39–BOB
Ruhoniylik liboslari tikiladi
1 Ular koʻk, safsar va qirmizi iplardan Muqaddas xonada xizmat qilganda kiyish uchun ruhoniylarga liboslarni ajoyib qilib tikdilar. Horunga muqaddas ruhoniylik liboslari tikishdi. Hammasini Egamiz Musoga amr etganday qildilar.
Oliy ruhoniy uchun efod
2 Ular efodni mayin zigʻir matosidan tikib, ustiga koʻk, safsar, qirmizi va zar iplardan naqsh soldilar. 3 Oltinni yupqa qilib yoyib, ingichka–ingichka qilib kesib, zar ip qilishdi. Ular oʻz mahoratlarini ishga solib koʻk, safsar, qirmizi iplardan naqsh solingan mayin zigʻir matosini bu zar ip bilan bezatdilar. 4 Efodning old va orqa qismlarini bir–biriga bogʻlash uchun ikkita yelka bogʻichini qilib, ularni old va orqa qismlarining ustki chetiga tikdilar. 5 Kamar yasab, uni efodga bogʻladilar. Kamarni ham mayin zigʻir matosidan qildilar. Unga koʻk, safsar, qirmizi va zar iplardan mahorat bilan naqsh soldilar. Hammasini Egamiz Musoga amr etganday qildilar.
6 Keyin muhr oʻyganday qilib, Isroil oʻgʻillarining ismini ikkita aqiq toshga oʻyib yozdilar. Yozilgan toshlarni oltindan qilingan naqshli uyalar ichiga qoʻyib, 7 Isroilning oʻn ikki qabilasini eslatib turish uchun efodning yelka bogʻichlariga oʻrnashtirdilar. Hammasini Egamiz Musoga amr etganday qildilar.
Oliy ruhoniy uchun koʻkrakpech
8 Ular koʻkrakpechni yasadilar. Koʻkrakpechni, efod singari, mayin zigʻir matosidan qilib, koʻk, safsar, qirmizi va zar iplardan unga mahorat bilan naqsh soldilar. 9 Koʻkrakpechni toʻrtburchak xalta shaklida, ikki buklangan, boʻyi bir qarich, eniga ham bir qarich qilib yasadilar. 10 Koʻkrakpechga toʻrt qator toshni toʻgʻri qilib terdilar: qizil yoqut, xrizolit va zumrad toshlarni birinchi qatorga terdilar. 11 Ikkinchi qatorga firuza, zangori yoqut va olmosni terdilar. 12 Uchinchi qatorga lojuvard, agat va ametist toshlarni terdilar. 13 Toʻrtinchi qatorga topaz, aqiq va yashma toshlarni terdilar. Hamma toshlarni oltindan qilingan naqshli uyalarga oʻrnashtirdilar. 14 Bu oʻn ikki tosh Isroilning oʻn ikki qabilasini eslatib turardi. Muhr oʻyganday qilib, Isroilning oʻn ikki oʻgʻlidan har birining ismini bu toshlarning har biriga oʻyib yozdilar.
15 Ular koʻkrakpechni efodga bogʻlash uchun toza oltindan ipga oʻxshatib eshilgan ikkita zanjir yasadilar. 16 Yana naqshli ikkita oltin uya va ikkita oltin halqa yasab, ikkala halqani koʻkrakpechning ustki burchaklariga mahkamladilar. 17 Ikkala oltin zanjirning bir uchini koʻkrakpechdagi halqalarga bogʻlab, 18 ikkinchi uchini naqshli oltin uyalarga mahkamladilar. Uyalarni efodning old tomonidagi yelka bogʻichlariga oʻrnashtirdilar. 19-20 Yana oltindan toʻrtta halqa yasadilar. Ikkitasini koʻkrakpechning ostki burchaklariga — efodga yaqin boʻlgan ichki qirgʻogʻiga mahkamladilar. Ikkitasini efodning old tomoniga, ikkala yelka bogʻichining pastiga — naqshli kamardan yuqoriga mahkamladilar. 21 Koʻkrakpech efodning naqshli kamaridan yuqorida boʻlsin, efoddan osilib turmasin deb, koʻkrakpechni halqalari yordamida efodning halqalariga koʻk bogʻich bilan mahkamladilar. Hammasini Egamiz Musoga amr etganday qildilar.
Boshqa ruhoniylik liboslari
22 Efodning ridosini koʻk iplardan toʻqilgan matodan tikdilar. 23 Ridoning oʻrtasidan bosh sigʻadigan teshik qildilar. Rido yirtilib ketmasligi uchun teshikning chetini toʻqidilar. 24-26 Rido etagining uchiga aylanasi boʻylab anor shaklini va qoʻngʻiroqchalarni birin–ketin qilib bittama–bitta osib chiqdilar. Anor shakli yigirilgan koʻk, safsar va qirmizi iplardan qilingan edi. Qoʻngʻiroqchalar toza oltindan qilingan boʻlib, anor shakli oralariga osilgan edi. Horun oliy ruhoniy boʻlib xizmat qilganda, u shu ridoni kiyishi kerak edi. Hammasini Egamiz Musoga amr etganday qildilar.
27 Horun bilan uning oʻgʻillariga mayin zigʻir matosidan koʻylaklarni, 28 sallani, peshanabogʻlarni va ishtonlarni qildilar. 29 Belbogʻini mayin zigʻir matosidan toʻqib, ustiga koʻk, safsar va qirmizi iplardan mahorat bilan naqsh soldilar. Hammasini Egamiz Musoga amr etganday qildilar.
30 Toza oltindan lavhani — muqaddaslik ramzini yasadilar. Lavhaning yuzasiga muhr oʻyganday, “Egamizga bagʻishlangan” deb oʻyib yozdilar. 31 Lavhani sallaga mahkamlash uchun koʻk bogʻichni lavhaga bogʻlab qoʻydilar. Hammasini Egamiz Musoga amr etganday qildilar.
Ish nihoyasiga yetadi
32 Shunday qilib, Uchrashuv chodiri — Muqaddas chodir yasalishiga oid hamma ishlar nihoyasiga yetdi. Isroil xalqi hammasini Egamiz Musoga amr etganday qildilar. 33 Keyin Musoning oldiga quyidagilardan iborat Muqaddas chodirni olib keldilar:
Chodirning ichki qavatini va uning hamma qismlarini — ilgaklarini, romlarini, tambalarini, ustunlari va tagliklarini,
34 qizilga boʻyalgan qoʻchqor terisidan yopinchiqni, yumshoq teridan yopinchiq va Eng muqaddas xonani toʻsib turadigan ichki pardani,
35 Ahd sandigʻini , uning xodalari va qopqogʻini,
36 xontaxtani, uning hamma buyumlarini va unga qoʻyiladigan muqaddas nonlarni ,
37 toza oltindan qilingan chiroqpoya, unga oʻrnatilgan moychiroqlarni, uning hamma buyumlarini va moychiroqlar uchun zaytun moyini,
38 oltin tutatqi qurbongohini,
muqaddas qiladigan moy va xushboʻy tutatqini,
Chodirga kiraverishdagi pardani,
39 bronza qurbongohni, uning bronza panjarasini, xodalari va hamma buyumlarini,
qoʻlyuvgichni va uning tagligini,
40 hovlini toʻsib turadigan pardalarni, pardalarni ushlab turadigan ustunlarni, ustunlarning tagliklarini va hovliga kiraverishdagi pardani,
Chodir va hovli uchun arqonlarni, qoziqlarni,
Muqaddas chodir — Uchrashuv chodirida foydalanadigan hamma ashyolarni,
41 Ruhoniy Horun va uning oʻgʻillari Muqaddas xonada xizmat qilganda kiyadigan, ajoyib qilib tikilgan muqaddas liboslarni.
42 Xullas, Isroil xalqi hammasini Egamiz Musoga amr etganday qildilar. 43 Muso qilingan hamma ishlarni koʻzdan kechirdi, Isroil xalqi bu ishlarni Egamizning amri boʻyicha qilganlarini koʻrib, Muso ularni duo qildi.
39–БОБ
Руҳонийлик либослари тикилади
1 Улар кўк, сафсар ва қирмизи иплардан Муқаддас хонада хизмат қилганда кийиш учун руҳонийларга либосларни ажойиб қилиб тикдилар. Ҳорунга муқаддас руҳонийлик либослари тикишди. Ҳаммасини Эгамиз Мусога амр этгандай қилдилар.
Олий руҳоний учун эфод
2 Улар эфодни майин зиғир матосидан тикиб, устига кўк, сафсар, қирмизи ва зар иплардан нақш солдилар. 3 Олтинни юпқа қилиб ёйиб, ингичка–ингичка қилиб кесиб, зар ип қилишди. Улар ўз маҳоратларини ишга солиб кўк, сафсар, қирмизи иплардан нақш солинган майин зиғир матосини бу зар ип билан безатдилар. 4 Эфоднинг олд ва орқа қисмларини бир–бирига боғлаш учун иккита елка боғичини қилиб, уларни олд ва орқа қисмларининг устки четига тикдилар. 5 Камар ясаб, уни эфодга боғладилар. Камарни ҳам майин зиғир матосидан қилдилар. Унга кўк, сафсар, қирмизи ва зар иплардан маҳорат билан нақш солдилар. Ҳаммасини Эгамиз Мусога амр этгандай қилдилар.
6 Кейин муҳр ўйгандай қилиб, Исроил ўғилларининг исмини иккита ақиқ тошга ўйиб ёздилар. Ёзилган тошларни олтиндан қилинган нақшли уялар ичига қўйиб, 7 Исроилнинг ўн икки қабиласини эслатиб туриш учун эфоднинг елка боғичларига ўрнаштирдилар. Ҳаммасини Эгамиз Мусога амр этгандай қилдилар.
Олий руҳоний учун кўкракпеч
8 Улар кўкракпечни ясадилар. Кўкракпечни, эфод сингари, майин зиғир матосидан қилиб, кўк, сафсар, қирмизи ва зар иплардан унга маҳорат билан нақш солдилар. 9 Кўкракпечни тўртбурчак халта шаклида, икки букланган, бўйи бир қарич, энига ҳам бир қарич қилиб ясадилар. 10 Кўкракпечга тўрт қатор тошни тўғри қилиб тердилар: қизил ёқут, хризолит ва зумрад тошларни биринчи қаторга тердилар. 11 Иккинчи қаторга фируза, зангори ёқут ва олмосни тердилар. 12 Учинчи қаторга ложувард, агат ва аметист тошларни тердилар. 13 Тўртинчи қаторга топаз, ақиқ ва яшма тошларни тердилар. Ҳамма тошларни олтиндан қилинган нақшли уяларга ўрнаштирдилар. 14 Бу ўн икки тош Исроилнинг ўн икки қабиласини эслатиб турарди. Муҳр ўйгандай қилиб, Исроилнинг ўн икки ўғлидан ҳар бирининг исмини бу тошларнинг ҳар бирига ўйиб ёздилар.
15 Улар кўкракпечни эфодга боғлаш учун тоза олтиндан ипга ўхшатиб эшилган иккита занжир ясадилар. 16 Яна нақшли иккита олтин уя ва иккита олтин ҳалқа ясаб, иккала ҳалқани кўкракпечнинг устки бурчакларига маҳкамладилар. 17 Иккала олтин занжирнинг бир учини кўкракпечдаги ҳалқаларга боғлаб, 18 иккинчи учини нақшли олтин уяларга маҳкамладилар. Уяларни эфоднинг олд томонидаги елка боғичларига ўрнаштирдилар. 19-20 Яна олтиндан тўртта ҳалқа ясадилар. Иккитасини кўкракпечнинг остки бурчакларига — эфодга яқин бўлган ички қирғоғига маҳкамладилар. Иккитасини эфоднинг олд томонига, иккала елка боғичининг пастига — нақшли камардан юқорига маҳкамладилар. 21 Кўкракпеч эфоднинг нақшли камаридан юқорида бўлсин, эфоддан осилиб турмасин деб, кўкракпечни ҳалқалари ёрдамида эфоднинг ҳалқаларига кўк боғич билан маҳкамладилар. Ҳаммасини Эгамиз Мусога амр этгандай қилдилар.
Бошқа руҳонийлик либослари
22 Эфоднинг ридосини кўк иплардан тўқилган матодан тикдилар. 23 Ридонинг ўртасидан бош сиғадиган тешик қилдилар. Ридо йиртилиб кетмаслиги учун тешикнинг четини тўқидилар. 24-26 Ридо этагининг учига айланаси бўйлаб анор шаклини ва қўнғироқчаларни бирин–кетин қилиб биттама–битта осиб чиқдилар. Анор шакли йигирилган кўк, сафсар ва қирмизи иплардан қилинган эди. Қўнғироқчалар тоза олтиндан қилинган бўлиб, анор шакли ораларига осилган эди. Ҳорун олий руҳоний бўлиб хизмат қилганда, у шу ридони кийиши керак эди. Ҳаммасини Эгамиз Мусога амр этгандай қилдилар.
27 Ҳорун билан унинг ўғилларига майин зиғир матосидан кўйлакларни, 28 саллани, пешанабоғларни ва иштонларни қилдилар. 29 Белбоғини майин зиғир матосидан тўқиб, устига кўк, сафсар ва қирмизи иплардан маҳорат билан нақш солдилар. Ҳаммасини Эгамиз Мусога амр этгандай қилдилар.
30 Тоза олтиндан лавҳани — муқаддаслик рамзини ясадилар. Лавҳанинг юзасига муҳр ўйгандай, “Эгамизга бағишланган” деб ўйиб ёздилар. 31 Лавҳани саллага маҳкамлаш учун кўк боғични лавҳага боғлаб қўйдилар. Ҳаммасини Эгамиз Мусога амр этгандай қилдилар.
Иш ниҳоясига етади
32 Шундай қилиб, Учрашув чодири — Муқаддас чодир ясалишига оид ҳамма ишлар ниҳоясига етди. Исроил халқи ҳаммасини Эгамиз Мусога амр этгандай қилдилар. 33 Кейин Мусонинг олдига қуйидагилардан иборат Муқаддас чодирни олиб келдилар:
Чодирнинг ички қаватини ва унинг ҳамма қисмларини — илгакларини, ромларини, тамбаларини, устунлари ва тагликларини,
34 қизилга бўялган қўчқор терисидан ёпинчиқни, юмшоқ теридан ёпинчиқ ва Энг муқаддас хонани тўсиб турадиган ички пардани,
35 Аҳд сандиғини , унинг ходалари ва қопқоғини,
36 хонтахтани, унинг ҳамма буюмларини ва унга қўйиладиган муқаддас нонларни ,
37 тоза олтиндан қилинган чироқпоя, унга ўрнатилган мойчироқларни, унинг ҳамма буюмларини ва мойчироқлар учун зайтун мойини,
38 олтин тутатқи қурбонгоҳини,
муқаддас қиладиган мой ва хушбўй тутатқини,
Чодирга кираверишдаги пардани,
39 бронза қурбонгоҳни, унинг бронза панжарасини, ходалари ва ҳамма буюмларини,
қўлювгични ва унинг таглигини,
40 ҳовлини тўсиб турадиган пардаларни, пардаларни ушлаб турадиган устунларни, устунларнинг тагликларини ва ҳовлига кираверишдаги пардани,
Чодир ва ҳовли учун арқонларни, қозиқларни,
Муқаддас чодир — Учрашув чодирида фойдаланадиган ҳамма ашёларни,
41 Руҳоний Ҳорун ва унинг ўғиллари Муқаддас хонада хизмат қилганда киядиган, ажойиб қилиб тикилган муқаддас либосларни.
42 Хуллас, Исроил халқи ҳаммасини Эгамиз Мусога амр этгандай қилдилар. 43 Мусо қилинган ҳамма ишларни кўздан кечирди, Исроил халқи бу ишларни Эгамизнинг амри бўйича қилганларини кўриб, Мусо уларни дуо қилди.
