4–BOB
Donolikdan keladigan foydalar
1 Oʻgʻillarim, otangizning pand–nasihatlariga quloq solinglar,
eʼtibor berib farosatli boʻlinglar.
2 Sizlarga yaxshi saboq beraman,
soʻzlarimdan yuz oʻgirmanglar.
3 Men ota–onamning yolgʻiz, yosh oʻgʻli edim.
4 Bolaligimda otam menga shunday derdi:
“Soʻzlarimni yuragingga jo qilib,
amrlarimni bajargin, shunda yashaysan.
5 Dono boʻl, idrokli boʻl,
ularni unutma, soʻzlarimdan chiqma.
6 Donolikdan yuz oʻgirma, seni himoya qiladi,
uni sevgin, seni asraydi.
7 Donolikning boshi shudir, dono boʻl,
bor–yoʻgʻingni berib boʻlsa ham, idrok ol .
8 Uni hurmat qil, seni koʻkka koʻtaradi.
Uni quchgin, seni shon–shuhratga erishtiradi.
9 Boshingga iltifot gulchambari,
shuhrat tojini kiydiradi.”
10 Oʻgʻlim , aytganlarimga quloq solib qabul qil,
shunda umring uzoq boʻladi.
11 Senga donolik yoʻllarini oʻrgatdim,
toʻgʻri yoʻldan olib yurdim.
12 Yurganingda toʻsiqqa uchramaysan,
yugurganingda qoqilmaysan.
13 Yoʻl–yoʻriqlarimni qattiq ushla, qoʻyib yuborma,
ularni qoʻriqla, chunki ular hayotingdir.
14 Fosiqning soʻqmoqlariga oyoq bosma,
yovuzlar yoʻlidan yurma.
15 Hatto nazar solma,
yonidan ham oʻtma,
qayrilib uzoqdan yurgin.
16 Chunki ular yomonlik qilmasdan uxlay olmaydi,
birortasiga zarar keltirmaguncha uyqulari kelmaydi.
17 Ular fosiqlik nonini yeydi,
zoʻravonlik sharobini ichadi.
18 Solihning yoʻli tongga oʻxshaydi,
kun chiqquncha tong yorishaveradi.
19 Fosiqning yoʻli esa zulmat kabidir,
nimaga qoqilib ketishini bilmaydi.
20 Oʻgʻlim, soʻzlarimni eshit,
aytganlarimga quloq sol.
21 Ularni koʻz oldingdan qochirma,
yuragingning qaʼrida saqlagin.
22 Chunki ularni topganlarga hayot,
butun tan–joniga malham boʻladi.
23 Bor kuching bilan qalbingni asra,
chunki u hayot bulogʻidir.
24 Ogʻzingdan egrilikni,
tilingdan ayyorlikni olib tashla.
25 Koʻzlaring toʻgʻriga qarasin,
nigohing oldingga qaratilgan boʻlsin.
26 Toʻgʻri yoʻlni tanlab yur ,
qadamingni oʻylab bos.
27 Oʻngga ham, chapga ham ogʻma,
yovuzlikdan uzoqlash.
4–БОБ
Доноликдан келадиган фойдалар
1 Ўғилларим, отангизнинг панд–насиҳатларига қулоқ солинглар,
эътибор бериб фаросатли бўлинглар.
2 Сизларга яхши сабоқ бераман,
сўзларимдан юз ўгирманглар.
3 Мен ота–онамнинг ёлғиз, ёш ўғли эдим.
4 Болалигимда отам менга шундай дерди:
“Сўзларимни юрагингга жо қилиб,
амрларимни бажаргин, шунда яшайсан.
5 Доно бўл, идрокли бўл,
уларни унутма, сўзларимдан чиқма.
6 Доноликдан юз ўгирма, сени ҳимоя қилади,
уни севгин, сени асрайди.
7 Доноликнинг боши шудир, доно бўл,
бор–йўғингни бериб бўлса ҳам, идрок ол .
8 Уни ҳурмат қил, сени кўкка кўтаради.
Уни қучгин, сени шон–шуҳратга эриштиради.
9 Бошингга илтифот гулчамбари,
шуҳрат тожини кийдиради.”
10 Ўғлим , айтганларимга қулоқ солиб қабул қил,
шунда умринг узоқ бўлади.
11 Сенга донолик йўлларини ўргатдим,
тўғри йўлдан олиб юрдим.
12 Юрганингда тўсиққа учрамайсан,
югурганингда қоқилмайсан.
13 Йўл–йўриқларимни қаттиқ ушла, қўйиб юборма,
уларни қўриқла, чунки улар ҳаётингдир.
14 Фосиқнинг сўқмоқларига оёқ босма,
ёвузлар йўлидан юрма.
15 Ҳатто назар солма,
ёнидан ҳам ўтма,
қайрилиб узоқдан юргин.
16 Чунки улар ёмонлик қилмасдан ухлай олмайди,
бирортасига зарар келтирмагунча уйқулари келмайди.
17 Улар фосиқлик нонини ейди,
зўравонлик шаробини ичади.
18 Солиҳнинг йўли тонгга ўхшайди,
кун чиққунча тонг ёришаверади.
19 Фосиқнинг йўли эса зулмат кабидир,
нимага қоқилиб кетишини билмайди.
20 Ўғлим, сўзларимни эшит,
айтганларимга қулоқ сол.
21 Уларни кўз олдингдан қочирма,
юрагингнинг қаърида сақлагин.
22 Чунки уларни топганларга ҳаёт,
бутун тан–жонига малҳам бўлади.
23 Бор кучинг билан қалбингни асра,
чунки у ҳаёт булоғидир.
24 Оғзингдан эгриликни,
тилингдан айёрликни олиб ташла.
25 Кўзларинг тўғрига қарасин,
нигоҳинг олдингга қаратилган бўлсин.
26 Тўғри йўлни танлаб юр ,
қадамингни ўйлаб бос.
27 Ўнгга ҳам, чапга ҳам оғма,
ёвузликдан узоқлаш.
