32–BOB
Solihlik hukmronlik qiladi
1 Ana, shoh solihlik bilan hukmronlik qiladi,
Hukmdorlar adolat bilan boshqaradi.
2 Har bir odam shamoldan asraydigan panohday boʻladi,
Boʻrondan saqlaydigan boshpana kabi boʻladi.
Ular sahrodagi suv oʻzaniga oʻxshaydi,
Tashna yerdagi ulkan qoyaning soyasiday boʻladi.
3 Koʻrib turganlar endi koʻz yumib yurmaydi,
Qulogʻi borlar endi quloq soladi.
4 Idroksizning aqli anglaydigan boʻladi,
Duduq odamning tili ravon boʻladi.
5 Ahmoqni endi aslzoda deb chaqirmaydilar,
Yaramasni, hurmatga sazovor, deb aytmaydilar.
6 Mana, ahmoq kaltafahmlik bilan gapiradi,
Fikri–zikri esa yovuzlik bilan band.
Qilganlari — nopoklik,
Egam haqida xato gapiradi.
Och odamni u ochligicha qoldiradi,
Chanqaganga suv bermaydi.
7 Battolning usullari yovuzdir,
U yomonliklar rejalashtiradi,
Yolgʻon gap–soʻzlari bilan
Faqirning haq daʼvosini yoʻqqa chiqarib,
Bechorani nobud qiladi.
8 Olijanob odamlar esa yaxshi rejalar tuzadi,
Yaxshi niyat qilib, oʻz soʻzida turadi.
Quddus ayollari toʻgʻrisida bashorat
9 Ey siz, begʻam ayollar,
Turinglar, Menga quloq solinglar!
Ey siz, oʻziga ishongan qizlar,
Mening gaplarimni eshitinglar!
10 Ey sizlar, beparvo yurganlar,
Bir yil oʻtar–oʻtmas titray boshlaysiz.
Uzum hosili yaxshi boʻlmaydi,
Meva hosil bermaydi.
11 Qoʻrqing, ey siz, begʻam ayollar,
Qaltirang, ey oʻziga ishongan qizlar!
Tavba qilib, kiyimingizni yechib tashlang.
Qanorga oʻranib, belingizni bogʻlang!
12 Koʻkragingizga urib yigʻlang
Ajoyib dalalaringiz,
Serhosil uzumzorlaringiz uchun!
13 Xalqimning yeri uchun yigʻlang!
U yerni tikan, yantoq butalari bosib ketadi.
Ha, shodlikka toʻla boʻlgan uylar uchun,
Quvnoq shahar uchun aza tuting!
14 Mana, saroy tashlandiq boʻlib qoldi,
Gavjum shahar sahroga aylandi.
Qalʼayu minora to abad
Yovvoyi eshaklar yayraydigan joy,
Chorva uchun yaylov boʻldi.
15 Toki yuqoridan ustimizga
Ruh yogʻilmaguncha shunday boʻladi.
Undan keyin sahrolar serhosil dalaga aylanadi,
Serhosil dala oʻrmon sifat boʻladi.
16 Shunda odillik sahroda makon qiladi,
Solihlik serhosil dalada maskan qiladi.
17 Solihlik mevasi tinchlik boʻladi,
Solihlik samarasi to abad xotirjamlik, ishonch boʻladi.
18 Xalqim yashaydi sokin joylarda,
Bexavotir uylarda, xotirjam maskanlarda.
19 Oʻsha oʻrmonni doʻl yakson qiladi,
U shahar esa tamomila yoʻq boʻladi.
20 Shunday boʻlsa ham, naqadar baxtlisiz!
Irmoqlar boʻyida ekin ekasiz.
Chorvayu podangiz yaylovlarni kezib yuradi.
32–БОБ
Солиҳлик ҳукмронлик қилади
1 Ана, шоҳ солиҳлик билан ҳукмронлик қилади,
Ҳукмдорлар адолат билан бошқаради.
2 Ҳар бир одам шамолдан асрайдиган паноҳдай бўлади,
Бўрондан сақлайдиган бошпана каби бўлади.
Улар саҳродаги сув ўзанига ўхшайди,
Ташна ердаги улкан қоянинг соясидай бўлади.
3 Кўриб турганлар энди кўз юмиб юрмайди,
Қулоғи борлар энди қулоқ солади.
4 Идроксизнинг ақли англайдиган бўлади,
Дудуқ одамнинг тили равон бўлади.
5 Аҳмоқни энди аслзода деб чақирмайдилар,
Ярамасни, ҳурматга сазовор, деб айтмайдилар.
6 Мана, аҳмоқ калтафаҳмлик билан гапиради,
Фикри–зикри эса ёвузлик билан банд.
Қилганлари — нопоклик,
Эгам ҳақида хато гапиради.
Оч одамни у очлигича қолдиради,
Чанқаганга сув бермайди.
7 Баттолнинг усуллари ёвуздир,
У ёмонликлар режалаштиради,
Ёлғон гап–сўзлари билан
Фақирнинг ҳақ даъвосини йўққа чиқариб,
Бечорани нобуд қилади.
8 Олижаноб одамлар эса яхши режалар тузади,
Яхши ният қилиб, ўз сўзида туради.
Қуддус аёллари тўғрисида башорат
9 Эй сиз, беғам аёллар,
Туринглар, Менга қулоқ солинглар!
Эй сиз, ўзига ишонган қизлар,
Менинг гапларимни эшитинглар!
10 Эй сизлар, бепарво юрганлар,
Бир йил ўтар–ўтмас титрай бошлайсиз.
Узум ҳосили яхши бўлмайди,
Мева ҳосил бермайди.
11 Қўрқинг, эй сиз, беғам аёллар,
Қалтиранг, эй ўзига ишонган қизлар!
Тавба қилиб, кийимингизни ечиб ташланг.
Қанорга ўраниб, белингизни боғланг!
12 Кўкрагингизга уриб йиғланг
Ажойиб далаларингиз,
Серҳосил узумзорларингиз учун!
13 Халқимнинг ери учун йиғланг!
У ерни тикан, янтоқ буталари босиб кетади.
Ҳа, шодликка тўла бўлган уйлар учун,
Қувноқ шаҳар учун аза тутинг!
14 Мана, сарой ташландиқ бўлиб қолди,
Гавжум шаҳар саҳрога айланди.
Қалъаю минора то абад
Ёввойи эшаклар яйрайдиган жой,
Чорва учун яйлов бўлди.
15 Токи юқоридан устимизга
Руҳ ёғилмагунча шундай бўлади.
Ундан кейин саҳролар серҳосил далага айланади,
Серҳосил дала ўрмон сифат бўлади.
16 Шунда одиллик саҳрода макон қилади,
Солиҳлик серҳосил далада маскан қилади.
17 Солиҳлик меваси тинчлик бўлади,
Солиҳлик самараси то абад хотиржамлик, ишонч бўлади.
18 Халқим яшайди сокин жойларда,
Бехавотир уйларда, хотиржам масканларда.
19 Ўша ўрмонни дўл яксон қилади,
У шаҳар эса тамомила йўқ бўлади.
20 Шундай бўлса ҳам, нақадар бахтлисиз!
Ирмоқлар бўйида экин экасиз.
Чорваю подангиз яйловларни кезиб юради.
