6–BOB
1 Xudoning hamkorlari sifatida sizlarga yolvoramiz: Xudoning inoyati hayotingizda samarasiz boʻlmasin. 2 Xudo shunday deb aytyapti:
“Muruvvat payti kelganda,
Men senga quloq solaman.
Najot kuni kelganda,
Men senga yordam beraman.”
Oʻsha muruvvat payti hozirgi paytdir, oʻsha najot kuni bugungi kundir.
Xudoning haqiqiy xizmatkorlari
3 Xizmatimizda birorta ayb topilmasin deb, biz hech kimni zarracha ranjitmaymiz. 4 Xudoning haqiqiy xizmatkorlari ekanligimizni oʻz harakatlarimiz bilan isbotlayapmiz. Har xil qiyinchiliklaru kulfatlar boshimizga tushganda, tang ahvolda qolganimizda sabr–toqat koʻrsatyapmiz. 5 Bizni urganlarida, qamoqqa tashlaganlarida, gʻalayonlarda qolganimizda, mashaqqat bilan mehnat qilganimizda, uyqusizlikda va och qolganimizda, hammasiga bardosh berdik. 6 Poklik, donolik, sabr–toqat bilan yashab, mehribon boʻlib, Muqaddas Ruh bizda maskan qilganini koʻrsatib, samimiy muhabbatimiz bilan Xudoning xizmatkorlari ekanimizni isbotladik. 7 Biz haqiqatni eʼlon qilyapmiz, Xudoning qudratiga tayanib xizmat qilyapmiz. Ham oʻng qoʻlimizda, ham chap qoʻlimizda solihlik qurollarini tutib yuribmiz. 8 Sharafga erishamizmi yoki isnodga qolamizmi, boshqalar bizni haqorat qiladimi yoki maqtaydimi, har qanday vaziyatda Xudoning xizmatkorlari ekanligimizni koʻrsatyapmiz. Bizni yolgʻonchi, deb aytishadi, ammo biz haqiqatgoʻymiz. 9 Mashhur emasmiz, ammo bizni bilishadi. Bizni oʻlgan deb hisoblaydilar, ammo mana, tirikmiz. Bizni jazoga tortadilar, ammo oʻlimga mahkum qilmaydilar. 10 Bizni xafa qilyaptilar, ammo doimo xursandmiz. Oʻzimiz kambagʻalmiz–u, koʻp kishilarni boyitamiz. Hech narsamiz yoʻgʻ–u, ammo hamma narsaga egamiz.
11 Ey Korinfliklar! Sizlarga bemalol, ochiq–oydin gapirdik. Sizlarga bagʻrimizni keng ochdik. 12 Biz sizlardan mehr–muhabbatimizni ayamadik, sizlar esa oʻz mehringizni bizdan qizgʻanasiz. 13 Sizlarga oʻz farzandlarimga gapirayotganday gapiryapman. Biz sizlarga qanday muomala qilsak, sizlar ham bizga shunday muomala qiling: bizga bagʻringizni keng oching.
Barhayot Xudoning maʼbadi
14 Imonsizlar bilan sherik boʻlmanglar . Solihlik bilan qabihlikning orasida qanday aloqa bor?! Nur bilan zulmat orasida qanday umumiylik boʻlishi mumkin?! 15 Masih bilan shayton orasida qanday ittifoq boʻlishi mumkin?! Imonli bilan imonsizning orasida qanday sheriklik boʻlishi mumkin?! 16 Xudoning maʼbadi bilan butlar orasida qanday umumiylik bor?! Axir, biz barhayot Xudoning maʼbadimiz–ku! Xudo shunday deb aytgan:
“Men ularning orasida yashayman,
Ularning orasida yuraman.
Men ularning Xudosi boʻlaman,
Ular esa Mening xalqim boʻladi.”
17 Binobarin, Egamiz shunday degan:
“Xalqlar orasidan chiqinglar,
Ulardan ajralib chiqinglar,
Haromga qoʻl tekkizmang,
Shunda Men sizlarni qabul qilaman.”
18 Qodir Xudo — Egamiz yana shunday deb aytgan:
“Men sizlarga ota boʻlaman,
Sizlar esa Menga oʻgʻil–qizlar boʻlasizlar.”
6–БОБ
1 Худонинг ҳамкорлари сифатида сизларга ёлворамиз: Худонинг инояти ҳаётингизда самарасиз бўлмасин. 2 Худо шундай деб айтяпти:
“Мурувват пайти келганда,
Мен сенга қулоқ соламан.
Нажот куни келганда,
Мен сенга ёрдам бераман.”
Ўша мурувват пайти ҳозирги пайтдир, ўша нажот куни бугунги кундир.
Худонинг ҳақиқий хизматкорлари
3 Хизматимизда бирорта айб топилмасин деб, биз ҳеч кимни заррача ранжитмаймиз. 4 Худонинг ҳақиқий хизматкорлари эканлигимизни ўз ҳаракатларимиз билан исботлаяпмиз. Ҳар хил қийинчиликлару кулфатлар бошимизга тушганда, танг аҳволда қолганимизда сабр–тоқат кўрсатяпмиз. 5 Бизни урганларида, қамоққа ташлаганларида, ғалаёнларда қолганимизда, машаққат билан меҳнат қилганимизда, уйқусизликда ва оч қолганимизда, ҳаммасига бардош бердик. 6 Поклик, донолик, сабр–тоқат билан яшаб, меҳрибон бўлиб, Муқаддас Руҳ бизда маскан қилганини кўрсатиб, самимий муҳаббатимиз билан Худонинг хизматкорлари эканимизни исботладик. 7 Биз ҳақиқатни эълон қиляпмиз, Худонинг қудратига таяниб хизмат қиляпмиз. Ҳам ўнг қўлимизда, ҳам чап қўлимизда солиҳлик қуролларини тутиб юрибмиз. 8 Шарафга эришамизми ёки иснодга қоламизми, бошқалар бизни ҳақорат қиладими ёки мақтайдими, ҳар қандай вазиятда Худонинг хизматкорлари эканлигимизни кўрсатяпмиз. Бизни ёлғончи, деб айтишади, аммо биз ҳақиқатгўймиз. 9 Машҳур эмасмиз, аммо бизни билишади. Бизни ўлган деб ҳисоблайдилар, аммо мана, тирикмиз. Бизни жазога тортадилар, аммо ўлимга маҳкум қилмайдилар. 10 Бизни хафа қиляптилар, аммо доимо хурсандмиз. Ўзимиз камбағалмиз–у, кўп кишиларни бойитамиз. Ҳеч нарсамиз йўғ–у, аммо ҳамма нарсага эгамиз.
11 Эй Коринфликлар! Сизларга бемалол, очиқ–ойдин гапирдик. Сизларга бағримизни кенг очдик. 12 Биз сизлардан меҳр–муҳаббатимизни аямадик, сизлар эса ўз меҳрингизни биздан қизғанасиз. 13 Сизларга ўз фарзандларимга гапираётгандай гапиряпман. Биз сизларга қандай муомала қилсак, сизлар ҳам бизга шундай муомала қилинг: бизга бағрингизни кенг очинг.
Барҳаёт Худонинг маъбади
14 Имонсизлар билан шерик бўлманглар . Солиҳлик билан қабиҳликнинг орасида қандай алоқа бор?! Нур билан зулмат орасида қандай умумийлик бўлиши мумкин?! 15 Масиҳ билан шайтон орасида қандай иттифоқ бўлиши мумкин?! Имонли билан имонсизнинг орасида қандай шериклик бўлиши мумкин?! 16 Худонинг маъбади билан бутлар орасида қандай умумийлик бор?! Ахир, биз барҳаёт Худонинг маъбадимиз–ку! Худо шундай деб айтган:
“Мен уларнинг орасида яшайман,
Уларнинг орасида юраман.
Мен уларнинг Худоси бўламан,
Улар эса Менинг халқим бўлади.”
17 Бинобарин, Эгамиз шундай деган:
“Халқлар орасидан чиқинглар,
Улардан ажралиб чиқинглар,
Ҳаромга қўл теккизманг,
Шунда Мен сизларни қабул қиламан.”
18 Қодир Худо — Эгамиз яна шундай деб айтган:
“Мен сизларга ота бўламан,
Сизлар эса Менга ўғил–қизлар бўласизлар.”
