23–BOB
1 Dovud rosa keksayib, umri oxirlab qolgach, oʻgʻli Sulaymonni Isroil ustidan shoh qildi.
Levilar va ularning vazifalari
2 Dovud Isroilning hamma yoʻlboshchilarini, ruhoniylarini va levilarni toʻpladi. 3 U oʻttiz va undan yuqori yoshdagi levilarni hisobladi. Ularning jami 38.000 erkak chiqdi. 4 Shunda Dovud aytdi: “Bulardan 24.000 nafari Egamizning uyidagi ishlar uchun masʼul boʻladi, 6000 nafari amaldorlar va hakamlar boʻlib xizmat qiladi, 5 4000 nafari darvozabon boʻladi, qolgan 4000 nafari esa men yasattirgan musiqa asboblarini chalib, Egamizni madh qiladi.”
6 Dovud levilarni urugʻlariga koʻra, Gershon, Qohot va Marori guruhlariga boʻldi.
Gershon nasli
7 Gershonning Lubnax va Shimax degan ikki oʻgʻli bor edi.
8 Lubnaxning uchta oʻgʻli boʻlib, toʻngʻichi Yoxiyol, oʻrtanchasi Zatom va kenjasi Yoʻel edi.
9 Ular Lubnax naslining urugʻboshilari edilar. Shimaxning Shalumoʻt, Xaziyol va Xaron ismli uch oʻgʻli bor edi.
10-11 Keyinchalik Shimax yana toʻrt oʻgʻil koʻrdi, ularning tartibi quyidagicha edi: Yaxat, Zizo, Yoush va Bariyo. Yoush bilan Bariyoning oʻgʻillari kam boʻlgani uchun ular bitta xonadon hisoblanardilar.
Qohot nasli
12 Qohotning toʻrtta oʻgʻli boʻlib, ularning ismlari Imrom, Izxor, Xevron va Uziyol edi.
13 Imromning oʻgʻillari Horun va Muso edi. Horun Xudoga bagʻishlangan boʻlib, eng muqaddas ashyolar uchun masʼuliyat to abad uning va uning nasli zimmasiga yuklangan edi. Ular Egamizning huzurida qurbonliklar keltirishlari, Unga xizmat qilishlari va to abad Uning nomidan xalqni duo qilishlari kerak edi. 14 Xudoning odami Musoga kelsak, uning oʻgʻillari Levi qabilasining bir qismi hisoblanardi.
15 Musoning Gershom va Eliazar degan ikki oʻgʻli bor edi.
16 Gershomning oʻgʻillari orasida Shavuvol toʻngʻichi edi.
17 Eliazarning toʻngʻich farzandi Raxaviyo edi. Eliazarning undan boʻlak oʻgʻillari boʻlmasa–da, Raxaviyoning oʻgʻillari nihoyatda koʻp edi.
18 Qohotning ikkinchi oʻgʻli Izxor ham oʻgʻillar koʻrgan edi. Uning toʻngʻich oʻgʻli Shalumit edi.
19 Qohotning uchinchi oʻgʻli Xevron toʻrt oʻgʻil koʻrgan edi. Toʻngʻich oʻgʻlining ismi Yoriyo, keyingilariniki Emoriyo, Yaxaziyol va Yoxamom edi.
20 Qohotning kenja oʻgʻli Uziyolning ikki oʻgʻli bor edi: toʻngʻichi Mixo va kenjasi Ishshiyo.
Marori nasli
21 Marorining Maxli va Mushi degan ikkita oʻgʻli bor edi.
Maxlining Elazar va Kish ismli ikkita oʻgʻli bor edi. 22 Elazar oʻgʻil koʻrmay oʻtib ketdi. Undan faqat qizlar tugʻildi. Uning qizlari oʻzlarining amakivachchalari — Kishning oʻgʻillariga turmushga chiqdilar.
23 Mushining Maxli, Eder va Yorimoʻt ismli uch oʻgʻli bor edi.
24 Xullas, levilarning nomma–nom roʻyxatga kiritilgan avlodlari, ularning urugʻ va xonadonlari shulardan iborat edi. Yigirma va undan yuqori yoshdagi levilar Egamizning uyidagi xizmatga tayinlangan edilar.
25 Dovud shunday degan edi: “Isroil xalqining Xudosi — Egamiz Oʻz xalqiga tinchlik ato qildi. Endi U Quddusda abadiy istiqomat qiladi. 26 Shunday ekan, bundan buyon levilar Muqaddas chodirni yoki unda ishlatiladigan ashyolarni koʻtarib yurishlari shart emas.” 27 Dovudning oxirgi farmoniga koʻra, yigirma va undan yuqori yoshdagi levilar roʻyxatga olingan edilar.
28 Levilarning vazifasi Egamizning uyidagi xizmatda Horun nasliga yordam berish edi. Bunga: hovli va yon xonalarga masʼul boʻlish, muqaddas ashyolarni poklash va Egamizning uyidagi har qanday boshqa yumushlarni bajarish vazifalari kirar edi. 29 Shuningdek, levilar Egamiz huzuridagi xontaxta ustiga qoʻyiladigan nonlar, don nazri uchun sifatli un, xamirturushsiz chalpaklar, pishirib tayyorlanadigan nazrlar, zaytun moyi aralashtirilgan nazrlar, nazrlarning ogʻirligi, soni va hajmi uchun masʼul edilar. 30 Har kuni ertalab va kechqurun ular Maʼbadda Egamizga shukronalar aytib, hamdu sanolar kuylashlari kerak edi. 31 Shabbat kunlari, yangi oy va boshqa belgilangan bayramlarda qurbonliklar kuydirilganda ham shukronalar aytib, hamdu sanolar kuylash ularning zimmasida edi. Egamizning huzurida doimo xizmat qilayotgan levilarning soni qoidaga muvofiq boʻlishi shart edi.
32 Demak, levilar Uchrashuv chodiri va Maʼbad uchun masʼul boʻlib, Egamizning uyida xizmat qilgan oʻz qarindoshlari — Horun nasliga yordam berishlari kerak edi.
23–БОБ
1 Довуд роса кексайиб, умри охирлаб қолгач, ўғли Сулаймонни Исроил устидан шоҳ қилди.
Левилар ва уларнинг вазифалари
2 Довуд Исроилнинг ҳамма йўлбошчиларини, руҳонийларини ва левиларни тўплади. 3 У ўттиз ва ундан юқори ёшдаги левиларни ҳисоблади. Уларнинг жами 38.000 эркак чиқди. 4 Шунда Довуд айтди: “Булардан 24.000 нафари Эгамизнинг уйидаги ишлар учун масъул бўлади, 6000 нафари амалдорлар ва ҳакамлар бўлиб хизмат қилади, 5 4000 нафари дарвозабон бўлади, қолган 4000 нафари эса мен ясаттирган мусиқа асбобларини чалиб, Эгамизни мадҳ қилади.”
6 Довуд левиларни уруғларига кўра, Гершон, Қоҳот ва Марори гуруҳларига бўлди.
Гершон насли
7 Гершоннинг Лубнах ва Шимах деган икки ўғли бор эди.
8 Лубнахнинг учта ўғли бўлиб, тўнғичи Ёхиёл, ўртанчаси Затом ва кенжаси Йўэл эди.
9 Улар Лубнах наслининг уруғбошилари эдилар. Шимахнинг Шалумўт, Хазиёл ва Харон исмли уч ўғли бор эди.
10-11 Кейинчалик Шимах яна тўрт ўғил кўрди, уларнинг тартиби қуйидагича эди: Яхат, Зизо, Ёуш ва Бариё. Ёуш билан Бариёнинг ўғиллари кам бўлгани учун улар битта хонадон ҳисобланардилар.
Қоҳот насли
12 Қоҳотнинг тўртта ўғли бўлиб, уларнинг исмлари Имром, Изхор, Хеврон ва Узиёл эди.
13 Имромнинг ўғиллари Ҳорун ва Мусо эди. Ҳорун Худога бағишланган бўлиб, энг муқаддас ашёлар учун масъулият то абад унинг ва унинг насли зиммасига юкланган эди. Улар Эгамизнинг ҳузурида қурбонликлар келтиришлари, Унга хизмат қилишлари ва то абад Унинг номидан халқни дуо қилишлари керак эди. 14 Худонинг одами Мусога келсак, унинг ўғиллари Леви қабиласининг бир қисми ҳисобланарди.
15 Мусонинг Гершом ва Элиазар деган икки ўғли бор эди.
16 Гершомнинг ўғиллари орасида Шавувол тўнғичи эди.
17 Элиазарнинг тўнғич фарзанди Рахавиё эди. Элиазарнинг ундан бўлак ўғиллари бўлмаса–да, Рахавиёнинг ўғиллари ниҳоятда кўп эди.
18 Қоҳотнинг иккинчи ўғли Изхор ҳам ўғиллар кўрган эди. Унинг тўнғич ўғли Шалумит эди.
19 Қоҳотнинг учинчи ўғли Хеврон тўрт ўғил кўрган эди. Тўнғич ўғлининг исми Ёриё, кейингилариники Эмориё, Яхазиёл ва Ёхамом эди.
20 Қоҳотнинг кенжа ўғли Узиёлнинг икки ўғли бор эди: тўнғичи Михо ва кенжаси Ишшиё.
Марори насли
21 Марорининг Махли ва Муши деган иккита ўғли бор эди.
Махлининг Элазар ва Киш исмли иккита ўғли бор эди. 22 Элазар ўғил кўрмай ўтиб кетди. Ундан фақат қизлар туғилди. Унинг қизлари ўзларининг амакиваччалари — Кишнинг ўғилларига турмушга чиқдилар.
23 Мушининг Махли, Эдер ва Ёримўт исмли уч ўғли бор эди.
24 Хуллас, левиларнинг номма–ном рўйхатга киритилган авлодлари, уларнинг уруғ ва хонадонлари шулардан иборат эди. Йигирма ва ундан юқори ёшдаги левилар Эгамизнинг уйидаги хизматга тайинланган эдилар.
25 Довуд шундай деган эди: “Исроил халқининг Худоси — Эгамиз Ўз халқига тинчлик ато қилди. Энди У Қуддусда абадий истиқомат қилади. 26 Шундай экан, бундан буён левилар Муқаддас чодирни ёки унда ишлатиладиган ашёларни кўтариб юришлари шарт эмас.” 27 Довуднинг охирги фармонига кўра, йигирма ва ундан юқори ёшдаги левилар рўйхатга олинган эдилар.
28 Левиларнинг вазифаси Эгамизнинг уйидаги хизматда Ҳорун наслига ёрдам бериш эди. Бунга: ҳовли ва ён хоналарга масъул бўлиш, муқаддас ашёларни поклаш ва Эгамизнинг уйидаги ҳар қандай бошқа юмушларни бажариш вазифалари кирар эди. 29 Шунингдек, левилар Эгамиз ҳузуридаги хонтахта устига қўйиладиган нонлар, дон назри учун сифатли ун, хамиртурушсиз чалпаклар, пишириб тайёрланадиган назрлар, зайтун мойи аралаштирилган назрлар, назрларнинг оғирлиги, сони ва ҳажми учун масъул эдилар. 30 Ҳар куни эрталаб ва кечқурун улар Маъбадда Эгамизга шукроналар айтиб, ҳамду санолар куйлашлари керак эди. 31 Шаббат кунлари, янги ой ва бошқа белгиланган байрамларда қурбонликлар куйдирилганда ҳам шукроналар айтиб, ҳамду санолар куйлаш уларнинг зиммасида эди. Эгамизнинг ҳузурида доимо хизмат қилаётган левиларнинг сони қоидага мувофиқ бўлиши шарт эди.
32 Демак, левилар Учрашув чодири ва Маъбад учун масъул бўлиб, Эгамизнинг уйида хизмат қилган ўз қариндошлари — Ҳорун наслига ёрдам беришлари керак эди.
