5–BOB
Zinoga qarshi ogohlantirish
1 Oʻgʻlim , donoligimga eʼtibor ber,
aql–idrokimga quloq sol,
2 toki fahm–farosating yoʻqolmasin,
biliming saqlansin.
3 Buzuq ayolning tilidan bol tomadi,
soʻzlari — malhamday yumshoq,
4 ammo oqibati zaharday achchiq,
xanjarday oʻtkirdir.
5 Oyoqlari oʻlim tomon yuradi,
qadamlari oʻliklar diyoriga yetaklaydi.
6 U hayotga olib boradigan yoʻlga eʼtibor bermaydi,
yoʻllari beqaror, oʻzi buni bilmaydi.
7 Oʻgʻlim , menga quloq sol,
soʻzlarimdan chiqma.
8 U ayoldan uzoqroq yur,
uning eshigiga yaqinlashma.
9 Boʻlmasa, oʻz obroʻyingni begonalarga,
hayotingni yovuzlarga bergan boʻlasan.
10 Boyligingdan begonalar bahramand boʻladi,
mehnat bilan topgan mol–mulking oʻzgalarning uyida boʻladi.
11 Umring oxirida,
vujudingu tanangdan asar qolmagach,
faryod qilasan.
12 Oʻshanda shunday deysan:
“Men intizom va tanqiddan qanchalik nafratlanar edim–a,
13 na ustozlarimga,
na nasihat berganlarga quloq solibman.
14 Ana oqibat, jamoa orasida
halokat qirgʻogʻiga kelib qoldim.”
15 Oʻz sardobangdagi,
oʻz qudugʻingdagi suvni ichaver.
16 Buloqlaring tashqarida,
irmoqlaring koʻchada oqsinmi?!
17 Uni begonalar bilan baham koʻrma,
faqat oʻzingniki boʻlsin.
18 Bulogʻing suvlari muborak boʻlsin,
koʻz ochib koʻrganing bilan quvongin.
19 Jozibali ohu va goʻzal kiyik!
Uning ogʻushi seni qoniqtirsin,
doim uning sevgisi bilan qanoatlangin.
20 Nega endi, oʻgʻlim, begona xotinni koʻngling qoʻmsaydi?
Nimaga begona ayolning ogʻushini quchasan?
21 Insonning xatti–harakatlari
Egamizning koʻzi oldidadir.
Egamiz odamning barcha ishlarini kuzatib turadi.
22 Fosiqning ishlari uning oʻzini ushlaydi,
gunohlari uni zanjirband qiladi.
23 U ahmoqligi tufayli yoʻldan ozadi,
tarbiyasizligi dastidan oʻladi.
5–БОБ
Зинога қарши огоҳлантириш
1 Ўғлим , донолигимга эътибор бер,
ақл–идрокимга қулоқ сол,
2 токи фаҳм–фаросатинг йўқолмасин,
билиминг сақлансин.
3 Бузуқ аёлнинг тилидан бол томади,
сўзлари — малҳамдай юмшоқ,
4 аммо оқибати заҳардай аччиқ,
ханжардай ўткирдир.
5 Оёқлари ўлим томон юради,
қадамлари ўликлар диёрига етаклайди.
6 У ҳаётга олиб борадиган йўлга эътибор бермайди,
йўллари беқарор, ўзи буни билмайди.
7 Ўғлим , менга қулоқ сол,
сўзларимдан чиқма.
8 У аёлдан узоқроқ юр,
унинг эшигига яқинлашма.
9 Бўлмаса, ўз обрўйингни бегоналарга,
ҳаётингни ёвузларга берган бўласан.
10 Бойлигингдан бегоналар баҳраманд бўлади,
меҳнат билан топган мол–мулкинг ўзгаларнинг уйида бўлади.
11 Умринг охирида,
вужудингу танангдан асар қолмагач,
фарёд қиласан.
12 Ўшанда шундай дейсан:
“Мен интизом ва танқиддан қанчалик нафратланар эдим–а,
13 на устозларимга,
на насиҳат берганларга қулоқ солибман.
14 Ана оқибат, жамоа орасида
ҳалокат қирғоғига келиб қолдим.”
15 Ўз сардобангдаги,
ўз қудуғингдаги сувни ичавер.
16 Булоқларинг ташқарида,
ирмоқларинг кўчада оқсинми?!
17 Уни бегоналар билан баҳам кўрма,
фақат ўзингники бўлсин.
18 Булоғинг сувлари муборак бўлсин,
кўз очиб кўрганинг билан қувонгин.
19 Жозибали оҳу ва гўзал кийик!
Унинг оғуши сени қониқтирсин,
доим унинг севгиси билан қаноатлангин.
20 Нега энди, ўғлим, бегона хотинни кўнглинг қўмсайди?
Нимага бегона аёлнинг оғушини қучасан?
21 Инсоннинг хатти–ҳаракатлари
Эгамизнинг кўзи олдидадир.
Эгамиз одамнинг барча ишларини кузатиб туради.
22 Фосиқнинг ишлари унинг ўзини ушлайди,
гуноҳлари уни занжирбанд қилади.
23 У аҳмоқлиги туфайли йўлдан озади,
тарбиясизлиги дастидан ўлади.
