7–BOB
1 Shundan keyin Xirat–Yoʻrim aholisi borib, Egamizning Sandigʻini oldi. Uni Abunadavning tepalikdagi uyiga olib kelishdi. Egamizning Sandigʻini avaylab saqlasin deb, Abunadavning oʻgʻli Elazarni poklab, shu vazifaga tayinlashdi.
Shomuil Isroilga yoʻlboshchilik qiladi
2 Sandiq uzoq vaqt — yigirma yilcha Xirat–Yoʻrimda qolib ketdi. Bu orada butun Isroil xalqi Egamizga talpindi.
3 Shomuil jamiki Isroil xalqiga dedi:
— Agar chin dildan Egamizga qaytmoqchi boʻlsangiz, hamma begona xudolarni va Ashtaret tasvirlarini orangizdan yoʻqoting. Koʻnglingizni Egamizga berib, yolgʻiz Unga xizmat qiling. Ana shunda Egamiz sizlarni Filistlarning qoʻlidan qutqaradi.
4 Isroil xalqi Baal va Ashtaret tasvirlarini yoʻq qilib, faqat Egamizga xizmat qila boshlashdi.
5 Oʻshanda Shomuil:
— Butun Isroil xalqi Mispaxda toʻplansin, men u yerda Isroil xalqi uchun Egamizga iltijo qilaman, — dedi.
6 Mispaxda toʻplangan Isroil xalqi quduqdan suv tortib, Egamizga nazr qilib toʻkishdi. “Egamiz oldida gunoh qildik”, deb oʻsha kuni roʻza tutishdi. Shomuil Mispaxda Isroil xalqiga hakamlik qila boshladi.
7 Filistlar Isroil xalqining Mispaxda toʻplanganini eshitib qolishdi. Filist beklari, Isroil xalqi bilan urishamiz, deb otlanishdi. Isroil xalqi buni eshitib, Filistlardan qoʻrqib ketishdi. 8 Ular Shomuilga:
— Biz uchun Egamiz Xudoga tinimsiz iltijo qiling, toki U bizni Filistlarning qoʻlidan qutqarsin, — deyishdi. 9 Shu boisdan Shomuil bitta emadigan qoʻzichoq olib, Egamizga kuydiriladigan qurbonlik qildi. Soʻng Isroil xalqi uchun Egamizga nolayu faryod bilan iltijo qildi. Egamiz uning iltijosini eshitdi.
10 Shomuil kuydiriladigan qurbonlikni ado etayotgan edi, Filistlar Isroil lashkariga hujum qilmoqchi boʻlib yaqin keldilar. Ammo oʻsha zahoti Egamiz vahimali ovoz chiqarib, Filistlarni shunday sarosimaga soldiki, oqibatda ular Isroil lashkariga magʻlub boʻldi. 11 Isroil lashkari Mispaxdan chiqib, Filistlarni Bayt–Kor degan yerning etagigacha quvib borib oʻldirdilar.
12 Shomuil bir toshni olib, Mispax bilan Yashono orasiga oʻrnatdi. “Egamiz bizga yoʻl boʻyi yordam berdi”, deya toshga Evanzor deb nom berdi. 13 Magʻlub boʻlgan Filistlar Isroil hududiga qaytib hujum qilishmadi. Shomuil hayotligida Isroil xalqi Filistlarga hujum qilganda, Egamiz madad berib turdi. 14 Exrondan Gatga qadar Filistlar qoʻlga kiritgan shaharlarning hammasini Isroil xalqi yana qaytarib oldi. Shunday qilib, Isroil xalqining hamma yerlari Filistlardan ozod boʻldi. Isroil xalqi bilan Amor xalqlari orasida sulh tuzildi.
15 Shomuil umr boʻyi Isroilga hakamlik qildi. 16 U har yili Baytil, Gilgal, Mispaxni aylanar, bu shaharlarda turib, Isroilni boshqarardi. 17 Keyin Rama shahridagi uyiga qaytar va oʻsha yerda turib Isroilga hakamlik qilardi. Shomuil Ramada Egamizga atab bir qurbongoh qurdirdi.
7–БОБ
1 Шундан кейин Хират–Йўрим аҳолиси бориб, Эгамизнинг Сандиғини олди. Уни Абунадавнинг тепаликдаги уйига олиб келишди. Эгамизнинг Сандиғини авайлаб сақласин деб, Абунадавнинг ўғли Элазарни поклаб, шу вазифага тайинлашди.
Шомуил Исроилга йўлбошчилик қилади
2 Сандиқ узоқ вақт — йигирма йилча Хират–Йўримда қолиб кетди. Бу орада бутун Исроил халқи Эгамизга талпинди.
3 Шомуил жамики Исроил халқига деди:
— Агар чин дилдан Эгамизга қайтмоқчи бўлсангиз, ҳамма бегона худоларни ва Аштарет тасвирларини орангиздан йўқотинг. Кўнглингизни Эгамизга бериб, ёлғиз Унга хизмат қилинг. Ана шунда Эгамиз сизларни Филистларнинг қўлидан қутқаради.
4 Исроил халқи Баал ва Аштарет тасвирларини йўқ қилиб, фақат Эгамизга хизмат қила бошлашди.
5 Ўшанда Шомуил:
— Бутун Исроил халқи Миспахда тўплансин, мен у ерда Исроил халқи учун Эгамизга илтижо қиламан, — деди.
6 Миспахда тўпланган Исроил халқи қудуқдан сув тортиб, Эгамизга назр қилиб тўкишди. “Эгамиз олдида гуноҳ қилдик”, деб ўша куни рўза тутишди. Шомуил Миспахда Исроил халқига ҳакамлик қила бошлади.
7 Филистлар Исроил халқининг Миспахда тўпланганини эшитиб қолишди. Филист беклари, Исроил халқи билан уришамиз, деб отланишди. Исроил халқи буни эшитиб, Филистлардан қўрқиб кетишди. 8 Улар Шомуилга:
— Биз учун Эгамиз Худога тинимсиз илтижо қилинг, токи У бизни Филистларнинг қўлидан қутқарсин, — дейишди. 9 Шу боисдан Шомуил битта эмадиган қўзичоқ олиб, Эгамизга куйдириладиган қурбонлик қилди. Сўнг Исроил халқи учун Эгамизга нолаю фарёд билан илтижо қилди. Эгамиз унинг илтижосини эшитди.
10 Шомуил куйдириладиган қурбонликни адо этаётган эди, Филистлар Исроил лашкарига ҳужум қилмоқчи бўлиб яқин келдилар. Аммо ўша заҳоти Эгамиз ваҳимали овоз чиқариб, Филистларни шундай саросимага солдики, оқибатда улар Исроил лашкарига мағлуб бўлди. 11 Исроил лашкари Миспахдан чиқиб, Филистларни Байт–Кор деган ернинг этагигача қувиб бориб ўлдирдилар.
12 Шомуил бир тошни олиб, Миспах билан Яшоно орасига ўрнатди. “Эгамиз бизга йўл бўйи ёрдам берди”, дея тошга Эванзор деб ном берди. 13 Мағлуб бўлган Филистлар Исроил ҳудудига қайтиб ҳужум қилишмади. Шомуил ҳаётлигида Исроил халқи Филистларга ҳужум қилганда, Эгамиз мадад бериб турди. 14 Эхрондан Гатга қадар Филистлар қўлга киритган шаҳарларнинг ҳаммасини Исроил халқи яна қайтариб олди. Шундай қилиб, Исроил халқининг ҳамма ерлари Филистлардан озод бўлди. Исроил халқи билан Амор халқлари орасида сулҳ тузилди.
15 Шомуил умр бўйи Исроилга ҳакамлик қилди. 16 У ҳар йили Байтил, Гилгал, Миспахни айланар, бу шаҳарларда туриб, Исроилни бошқарарди. 17 Кейин Рама шаҳридаги уйига қайтар ва ўша ерда туриб Исроилга ҳакамлик қиларди. Шомуил Рамада Эгамизга атаб бир қурбонгоҳ қурдирди.
