41–BOB
Xudoning Isroil xalqiga bergan vaʼdasi
1 Egam aytar: “Mening oldimda sukut saqlang,
Ey dengiz ortidagi yurtlar!
Xalqlarning kuchi qayta tiklansin.
Ular yaqinroq kelib, gapirsinlar.
Hukm qilishga birga yigʻilaylik.
2 Kim sharqdan gʻolib shohni chaqirdi?!
Kim uni Oʻz xizmatiga chaqirdi?!
Kim unga elatlarni boʻysundiradi?!
Kim shohlarni oyogʻi ostida ezadi?!
Gʻolib shoh oʻz qilichi bilan
Ularni chopib tashlaydi,
Yoyi bilan ularni somonday uchiradi.
3 Ularni taʼqib qiladi,
Oyoq bosmagan yoʻldan yuradi,
Oʻsha joylardan eson–omon oʻtadi.
4 Bu voqealar ortida turgan kim?!
Boshidan avlodlarni dunyoga keltirgan kim?!
Men emasmi?!
Azaldan Men sizning Egangizman,
Oxirgacha ham Egangiz boʻlaman.
5 Dengiz ortidagi yurtlar
Buni koʻrib, qoʻrqadi.
Yer yuzining toʻrt burchidan titrab,
Ular yaqinlashib keladi.
6 «Qoʻrqmagin», deya hamma
Bir–biriga dalda beradi.
7 Mana, hunarmand odam
Tilla ustasiga dalda beradi.
Misgar: «Ha, yaxshi chiqdi», deb
Temirchiga dalda beradi.
Yiqilib tushmasin deb, butni mixlab qoʻyadi.
8 Ammo sen–chi, ey qulim Isroil,
Ey Oʻzim tanlagan Yoqub nasli,
Doʻstim Ibrohimning avlodi!
9 Seni yerning toʻrt burchidan olib keldim,
Yerning olis burchaklaridan chaqirdim.
Aytdimki: «Sen Mening qulimsan,
Seni tanladim, rad etmadim.»
10 Qoʻrqma, Men sen bilan birgaman,
Vahimaga tushma, Men sening Xudoyingman.
Senga kuch beraman, Oʻzim yordamga kelaman,
Gʻolib oʻng qoʻlim bilan seni qoʻllayman.
11 Ha, senga qarshi boʻlganlarning hammasi
Sharmandayu sharmisor boʻlib qoladi,
Dushmanlaring yoʻq boʻladi, nobud boʻladi.
12 Urush qiladiganlarni izlab ham topa olmaysan,
Sen bilan jang qilganlar tamomila tugab bitadi.
13 Men Oʻzim, Egang Xudo, oʻng qoʻlingni kuchaytiraman,
Senga: «Qoʻrqma, Oʻzim yordamga kelaman» degan Menman.”
14 Egamiz shunday aytmoqda:
“Qoʻrqma, ey Isroil xalqi, Yoqub nasli!
Sen kichkina bir chuvalchangdaysan.
Ammo Oʻzim senga yordam beraman.
Men, Isroil xalqining Muqaddas Xudosi,
Sening qutqaruvchingman.
15 Sendan bugʻdoy yanchadigan xoʻptir yasayman,
Yangi, oʻtkir, tishli xoʻptir qilaman,
Sen togʻlarni yanchasan, ezasan,
Tepaliklarni somon qilasan.
16 Sen ularni sovurib tashlaysan,
Ularni shamol uchirib ketadi.
Boʻron ularni toʻzgʻitadi,
Sen esa Men — Egang tufayli sevinch topasan,
Isroil xalqining Muqaddas Xudosi ila maqtanasan.
17 Qashshoqlaru muhtojlar suv izlar,
Ammo suv yoʻq.
Ogʻizlari chanqoqdan qurib ketgan.
Men, Egangiz, ularga javob beraman,
Men, Isroil xalqining Xudosi, ularni tark etmayman.
18 Yalangʻoch tepaliklardan daryolar oʻtkazaman,
Vodiylar oʻrtasida buloqlar ochaman.
Sahrolarni suv toʻla hovuzlarga aylantiraman,
Qaqragan yerda buloqlar ochaman.
19 Choʻlda sadr, akas, zaytun daraxtlarini,
Hamda mirta butalarini oʻstiraman,
Sahroda sarv, archa, qaragʻay daraxtlarini oʻstiraman.
20 Mana, hamma koʻrib bilsin,
Bularni Men, Egangiz,
Oʻz qoʻlim bilan qilganimni ular tushunsin.
Men, Isroil xalqining Muqaddas Xudosi,
Bularni yaratganimni ular anglab yetsin.”
Butlar foydasizdir
21 Yoqub naslining Shohi — Egamiz, shunday deydi:
“Daʼvolaringizni ayting,
Isbotingizni keltiring.
22 Qani, butlaringizni olib keling,
Kelajakda nima boʻlishini
Butlaringiz aytib bersin.
Oʻtmishda boʻlganlarni tushuntirsin–chi!
Oʻshalar haqida oʻylab koʻraylik.
Oxiri nima boʻlishini bilaylik.
Ha, boʻladiganlarni bizga aytsin.
23 Ey butlar! Kelajakni bizga bildiring,
Shunda xudo ekanligingizni bilamiz.
Biron yaxshilik yoki yomonlik qilib koʻring–chi,
Koʻrib, birgalikda vahimaga tushaylik.
24 Axir, sizlar hech nima emassiz,
Ishlaringiz esa undan ham battar.
Sizni tanlaganning oʻzi jirkanchdir.
25 Men shimoldan bir yetakchi chaqirdim.
Ana, u keladi.
Sharqdan kelib, Mening nomimga shuhrat keltiradi.
Hukmdorlarni u tuproqday oyoq osti qiladi,
Kulolning loyiday qilib tepkilaydi.
26 Kim buni oldindan aytibdiki, biz bilibmiz?!
Kim buni ilgari bildiribdiki, «U haq edi», deb aytsak?!
Butlar bu haqda gapirmadi, xabar bermadi,
Hech kim ularning ovozini eshitmadi.
27 Men, Egangiz, birinchi boʻlib bu xushxabarni Quddusga yetkazdim,
Sionga elchi joʻnatib, shunday deb aytishni buyurdim:
Xalqing kelyapti! Ular uylariga qaytib kelishyapti!
28 Men butlarga qaradim,
Lekin ular Menga hech narsa aytmadi.
Savolimga ular javob bermadi.
29 Qarang, butlarning hammasi soxta,
Qilgan ishlari hech nima emas,
Hamma butlar shamolday behuda.”
41–БОБ
Худонинг Исроил халқига берган ваъдаси
1 Эгам айтар: “Менинг олдимда сукут сақланг,
Эй денгиз ортидаги юртлар!
Халқларнинг кучи қайта тиклансин.
Улар яқинроқ келиб, гапирсинлар.
Ҳукм қилишга бирга йиғилайлик.
2 Ким шарқдан ғолиб шоҳни чақирди?!
Ким уни Ўз хизматига чақирди?!
Ким унга элатларни бўйсундиради?!
Ким шоҳларни оёғи остида эзади?!
Ғолиб шоҳ ўз қиличи билан
Уларни чопиб ташлайди,
Ёйи билан уларни сомондай учиради.
3 Уларни таъқиб қилади,
Оёқ босмаган йўлдан юради,
Ўша жойлардан эсон–омон ўтади.
4 Бу воқеалар ортида турган ким?!
Бошидан авлодларни дунёга келтирган ким?!
Мен эмасми?!
Азалдан Мен сизнинг Эгангизман,
Охиргача ҳам Эгангиз бўламан.
5 Денгиз ортидаги юртлар
Буни кўриб, қўрқади.
Ер юзининг тўрт бурчидан титраб,
Улар яқинлашиб келади.
6 «Қўрқмагин», дея ҳамма
Бир–бирига далда беради.
7 Мана, ҳунарманд одам
Тилла устасига далда беради.
Мисгар: «Ҳа, яхши чиқди», деб
Темирчига далда беради.
Йиқилиб тушмасин деб, бутни михлаб қўяди.
8 Аммо сен–чи, эй қулим Исроил,
Эй Ўзим танлаган Ёқуб насли,
Дўстим Иброҳимнинг авлоди!
9 Сени ернинг тўрт бурчидан олиб келдим,
Ернинг олис бурчакларидан чақирдим.
Айтдимки: «Сен Менинг қулимсан,
Сени танладим, рад этмадим.»
10 Қўрқма, Мен сен билан биргаман,
Ваҳимага тушма, Мен сенинг Худойингман.
Сенга куч бераман, Ўзим ёрдамга келаман,
Ғолиб ўнг қўлим билан сени қўллайман.
11 Ҳа, сенга қарши бўлганларнинг ҳаммаси
Шармандаю шармисор бўлиб қолади,
Душманларинг йўқ бўлади, нобуд бўлади.
12 Уруш қиладиганларни излаб ҳам топа олмайсан,
Сен билан жанг қилганлар тамомила тугаб битади.
13 Мен Ўзим, Эганг Худо, ўнг қўлингни кучайтираман,
Сенга: «Қўрқма, Ўзим ёрдамга келаман» деган Менман.”
14 Эгамиз шундай айтмоқда:
“Қўрқма, эй Исроил халқи, Ёқуб насли!
Сен кичкина бир чувалчангдайсан.
Аммо Ўзим сенга ёрдам бераман.
Мен, Исроил халқининг Муқаддас Худоси,
Сенинг қутқарувчингман.
15 Сендан буғдой янчадиган хўптир ясайман,
Янги, ўткир, тишли хўптир қиламан,
Сен тоғларни янчасан, эзасан,
Тепаликларни сомон қиласан.
16 Сен уларни совуриб ташлайсан,
Уларни шамол учириб кетади.
Бўрон уларни тўзғитади,
Сен эса Мен — Эганг туфайли севинч топасан,
Исроил халқининг Муқаддас Худоси ила мақтанасан.
17 Қашшоқлару муҳтожлар сув излар,
Аммо сув йўқ.
Оғизлари чанқоқдан қуриб кетган.
Мен, Эгангиз, уларга жавоб бераман,
Мен, Исроил халқининг Худоси, уларни тарк этмайман.
18 Яланғоч тепаликлардан дарёлар ўтказаман,
Водийлар ўртасида булоқлар очаман.
Саҳроларни сув тўла ҳовузларга айлантираман,
Қақраган ерда булоқлар очаман.
19 Чўлда садр, акас, зайтун дарахтларини,
Ҳамда мирта буталарини ўстираман,
Саҳрода сарв, арча, қарағай дарахтларини ўстираман.
20 Мана, ҳамма кўриб билсин,
Буларни Мен, Эгангиз,
Ўз қўлим билан қилганимни улар тушунсин.
Мен, Исроил халқининг Муқаддас Худоси,
Буларни яратганимни улар англаб етсин.”
Бутлар фойдасиздир
21 Ёқуб наслининг Шоҳи — Эгамиз, шундай дейди:
“Даъволарингизни айтинг,
Исботингизни келтиринг.
22 Қани, бутларингизни олиб келинг,
Келажакда нима бўлишини
Бутларингиз айтиб берсин.
Ўтмишда бўлганларни тушунтирсин–чи!
Ўшалар ҳақида ўйлаб кўрайлик.
Охири нима бўлишини билайлик.
Ҳа, бўладиганларни бизга айтсин.
23 Эй бутлар! Келажакни бизга билдиринг,
Шунда худо эканлигингизни биламиз.
Бирон яхшилик ёки ёмонлик қилиб кўринг–чи,
Кўриб, биргаликда ваҳимага тушайлик.
24 Ахир, сизлар ҳеч нима эмассиз,
Ишларингиз эса ундан ҳам баттар.
Сизни танлаганнинг ўзи жирканчдир.
25 Мен шимолдан бир етакчи чақирдим.
Ана, у келади.
Шарқдан келиб, Менинг номимга шуҳрат келтиради.
Ҳукмдорларни у тупроқдай оёқ ости қилади,
Кулолнинг лойидай қилиб тепкилайди.
26 Ким буни олдиндан айтибдики, биз билибмиз?!
Ким буни илгари билдирибдики, «У ҳақ эди», деб айтсак?!
Бутлар бу ҳақда гапирмади, хабар бермади,
Ҳеч ким уларнинг овозини эшитмади.
27 Мен, Эгангиз, биринчи бўлиб бу хушхабарни Қуддусга етказдим,
Сионга элчи жўнатиб, шундай деб айтишни буюрдим:
Халқинг келяпти! Улар уйларига қайтиб келишяпти!
28 Мен бутларга қарадим,
Лекин улар Менга ҳеч нарса айтмади.
Саволимга улар жавоб бермади.
29 Қаранг, бутларнинг ҳаммаси сохта,
Қилган ишлари ҳеч нима эмас,
Ҳамма бутлар шамолдай беҳуда.”
