60–BOB
Quddusning ulugʻvor kelajagi
1 Ey Quddus xalqi, tur, porlagin! Axir, nuring keldi,
Egamizning ulugʻvorligi ustingga yogʻildi.
2 Mana, yer yuzini zulmat qopladi,
Xalqlarni quyuq zulmat bosdi.
Ammo Egamiz sening oldingga keladi,
Oʻz ulugʻvorligini boshing uzra porlatadi.
3 Xalqlar sening nuringga keladi,
Tonggi yorugʻligingga shohlar keladi.
4 Boshingni koʻtarib, atrofingga boq!
Hammasi toʻplanib, senga kelmoqda.
Oʻgʻillaringni uzoqlardan olib keladilar,
Qizlaringni chaqaloqlarday qoʻllarda koʻtarib keladilar.
5 Oʻshanda shularni koʻrib, nur sochasan,
Yuraging hapriqib, qinidan chiqquday boʻladi.
Zotan, dengiz orqali keladigan boyliklar senga nasib etadi,
Xalqlarning boyligi senga keladi.
6 Yurting tuya suruvlariga toʻlib ketadi,
Midiyon, Efaxning boʻtaloqlari bilan toʻladi.
Ularning hammasi Shava yurtidan keladi,
Oltinu tutatqilar olib keladi.
Ular Egamizga madhlar aytadi.
7 Kedarning hamma qoʻy suruvlari senga keladi,
Navayotning qoʻchqorlari senga xizmat qiladi.
Egamizning qurbongohida
Ular qurbonlik deb qabul qilinadi.
Egamiz Oʻz uyini yanada ulugʻvor qiladi.
8 Bulutlar kabi, uchayotgan nima u?
Inlariga uchayotgan kaptarlarga oʻxshash nima u?
9 Shubhasiz, dengiz ortidagi yurtlar
Egamizga muntazir boʻladi.
Isroil xalqining Muqaddas Xudosi —
Egangiz Xudoning sharafiga
Tarshish kemalari boshchiligida
Bolalaringizni uzoqdan olib kelishadi,
Oltinu kumushlari bilan birga olib kelishadi.
Zotan, Egamiz seni ulugʻvorlik bilan qoplagan.
10 Egamiz Quddusga shunday deydi:
“Begonalar devorlaringni tuzatadi,
Shohlari senga xizmat qiladi.
Gʻazablanganimda senga jazo bergan boʻlsam ham,
Endi marhamat qilib, senga shafqat qilaman.
11 Darvozalaring doimo ochiq boʻladi,
Ular kechayu kunduz yopilmaydi.
Shunda xalqlar senga boyliklarini olib keladi,
Ularni oʻz shohlari boshlab keladi.
12 Senga xizmat qilmagan elatu shohlik yoʻq boʻladi,
Ha, u xalqlar batamom nobud boʻladi.
13 Lubnonning faxrlangan daraxtlari
Senga olib kelinadi.
Sarv, chinor, sadr yogʻochlari
Muqaddas maskanimni bezatish uchun keltiriladi.
Oyogʻim turgan shu joyga Men shuhrat keltiraman.
14 Senga zulm qilganlarning oʻgʻillari kelib,
Senga taʼzim qiladilar.
Sendan nafratlanganlarning hammasi
Oyoqlaringga yiqiladi.
Ular seni «Egamizning shahri,
Isroil xalqining Muqaddas Xudosining shahri — Sion» deb atashadi.
15 Ilgari sen tashlab ketilgan,
Hamma nafrat etgan,
Biror kimsa oʻtmaydigan joy eding.
Endi Men seni abadiy ulugʻvor qilaman,
Jamiki nasllarning shodligi qilaman.
16 Elatlar, shohlar seni ona kabi emizadilar,
Oʻshanda Men, Egang, sening najotkoring ekanligimni bilib olasan,
Yoqub naslining qudratli Xudosi —
Qutqaruvching Men ekanligimni anglaysan.
17 Senga bronza oʻrniga oltin,
Temir oʻrniga kumush,
Yogʻoch oʻrniga bronza,
Tosh oʻrniga temir keltiraman.
Tinchlik sening hakaming,
Solihlik hukmdoring boʻladi.
18 Yurtingda endi zoʻravonlik tovushi eshitilmaydi,
Chegarang ichida vayronagarchilik, halokat boʻlmaydi.
Devorlaringga, Najot deb nom qoʻyasan,
Darvozalaringga, Sharaf deya nom berasan.
Xudoning Oʻzi Quddusning ulugʻvorligidir
19 Endi kunduzi quyosh senga nur sochmaydi,
Oy ham yorugʻlik manbaing boʻlmaydi.
Senga Mening Oʻzim to abad nur manbai boʻlaman,
Men, Xudoying, sening ulugʻvorliging boʻlaman.
20 Quyoshing hech qachon botmaydi,
Oying endi boshqa yashirinmaydi,
Chunki Men sening quyoshu oying boʻlaman.
Ha, Men sening to abad nuring boʻlaman,
Qaygʻuli kunlaring tamom boʻladi.
21 Xalqingning hammasi solih boʻladi,
Ular yurtni to abad mulk qilib oladi.
Oʻzim oʻtqazgan niholdir ular,
Menga shuhrat keltirsin deb, yaratgan
Qoʻllarimning ijodi ular.
22 Eng kichik odamingdan mingta odam chiqadi,
Eng zaif odamingdan kuchli xalq paydo boʻladi.
Men, Egang, buni oʻz vaqtida tez bajo keltiraman.”
60–БОБ
Қуддуснинг улуғвор келажаги
1 Эй Қуддус халқи, тур, порлагин! Ахир, нуринг келди,
Эгамизнинг улуғворлиги устингга ёғилди.
2 Мана, ер юзини зулмат қоплади,
Халқларни қуюқ зулмат босди.
Аммо Эгамиз сенинг олдингга келади,
Ўз улуғворлигини бошинг узра порлатади.
3 Халқлар сенинг нурингга келади,
Тонгги ёруғлигингга шоҳлар келади.
4 Бошингни кўтариб, атрофингга боқ!
Ҳаммаси тўпланиб, сенга келмоқда.
Ўғилларингни узоқлардан олиб келадилар,
Қизларингни чақалоқлардай қўлларда кўтариб келадилар.
5 Ўшанда шуларни кўриб, нур сочасан,
Юрагинг ҳаприқиб, қинидан чиққудай бўлади.
Зотан, денгиз орқали келадиган бойликлар сенга насиб этади,
Халқларнинг бойлиги сенга келади.
6 Юртинг туя сурувларига тўлиб кетади,
Мидиён, Эфахнинг бўталоқлари билан тўлади.
Уларнинг ҳаммаси Шава юртидан келади,
Олтину тутатқилар олиб келади.
Улар Эгамизга мадҳлар айтади.
7 Кедарнинг ҳамма қўй сурувлари сенга келади,
Наваётнинг қўчқорлари сенга хизмат қилади.
Эгамизнинг қурбонгоҳида
Улар қурбонлик деб қабул қилинади.
Эгамиз Ўз уйини янада улуғвор қилади.
8 Булутлар каби, учаётган нима у?
Инларига учаётган каптарларга ўхшаш нима у?
9 Шубҳасиз, денгиз ортидаги юртлар
Эгамизга мунтазир бўлади.
Исроил халқининг Муқаддас Худоси —
Эгангиз Худонинг шарафига
Таршиш кемалари бошчилигида
Болаларингизни узоқдан олиб келишади,
Олтину кумушлари билан бирга олиб келишади.
Зотан, Эгамиз сени улуғворлик билан қоплаган.
10 Эгамиз Қуддусга шундай дейди:
“Бегоналар деворларингни тузатади,
Шоҳлари сенга хизмат қилади.
Ғазабланганимда сенга жазо берган бўлсам ҳам,
Энди марҳамат қилиб, сенга шафқат қиламан.
11 Дарвозаларинг доимо очиқ бўлади,
Улар кечаю кундуз ёпилмайди.
Шунда халқлар сенга бойликларини олиб келади,
Уларни ўз шоҳлари бошлаб келади.
12 Сенга хизмат қилмаган элату шоҳлик йўқ бўлади,
Ҳа, у халқлар батамом нобуд бўлади.
13 Лубноннинг фахрланган дарахтлари
Сенга олиб келинади.
Сарв, чинор, садр ёғочлари
Муқаддас масканимни безатиш учун келтирилади.
Оёғим турган шу жойга Мен шуҳрат келтираман.
14 Сенга зулм қилганларнинг ўғиллари келиб,
Сенга таъзим қиладилар.
Сендан нафратланганларнинг ҳаммаси
Оёқларингга йиқилади.
Улар сени «Эгамизнинг шаҳри,
Исроил халқининг Муқаддас Худосининг шаҳри — Сион» деб аташади.
15 Илгари сен ташлаб кетилган,
Ҳамма нафрат этган,
Бирор кимса ўтмайдиган жой эдинг.
Энди Мен сени абадий улуғвор қиламан,
Жамики наслларнинг шодлиги қиламан.
16 Элатлар, шоҳлар сени она каби эмизадилар,
Ўшанда Мен, Эганг, сенинг нажоткоринг эканлигимни билиб оласан,
Ёқуб наслининг қудратли Худоси —
Қутқарувчинг Мен эканлигимни англайсан.
17 Сенга бронза ўрнига олтин,
Темир ўрнига кумуш,
Ёғоч ўрнига бронза,
Тош ўрнига темир келтираман.
Тинчлик сенинг ҳакаминг,
Солиҳлик ҳукмдоринг бўлади.
18 Юртингда энди зўравонлик товуши эшитилмайди,
Чегаранг ичида вайронагарчилик, ҳалокат бўлмайди.
Деворларингга, Нажот деб ном қўясан,
Дарвозаларингга, Шараф дея ном берасан.
Худонинг Ўзи Қуддуснинг улуғворлигидир
19 Энди кундузи қуёш сенга нур сочмайди,
Ой ҳам ёруғлик манбаинг бўлмайди.
Сенга Менинг Ўзим то абад нур манбаи бўламан,
Мен, Худойинг, сенинг улуғворлигинг бўламан.
20 Қуёшинг ҳеч қачон ботмайди,
Ойинг энди бошқа яширинмайди,
Чунки Мен сенинг қуёшу ойинг бўламан.
Ҳа, Мен сенинг то абад нуринг бўламан,
Қайғули кунларинг тамом бўлади.
21 Халқингнинг ҳаммаси солиҳ бўлади,
Улар юртни то абад мулк қилиб олади.
Ўзим ўтқазган ниҳолдир улар,
Менга шуҳрат келтирсин деб, яратган
Қўлларимнинг ижоди улар.
22 Энг кичик одамингдан мингта одам чиқади,
Энг заиф одамингдан кучли халқ пайдо бўлади.
Мен, Эганг, буни ўз вақтида тез бажо келтираман.”
