5–BOB
Quddus aholisining gunohlari
1 Egamiz shunday deydi:
“Quddusning har bir koʻchasiga kirib chiqinglar,
Atrofingizga qarab, bilib olinglar,
Shahar maydonlarida qidirib koʻringlar,
Biron adolatli, rostgoʻy odam bormikan.
Agar shunday odamni topib kelsangiz,
Men Quddus aholisining gunohidan oʻtaman.
2 Ular «Egamiz shohid!» deya qasam ichadilar,
Ammo ichgan qasamlari yolgʻon.”
3 Ey Egam, Sen haqiqatni izlaysan.
Sen bu xalqni urgan eding,
Ammo ular ogʻriq sezmadilar.
Ularni deyarli yoʻq qilib yuborganingda ham,
Gapingga kirmadilar.
Betlarini toshdan ham qattiq qildilar,
Tavba qilishni xohlamadilar.
4 Shunda men ichimda dedim:
“Eha, bular kambagʻal–ku!
Shuning uchun ularning farosati yoʻq,
Ular Egamizning yoʻlini bilmaydi,
Xudosining qonunini tanimaydi.
5 Qani, boylarning oldiga boray–chi,
Ular bilan gaplashib koʻray–chi,
Egamizning yoʻlini ular albatta biladi,
Ular Xudosining qonunini tanishadi.”
Ammo ularning hammasi boʻyinturugʻini sindirgan ekan,
Egamizga itoat etishdan bosh tortgan ekan.
6 Shuning uchun oʻrmondan chiqqan sher ularni oʻldiradi,
Choʻldan kelgan boʻri ularni gʻajib tashlaydi.
Qoplon ularning shaharlari oldida pisib turadi,
Shahardan chiqqan har bir odamni tilka–pora qiladi.
Axir, ular koʻp gunoh qildilar,
Xudoga koʻp xiyonat etdilar.
7 Egamiz shunday deydi:
“Ey Quddus, Seni qanday qilib kechiraman?!
Farzandlaring Meni tark etdilar–ku!
Ular Xudo boʻlmagan butlarning nomini oʻrtaga qoʻyib ont ichdilar.
Men ularning ehtiyojlarini qondirar edim,
Ular esa zino qilaverar edilar,
Fohishalarning uyiga toʻdalashib borar edilar.
8 Ular hirsi qoʻzgʻagan aygʻir otlar kabi edilar,
Har biri qoʻshnisining xotiniga kishnar edi.
9 Men ularni buning uchun jazolamaymi?!
Shunday bir xalqdan oʻch olmaymi?!
— deb aytmoqda Egamiz. —
10 Qani, ularning uzumzorlariga kiringlar,
Toklarini kesib tashlanglar.
Ammo butunlay yoʻq qilmanglar.
Novdalarini sindiringlar,
Endi ular Meniki emas.
11 Axir, Isroil va Yahudo xalqlari
Menga butunlay xiyonat qilishdi.”
Egamizning kalomi shudir.
Egamiz Isroilni tark etadi
12 Isroil xalqi Egamiz haqida yolgʻon gapirdi, ular shunday dedi:
“Egamiz baribir hech narsa qilmaydi.
Hech qanday koʻrgilik boshimizga tushmaydi!
Qahatchilik, urush boʻlmaydi!
13 Paygʻambarlarining bemaʼni soʻzlari shamolga oʻxshaydi,
Xudoning soʻzi ularga ayon boʻlmagan.
Bu kulfatlar oʻzlarining boshiga tushsin!”
14 Shuning uchun Parvardigori Olam — Egamiz shunday demoqda:
“Ey Yeremiyo, xalqim aytgan bu gaplari uchun
Men Oʻz soʻzlarimni sening ogʻzingda olovday qilaman.
Bu xalq esa oʻtin kabi boʻladi,
Olov ularni yondirib tashlaydi.”
15 Egamiz shunday demoqda:
“Ey Isroil xalqi,
Men olisdagi bir xalqni qoʻzgʻataman.
Ularni sizga qarshi yuboraman.
Ular kuchli, qadimgi bir xalqdir.
Bu xalqning tilini sizlar bilmaysizlar,
Ularning gaplarini tushunmaysizlar.
16 Ularning hammasi mohir jangchilardir,
Oʻqlari oʻlim elchilaridir.
17 Ular hosilingizni, noningizni yeb bitirishadi,
Oʻgʻil–qizlaringizni oʻldirishadi.
Mol–qoʻylaringizni boʻgʻizlashadi,
Uzumzoru anjirzorlaringizni yoʻq qilishadi.
Suyangan mustahkam shaharlaringizni
Lashkarlari vayron qilishadi.”
18 Egamiz demoqda: “Shunday kunlarda ham Men Oʻz xalqimni butunlay qirib yubormayman. 19 Xalqim sendan: «Nima uchun Egamiz Xudo bunday ishlarni qildi?» deb soʻraganda, sen, ey Yeremiyo, ularga shunday javob ber: «Sizlar Xudoni tark etib, yurtimizda begona xudolarga xizmat qildingizlar. Endi oʻzga yurtda begona odamlarga xuddi shunday xizmat qilasizlar.»
Xudo xalqni ogohlantiradi
20 Borib, Yoqub nasliga shunday deb ayt, Yahudo xalqiga shunday deb eʼlon qil:
21 Sizlarning koʻzingiz bor, ammo koʻrmaysizlar,
Qulogʻingiz bor, ammo eshitmaysizlar.
Ey aqlsiz, befarosat odamlar,
Gaplarimni eshitinglar!
22 Nahotki Mendan qoʻrqmasangizlar?!
Mening oldimda titramasangizlar?!
— deb aytmoqda Egamiz. —
Axir, Men dengizga qumni chegara qilib qoʻydim,
Oʻtib boʻlmaydigan abadiy toʻsiq qildim.
Toʻlqinlar koʻpirib, koʻtarilsa ham,
Toʻsiqdan ustun kelolmaydi.
Hayqirib oʻkirsa ham,
Undan oshib oʻtolmaydi.
23 Ammo sizlar oʻjar va isyonkorsizlar,
Yoʻldan ozib, Meni tark etdingizlar,
24 Sizlar ichingizda hech aytmaysizlar:
«Egamiz Xudodan qoʻrqaylik,
U oʻz vaqtida yomgʻir yogʻdiradi–ku!
Kuzda ham, bahorda ham yerimizni sugʻoradi–ku!
Yigʻim–terim mavsumini oʻz vaqtida beradi–ku!» deb.
25 Gunohlaringiz sizlarni bulardan mahrum etdi,
Ayblaringiz sizlarni barakadan judo etdi.
26 Ha, xalqim orasida yaramas odamlar bor.
Ular qush ovlayotganday pisib yotishar,
Tuzoq qoʻyib, odamlarni oʻz domiga tortishar.
27 Ovchi qafasni qushlarga toʻldirganday,
Ular uylarini hiylaga toʻldirdilar.
Shu tufayli kuchayib, davlat orttirdilar,
28 Semirib, yaltirab ketdilar.
Qabih ishlarining chek–chegarasi yoʻq.
Ular yetimni oqlashga harakat qilmaydi,
Yoʻqsilning haqini himoya etmaydi.
29 Men ularni bu uchun jazolamaymi?!
Shunday bir xalqdan oʻch olmaymi?!
— deb aytmoqda Egamiz. —
30 Qoʻrqinchli va dahshatli ishlar
Bu yurtda sodir boʻlmoqda:
31 Paygʻambarlar yolgʻondan bashorat qilmoqda,
Ruhoniylar oʻzlaricha xalqimni boshqarmoqda,
Xalqimga bularning hammasi xush kelmoqda.
Ammo oxirida ular nima qilar ekan–a?”
5–БОБ
Қуддус аҳолисининг гуноҳлари
1 Эгамиз шундай дейди:
“Қуддуснинг ҳар бир кўчасига кириб чиқинглар,
Атрофингизга қараб, билиб олинглар,
Шаҳар майдонларида қидириб кўринглар,
Бирон адолатли, ростгўй одам бормикан.
Агар шундай одамни топиб келсангиз,
Мен Қуддус аҳолисининг гуноҳидан ўтаман.
2 Улар «Эгамиз шоҳид!» дея қасам ичадилар,
Аммо ичган қасамлари ёлғон.”
3 Эй Эгам, Сен ҳақиқатни излайсан.
Сен бу халқни урган эдинг,
Аммо улар оғриқ сезмадилар.
Уларни деярли йўқ қилиб юборганингда ҳам,
Гапингга кирмадилар.
Бетларини тошдан ҳам қаттиқ қилдилар,
Тавба қилишни хоҳламадилар.
4 Шунда мен ичимда дедим:
“Эҳа, булар камбағал–ку!
Шунинг учун уларнинг фаросати йўқ,
Улар Эгамизнинг йўлини билмайди,
Худосининг қонунини танимайди.
5 Қани, бойларнинг олдига борай–чи,
Улар билан гаплашиб кўрай–чи,
Эгамизнинг йўлини улар албатта билади,
Улар Худосининг қонунини танишади.”
Аммо уларнинг ҳаммаси бўйинтуруғини синдирган экан,
Эгамизга итоат этишдан бош тортган экан.
6 Шунинг учун ўрмондан чиққан шер уларни ўлдиради,
Чўлдан келган бўри уларни ғажиб ташлайди.
Қоплон уларнинг шаҳарлари олдида писиб туради,
Шаҳардан чиққан ҳар бир одамни тилка–пора қилади.
Ахир, улар кўп гуноҳ қилдилар,
Худога кўп хиёнат этдилар.
7 Эгамиз шундай дейди:
“Эй Қуддус, Сени қандай қилиб кечираман?!
Фарзандларинг Мени тарк этдилар–ку!
Улар Худо бўлмаган бутларнинг номини ўртага қўйиб онт ичдилар.
Мен уларнинг эҳтиёжларини қондирар эдим,
Улар эса зино қилаверар эдилар,
Фоҳишаларнинг уйига тўдалашиб борар эдилар.
8 Улар ҳирси қўзғаган айғир отлар каби эдилар,
Ҳар бири қўшнисининг хотинига кишнар эди.
9 Мен уларни бунинг учун жазоламайми?!
Шундай бир халқдан ўч олмайми?!
— деб айтмоқда Эгамиз. —
10 Қани, уларнинг узумзорларига киринглар,
Токларини кесиб ташланглар.
Аммо бутунлай йўқ қилманглар.
Новдаларини синдиринглар,
Энди улар Меники эмас.
11 Ахир, Исроил ва Яҳудо халқлари
Менга бутунлай хиёнат қилишди.”
Эгамизнинг каломи шудир.
Эгамиз Исроилни тарк этади
12 Исроил халқи Эгамиз ҳақида ёлғон гапирди, улар шундай деди:
“Эгамиз барибир ҳеч нарса қилмайди.
Ҳеч қандай кўргилик бошимизга тушмайди!
Қаҳатчилик, уруш бўлмайди!
13 Пайғамбарларининг бемаъни сўзлари шамолга ўхшайди,
Худонинг сўзи уларга аён бўлмаган.
Бу кулфатлар ўзларининг бошига тушсин!”
14 Шунинг учун Парвардигори Олам — Эгамиз шундай демоқда:
“Эй Еремиё, халқим айтган бу гаплари учун
Мен Ўз сўзларимни сенинг оғзингда оловдай қиламан.
Бу халқ эса ўтин каби бўлади,
Олов уларни ёндириб ташлайди.”
15 Эгамиз шундай демоқда:
“Эй Исроил халқи,
Мен олисдаги бир халқни қўзғатаман.
Уларни сизга қарши юбораман.
Улар кучли, қадимги бир халқдир.
Бу халқнинг тилини сизлар билмайсизлар,
Уларнинг гапларини тушунмайсизлар.
16 Уларнинг ҳаммаси моҳир жангчилардир,
Ўқлари ўлим элчиларидир.
17 Улар ҳосилингизни, нонингизни еб битиришади,
Ўғил–қизларингизни ўлдиришади.
Мол–қўйларингизни бўғизлашади,
Узумзору анжирзорларингизни йўқ қилишади.
Суянган мустаҳкам шаҳарларингизни
Лашкарлари вайрон қилишади.”
18 Эгамиз демоқда: “Шундай кунларда ҳам Мен Ўз халқимни бутунлай қириб юбормайман. 19 Халқим сендан: «Нима учун Эгамиз Худо бундай ишларни қилди?» деб сўраганда, сен, эй Еремиё, уларга шундай жавоб бер: «Сизлар Худони тарк этиб, юртимизда бегона худоларга хизмат қилдингизлар. Энди ўзга юртда бегона одамларга худди шундай хизмат қиласизлар.»
Худо халқни огоҳлантиради
20 Бориб, Ёқуб наслига шундай деб айт, Яҳудо халқига шундай деб эълон қил:
21 Сизларнинг кўзингиз бор, аммо кўрмайсизлар,
Қулоғингиз бор, аммо эшитмайсизлар.
Эй ақлсиз, бефаросат одамлар,
Гапларимни эшитинглар!
22 Наҳотки Мендан қўрқмасангизлар?!
Менинг олдимда титрамасангизлар?!
— деб айтмоқда Эгамиз. —
Ахир, Мен денгизга қумни чегара қилиб қўйдим,
Ўтиб бўлмайдиган абадий тўсиқ қилдим.
Тўлқинлар кўпириб, кўтарилса ҳам,
Тўсиқдан устун келолмайди.
Ҳайқириб ўкирса ҳам,
Ундан ошиб ўтолмайди.
23 Аммо сизлар ўжар ва исёнкорсизлар,
Йўлдан озиб, Мени тарк этдингизлар,
24 Сизлар ичингизда ҳеч айтмайсизлар:
«Эгамиз Худодан қўрқайлик,
У ўз вақтида ёмғир ёғдиради–ку!
Кузда ҳам, баҳорда ҳам еримизни суғоради–ку!
Йиғим–терим мавсумини ўз вақтида беради–ку!» деб.
25 Гуноҳларингиз сизларни булардан маҳрум этди,
Айбларингиз сизларни баракадан жудо этди.
26 Ҳа, халқим орасида ярамас одамлар бор.
Улар қуш овлаётгандай писиб ётишар,
Тузоқ қўйиб, одамларни ўз домига тортишар.
27 Овчи қафасни қушларга тўлдиргандай,
Улар уйларини ҳийлага тўлдирдилар.
Шу туфайли кучайиб, давлат орттирдилар,
28 Семириб, ялтираб кетдилар.
Қабиҳ ишларининг чек–чегараси йўқ.
Улар етимни оқлашга ҳаракат қилмайди,
Йўқсилнинг ҳақини ҳимоя этмайди.
29 Мен уларни бу учун жазоламайми?!
Шундай бир халқдан ўч олмайми?!
— деб айтмоқда Эгамиз. —
30 Қўрқинчли ва даҳшатли ишлар
Бу юртда содир бўлмоқда:
31 Пайғамбарлар ёлғондан башорат қилмоқда,
Руҳонийлар ўзларича халқимни бошқармоқда,
Халқимга буларнинг ҳаммаси хуш келмоқда.
Аммо охирида улар нима қилар экан–а?”
