5–BOB
Yigit:
1 Ey jonim, kelinchagim, bogʻimga kelib,
Mirra va ziravorlarimni toʻplayman.
Asalari mumini hamda asalimni yeyman,
Sut va sharobimni ichaman.
Toʻyguningcha yegin, sevgilim,
Sevgidan ichib, qoniqqin.
Toʻrtinchi qoʻshiq
Qiz:
2 Uxladim, lekin yuragim uygʻoq edi.
Ana, sevgilim chaqirmoqda:
“Ochgin eshigingni, jonim, sevgilim,
Kabutarim, komilim.
Boshim hoʻldir shudringdan,
Sochlarim esa tun shabnamidan.”
3 Kiyimlarimni yechib qoʻyganman,
Qanday qilib yana kiyaman?!
Oyoqlarim yuvilgan,
Ularni kir qilaymi?!
4 Sevgilim qoʻlini eshik teshigidan kirgizganda,
Butun vujudim titrab ketdi.
5 Sevgilimni kirgizay, deya turdim.
Qoʻllarimdagi mirra,
Eshikning tutqichlariga oqib tushdi.
6 Sevgilimga eshikni ochdim,
Lekin u ketib qolibdi.
U ketganiga yurak–bagʻrim ezildi .
Qidirib, uni topa olmadim,
Chaqirdim, lekin u javob bermadi.
7 Shaharni aylanib yurgan qoʻriqchilar
Meni koʻrib qoldilar.
Ular meni urib yaraladilar.
Oʻsha shahar qoʻriqchilari
Ustimdagi roʻmolimni olib qoʻydilar.
8 Ey Quddus qizlari, vaʼda beringlar,
Sevgilimni topsangiz, aytib qoʻyinglar,
Uning ishqi dardida yonmoqdaman.
Quddus qizlari:
9 Ey ayollar goʻzali,
Sevgilingning boshqalardan nimasi ortiq?!
Uning boshqalardan nimasi ortiqki,
Sen bizga, vaʼda beringlar, deb aytasan?!
Qiz:
10 Sevgilim koʻhlik, chiroylidir,
Oʻn mingtaning ichida ajralib turar.
11 Boshi eng aʼlo tilladay goʻzal,
Jingalak sochlari qargʻaday qop–qoradir.
12 Koʻzlari esa buloqlar boʻyidagi kabutarlarday,
Chashmalar boʻyidagi, sutga choʻmdirilgan kaptarlardaydir.
13 Uning yonoqlari muattar hidli
Ziravor bogʻlari kabi juda xushboʻydir.
Lablari esa mirra oqib turgan
Nilufarlar kabi shirindir.
14 Qoʻllari tilladan yasalib,
Topaz toshlar bilan bezatilganga oʻxshaydi.
Tanasi esa zangori yoqutlar oʻrnatilgan
Tep–tekis fil suyagiday chiroylidir.
15 Oyoqlari tilla taglikka oʻrnatilgan
Marmar ustunlari kabi kuchlidir.
Uning qiyofasi ulugʻvor Lubnonday,
Qudratli, aʼlo sadr daraxtlaridaydir.
16 Uning ovozi juda shirin,
Oʻzi esa har jihatdan maftunkor.
Ey Quddus qizlari, mana shunday yigit
Mening sevgilim, doʻstimdir.
5–БОБ
Йигит:
1 Эй жоним, келинчагим, боғимга келиб,
Мирра ва зираворларимни тўплайман.
Асалари мумини ҳамда асалимни ейман,
Сут ва шаробимни ичаман.
Тўйгунингча егин, севгилим,
Севгидан ичиб, қониққин.
Тўртинчи қўшиқ
Қиз:
2 Ухладим, лекин юрагим уйғоқ эди.
Ана, севгилим чақирмоқда:
“Очгин эшигингни, жоним, севгилим,
Кабутарим, комилим.
Бошим ҳўлдир шудрингдан,
Сочларим эса тун шабнамидан.”
3 Кийимларимни ечиб қўйганман,
Қандай қилиб яна кияман?!
Оёқларим ювилган,
Уларни кир қилайми?!
4 Севгилим қўлини эшик тешигидан киргизганда,
Бутун вужудим титраб кетди.
5 Севгилимни киргизай, дея турдим.
Қўлларимдаги мирра,
Эшикнинг тутқичларига оқиб тушди.
6 Севгилимга эшикни очдим,
Лекин у кетиб қолибди.
У кетганига юрак–бағрим эзилди .
Қидириб, уни топа олмадим,
Чақирдим, лекин у жавоб бермади.
7 Шаҳарни айланиб юрган қўриқчилар
Мени кўриб қолдилар.
Улар мени уриб яраладилар.
Ўша шаҳар қўриқчилари
Устимдаги рўмолимни олиб қўйдилар.
8 Эй Қуддус қизлари, ваъда беринглар,
Севгилимни топсангиз, айтиб қўйинглар,
Унинг ишқи дардида ёнмоқдаман.
Қуддус қизлари:
9 Эй аёллар гўзали,
Севгилингнинг бошқалардан нимаси ортиқ?!
Унинг бошқалардан нимаси ортиқки,
Сен бизга, ваъда беринглар, деб айтасан?!
Қиз:
10 Севгилим кўҳлик, чиройлидир,
Ўн мингтанинг ичида ажралиб турар.
11 Боши энг аъло тилладай гўзал,
Жингалак сочлари қарғадай қоп–қорадир.
12 Кўзлари эса булоқлар бўйидаги кабутарлардай,
Чашмалар бўйидаги, сутга чўмдирилган каптарлардайдир.
13 Унинг ёноқлари муаттар ҳидли
Зиравор боғлари каби жуда хушбўйдир.
Лаблари эса мирра оқиб турган
Нилуфарлар каби шириндир.
14 Қўллари тилладан ясалиб,
Топаз тошлар билан безатилганга ўхшайди.
Танаси эса зангори ёқутлар ўрнатилган
Теп–текис фил суягидай чиройлидир.
15 Оёқлари тилла тагликка ўрнатилган
Мармар устунлари каби кучлидир.
Унинг қиёфаси улуғвор Лубнондай,
Қудратли, аъло садр дарахтларидайдир.
16 Унинг овози жуда ширин,
Ўзи эса ҳар жиҳатдан мафтункор.
Эй Қуддус қизлари, мана шундай йигит
Менинг севгилим, дўстимдир.
