10–BOB
1 Ey siz, yovuz farmonlar chiqaradiganlar,
Qonunlar yozib, jabr keltiradiganlar.
2 Kambagʻalni adolatdan mahrum qilyapsiz,
Mazlum xalqimni talayapsiz,
Ovingiz boʻlayotir bevalar,
Oʻljangiz boʻlayotir yetimlar.
3 Qiyomat kuni kelganda, siz nima qilasiz?
Uzoqdan balo kelganda, nima qilasiz?
Yordam soʻrab kimga qochib borasiz?!
Boyligingizni qayerga olib ketasiz?!
4 Yoʻq, asir boʻlib yiqilib qolasiz,
Yo jasadlar tagida qolib ketasiz.
Ammo shunday boʻlsa ham,
Egam tushmas gʻazabidan,
Uning qoʻli hamon
Isroilga qarshi koʻtarilgan.
Xudo takabbur Ossuriyani hukm qiladi
5 Egam aytar: “Mana Ossuriya! Gʻazabimning hassasi!
Uning qoʻlidadir qahrimning tayogʻi!
6 Men uni shakkok elga qarshi yuboraman,
Gʻazabimni oʻsha xalqqa qarshi sochaman,
Ovlab, oʻlja qil, deb unga amr qilaman.
Xalqlarni loyday oyoq osti qiladi u.
7 Ammo Ossuriya Mening qurolim ekanini
Xayoliga ham keltirmas,
Bular haqida u oʻylamas ham.
Uning fikri–yodi:
Xalqlarni qirib tashlashdir,
Bitta qoʻymay ularni yoʻq qilishdir.
8 Ossuriya shohi shunday oʻylaydi:
«Lashkarboshilarim shohlar emasmi?!
9 Xalno shahrini Karxamish shahriday vayron qilmadikmi?!
Xomat ham Arpadday quladi–ku!
Samariya Damashq kabi emasmi?!
10 Olganimday behuda butlar shohliklarini,
Olaman Quddusu Samariyaning sanamlarini.
11 Ne qilgan boʻlsam Samariya va uning sanamlarini,
Shunday qilaman Quddusu uning butlarini.»”
12 Ammo Rabbiy tuzgan rejalarini Sion togʻida va Quddusda amalga oshirgandan keyin, shunday deydi: “Endi takabbur, kibor Ossuriya shohi bilan hisob–kitob qilaman. 13 Axir, Ossuriya shohi shunday degan edi:
«Oʻz kuchim bilan bularni amalga oshirdim,
Donoligim bilan qildim, axir, idrokliman.
Xalqlarning chegarasini yoʻq qildim,
Ularning xazinalarini oʻlja qilib oldim.
Qudratli shohlarini taxtdan uloqtirdim.
14 Qush iniga qoʻl suqib tuxum yiqqani kabi,
Xalqlarning boyliklarini toʻpladim.
Tashlab ketilgan tuxumlarni qanday toʻplasalar,
Jamiki yurtlarni men shunday yigʻib oldim.
Yo qanot qoqqan, ogʻzin ochgan,
Yo ovozin chiqargan birov boʻlmadi.»”
Ishayoning Ossuriya shohiga javobi
15 Bolta maqtanarmi uni ishlatganga?!
Arra oʻzini maqtaydimi uni qoʻlga olganga?!
Kaltak ushlaganni kaltakning oʻzi koʻtaradimi?!
Hassa oʻzini ushlaganni koʻtaradimi?!
16 Ey Ossuriya,
Shu bois Sarvari Olam — Rabbiy
Ogʻir xastalikni yuborar pahlavonlaringiz orasiga.
Kasalliklarining qizgʻin pallasida
Ularning badanlaridan oʻt chiqadi,
Ular goʻyo lov–lov etib yonadi.
17 Isroilning Nuri yolqin boʻladi,
Isroil xalqining Muqaddas Xudosi olov boʻladi.
Olov yondirib, tikanzoru changalzorlarini
Bir kunda yamlab yutadi.
18 Ossuriyaning muhtasham oʻrmonlari
Va unumdor dalalari
Ogʻir xastalikka yoʻliqqan insonday,
Tamomila xarob boʻladi.
19 Oʻrmondagi daraxtlar shunchalik oz qolarki,
Hattoki yosh bola ham ularni sanay oladi.
Xudo Oʻz xalqini tinchlantiradi
20 Oʻsha kuni Isroilning qolgan–qutgani,
Yoqub naslining qutulganlari
Boshqa suyanmaydi oʻz zulmkorlariga ,
Ular sadoqat bilan tayanadi
Isroil xalqining Muqaddas Xudosi — Egamga.
21 Yoqub naslining qutulganlari, omon qolganlari
Qaytadi qudratli Xudoga.
22 Ey Isroil, sening xalqing
Dengiz qumiday koʻp boʻlsa ham,
Endi ulardan faqatgina sanoqli odamlar qaytadi.
Zero, “Qirgʻin boʻlsin”, deya qaror qilingan,
Xudo odil hukmini Oʻz xalqining boshiga soladi.
23 Shubhasiz, butun yer yuzida qiyomat boʻladi, zotan, Sarvari Olam — Rabbiy shunday qaror qilgan.
24-25 Shu bois Sarvari Olam — Rabbiy shunday aytmoqda: “Ey xalqim, Quddus ahli! Misrliklar kabi, Ossuriyaliklar sizlarga tayoq koʻtaradilar, sizlarni qamchi bilan uradilar. Ammo hademay gʻazabimni bosaman, ulardan qoʻrqmanglar. Endi Ossuriyaliklarga qahrimni sochib, ularni qiraman. 26 Ha, Midiyonlarni Oriv qoyasida shunday qirgan edim . Hassamni koʻtarib, Misr lashkarini dengizda gʻarq qildim . Endi xuddi shunday qilib, Men, Sarvari Olam, ularga qarshi qamchimni koʻtaraman. 27 Oʻsha kuni Ossuriyaning yukini yelkangizdan uloqtiraman. Uning boʻyinturugʻi boʻyningizdan olib tashlanadi. Ha, boʻyinturuq yoʻq qilinadi, chunki sizlar kuchga toʻldingiz .”
28 Ossuriya lashkari Oyaz shahriga keldi,
Migron boʻylab oʻtdi,
Qurol–aslahasini Mixmashda shay qildi.
29 Ular Gebo soʻqmogʻini kesib oʻtdilar–u,
Rama xalqi vahimaga tushib qoldi,
Ular Shoulning shahri Givoda omonat toʻxtadi–yu,
Shahar ahli qochib ketdi.
30 Faryod qiling, ey Galim ahli!
Eshit, ey Laysho!
Ey shoʻrlik Onotoʻt!
31 Madmenax ahli qochib ketdi,
Gebim ahli, panoh topay deb, uchib ketdi.
32 Oʻsha kuni Ossuriya lashkari Nav shahrida turadi.
Quddus shahri joylashgan tepalikka —
Aziz Sion togʻiga qarab mushtini koʻtaradi.
33 Qara, Sarvari Olam — Rabbiy
Qudratli kuchi ila daraxt shoxlarini kesib tashlaydi,
Baland daraxtlarni qirqib tashlaydi,
Yuksalganlarini yerga uradi.
34 U bolta bilan kesib tashlaydi oʻrmondagi changalzorni,
Qudratli Xudo qulatib yuboradi Lubnon daraxtlarini.
10–БОБ
1 Эй сиз, ёвуз фармонлар чиқарадиганлар,
Қонунлар ёзиб, жабр келтирадиганлар.
2 Камбағални адолатдан маҳрум қиляпсиз,
Мазлум халқимни талаяпсиз,
Овингиз бўлаётир бевалар,
Ўлжангиз бўлаётир етимлар.
3 Қиёмат куни келганда, сиз нима қиласиз?
Узоқдан бало келганда, нима қиласиз?
Ёрдам сўраб кимга қочиб борасиз?!
Бойлигингизни қаерга олиб кетасиз?!
4 Йўқ, асир бўлиб йиқилиб қоласиз,
Ё жасадлар тагида қолиб кетасиз.
Аммо шундай бўлса ҳам,
Эгам тушмас ғазабидан,
Унинг қўли ҳамон
Исроилга қарши кўтарилган.
Худо такаббур Оссурияни ҳукм қилади
5 Эгам айтар: “Мана Оссурия! Ғазабимнинг ҳассаси!
Унинг қўлидадир қаҳримнинг таёғи!
6 Мен уни шаккок элга қарши юбораман,
Ғазабимни ўша халққа қарши сочаман,
Овлаб, ўлжа қил, деб унга амр қиламан.
Халқларни лойдай оёқ ости қилади у.
7 Аммо Оссурия Менинг қуролим эканини
Хаёлига ҳам келтирмас,
Булар ҳақида у ўйламас ҳам.
Унинг фикри–ёди:
Халқларни қириб ташлашдир,
Битта қўймай уларни йўқ қилишдир.
8 Оссурия шоҳи шундай ўйлайди:
«Лашкарбошиларим шоҳлар эмасми?!
9 Хално шаҳрини Кархамиш шаҳридай вайрон қилмадикми?!
Хомат ҳам Арпаддай қулади–ку!
Самария Дамашқ каби эмасми?!
10 Олганимдай беҳуда бутлар шоҳликларини,
Оламан Қуддусу Самариянинг санамларини.
11 Не қилган бўлсам Самария ва унинг санамларини,
Шундай қиламан Қуддусу унинг бутларини.»”
12 Аммо Раббий тузган режаларини Сион тоғида ва Қуддусда амалга оширгандан кейин, шундай дейди: “Энди такаббур, кибор Оссурия шоҳи билан ҳисоб–китоб қиламан. 13 Ахир, Оссурия шоҳи шундай деган эди:
«Ўз кучим билан буларни амалга оширдим,
Донолигим билан қилдим, ахир, идроклиман.
Халқларнинг чегарасини йўқ қилдим,
Уларнинг хазиналарини ўлжа қилиб олдим.
Қудратли шоҳларини тахтдан улоқтирдим.
14 Қуш инига қўл суқиб тухум йиққани каби,
Халқларнинг бойликларини тўпладим.
Ташлаб кетилган тухумларни қандай тўпласалар,
Жамики юртларни мен шундай йиғиб олдим.
Ё қанот қоққан, оғзин очган,
Ё овозин чиқарган биров бўлмади.»”
Ишаёнинг Оссурия шоҳига жавоби
15 Болта мақтанарми уни ишлатганга?!
Арра ўзини мақтайдими уни қўлга олганга?!
Калтак ушлаганни калтакнинг ўзи кўтарадими?!
Ҳасса ўзини ушлаганни кўтарадими?!
16 Эй Оссурия,
Шу боис Сарвари Олам — Раббий
Оғир хасталикни юборар паҳлавонларингиз орасига.
Касалликларининг қизғин палласида
Уларнинг баданларидан ўт чиқади,
Улар гўё лов–лов этиб ёнади.
17 Исроилнинг Нури ёлқин бўлади,
Исроил халқининг Муқаддас Худоси олов бўлади.
Олов ёндириб, тиканзору чангалзорларини
Бир кунда ямлаб ютади.
18 Оссуриянинг муҳташам ўрмонлари
Ва унумдор далалари
Оғир хасталикка йўлиққан инсондай,
Тамомила хароб бўлади.
19 Ўрмондаги дарахтлар шунчалик оз қоларки,
Ҳаттоки ёш бола ҳам уларни санай олади.
Худо Ўз халқини тинчлантиради
20 Ўша куни Исроилнинг қолган–қутгани,
Ёқуб наслининг қутулганлари
Бошқа суянмайди ўз зулмкорларига ,
Улар садоқат билан таянади
Исроил халқининг Муқаддас Худоси — Эгамга.
21 Ёқуб наслининг қутулганлари, омон қолганлари
Қайтади қудратли Худога.
22 Эй Исроил, сенинг халқинг
Денгиз қумидай кўп бўлса ҳам,
Энди улардан фақатгина саноқли одамлар қайтади.
Зеро, “Қирғин бўлсин”, дея қарор қилинган,
Худо одил ҳукмини Ўз халқининг бошига солади.
23 Шубҳасиз, бутун ер юзида қиёмат бўлади, зотан, Сарвари Олам — Раббий шундай қарор қилган.
24-25 Шу боис Сарвари Олам — Раббий шундай айтмоқда: “Эй халқим, Қуддус аҳли! Мисрликлар каби, Оссурияликлар сизларга таёқ кўтарадилар, сизларни қамчи билан урадилар. Аммо ҳадемай ғазабимни босаман, улардан қўрқманглар. Энди Оссурияликларга қаҳримни сочиб, уларни қираман. 26 Ҳа, Мидиёнларни Орив қоясида шундай қирган эдим . Ҳассамни кўтариб, Миср лашкарини денгизда ғарқ қилдим . Энди худди шундай қилиб, Мен, Сарвари Олам, уларга қарши қамчимни кўтараман. 27 Ўша куни Оссуриянинг юкини елкангиздан улоқтираман. Унинг бўйинтуруғи бўйнингиздан олиб ташланади. Ҳа, бўйинтуруқ йўқ қилинади, чунки сизлар кучга тўлдингиз .”
28 Оссурия лашкари Ояз шаҳрига келди,
Мигрон бўйлаб ўтди,
Қурол–аслаҳасини Михмашда шай қилди.
29 Улар Гебо сўқмоғини кесиб ўтдилар–у,
Рама халқи ваҳимага тушиб қолди,
Улар Шоулнинг шаҳри Гивода омонат тўхтади–ю,
Шаҳар аҳли қочиб кетди.
30 Фарёд қилинг, эй Галим аҳли!
Эшит, эй Лайшо!
Эй шўрлик Онотўт!
31 Мадменах аҳли қочиб кетди,
Гебим аҳли, паноҳ топай деб, учиб кетди.
32 Ўша куни Оссурия лашкари Нав шаҳрида туради.
Қуддус шаҳри жойлашган тепаликка —
Азиз Сион тоғига қараб муштини кўтаради.
33 Қара, Сарвари Олам — Раббий
Қудратли кучи ила дарахт шохларини кесиб ташлайди,
Баланд дарахтларни қирқиб ташлайди,
Юксалганларини ерга уради.
34 У болта билан кесиб ташлайди ўрмондаги чангалзорни,
Қудратли Худо қулатиб юборади Лубнон дарахтларини.
