65–BOB
Xudo hukmining odilligi
1 Egam aytar: “Meni soʻramaganlarga koʻrindim,
Meni izlamaganlar topdi.
Menga iltijo qilmagan bir xalqqa:
«Mana Men! Shu yerdaman!» deb aytdim.
2 Itoatsiz xalqni
Kun boʻyi quchoq ochib kutdim.
Ana, ular oʻzlari xohlagan,
Toʻgʻri boʻlmagan yoʻllardan yuradi.
3 Ular yuzimga qarab turib,
Jahlimni chiqaradi.
Sajdagoh bogʻlarda toʻxtovsiz qurbonliklar keltiradi,
Gʻisht qurbongohlarda tutatqilar tutatadi.
4 Ular qabrlar orasida oʻtirib,
Yashirin joylarda arvohlarga maslahat soladi .
Ular choʻchqa goʻshtini yeydi,
Qozonlarida harom goʻsht qaynatadi.
5 Ular boshqalarga shunday deydi:
«Nariroq tur, menga tegma,
Yana muqaddasligim yuqib qolmasin.»
Bularning hammasi kun boʻyi yonib turgan olov kabidir.
Ularning tutuni burnimni achitadi.
6 Mana, hammasi koʻz oʻngimda yozib qoʻyilgan.
Men jim turmayman, ularni jazolayman.
Qilmishlariga yarasha ularga toʻliq qaytaraman.
7 Ularni oʻzlarining gunohlari uchun
Hamda otalarining gunohlari uchun jazolayman,
— demoqda Egamiz. —
Axir, ular togʻlarda tutatqilar tutatdilar,
Tepaliklarda Meni haqorat qildilar.
Shu bois qilmishlariga yarasha
Ularga jazosini beraman.”
8 Egamiz shunday aytmoqda:
“Agar bir bosh uzumda hali sharbati bor boʻlsa,
Odamlar: «Uni tashlab yubormang,
Hali foydasi tegadi», deb aytadi.
Men ham Oʻz qullarim haqi shunday qilaman,
Oʻz xalqimning hammasini yoʻq qilmayman.
9 Togʻlarimni mulk qilib olsin deb,
Isroil va Yahudo xalqiga avlod beraman.
Tanlagan xalqim togʻlarimga egalik qiladi,
Mening qullarim u yerda yashaydi.
10 Sharon tekisligi qoʻylar suruvlari uchun yaylov boʻladi,
Oxor soyligi mol–qoʻylar uchun oʻtloq boʻladi.
Ha, bu yerlar Menga intilganlarniki boʻladi.
11 Ammo baʼzilaringiz Men, Egangizni tark etdingiz,
Muqaddas togʻimni unutdingiz!
«Omad» buti uchun dasturxon yozdingiz,
«Qismat» buti uchun qadahlarga sharob quydingiz!
12 Shundaylarni Men qilichning damiga roʻpara qilaman.
Hammangiz tiz choʻkasiz, boʻgʻizlanasiz.
Axir, Men chaqirganimda javob bermadingiz,
Gapirganimda quloq solmadingiz.
Mening oldimda qabihliklar qildingiz,
Men xohlamagan narsalarni tanladingiz.”
13 Shu bois Egamiz Rabbiy aytmoqda:
“Mening qullarim yeydi, sizlar esa och qolasiz,
Qullarim ichadi, sizlar tashnalikdan azob chekasiz,
Qullarim shod–xurram boʻladi,
Sizlar esa sharmandayu sharmisor boʻlasiz.
14 Qullarimning qalbi shodlikka toʻladi,
Ular qoʻshiqlar kuylaydi.
Sizlar esa yuragingizdagi qaygʻudan dod–voy qilasiz,
Ezilgan ruhingiz tufayli uvullab yigʻlaysiz.
15 Men, Egangiz Rabbiy, sizlarni oʻldiraman,
Sizning nomingiz tanlangan xalqim orasida
Laʼnat sifatida ishlatiladi.
Oʻz qullarimga esa boshqa nom beraman.
16 Kim oʻziga bu yurtda baraka tilasa,
Men, sodiq Xudoning nomi bilan duo qiladi.
Yurtda kim ont ichadigan boʻlsa,
Mening nomim bilan ont ichadi.
Oldingi qaygʻular unutiladi,
Qaygʻu koʻz oldimdan yoʻqotiladi.
Yangi ulugʻvor ijod
17 Mana, qarang! Yangi osmon, yangi yer yaratyapman.
Ilgari boʻlganlar endi eslanmaydi,
Ular hech qachon yodga olinmaydi.
18 Yaratayotgan ishlarim tufayli
To abad shodlaning, xursand boʻling.
Men Quddusni shodlik qilib,
Xalqini quvonch qilib yaratyapman.
19 Men Quddus tufayli sevinaman,
Xalqim Menga quvonch keltiradi.
Endi Quddusda hech qachon
Yigʻi, faryod tovushi eshitilmaydi.
20 U yerda endi goʻdaklar oʻlmaydi,
Biror qariya yoshini yashamay oʻtmaydi.
Birontasi yuz yoshga kirib olamdan oʻtsa,
U haqda: «Evoh, yosh ketdi», deb aytadilar.
Yuzga yetmay oʻlganni laʼnati deb biladilar .
21 Xalqim uylar qurib, oʻzlari oʻsha yerda yashaydi,
Tokzorlar oʻtqazib, hosilini oʻzlari yeydi.
22 Endi ular qurgan uylarda boshqalar yashamaydi,
Ekkan daraxtlarining hosili boshqalarga nasib boʻlmaydi.
Xalqimning umri chinor umriday uzoq boʻladi,
Tanlagan xalqim oʻz qoʻllarining mahsulidan uzoq vaqt bahramand boʻladi.
23 Ularning mehnati behuda ketmaydi,
Nasllari baxtsizlikka mubtalo boʻlmaydi.
Ular Men, Egasidan baraka topgan xalqdir,
Ularning avlodiga ham Men baraka beraman.
24 Menga yolvormaslaridan ham oldin
Xalqimga javob beraman.
Gapirayotgan paytining oʻzidayoq
Ularga quloq tutaman.
25 Boʻri bilan qoʻzichoq birga oʻtlab yuradi,
Sher ham hoʻkiz kabi somon yeydi,
Ilon esa tuproq yalaydi.
Muqaddas togʻimning biron yerida
Hech bir yovuzligu yomonlik qilinmaydi.”
Egamizning kalomi shudir.
65–БОБ
Худо ҳукмининг одиллиги
1 Эгам айтар: “Мени сўрамаганларга кўриндим,
Мени изламаганлар топди.
Менга илтижо қилмаган бир халққа:
«Мана Мен! Шу ердаман!» деб айтдим.
2 Итоатсиз халқни
Кун бўйи қучоқ очиб кутдим.
Ана, улар ўзлари хоҳлаган,
Тўғри бўлмаган йўллардан юради.
3 Улар юзимга қараб туриб,
Жаҳлимни чиқаради.
Саждагоҳ боғларда тўхтовсиз қурбонликлар келтиради,
Ғишт қурбонгоҳларда тутатқилар тутатади.
4 Улар қабрлар орасида ўтириб,
Яширин жойларда арвоҳларга маслаҳат солади .
Улар чўчқа гўштини ейди,
Қозонларида ҳаром гўшт қайнатади.
5 Улар бошқаларга шундай дейди:
«Нарироқ тур, менга тегма,
Яна муқаддаслигим юқиб қолмасин.»
Буларнинг ҳаммаси кун бўйи ёниб турган олов кабидир.
Уларнинг тутуни бурнимни ачитади.
6 Мана, ҳаммаси кўз ўнгимда ёзиб қўйилган.
Мен жим турмайман, уларни жазолайман.
Қилмишларига яраша уларга тўлиқ қайтараман.
7 Уларни ўзларининг гуноҳлари учун
Ҳамда оталарининг гуноҳлари учун жазолайман,
— демоқда Эгамиз. —
Ахир, улар тоғларда тутатқилар тутатдилар,
Тепаликларда Мени ҳақорат қилдилар.
Шу боис қилмишларига яраша
Уларга жазосини бераман.”
8 Эгамиз шундай айтмоқда:
“Агар бир бош узумда ҳали шарбати бор бўлса,
Одамлар: «Уни ташлаб юборманг,
Ҳали фойдаси тегади», деб айтади.
Мен ҳам Ўз қулларим ҳақи шундай қиламан,
Ўз халқимнинг ҳаммасини йўқ қилмайман.
9 Тоғларимни мулк қилиб олсин деб,
Исроил ва Яҳудо халқига авлод бераман.
Танлаган халқим тоғларимга эгалик қилади,
Менинг қулларим у ерда яшайди.
10 Шарон текислиги қўйлар сурувлари учун яйлов бўлади,
Охор сойлиги мол–қўйлар учун ўтлоқ бўлади.
Ҳа, бу ерлар Менга интилганларники бўлади.
11 Аммо баъзиларингиз Мен, Эгангизни тарк этдингиз,
Муқаддас тоғимни унутдингиз!
«Омад» бути учун дастурхон ёздингиз,
«Қисмат» бути учун қадаҳларга шароб қуйдингиз!
12 Шундайларни Мен қиличнинг дамига рўпара қиламан.
Ҳаммангиз тиз чўкасиз, бўғизланасиз.
Ахир, Мен чақирганимда жавоб бермадингиз,
Гапирганимда қулоқ солмадингиз.
Менинг олдимда қабиҳликлар қилдингиз,
Мен хоҳламаган нарсаларни танладингиз.”
13 Шу боис Эгамиз Раббий айтмоқда:
“Менинг қулларим ейди, сизлар эса оч қоласиз,
Қулларим ичади, сизлар ташналикдан азоб чекасиз,
Қулларим шод–хуррам бўлади,
Сизлар эса шармандаю шармисор бўласиз.
14 Қулларимнинг қалби шодликка тўлади,
Улар қўшиқлар куйлайди.
Сизлар эса юрагингиздаги қайғудан дод–вой қиласиз,
Эзилган руҳингиз туфайли увиллаб йиғлайсиз.
15 Мен, Эгангиз Раббий, сизларни ўлдираман,
Сизнинг номингиз танланган халқим орасида
Лаънат сифатида ишлатилади.
Ўз қулларимга эса бошқа ном бераман.
16 Ким ўзига бу юртда барака тиласа,
Мен, содиқ Худонинг номи билан дуо қилади.
Юртда ким онт ичадиган бўлса,
Менинг номим билан онт ичади.
Олдинги қайғулар унутилади,
Қайғу кўз олдимдан йўқотилади.
Янги улуғвор ижод
17 Мана, қаранг! Янги осмон, янги ер яратяпман.
Илгари бўлганлар энди эсланмайди,
Улар ҳеч қачон ёдга олинмайди.
18 Яратаётган ишларим туфайли
То абад шодланинг, хурсанд бўлинг.
Мен Қуддусни шодлик қилиб,
Халқини қувонч қилиб яратяпман.
19 Мен Қуддус туфайли севинаман,
Халқим Менга қувонч келтиради.
Энди Қуддусда ҳеч қачон
Йиғи, фарёд товуши эшитилмайди.
20 У ерда энди гўдаклар ўлмайди,
Бирор қария ёшини яшамай ўтмайди.
Биронтаси юз ёшга кириб оламдан ўтса,
У ҳақда: «Эвоҳ, ёш кетди», деб айтадилар.
Юзга етмай ўлганни лаънати деб биладилар .
21 Халқим уйлар қуриб, ўзлари ўша ерда яшайди,
Токзорлар ўтқазиб, ҳосилини ўзлари ейди.
22 Энди улар қурган уйларда бошқалар яшамайди,
Эккан дарахтларининг ҳосили бошқаларга насиб бўлмайди.
Халқимнинг умри чинор умридай узоқ бўлади,
Танлаган халқим ўз қўлларининг маҳсулидан узоқ вақт баҳраманд бўлади.
23 Уларнинг меҳнати беҳуда кетмайди,
Насллари бахтсизликка мубтало бўлмайди.
Улар Мен, Эгасидан барака топган халқдир,
Уларнинг авлодига ҳам Мен барака бераман.
24 Менга ёлвормасларидан ҳам олдин
Халқимга жавоб бераман.
Гапираётган пайтининг ўзидаёқ
Уларга қулоқ тутаман.
25 Бўри билан қўзичоқ бирга ўтлаб юради,
Шер ҳам ҳўкиз каби сомон ейди,
Илон эса тупроқ ялайди.
Муқаддас тоғимнинг бирон ерида
Ҳеч бир ёвузлигу ёмонлик қилинмайди.”
Эгамизнинг каломи шудир.
