7–BOB
Ezra Quddusga keladi
1 Oradan koʻp yillar oʻtdi. Fors shohi Artaxshas hukmronligi davrida Ezra degan bir odam bor edi. Uning nasabnomasi quyidagicha edi:
Ezra — Sarayoning oʻgʻli ,
Sarayo — Ozariyoning oʻgʻli,
Ozariyo — Xilqiyoning oʻgʻli,
2 Xilqiyo — Shallumning oʻgʻli,
Shallum — Zodoʻxning oʻgʻli,
Zodoʻx — Oxitobning oʻgʻli,
3 Oxitob — Emoriyoning oʻgʻli,
Emoriyo — Ozariyoning oʻgʻli,
Ozariyo — Maroyoʻtning oʻgʻli,
4 Maroyoʻt — Zaraxiyoning oʻgʻli,
Zaraxiyo — Uzzining oʻgʻli,
Uzzi — Bukkining oʻgʻli,
5 Bukki — Abushuvaning oʻgʻli,
Abushuva — Finxazning oʻgʻli,
Finxaz — Elazarning oʻgʻli,
Elazar — oliy ruhoniy Horunning oʻgʻli edi.
6-7 Ezra Isroil xalqining Xudosi — Egamizning Musoga bergan qonunini juda yaxshi biladigan mohir tafsirchi edi.
Shoh Artaxshas hukmronligining yettinchi yilida Ezra Bobildan Quddusga tomon yoʻlga otlandi. Isroil xalqidan, ruhoniylardan, levilardan, qoʻshiqchilardan, Maʼbad darvozabonlaridan, Maʼbad xizmatkorlaridan baʼzilari ham Ezra bilan birga Quddusga ketmoqchi boʻldilar. Ezraga Egasi Xudo yor boʻlgani uchun, shoh unga soʻragan narsasini inʼom qildi. 8-9 Birinchi oyning birinchi kunida ular Ezraning boshchiligida Bobildan chiqdilar. Ezraga Xudoning marhamati yor boʻlgani uchun, ular toʻrt oydan keyin — beshinchi oyning birinchi kunida Quddusga yetib keldilar. 10 Ezra butun hayotini Egamiz bergan Tavrot kitobini oʻrganishga, unga amal qilishga, Tavrotdagi qonun–qoidalarni Isroil xalqiga oʻrgatishga bagʻishlagan edi.
Shoh Artaxshasning Ezraga bergan xati
11 Egamizning Isroil xalqiga bergan amr va qonunlarining mohir tafsirchisi — ruhoniy Ezraga shoh Artaxshas maktub bergan edi. Maktubning mazmuni quyidagicha edi:
12 “Samoviy Xudo qonunlarining mohir tafsirchisi — ruhoniy Ezraga shohanshoh Artaxshasdan salomlar boʻlsin.
13 Mening shohligimda istiqomat qilayotgan Isroil xalqidan, shuningdek, ruhoniy va levilardan sen bilan Quddusga ketishni istagan har kimga ijozat berilsin, deb farmon beraman. 14 Men va yettita maslahatchim seni Yahudo yurti va Quddusga yuborib, u yerdagi vaziyatni tekshirib chiqishingga vakolat beramiz. Senga topshirilgan Xudoyingning qonuni u yerda ijro etilyaptimi yoki yoʻqmi, bilib kel. 15 Quddusda maskan qilgan Isroil xalqining Xudosiga biz koʻngildan chiqarib nazr qilgan kumush va oltinlarni ham oʻzing bilan olib ket. 16 Bobil viloyati boʻylab sen toʻplaydigan hamma kumush va oltinni ol. Isroil xalqi va ularning ruhoniylari oʻz Xudosining Quddusdagi uyi uchun koʻngildan chiqarib beradigan nazrlarni ham olib ket.
17 Bu kumush va oltinga, birinchi navbatda, buqalar, qoʻchqorlar, qoʻzilar, ularga qoʻshib qilinadigan don bilan sharob nazrlarini sotib ol. Bularni Xudoyingning Quddusdagi uyi qurbongohida nazr qil. 18 Qolgan kumush va oltinni esa Xudoyingning xohishiga muvofiq, oʻzingga va hamkorlaringga maʼqul kelganicha ishlatsang boʻladi. 19 Xudoyingning uyida foydalanish uchun berilgan buyumlarni Quddusdagi Xudoga inʼom qil. 20 Bordi–yu, Xudoyingning uyi uchun yana boshqa xarajatlar talab qilinsa, mablagʻni shoh xazinasidan olishing mumkin.
21 Men, shoh Artaxshas, Furot daryosining gʻarbidagi viloyat xazinabonlarining hammasiga farmon beraman: Samoviy Xudo qonunlarining mohir tafsirchisi — ruhoniy Ezra nima talab qilmasin, uning talabi soʻzsiz ijro etilsin. 22 200 pudga qadar kumush, 1000 togʻoraga qadar bugʻdoy, 200 koʻzaga qadar sharob, 200 koʻzaga qadar moy va keragicha tuz berilsin. 23 Samoviy Xudo Oʻz uyi uchun nimalarni amr qilgan boʻlsa, oʻsha narsalar albatta muhayyo qilinsin. Mendan va mening merosxoʻrlarimdan Xudo gʻazablanmasin. 24 Biz yana sizlarni xabardor qilamizki, ruhoniylardan, levilardan, qoʻshiqchilardan, Maʼbad darvozabonlaridan, Maʼbad xizmatkorlaridan, Xudoning uyidagi boshqa xizmatkorlardan oʻlpon, soliq yoki xiroj olish man etiladi.
25 Sen esa, Ezra, Xudo bergan donolik bilan qozi va hakamlarni tayinla. Ular Furot daryosining gʻarbidagi viloyatda Xudoyingning qonunlarini biladigan jamiki xalqni hukm qilsinlar. Qonunlarni bilmaydigan odamlarga sizlar taʼlim beringlar. 26 Xudoyingning qonuniga va shohning qonuniga itoat qilmaganlarning hammasi albatta jazoga tortilsin: qatl qilinsin yoki surgun qilinsin, qamoqqa tashlansin yoki mol–mulki musodara qilinsin.”
Ezra Xudoni madh qiladi
27 Ota–bobolarimizning Xudosi — Egamizga hamdu sanolar boʻlsin! Egam Quddusdagi uyini sharaflash istagini shohning yuragiga soldi. 28 Egam Xudoning marhamati bilan men shohning, uning maslahatchilari va barcha obroʻli aʼyonlarining iltifotiga sazovor boʻldim.
Ezra safarga tayyorlanadi
Egam Xudo menga yor boʻlgani uchun men dadil boʻlib, Isroil yoʻlboshchilarini oʻzim bilan olib ketgani toʻpladim.
7–БОБ
Эзра Қуддусга келади
1 Орадан кўп йиллар ўтди. Форс шоҳи Артахшас ҳукмронлиги даврида Эзра деган бир одам бор эди. Унинг насабномаси қуйидагича эди:
Эзра — Сараёнинг ўғли ,
Сараё — Озариёнинг ўғли,
Озариё — Хилқиёнинг ўғли,
2 Хилқиё — Шаллумнинг ўғли,
Шаллум — Зодўхнинг ўғли,
Зодўх — Охитобнинг ўғли,
3 Охитоб — Эмориёнинг ўғли,
Эмориё — Озариёнинг ўғли,
Озариё — Маройўтнинг ўғли,
4 Маройўт — Зарахиёнинг ўғли,
Зарахиё — Уззининг ўғли,
Уззи — Буккининг ўғли,
5 Букки — Абушуванинг ўғли,
Абушува — Финхазнинг ўғли,
Финхаз — Элазарнинг ўғли,
Элазар — олий руҳоний Ҳоруннинг ўғли эди.
6-7 Эзра Исроил халқининг Худоси — Эгамизнинг Мусога берган қонунини жуда яхши биладиган моҳир тафсирчи эди.
Шоҳ Артахшас ҳукмронлигининг еттинчи йилида Эзра Бобилдан Қуддусга томон йўлга отланди. Исроил халқидан, руҳонийлардан, левилардан, қўшиқчилардан, Маъбад дарвозабонларидан, Маъбад хизматкорларидан баъзилари ҳам Эзра билан бирга Қуддусга кетмоқчи бўлдилар. Эзрага Эгаси Худо ёр бўлгани учун, шоҳ унга сўраган нарсасини инъом қилди. 8-9 Биринчи ойнинг биринчи кунида улар Эзранинг бошчилигида Бобилдан чиқдилар. Эзрага Худонинг марҳамати ёр бўлгани учун, улар тўрт ойдан кейин — бешинчи ойнинг биринчи кунида Қуддусга етиб келдилар. 10 Эзра бутун ҳаётини Эгамиз берган Таврот китобини ўрганишга, унга амал қилишга, Тавротдаги қонун–қоидаларни Исроил халқига ўргатишга бағишлаган эди.
Шоҳ Артахшаснинг Эзрага берган хати
11 Эгамизнинг Исроил халқига берган амр ва қонунларининг моҳир тафсирчиси — руҳоний Эзрага шоҳ Артахшас мактуб берган эди. Мактубнинг мазмуни қуйидагича эди:
12 “Самовий Худо қонунларининг моҳир тафсирчиси — руҳоний Эзрага шоҳаншоҳ Артахшасдан саломлар бўлсин.
13 Менинг шоҳлигимда истиқомат қилаётган Исроил халқидан, шунингдек, руҳоний ва левилардан сен билан Қуддусга кетишни истаган ҳар кимга ижозат берилсин, деб фармон бераман. 14 Мен ва еттита маслаҳатчим сени Яҳудо юрти ва Қуддусга юбориб, у ердаги вазиятни текшириб чиқишингга ваколат берамиз. Сенга топширилган Худойингнинг қонуни у ерда ижро этиляптими ёки йўқми, билиб кел. 15 Қуддусда маскан қилган Исроил халқининг Худосига биз кўнгилдан чиқариб назр қилган кумуш ва олтинларни ҳам ўзинг билан олиб кет. 16 Бобил вилояти бўйлаб сен тўплайдиган ҳамма кумуш ва олтинни ол. Исроил халқи ва уларнинг руҳонийлари ўз Худосининг Қуддусдаги уйи учун кўнгилдан чиқариб берадиган назрларни ҳам олиб кет.
17 Бу кумуш ва олтинга, биринчи навбатда, буқалар, қўчқорлар, қўзилар, уларга қўшиб қилинадиган дон билан шароб назрларини сотиб ол. Буларни Худойингнинг Қуддусдаги уйи қурбонгоҳида назр қил. 18 Қолган кумуш ва олтинни эса Худойингнинг хоҳишига мувофиқ, ўзингга ва ҳамкорларингга маъқул келганича ишлатсанг бўлади. 19 Худойингнинг уйида фойдаланиш учун берилган буюмларни Қуддусдаги Худога инъом қил. 20 Борди–ю, Худойингнинг уйи учун яна бошқа харажатлар талаб қилинса, маблағни шоҳ хазинасидан олишинг мумкин.
21 Мен, шоҳ Артахшас, Фурот дарёсининг ғарбидаги вилоят хазинабонларининг ҳаммасига фармон бераман: Самовий Худо қонунларининг моҳир тафсирчиси — руҳоний Эзра нима талаб қилмасин, унинг талаби сўзсиз ижро этилсин. 22 200 пудга қадар кумуш, 1000 тоғорага қадар буғдой, 200 кўзага қадар шароб, 200 кўзага қадар мой ва керагича туз берилсин. 23 Самовий Худо Ўз уйи учун нималарни амр қилган бўлса, ўша нарсалар албатта муҳайё қилинсин. Мендан ва менинг меросхўрларимдан Худо ғазабланмасин. 24 Биз яна сизларни хабардор қиламизки, руҳонийлардан, левилардан, қўшиқчилардан, Маъбад дарвозабонларидан, Маъбад хизматкорларидан, Худонинг уйидаги бошқа хизматкорлардан ўлпон, солиқ ёки хирож олиш ман этилади.
25 Сен эса, Эзра, Худо берган донолик билан қози ва ҳакамларни тайинла. Улар Фурот дарёсининг ғарбидаги вилоятда Худойингнинг қонунларини биладиган жамики халқни ҳукм қилсинлар. Қонунларни билмайдиган одамларга сизлар таълим беринглар. 26 Худойингнинг қонунига ва шоҳнинг қонунига итоат қилмаганларнинг ҳаммаси албатта жазога тортилсин: қатл қилинсин ёки сургун қилинсин, қамоққа ташлансин ёки мол–мулки мусодара қилинсин.”
Эзра Худони мадҳ қилади
27 Ота–боболаримизнинг Худоси — Эгамизга ҳамду санолар бўлсин! Эгам Қуддусдаги уйини шарафлаш истагини шоҳнинг юрагига солди. 28 Эгам Худонинг марҳамати билан мен шоҳнинг, унинг маслаҳатчилари ва барча обрўли аъёнларининг илтифотига сазовор бўлдим.
Эзра сафарга тайёрланади
Эгам Худо менга ёр бўлгани учун мен дадил бўлиб, Исроил йўлбошчиларини ўзим билан олиб кетгани тўпладим.
