиз Учрашув чодирига келинглар. Мен унга кўрсатмаларимни бераман.
Мусо билан Ёшуа Учрашув чодирига бориб туришди. 15 Кейин Эгамиз чодирнинг кириш жойида, устун шаклидаги булут ичида кўринди. 16 Эгамиз Мусога айтди: “Сенинг вақти–соатинг яқинлашиб қолди. Бу халқ эса борадиган юртда Менга бевафолик қилади, ўша юртнинг бегона худоларига сажда қилади. Улар Мени тарк этадилар, улар билан қилган аҳдимни бузадилар. 17 Шунда уларга ғазабимни сочаман, уларни тарк этиб, юзимни ўгираман. Улар осон олинадиган ўлжадай бўлиб қолишади, кўп кулфат ва офатлар бошларига келган куни: «Худойимиз орамизда бўлмагани учун шу кулфатлар бошимизга тушмадимикин?!» дейишади. 18 Улар бошқа худоларга эргашиб, қилган қабиҳликлари учун, Мен албатта улардан юзимни ўгираман.
19 Энди қуйидаги қўшиқ сўзларини ёзиб ол. Уни бутун Исроил халқига ўргат. Бу қўшиқ доимо уларнинг оғзида бўлсин, Исроил халқига қарши Менинг гувоҳим бўлсин. 20 Мен уларни, ота–боболарига қасам ичиб ваъда берганимдай, сут ва асал оқиб ётган юртга олиб кираман. Улар еб тўйиб семирадилар, кейин бошқа худоларга юз бурадилар, ўша худоларга хизмат қиладилар. Мендан юз ўгириб, аҳдимни бузадилар. 21 Бошларига кўп кулфат ва офатлар келганда, бу қўшиқ уларга қарши гувоҳ бўлади. Чунки уларнинг авлодлари бу қўшиқни оғзиларидан туширмайди. Мен қасам ичиб, ваъда берган юртга уларни олиб кирмасимдан олдин, ҳозирданоқ ниятларини билиб турибман.”
22 Мусо ўша куни қўшиқни ёзиб, Исроил халқига ўргатди .
23 Эгамиз Нун ўғли Ёшуага шундай амр қилди:
— Дадил ва ботир бўл. Сен Исроил халқини Мен уларга ваъда қилган юртга олиб кирасан. Мен сен билан бирга бўламан.
24 Мусо қонунларнинг ҳамма сўзларини охиригача ёзиб бўлгач, 25 Эгамизнинг Аҳд сандиғини олиб юрадиган левиларга шундай буйруқ берди:
26 — Бу қонунларни Эгангиз Худонинг Аҳд сандиғи ёнига қўйинглар, ўша ерда сизларга қарши гувоҳ бўлиб турсин. 27 Мен сизларнинг итоатсизлигингизни, ўжарлигингизни яхши биламан. Борлигимда Эгамизга бўйсунмайсизлар–у, мен ўлганимдан кейин баттар бўласизлар! 28 Қани, барча қабила оқсоқолларингизни ва назоратчиларингизни олдимга йиғиб келинглар. Мен уларга шу сўзларни айтайин. Ер ва осмон уларга қарши гувоҳ бўлсин. 29 Ўлимимдан кейин сизлар бузилиб кетишингизни, мен кўрсатган йўлдан чиқиб кетишингизни биламан. Бошингизга кулфатлар тушади, чунки Эгамизнинг олдида қабиҳликлар қиласизлар. Қилган ишларингиз билан Уни ғазаблантирасизлар.
Мусонинг қўшиғи
30 Мусо жамики Исроил жамоаси олдида қуйидаги қўшиқни бошдан охиргача айтди:
