1–BOB
Duoyi salom
1 Xudoning irodasi bilan Iso Masihning havoriysi boʻlgan men — Pavlusdan va birodarimiz Timoʻtiydan Xudoning Korinf shahridagi jamoatiga hamda Axaya viloyatidagi barcha Xudoning azizlariga salom! 2 Otamiz Xudo va Rabbimiz Iso Masih sizlarga inoyatu tinchlik ato qilsin.
Tasalli manbai — Xudo
3 Rabbimiz Iso Masihning Otasi Xudoga, har turli tasallining manbai boʻlgan Xudo — marhamatli Otaga hamdu sanolar boʻlsin! 4 Har xil azob–uqubatlarga uchraganimizda, Xudo bizga tasalli beradi. Shunday ekan, biz ham azob chekayotgan insonga tasalli bera olamiz. Xudo bizga bergan tasalli bilan uni ovuntira olamiz. 5 Masihga oʻxshab biz qanchalik koʻp azob cheksak, Xudo bizga Masih orqali shunchalik koʻp tasalli beradi. 6 Biz azob–uqubatlarga duchor boʻlayotgan ekanmiz, sizlar tasalli va najot topishingiz uchundir. Biz tasalli topayotgan boʻlsak, bu ham sizlar tasalli topishingiz uchundir, toki sizlar ham bizga oʻxshab azob–uqubatlarga uchraganingizda bardosh bera oling. 7 Sizlar nafaqat azob–uqubatlarimizga, balki tasallimizga ham sherik boʻlishingizga hech shubhamiz yoʻq.
8 Ey birodarlar, biz shuni istar edikki, sizlar Asiya viloyatidagi biz chekkan azoblardan bexabar qolmanglar. Biz haddan tashqari, chidab boʻlmas darajada azob–uqubat tortdik, hatto tirik qolishdan ham umidimizni uzgan edik. 9 Oʻlim muqarrar ekanligiga amin boʻlgan edik. Bularning hammasi bizning oʻzimizga emas, balki oʻliklarni tiriltiradigan Xudoga umid bogʻlashimiz uchun sodir boʻldi. 10 Haqiqatan ham Xudo bizni shunday ogʻir oʻlim tahlikasidan qutqardi va yana qutqaradi ham. Ha, Xudo bizni yana qutqaradi, deb Undan qattiq umid qilamiz. 11 Sizlar ham ibodatlaringiz orqali bizning faoliyatimizga sherik boʻlyapsizlar. Buni koʻrib, koʻpchilik biz uchun Xudoga shukr aytadi, chunki ularning biz uchun qilgan iltijolari natijasida Xudo bizga iltifot koʻrsatdi.
Pavlusning safar rejalari oʻzgaradi
12 Vijdonimiz guvohlik berib turibdi, biz bu dunyoda, ayniqsa sizlar bilan boʻlgan munosabatimizda Xudo ato qilgan soddalik va samimiylik bilan ish tutdik. Biz dunyoviy donolikka emas, balki Xudoning inoyatiga tayanib harakat qildik. Faxrlanishimizning sababi ana oʻshadir.
13-14 Sizlar oʻqib, tushuna oladiganlardan boshqa hech narsa yozmaymiz. Sizlar hozir bizni qisman boʻlsa–da, tushunasizlar. Umid qilamanki, bir kun kelib, sizlar quyidagini toʻla anglab olasiz: biz sizlardan qanday faxrlansak, sizlar ham Rabbimiz Iso keladigan kunda bizdan shunday faxrlana olasizlar.
15 Yuqorida aytib oʻtganlarimning toʻgʻriligiga ishonganim uchun meni ikki marta koʻrib, xursand boʻlib qolinglar degan niyatda sizlarning oldingizga bormoqchi edim. 16 Makedoniyaga borayotganimda sizlarning oldingizga kirib oʻtish, qaytishda ham sizlarni koʻrib ketish niyatim bor edi . Shunday qilib, Yahudiyaga ketishimda yoʻlda uchrashi mumkin boʻlgan ehtiyojlarimni qondirib, kuzatib qoʻyardingizlar.
17 Shunday rejalarim bor edi. Oʻsha rejalar amalga oshmasa, yengiltaklik bilan ish tutgan boʻlamanmi?! Yoki men reja qilayotgan paytda goh “ha”, goh “yoʻq” deydigan, betayin odamga oʻxshaymanmi?! 18 Xudo ishonchlidir, shuning uchun sizlarga yetkazgan xabarimiz ham hech oʻzgarmaydi. 19 Silas , Timoʻtiy va men sizlarga Xudoning Oʻgʻli — Iso Masih haqida aytganmiz. Iso Masih oʻzgaruvchan emas. U doimo sadoqatlidir. 20 Iso Masih orqali Xudo Oʻz vaʼdalarini bajaradi, shuning uchun biz ham Iso Masih orqali Xudoni ulugʻlab, “Omin, iloyim shunday boʻlsin”, deymiz. 21 Xudoning Oʻzi bizni ham, sizlarni ham Iso Masihga boʻlgan imonimizda mustahkam qiladi. U bizni Oʻzi uchun tanlab oldi. 22 Bizga Oʻz muhrini bosib, kelajakdagi qut–barakalarning kafili sifatida Muqaddas Ruhni berdi. 23 Xudo shohid, oʻz jonim haqi aytyapman, sizlarni ayaganim uchun hanuz Korinfga bormadim. 24 Biz sizlarning imoningiz ustidan hukmdormiz, demoqchi emasman, chunki sizlar imonda mahkam turibsizlar. Xizmat qilishimizdan maqsad quvonchingizni koʻpaytirishdir.
1–БОБ
Дуойи салом
1 Худонинг иродаси билан Исо Масиҳнинг ҳаворийси бўлган мен — Павлусдан ва биродаримиз Тимўтийдан Худонинг Коринф шаҳридаги жамоатига ҳамда Ахая вилоятидаги барча Худонинг азизларига салом! 2 Отамиз Худо ва Раббимиз Исо Масиҳ сизларга инояту тинчлик ато қилсин.
Тасалли манбаи — Худо
3 Раббимиз Исо Масиҳнинг Отаси Худога, ҳар турли тасаллининг манбаи бўлган Худо — марҳаматли Отага ҳамду санолар бўлсин! 4 Ҳар хил азоб–уқубатларга учраганимизда, Худо бизга тасалли беради. Шундай экан, биз ҳам азоб чекаётган инсонга тасалли бера оламиз. Худо бизга берган тасалли билан уни овунтира оламиз. 5 Масиҳга ўхшаб биз қанчалик кўп азоб чексак, Худо бизга Масиҳ орқали шунчалик кўп тасалли беради. 6 Биз азоб–уқубатларга дучор бўлаётган эканмиз, сизлар тасалли ва нажот топишингиз учундир. Биз тасалли топаётган бўлсак, бу ҳам сизлар тасалли топишингиз учундир, токи сизлар ҳам бизга ўхшаб азоб–уқубатларга учраганингизда бардош бера олинг. 7 Сизлар нафақат азоб–уқубатларимизга, балки тасаллимизга ҳам шерик бўлишингизга ҳеч шубҳамиз йўқ.
8 Эй биродарлар, биз шуни истар эдикки, сизлар Асия вилоятидаги биз чеккан азоблардан бехабар қолманглар. Биз ҳаддан ташқари, чидаб бўлмас даражада азоб–уқубат тортдик, ҳатто тирик қолишдан ҳам умидимизни узган эдик. 9 Ўлим муқаррар эканлигига амин бўлган эдик. Буларнинг ҳаммаси бизнинг ўзимизга эмас, балки ўликларни тирилтирадиган Худога умид боғлашимиз учун содир бўлди. 10 Ҳақиқатан ҳам Худо бизни шундай оғир ўлим таҳликасидан қутқарди ва яна қутқаради ҳам. Ҳа, Худо бизни яна қутқаради, деб Ундан қаттиқ умид қиламиз. 11 Сизлар ҳам ибодатларингиз орқали бизнинг фаолиятимизга шерик бўляпсизлар. Буни кўриб, кўпчилик биз учун Худога шукр айтади, чунки уларнинг биз учун қилган илтижолари натижасида Худо бизга илтифот кўрсатди.
Павлуснинг сафар режалари ўзгаради
12 Виждонимиз гувоҳлик бериб турибди, биз бу дунёда, айниқса сизлар билан бўлган муносабатимизда Худо ато қилган соддалик ва самимийлик билан иш тутдик. Биз дунёвий доноликка эмас, балки Худонинг иноятига таяниб ҳаракат қилдик. Фахрланишимизнинг сабаби ана ўшадир.
13-14 Сизлар ўқиб, тушуна оладиганлардан бошқа ҳеч нарса ёзмаймиз. Сизлар ҳозир бизни қисман бўлса–да, тушунасизлар. Умид қиламанки, бир кун келиб, сизлар қуйидагини тўла англаб оласиз: биз сизлардан қандай фахрлансак, сизлар ҳам Раббимиз Исо келадиган кунда биздан шундай фахрлана оласизлар.
15 Юқорида айтиб ўтганларимнинг тўғрилигига ишонганим учун мени икки марта кўриб, хурсанд бўлиб қолинглар деган ниятда сизларнинг олдингизга бормоқчи эдим. 16 Македонияга бораётганимда сизларнинг олдингизга кириб ўтиш, қайтишда ҳам сизларни кўриб кетиш ниятим бор эди . Шундай қилиб, Яҳудияга кетишимда йўлда учраши мумкин бўлган эҳтиёжларимни қондириб, кузатиб қўярдингизлар.
17 Шундай режаларим бор эди. Ўша режалар амалга ошмаса, енгилтаклик билан иш тутган бўламанми?! Ёки мен режа қилаётган пайтда гоҳ “ҳа”, гоҳ “йўқ” дейдиган, бетайин одамга ўхшайманми?! 18 Худо ишончлидир, шунинг учун сизларга етказган хабаримиз ҳам ҳеч ўзгармайди. 19 Силас , Тимўтий ва мен сизларга Худонинг Ўғли — Исо Масиҳ ҳақида айтганмиз. Исо Масиҳ ўзгарувчан эмас. У доимо садоқатлидир. 20 Исо Масиҳ орқали Худо Ўз ваъдаларини бажаради, шунинг учун биз ҳам Исо Масиҳ орқали Худони улуғлаб, “Омин, илойим шундай бўлсин”, деймиз. 21 Худонинг Ўзи бизни ҳам, сизларни ҳам Исо Масиҳга бўлган имонимизда мустаҳкам қилади. У бизни Ўзи учун танлаб олди. 22 Бизга Ўз муҳрини босиб, келажакдаги қут–баракаларнинг кафили сифатида Муқаддас Руҳни берди. 23 Худо шоҳид, ўз жоним ҳақи айтяпман, сизларни аяганим учун ҳануз Коринфга бормадим. 24 Биз сизларнинг имонингиз устидан ҳукмдормиз, демоқчи эмасман, чунки сизлар имонда маҳкам турибсизлар. Хизмат қилишимиздан мақсад қувончингизни кўпайтиришдир.
