10–BOB
Pavlusga Xudo bergan hokimiyat
1 Masihning Oʻzi koʻrsatgan muloyimlik va mehribonlik bilan sizlardan iltijo qilaman. Baʼzilar men haqimda: “Pavlus shaxsan oramizda boʻlganda moʻmin–u, uzoqda boʻlganda esa juda jasur ekan–a!” deb aytayotgan ekan. 2 Baʼzilar meni boʻshang odam, deb aytayotgan ekan. Men albatta bunday odamlarga qattiq muomala qilaman. Sizlardan oʻtinaman, sizlarga qattiq gapirishga meni majbur qilmanglar. 3 Biz inson boʻlib, bu dunyoda yashasak ham, bashariy kuch bilan jang qilmaymiz. 4 Bizning qurol–aslahalarimiz bashariy manfaat uchun emas, balki ilohiy manfaat uchun ishlatiladi. Bizning qurol–aslahalarimiz bu dunyoning qurol–aslahalariday emas. Xudoning qudrati bilan bu qurol–aslahalarimiz qalʼaday mustahkam boʻlgan insoniy oʻy–xayollarni hamda quruq safsatalarni yoʻq qilishga qodir. 5 Xudoni tanib–bilishga toʻsqinlik qilayotgan takabburona dunyoqarashga biz barham beramiz. Har qanday oʻy–xayolni Masihga boʻysundirib, asir qilamiz. 6 Shunday qilib, oʻzlaringiz ham toʻla boʻysunganingizdan keyin, biz birgalikda har xil itoatsizlikni jazolashga tayyor boʻlamiz.
7 Sizlar mening havoriy ekanligimni nahotki bilmasangizlar?! Agar birortasi ishonch bilan: “Men Masihga tegishliman”, desa, shuni oʻylab koʻrsin: u tegishli boʻlgan Masihga biz ham tegishlimiz! 8 Egamiz tomonidan berilgan hokimiyat haqida juda koʻp maqtansam ham, bundan hech xijolat boʻlmayman. Axir, bu hokimiyat menga sizlarning imoningizni vayron qilish uchun emas, balki mustahkamlash uchun berilgan.
9-11 Darvoqe, baʼzilar: “U maktublarida talabchan va kuchli, lekin shaxsan biz bilan boʻlganda esa zaif, soʻzlari ham taʼsirsiz”, deb aytayotgan ekan. Bunday deb aytayotganlar shuni bilib qoʻysinlarki, men faqatgina maktublarimda ogohlantirib qolmayapman. Men maktublarimda qanday inson ekanligimni koʻrsatgan boʻlsam, huzuringizda boʻlganimda ham shunday inson ekanligimni oʻz harakatlarim bilan isbotlayman.
Maqtanishu maqtanmaslik haqida
12 Oʻzlariga yuqori baho beradigan odamlarning qatoriga biz oʻzimizni qoʻshmaymiz, hatto ular bilan solishtirmaymiz. Ular oʻzlarini oʻzlari bilan oʻlchab, oʻzlarini oʻzlariga qiyos qiladilar. Bu qanday ahmoqlik! 13 Biz haddan tashqari maqtanmaymiz. Xudo bizga yuklagan masʼuliyat va vazifa doirasidan chiqib ketmaymiz. Sizlar ham bizning masʼuliyatimiz doirasiga kirasizlar. 14 Agar biz sizlarga masʼul boʻlmaganimizda edi, sizlarga qilgan muomalamizda haddimizdan oshgan boʻlardik. Ammo oʻzlaringiz bilasiz–ku, birinchi boʻlib sizlarga Masihning Xushxabarini keltirgan bizmiz.
15 Biz haddimizdan oshib, boshqalarning qilgan mehnati bilan maqtanmaymiz. Umid qilamizki, imoningiz oshib boraveradi, shunda sizlarning yordamingiz bilan xizmatimiz yanada koʻpayadi. 16 Shunday qilib, boshqalarning tayyor ishlari bilan maqtanmay, sizlardan uzoqroq boʻlgan joylarga ham Xushxabarni yetkazaylik. 17 Muqaddas bitiklarda oʻrgatilganday, kim maqtanmoqchi boʻlsa, Egamizning qilgan ishlari bilan maqtansin! 18 Oʻzini oʻzi maqtagan odam emas, balki Egamizning maqtoviga sazovor boʻlgan odamgina Unga maqbul boʻladi.
10–БОБ
Павлусга Худо берган ҳокимият
1 Масиҳнинг Ўзи кўрсатган мулойимлик ва меҳрибонлик билан сизлардан илтижо қиламан. Баъзилар мен ҳақимда: “Павлус шахсан орамизда бўлганда мўмин–у, узоқда бўлганда эса жуда жасур экан–а!” деб айтаётган экан. 2 Баъзилар мени бўшанг одам, деб айтаётган экан. Мен албатта бундай одамларга қаттиқ муомала қиламан. Сизлардан ўтинаман, сизларга қаттиқ гапиришга мени мажбур қилманглар. 3 Биз инсон бўлиб, бу дунёда яшасак ҳам, башарий куч билан жанг қилмаймиз. 4 Бизнинг қурол–аслаҳаларимиз башарий манфаат учун эмас, балки илоҳий манфаат учун ишлатилади. Бизнинг қурол–аслаҳаларимиз бу дунёнинг қурол–аслаҳаларидай эмас. Худонинг қудрати билан бу қурол–аслаҳаларимиз қалъадай мустаҳкам бўлган инсоний ўй–хаёлларни ҳамда қуруқ сафсаталарни йўқ қилишга қодир. 5 Худони таниб–билишга тўсқинлик қилаётган такаббурона дунёқарашга биз барҳам берамиз. Ҳар қандай ўй–хаёлни Масиҳга бўйсундириб, асир қиламиз. 6 Шундай қилиб, ўзларингиз ҳам тўла бўйсунганингиздан кейин, биз биргаликда ҳар хил итоатсизликни жазолашга тайёр бўламиз.
7 Сизлар менинг ҳаворий эканлигимни наҳотки билмасангизлар?! Агар бирортаси ишонч билан: “Мен Масиҳга тегишлиман”, деса, шуни ўйлаб кўрсин: у тегишли бўлган Масиҳга биз ҳам тегишлимиз! 8 Эгамиз томонидан берилган ҳокимият ҳақида жуда кўп мақтансам ҳам, бундан ҳеч хижолат бўлмайман. Ахир, бу ҳокимият менга сизларнинг имонингизни вайрон қилиш учун эмас, балки мустаҳкамлаш учун берилган.
9-11 Дарвоқе, баъзилар: “У мактубларида талабчан ва кучли, лекин шахсан биз билан бўлганда эса заиф, сўзлари ҳам таъсирсиз”, деб айтаётган экан. Бундай деб айтаётганлар шуни билиб қўйсинларки, мен фақатгина мактубларимда огоҳлантириб қолмаяпман. Мен мактубларимда қандай инсон эканлигимни кўрсатган бўлсам, ҳузурингизда бўлганимда ҳам шундай инсон эканлигимни ўз ҳаракатларим билан исботлайман.
Мақтанишу мақтанмаслик ҳақида
12 Ўзларига юқори баҳо берадиган одамларнинг қаторига биз ўзимизни қўшмаймиз, ҳатто улар билан солиштирмаймиз. Улар ўзларини ўзлари билан ўлчаб, ўзларини ўзларига қиёс қиладилар. Бу қандай аҳмоқлик! 13 Биз ҳаддан ташқари мақтанмаймиз. Худо бизга юклаган масъулият ва вазифа доирасидан чиқиб кетмаймиз. Сизлар ҳам бизнинг масъулиятимиз доирасига кирасизлар. 14 Агар биз сизларга масъул бўлмаганимизда эди, сизларга қилган муомаламизда ҳаддимиздан ошган бўлардик. Аммо ўзларингиз биласиз–ку, биринчи бўлиб сизларга Масиҳнинг Хушхабарини келтирган бизмиз.
15 Биз ҳаддимиздан ошиб, бошқаларнинг қилган меҳнати билан мақтанмаймиз. Умид қиламизки, имонингиз ошиб бораверади, шунда сизларнинг ёрдамингиз билан хизматимиз янада кўпаяди. 16 Шундай қилиб, бошқаларнинг тайёр ишлари билан мақтанмай, сизлардан узоқроқ бўлган жойларга ҳам Хушхабарни етказайлик. 17 Муқаддас битикларда ўргатилгандай, ким мақтанмоқчи бўлса, Эгамизнинг қилган ишлари билан мақтансин! 18 Ўзини ўзи мақтаган одам эмас, балки Эгамизнинг мақтовига сазовор бўлган одамгина Унга мақбул бўлади.
