7–BOB
Xudoning xalqi
1 Egangiz Xudo sizlarni egalik qiladigan yurtingizga olib kiradi. Oʻshanda U oldingizdan Xet, Girgosh, Amor, Kanʼon, Pariz, Xiv, Yobus kabi yettita xalqni haydaydi. Ular sizlardan koʻra, koʻproq va qudratliroqdir. 2 Egangiz Xudo bu xalqlarni sizlarning qoʻlingizga topshirganda, sizlar ularni magʻlub etasizlar. Shunda ularning hammasini tamomila qirib bitiringlar. Ular bilan ittifoq tuzmanglar, ularga rahm–shafqat qilmanglar. 3 Ular bilan quda–andachilik qilmanglar, ularga qiz uzatmanglar, oʻgʻillaringizga ularning qizlaridan olib bermanglar. 4 Aks holda, ular farzandlaringizni Egamizdan qaytaradi. Farzandlaringiz boshqa xudolarga xizmat qiladigan boʻladi. Oʻshanda Egamiz gʻazablanib, sizlarni bir lahzada halok qiladi. 5 Aksincha, oʻsha xalqlarni sizlar shunday qilinglar: ularning qurbongohlarini buzinglar, butsimon toshlarini parchalab tashlanglar, Asheraga atalgan ustunlarni kesinglar, butlarini yondiringlar. 6 Sizlar Egangiz Xudoning muqaddas xalqisiz. U sizlarni yer yuzidagi jamiki xalqlar orasidan Oʻz xalqi, Oʻz xazinasi qilib tanlab oldi.
7 Egamiz sizlarni boshqa xalqlardan koʻp boʻlganingiz uchun sevib tanlamadi. Sizlar boshqa hamma xalqlardan oz edingiz. 8 Egamiz sizlarni sevgani uchun va ota–bobolaringizga bergan vaʼdasini ado etish uchun sizlarni tanladi. Shu bois U sizlarni Misr firʼavni hukmronligidan, Misrdagi qullikdan Oʻz qudrati bilan olib chiqib, ozod qildi. 9 Shunday qilib, Egangiz Xudo haqiqiy Xudo ekanini bilib qoʻyinglar. U sodiq Xudodir! Uni sevadigan, Uning amrlarini bajaradiganlarning minginchi avlodigacha ahdini sodiq saqlaydi. 10 Xudodan nafratlanganlarning esa qilmishlariga yarasha boshlariga kulfat yogʻdiradi. Ha, Egamiz Undan nafratlanganlarga javob berishda kechikmaydi. 11 Shuning uchun bugun men sizlarga berayotgan amrlarni, farmonlar va qonun–qoidalarni bitta qoldirmay bajaringlar.
Itoatgoʻylikdan kelgan baraka
12 Agar mana shu qonun–qoidalarga itoat etib, ularni bitta qoldirmay bajarsangiz, Egangiz Xudo ham ota–bobolaringizga ont ichib, vaʼda qilgan ahdini sizlar bilan sodiq saqlaydi. 13 U sizlarga mehr qoʻyadi, ota–bobolaringizga beraman, deb ont ichgan yurtda sizlarga baraka berib, koʻpaytiradi. Uvali–juvali boʻlasizlar, yeringiz hosildor, doningiz, sharobingiz va moyingiz serob boʻladi, mol–qoʻyingiz barakali boʻladi, sigirlaringiz bolalaydi, qoʻylaringiz qoʻzilaydi. 14 Sizlar barcha xalqlar orasida barakaga eng boy xalq boʻlasizlar, orangizda farzandsiz erkak ham, ayol ham boʻlmaydi, mollaringiz orasida qisiri boʻlmaydi. 15 Egamiz sizlarni har qanday kasallikdan saqlaydi. Misrda oʻzlaringiz koʻrgan har xil qoʻrqinchli xastaliklar sizlarning boshingizga kelmaydi. Oʻsha xastaliklarni Egamiz sizlarning gʻanimlaringizga yuqtiradi. 16 Egangiz Xudo sizlarning qoʻlingizga topshiradigan barcha xalqlarni qirib yuboringlar, ularga rahm qilmanglar, ularning xudolariga sigʻinmanglar. Aks holda, ularning xudolari sizlarga tuzoq boʻladi.
17 Xayolingizda: “Bu xalqlar bizdan juda kuchli–ku, qanday qilib ularni haydaymiz?” deb oʻylashingiz mumkin, 18 ammo ulardan qoʻrqmanglar. Egangiz Xudo firʼavnni, butun Misrni nima qilganini esingizda tutinglar. 19 Egangiz Xudo Oʻz qudrati va ajoyibotlari bilan sizlarni u yerdan olib chiqdi, buyuk sinovlar, alomatu moʻjizalar koʻrsatdi. Bularni oʻz koʻzingiz bilan koʻrdingiz. Siz qoʻrqayotgan hamma xalqlarni Egangiz Xudo xuddi oʻsha ahvolga soladi. 20 Hatto sizlardan yashirinib tirik qolganlarni U vahimaga solib, quvib yuboradi . 21 Ulardan qoʻrqmanglar. Orangizdagi Egangiz Xudo buyuk va haybatli Xudodir. 22 U oʻsha xalqlarni sizlarning oldingizdan oz–ozdan haydaydi. Sizlar ularni birdaniga halok qilolmaysizlar. Boʻlmasa atrofingizda yovvoyi hayvonlar koʻpayib ketadi. 23 Egangiz Xudo oʻsha xalqlarni sizlarning qoʻlingizga beradi, ularning hammasini qattiq sarosimaga solib, halok qiladi. 24 Shohlarini ham sizlarning qoʻlingizga beradi. Sizlar ularning nomlarini yer yuzidan oʻchirasizlar. Hech kim sizlarga bas kelolmaydi, ularning hammasini halok qilasizlar. 25 Xudolarining tasvirlarini olovda yondiringlar, ularni qoplagan oltinu kumushlarga koʻz olaytirmanglar, oʻsha narsalarni olmanglar, toki ular sizlarga tuzoq boʻlmasin. Bu butlar Egangiz Xudoga jirkanchdir. 26 Bu jirkanchli narsalarni uyingizga olib kirmang, aks holda, oʻshalar singari yoʻq qilinasiz. Oʻsha narsalardan nafratlaninglar, jirkaninglar, chunki ular laʼnatlangandir.
7–БОБ
Худонинг халқи
1 Эгангиз Худо сизларни эгалик қиладиган юртингизга олиб киради. Ўшанда У олдингиздан Хет, Гиргош, Амор, Канъон, Париз, Хив, Ёбус каби еттита халқни ҳайдайди. Улар сизлардан кўра, кўпроқ ва қудратлироқдир. 2 Эгангиз Худо бу халқларни сизларнинг қўлингизга топширганда, сизлар уларни мағлуб этасизлар. Шунда уларнинг ҳаммасини тамомила қириб битиринглар. Улар билан иттифоқ тузманглар, уларга раҳм–шафқат қилманглар. 3 Улар билан қуда–андачилик қилманглар, уларга қиз узатманглар, ўғилларингизга уларнинг қизларидан олиб берманглар. 4 Акс ҳолда, улар фарзандларингизни Эгамиздан қайтаради. Фарзандларингиз бошқа худоларга хизмат қиладиган бўлади. Ўшанда Эгамиз ғазабланиб, сизларни бир лаҳзада ҳалок қилади. 5 Аксинча, ўша халқларни сизлар шундай қилинглар: уларнинг қурбонгоҳларини бузинглар, бутсимон тошларини парчалаб ташланглар, Ашерага аталган устунларни кесинглар, бутларини ёндиринглар. 6 Сизлар Эгангиз Худонинг муқаддас халқисиз. У сизларни ер юзидаги жамики халқлар орасидан Ўз халқи, Ўз хазинаси қилиб танлаб олди.
7 Эгамиз сизларни бошқа халқлардан кўп бўлганингиз учун севиб танламади. Сизлар бошқа ҳамма халқлардан оз эдингиз. 8 Эгамиз сизларни севгани учун ва ота–боболарингизга берган ваъдасини адо этиш учун сизларни танлади. Шу боис У сизларни Миср фиръавни ҳукмронлигидан, Мисрдаги қулликдан Ўз қудрати билан олиб чиқиб, озод қилди. 9 Шундай қилиб, Эгангиз Худо ҳақиқий Худо эканини билиб қўйинглар. У содиқ Худодир! Уни севадиган, Унинг амрларини бажарадиганларнинг мингинчи авлодигача аҳдини содиқ сақлайди. 10 Худодан нафратланганларнинг эса қилмишларига яраша бошларига кулфат ёғдиради. Ҳа, Эгамиз Ундан нафратланганларга жавоб беришда кечикмайди. 11 Шунинг учун бугун мен сизларга бераётган амрларни, фармонлар ва қонун–қоидаларни битта қолдирмай бажаринглар.
Итоатгўйликдан келган барака
12 Агар мана шу қонун–қоидаларга итоат этиб, уларни битта қолдирмай бажарсангиз, Эгангиз Худо ҳам ота–боболарингизга онт ичиб, ваъда қилган аҳдини сизлар билан содиқ сақлайди. 13 У сизларга меҳр қўяди, ота–боболарингизга бераман, деб онт ичган юртда сизларга барака бериб, кўпайтиради. Ували–жували бўласизлар, ерингиз ҳосилдор, донингиз, шаробингиз ва мойингиз сероб бўлади, мол–қўйингиз баракали бўлади, сигирларингиз болалайди, қўйларингиз қўзилайди. 14 Сизлар барча халқлар орасида баракага энг бой халқ бўласизлар, орангизда фарзандсиз эркак ҳам, аёл ҳам бўлмайди, молларингиз орасида қисири бўлмайди. 15 Эгамиз сизларни ҳар қандай касалликдан сақлайди. Мисрда ўзларингиз кўрган ҳар хил қўрқинчли хасталиклар сизларнинг бошингизга келмайди. Ўша хасталикларни Эгамиз сизларнинг ғанимларингизга юқтиради. 16 Эгангиз Худо сизларнинг қўлингизга топширадиган барча халқларни қириб юборинглар, уларга раҳм қилманглар, уларнинг худоларига сиғинманглар. Акс ҳолда, уларнинг худолари сизларга тузоқ бўлади.
17 Хаёлингизда: “Бу халқлар биздан жуда кучли–ку, қандай қилиб уларни ҳайдаймиз?” деб ўйлашингиз мумкин, 18 аммо улардан қўрқманглар. Эгангиз Худо фиръавнни, бутун Мисрни нима қилганини эсингизда тутинглар. 19 Эгангиз Худо Ўз қудрати ва ажойиботлари билан сизларни у ердан олиб чиқди, буюк синовлар, аломату мўъжизалар кўрсатди. Буларни ўз кўзингиз билан кўрдингиз. Сиз қўрқаётган ҳамма халқларни Эгангиз Худо худди ўша аҳволга солади. 20 Ҳатто сизлардан яшириниб тирик қолганларни У ваҳимага солиб, қувиб юборади . 21 Улардан қўрқманглар. Орангиздаги Эгангиз Худо буюк ва ҳайбатли Худодир. 22 У ўша халқларни сизларнинг олдингиздан оз–оздан ҳайдайди. Сизлар уларни бирданига ҳалок қилолмайсизлар. Бўлмаса атрофингизда ёввойи ҳайвонлар кўпайиб кетади. 23 Эгангиз Худо ўша халқларни сизларнинг қўлингизга беради, уларнинг ҳаммасини қаттиқ саросимага солиб, ҳалок қилади. 24 Шоҳларини ҳам сизларнинг қўлингизга беради. Сизлар уларнинг номларини ер юзидан ўчирасизлар. Ҳеч ким сизларга бас келолмайди, уларнинг ҳаммасини ҳалок қиласизлар. 25 Худоларининг тасвирларини оловда ёндиринглар, уларни қоплаган олтину кумушларга кўз олайтирманглар, ўша нарсаларни олманглар, токи улар сизларга тузоқ бўлмасин. Бу бутлар Эгангиз Худога жирканчдир. 26 Бу жирканчли нарсаларни уйингизга олиб кирманг, акс ҳолда, ўшалар сингари йўқ қилинасиз. Ўша нарсалардан нафратланинглар, жирканинглар, чунки улар лаънатлангандир.
