36–BOB
Isroil togʻlari haqida bashorat
1 Egamiz menga dedi: “Ey inson, Isroil togʻlari haqida shunday bashorat qil: «Ey Isroil togʻlari, Egamizning soʻzini eshiting. 2 Egamiz Rabbiy shunday demoqda: gʻanimlaringiz sizni mazax qilib: ‘Aha! Bu koʻhna tepaliklar endi bizniki boʻldi’, deb aytgan edilar.» 3 Shuning uchun, ey inson, bashorat qilib ayt: «Egamiz Rabbiy shunday demoqda: qoʻshni xalqlar sizlarga har yoqdan hamla qilib, sizlarni xonavayron qilganlari uchun, sizlar ularning mulki boʻldingiz, odamlardan haqoratlar eshitib, xoʻrliklar koʻrdingiz. 4 Ey Isroil togʻlari, endi Mening soʻzimni eshiting! Men, Egangiz Rabbiy, togʻlaru qirlarga, soyliklaru vodiylarga, xarobazorlaru huvullagan shaharlarga gapirmoqdaman. Axir, bu shaharlar atrofdagi hamma xalqlarga oʻlja va kulgi boʻldi. 5 Men, Egangiz Rabbiy, aytamanki, Isroil atrofida yashagan xalqlardan, xususan, Edom xalqidan qattiq gʻazabdaman. Chunki ular nafrat tuygʻusiga berilib, yaylovlarni talon–taroj qilish uchun yurtimni qoʻlga kiritdilar. Shunda oʻzida yoʻq xursand boʻldilar.» 6 Ey inson, shu sababdan Isroil yurti haqida bashorat qilib, togʻlaru qirlarga, soyliklaru vodiylarga ayt: «Egamiz Rabbiy shunday demoqda: qoʻshni xalqlar sizlarni qanchalik xoʻrlaganini koʻrib, gʻazabim keldi, rashkim qoʻzidi. 7 Shu sababdan Men, Egangiz Rabbiy, ont ichib aytamanki, atrofingizdagi barcha xalqlarni xoʻrlamay qoʻymayman.
8 Sizlar esa, ey Isroil togʻlari, butoq chiqarasizlar. Xalqim Isroil uchun moʻl hosil yetishtirasizlar. Ha, koʻp oʻtmay ular oʻz yurtiga qaytib keladilar. 9 Men sizlarga yuz buraman, Oʻzim sizlarga gʻamxoʻrlik qilaman. Yerlaringiz shudgor qilinadi, ekinlar ekiladi. 10 Men Isroil aholisini koʻpaytiraman. Butun Isroil xonadonini son–sanoqsiz qilaman. Huvullagan shaharlarga odamlar koʻchib keladi, vayronalar qayta tiklanadi. 11 Nafaqat odamlarning, balki mol–qoʻylarning ham soni behad koʻpayadi. Ular koʻpayib, barakali boʻladi. Yurtingiz ilgarigiday odamlarga toʻlib–toshadi. Men sizlarni oldingidan ham aʼloroq hayotga erishtiraman. Oʻshanda Egangiz Men ekanligimni bilib olasizlar. 12 Men xalqim Isroilni oldingizga yetaklab kelaman. Ular yerlaringizga egalik qiladilar, sizlar xalqimning mulki boʻlasizlar. Xalqimning farzandlarini boshqa nobud qilmaysizlar.
13 Egamiz Rabbiy shunday demoqda: ey Isroil togʻlari, odamlar sizlar haqingizda shunday gapirishadi: ‘Isroil yurti oʻz odamlarini nobud qiladi, oʻz xalqini farzandlaridan judo qiladi.’ 14 Ammo endi sizlar odamlarni nobud qilmaysizlar, xalqingizni farzandlaridan judo qilmaysizlar, — deb aytmoqda Egamiz Rabbiy. 15 — Begona xalqlar sizlarni haqorat qilishlariga va ustingizdan kulishlariga Men yoʻl qoʻymayman. Bundan buyon xalqimning qoqilishiga sizlar sabab boʻlmaysiz. Egamiz Rabbiyning kalomi shudir.»”
Isroil xalqining yangi hayoti
16 Egamiz menga Oʻz soʻzini ayon qildi: 17 “Ey inson, Isroil xalqi ona yurtida yashab yurgan paytida yerni yaramas qilmishlari bilan bulgʻagan edi. Ularning bunday qilmishlari Mening nazarimda hayz koʻrgan ayolday nopok edi . 18 Ular yurtda qon toʻkkanlari uchun, butlarga sigʻinib zaminni bulgʻaganlari uchun, Men ularning ustiga gʻazabimni sochgan edim. 19 Ularni xalqlar orasiga tarqatib tashlagan edim, boshqa yurtlarga quvib yuborgan edim. Men ularni tutgan yoʻllari va qilgan qilmishlariga yarasha jazolagan edim. 20 Biroq ular borgan joylarida Meni badnom qilishdi. Ularni koʻrgan odamlar: «Bu Xudoning xalqi–ku! Ular Egasining yurtidan chiqib ketishga majbur boʻlibdi–da!» deb aytishar edi. 21 Ha, Isroil xalqi borgan joyida Meni badnom qildi. Bulgʻangan muqaddas nomim uchun Men qaygʻurdim.
22 Shunday ekan, Isroil xalqiga ayt: «Egamiz Rabbiy shunday demoqda: Men sizlarni yurtingizga qaytarib olib kelaman. Lekin buni sizlar uchun emas, balki xalqlar orasida sizlar bulgʻagan Oʻz nomim uchun qilaman. 23 Sizlar bulgʻagan Mening buyuk nomim qanchalik muqaddas ekanligini Men barcha xalqlarga koʻrsataman. Oʻshanda Egasi Men ekanligimni ular bilib oladilar. Men sizlar orqali Oʻz muqaddasligimni ularga ayon qilaman. Egamiz Rabbiyning kalomi shudir.
24 Axir, sizlarni barcha xalqlar orasidan, hamma yurtlardan yigʻib olaman. Oʻz yurtingizga olib borib oʻrnashtiraman. 25 Ustingizga toza suvdan sepib, sizlarni poklayman. Barcha nopokliklaru butlaringizdan tozalayman. 26 Sizlarga yangi yurak berib, qalbingizni yangi ruhga toʻldiraman. Bagʻringizdagi tosh yurakning oʻrniga yumshoq yurak beraman. 27 Ichingizga Oʻz Ruhimni solaman. Sizlar farmonlarimga rioya qiladigan, qonun–qoidalarimni bitta qoldirmay bajaradigan boʻlasizlar. 28 Shunda Men ota–bobolaringizga bergan bu yurtda yashaysizlar. Sizlar Mening xalqim boʻlasiz, Men esa sizning Xudoyingiz boʻlaman. 29 Men sizlarni barcha nopokliklardan xalos qilaman. Gʻalla hosilini moʻl yetishtirib, ocharchilikka chek qoʻyaman. 30 Ovqat tanqisligidan xalqlar orasida xor boʻlmasligingiz uchun bogʻlaru dalalaringizga moʻl hosil beraman. 31 Shunda sizlar yovuz yoʻllaringizni, qabih qilmishlaringizni eslaysizlar, qilgan gunohlaringiz va jirkanch odatlaringiz uchun oʻzingizdan nafratlanib ketasizlar. 32 Ey Isroil xalqi, bilib qoʻyinglar, Men sizlarga qilmoqchi boʻlgan bu yaxshiliklarga loyiq emassiz, biroq shu orqali Men sizlarni uyaltiraman. Qilgan qilmishlaringizdan pushaymon boʻlasiz. Egamiz Rabbiyning kalomi shudir.»
33 Ey inson, ularga ayt: «Egamiz Rabbiy shunday demoqda: Men sizlarni gunohlardan poklaganimda, odamlarni olib kelib, shaharlaringizga oʻrnashtiraman. Vayrona boʻlib yotgan xarobalaringiz tiklanadi. 34 Qachonlardir sayyohlar kezib yurgan tashlandiq, qarovsiz yerlarga qayta ishlov beriladi. 35 Ular bu yerlarni koʻrganda shunday deb aytishadi: ‘Voajabo! Tashlandiq boʻlib yotgan bu yerlar Adan bogʻiday yashnab ketibdi–ku! Huvullab yotgan xarob shaharlar mustahkam devorlar bilan oʻralib, obod boʻlibdi–ku!’ 36 Shunda atrofdagi omon qolgan xalqlar xarob shaharlarni Men, Egangiz, qayta qurganimni, yalang maydonlarga Men ekin ekkanimni bilib olishadi. Men, Egangiz, aytgan bu soʻzlarimni albatta amalga oshiraman.»”
37 Egamiz Rabbiy shunday demoqda: “Men xalqim Isroilning iltijolariga quloq tutib, ularni qoʻylarday son–sanoqsiz qilaman. 38 Bayram arafasida Quddus koʻchalari qurbonlik qilinadigan qoʻylar bilan toʻlib–toshganiday, hozir vayron boʻlib yotgan shaharlar ham odamlar bilan toʻlib–toshadi. Oʻshanda Isroil xalqi Egasi Men ekanligimni bilib oladi.”
36–БОБ
Исроил тоғлари ҳақида башорат
1 Эгамиз менга деди: “Эй инсон, Исроил тоғлари ҳақида шундай башорат қил: «Эй Исроил тоғлари, Эгамизнинг сўзини эшитинг. 2 Эгамиз Раббий шундай демоқда: ғанимларингиз сизни мазах қилиб: ‘Аҳа! Бу кўҳна тепаликлар энди бизники бўлди’, деб айтган эдилар.» 3 Шунинг учун, эй инсон, башорат қилиб айт: «Эгамиз Раббий шундай демоқда: қўшни халқлар сизларга ҳар ёқдан ҳамла қилиб, сизларни хонавайрон қилганлари учун, сизлар уларнинг мулки бўлдингиз, одамлардан ҳақоратлар эшитиб, хўрликлар кўрдингиз. 4 Эй Исроил тоғлари, энди Менинг сўзимни эшитинг! Мен, Эгангиз Раббий, тоғлару қирларга, сойликлару водийларга, харобазорлару ҳувиллаган шаҳарларга гапирмоқдаман. Ахир, бу шаҳарлар атрофдаги ҳамма халқларга ўлжа ва кулги бўлди. 5 Мен, Эгангиз Раббий, айтаманки, Исроил атрофида яшаган халқлардан, хусусан, Эдом халқидан қаттиқ ғазабдаман. Чунки улар нафрат туйғусига берилиб, яйловларни талон–тарож қилиш учун юртимни қўлга киритдилар. Шунда ўзида йўқ хурсанд бўлдилар.» 6 Эй инсон, шу сабабдан Исроил юрти ҳақида башорат қилиб, тоғлару қирларга, сойликлару водийларга айт: «Эгамиз Раббий шундай демоқда: қўшни халқлар сизларни қанчалик хўрлаганини кўриб, ғазабим келди, рашким қўзиди. 7 Шу сабабдан Мен, Эгангиз Раббий, онт ичиб айтаманки, атрофингиздаги барча халқларни хўрламай қўймайман.
8 Сизлар эса, эй Исроил тоғлари, бутоқ чиқарасизлар. Халқим Исроил учун мўл ҳосил етиштирасизлар. Ҳа, кўп ўтмай улар ўз юртига қайтиб келадилар. 9 Мен сизларга юз бураман, Ўзим сизларга ғамхўрлик қиламан. Ерларингиз шудгор қилинади, экинлар экилади. 10 Мен Исроил аҳолисини кўпайтираман. Бутун Исроил хонадонини сон–саноқсиз қиламан. Ҳувиллаган шаҳарларга одамлар кўчиб келади, вайроналар қайта тикланади. 11 Нафақат одамларнинг, балки мол–қўйларнинг ҳам сони беҳад кўпаяди. Улар кўпайиб, баракали бўлади. Юртингиз илгаригидай одамларга тўлиб–тошади. Мен сизларни олдингидан ҳам аълороқ ҳаётга эриштираман. Ўшанда Эгангиз Мен эканлигимни билиб оласизлар. 12 Мен халқим Исроилни олдингизга етаклаб келаман. Улар ерларингизга эгалик қиладилар, сизлар халқимнинг мулки бўласизлар. Халқимнинг фарзандларини бошқа нобуд қилмайсизлар.
13 Эгамиз Раббий шундай демоқда: эй Исроил тоғлари, одамлар сизлар ҳақингизда шундай гапиришади: ‘Исроил юрти ўз одамларини нобуд қилади, ўз халқини фарзандларидан жудо қилади.’ 14 Аммо энди сизлар одамларни нобуд қилмайсизлар, халқингизни фарзандларидан жудо қилмайсизлар, — деб айтмоқда Эгамиз Раббий. 15 — Бегона халқлар сизларни ҳақорат қилишларига ва устингиздан кулишларига Мен йўл қўймайман. Бундан буён халқимнинг қоқилишига сизлар сабаб бўлмайсиз. Эгамиз Раббийнинг каломи шудир.»”
Исроил халқининг янги ҳаёти
16 Эгамиз менга Ўз сўзини аён қилди: 17 “Эй инсон, Исроил халқи она юртида яшаб юрган пайтида ерни ярамас қилмишлари билан булғаган эди. Уларнинг бундай қилмишлари Менинг назаримда ҳайз кўрган аёлдай нопок эди . 18 Улар юртда қон тўкканлари учун, бутларга сиғиниб заминни булғаганлари учун, Мен уларнинг устига ғазабимни сочган эдим. 19 Уларни халқлар орасига тарқатиб ташлаган эдим, бошқа юртларга қувиб юборган эдим. Мен уларни тутган йўллари ва қилган қилмишларига яраша жазолаган эдим. 20 Бироқ улар борган жойларида Мени бадном қилишди. Уларни кўрган одамлар: «Бу Худонинг халқи–ку! Улар Эгасининг юртидан чиқиб кетишга мажбур бўлибди–да!» деб айтишар эди. 21 Ҳа, Исроил халқи борган жойида Мени бадном қилди. Булғанган муқаддас номим учун Мен қайғурдим.
22 Шундай экан, Исроил халқига айт: «Эгамиз Раббий шундай демоқда: Мен сизларни юртингизга қайтариб олиб келаман. Лекин буни сизлар учун эмас, балки халқлар орасида сизлар булғаган Ўз номим учун қиламан. 23 Сизлар булғаган Менинг буюк номим қанчалик муқаддас эканлигини Мен барча халқларга кўрсатаман. Ўшанда Эгаси Мен эканлигимни улар билиб оладилар. Мен сизлар орқали Ўз муқаддаслигимни уларга аён қиламан. Эгамиз Раббийнинг каломи шудир.
24 Ахир, сизларни барча халқлар орасидан, ҳамма юртлардан йиғиб оламан. Ўз юртингизга олиб бориб ўрнаштираман. 25 Устингизга тоза сувдан сепиб, сизларни поклайман. Барча нопокликлару бутларингиздан тозалайман. 26 Сизларга янги юрак бериб, қалбингизни янги руҳга тўлдираман. Бағрингиздаги тош юракнинг ўрнига юмшоқ юрак бераман. 27 Ичингизга Ўз Руҳимни соламан. Сизлар фармонларимга риоя қиладиган, қонун–қоидаларимни битта қолдирмай бажарадиган бўласизлар. 28 Шунда Мен ота–боболарингизга берган бу юртда яшайсизлар. Сизлар Менинг халқим бўласиз, Мен эса сизнинг Худойингиз бўламан. 29 Мен сизларни барча нопокликлардан халос қиламан. Ғалла ҳосилини мўл етиштириб, очарчиликка чек қўяман. 30 Овқат танқислигидан халқлар орасида хор бўлмаслигингиз учун боғлару далаларингизга мўл ҳосил бераман. 31 Шунда сизлар ёвуз йўлларингизни, қабиҳ қилмишларингизни эслайсизлар, қилган гуноҳларингиз ва жирканч одатларингиз учун ўзингиздан нафратланиб кетасизлар. 32 Эй Исроил халқи, билиб қўйинглар, Мен сизларга қилмоқчи бўлган бу яхшиликларга лойиқ эмассиз, бироқ шу орқали Мен сизларни уялтираман. Қилган қилмишларингиздан пушаймон бўласиз. Эгамиз Раббийнинг каломи шудир.»
33 Эй инсон, уларга айт: «Эгамиз Раббий шундай демоқда: Мен сизларни гуноҳлардан поклаганимда, одамларни олиб келиб, шаҳарларингизга ўрнаштираман. Вайрона бўлиб ётган харобаларингиз тикланади. 34 Қачонлардир сайёҳлар кезиб юрган ташландиқ, қаровсиз ерларга қайта ишлов берилади. 35 Улар бу ерларни кўрганда шундай деб айтишади: ‘Воажабо! Ташландиқ бўлиб ётган бу ерлар Адан боғидай яшнаб кетибди–ку! Ҳувиллаб ётган хароб шаҳарлар мустаҳкам деворлар билан ўралиб, обод бўлибди–ку!’ 36 Шунда атрофдаги омон қолган халқлар хароб шаҳарларни Мен, Эгангиз, қайта қурганимни, яланг майдонларга Мен экин экканимни билиб олишади. Мен, Эгангиз, айтган бу сўзларимни албатта амалга ошираман.»”
37 Эгамиз Раббий шундай демоқда: “Мен халқим Исроилнинг илтижоларига қулоқ тутиб, уларни қўйлардай сон–саноқсиз қиламан. 38 Байрам арафасида Қуддус кўчалари қурбонлик қилинадиган қўйлар билан тўлиб–тошганидай, ҳозир вайрон бўлиб ётган шаҳарлар ҳам одамлар билан тўлиб–тошади. Ўшанда Исроил халқи Эгаси Мен эканлигимни билиб олади.”
