18–BOB
Bobil vayron boʻladi
1 Bundan keyin men samodan tushib kelayotgan boshqa bir farishtani koʻrdim. Unda buyuk hokimiyat bor edi. Uning ulugʻvorligidan yer yuzi yorishib ketdi. 2 U qattiq hayqirib, shunday dedi:
“Vayron boʻldi! Buyuk Bobil vayron boʻldi!
U jinlarning makoni, har turli yovuz ruhning panohi,
Har qanday harom va jirkanch qushning uyasi boʻlib qoldi.
Axir, barcha xalqlar Bobilning
Shahvoniy hirsi sharobidan ichgandi.
3 Yer yuzi shohlari u bilan zino qilgandi,
Yer yuzi savdogarlari
Uning cheksiz shahvati tufayli boylik orttirgandi.”
4 Shu payt men samodan kelayotgan boshqa bir ovozni eshitdim. U shunday dedi:
“Ey xalqim, Bobildan chiqib keting!
Tagʻin gunohlariga sherik boʻlib qolmang,
Tagʻin sizlar ham Bobilning balolariga duchor boʻlmang!
5 Zero, uning gunohlari uyilib koʻkka yetdi,
Xudo uning jinoyatlarini yodga oldi.
6 Bobil sizga nima qilgan boʻlsa,
Xudo ham unga shuni qilsin!
Qilmishiga yarasha ikki barobar jazosini bersin!
Oʻzi tayyorlagan ichimlikdan unga ikki barobar ichirsin!
7 Bobil qay darajada kekkayib, kayf–safo surgan boʻlsa,
Unga shu darajada azobu iztirob berilsin!
Axir, u dilida shunday demoqda:
«Men malikaman, beva emasman,
Aslo qaygʻu chekmayman.»
8 Shu bois uning boshiga balolar keladi,
U bir kunning ichida oʻlat, qaygʻu, qahatchilikka duchor boʻladi.
Uni olovda yondirishadi.
Axir, uni hukm qiluvchi Egamiz Xudo qudratlidir!”
9 Bobil bilan zino qilib, kayf–safo surgan yer yuzi shohlari yonayotgan Bobilning tutunini koʻrib, uning holiga hoʻngrab yigʻlaydilar. 10 Bobilning azob–uqubatidan dahshatga tushib, uzoqdan turib, deydilar:
“Ey buyuk shahar, holingga voy!
Ey qudratli Bobil, holingga voy!
Sen bir soatdayoq jazoingni olding!”
11 Yer yuzi savdogarlari ham uning holiga yigʻlab, motam tutadilar. Chunki ularning molini endi hech kim sotib olmaydi. 12 Oltin, kumush, javohirlaru marvaridlarni, mayin zigʻir matosi, shoyi, safsaru qirmizi gazlamalarni, turli xil xushboʻy yogʻochlarni, fil suyagidan yasalgan har xil buyumlarni, eng qimmatbaho yogʻochdan, bronzadan, temirdan va marmardan yasalgan buyumlarni, 13 dolchin, ziravorlar, xushboʻy tutatqilar va mirrani , sharob, zaytun moyini, oliy navli un va bugʻdoyni, mol–qoʻylarni, otlaru aravalarni, odamlarning jonini, tanasini ham sotib oladigan boshqa hech kim boʻlmaydi. 14 Savdogarlar shunday deb aytishadi: “Ey Bobil, sen orzu qilgan neʼmatlaring yoʻq boʻldi. Hashamatu savlating nom–nishonsiz gʻoyib boʻldi.” 15 Ha, oʻsha mollarini Bobilga sotib, boyib ketgan savdogarlar Bobilning azob–uqubatidan dahshatga tushib, qaygʻurib yigʻlaydilar:
16 “Holingga voy!
Ey buyuk shahar, holingga voy!
Sen mayin zigʻir matosidan kiyim kiyar eding,
Safsaru qirmizi liboslar ila yasanarding.
Oltin, javohirlaru marvaridlar ila bezanarding.
17 Shunday boyliging bir soatdayoq nobud boʻldi–ya!”
Har bir kema dargʻasi, kemadagi yoʻlovchilar, dengizchilar va dengizda savdo–sotiq qiluvchilarning hammasi uzoqdan Bobilga qarab turadilar. 18 Shahardagi yongʻindan chiqayotgan tutunni koʻrib, shunday faryod qiladilar: “Bu buyuk shaharga teng keladigani yoʻq!” 19 Ular boshlariga kul sochib, faryod chekib, qaygʻurib, dod soladilar:
“Holingga voy!
Ey buyuk shahar, holingga voy!
Dengizdagi kemalarga ega boʻlganlar
Sening ziynatlaring tufayli boylik orttirdilar.
Endi esa sen bir soatdayoq xarob boʻlding!
20 Ey samo, uning holidan shodlangin,
Ey Xudoning azizlari, xursand boʻling,
Havoriylaru paygʻambarlar, sevining!
Zero, Xudo sizlarni deb, Bobilni jazoladi.”
21 Keyin kuchli bir farishta tegirmon toshiga oʻxshash katta toshni koʻtarib, dengizga uloqtirdi–da, shunday dedi:
“Mana shunday shiddat bilan
Buyuk shahar Bobil qulaydi!
Endi u aslo qad koʻtarmaydi.
22 Arfachilaru ashulachilarning ovozlari senda eshitilmas,
Naychiyu karnaychilarning kuyi senda yangramas.
Endi bironta hunarmand senda ustaxona ochmaydi.
Tegirmon toshining tovushi koʻchalaringda eshitilmaydi.
23 Endi koʻchalaringdagi chiroqlar shuʼla sochmaydi,
Kuyov bilan kelinning ovozi eshitilmaydi.
Zero, savdogarlaring butun dunyoga soʻzini oʻtkazardi,
Sehr–jodularing dastidan jamiki xalqlar aldangan edi.
24 Paygʻambarlar va Xudo azizlarining qoni koʻchalaringda toʻkildi,
Ha, yer yuzida qirgʻinga duchor boʻlganlar senda oʻldirildi.”
18–БОБ
Бобил вайрон бўлади
1 Бундан кейин мен самодан тушиб келаётган бошқа бир фариштани кўрдим. Унда буюк ҳокимият бор эди. Унинг улуғворлигидан ер юзи ёришиб кетди. 2 У қаттиқ ҳайқириб, шундай деди:
“Вайрон бўлди! Буюк Бобил вайрон бўлди!
У жинларнинг макони, ҳар турли ёвуз руҳнинг паноҳи,
Ҳар қандай ҳаром ва жирканч қушнинг уяси бўлиб қолди.
Ахир, барча халқлар Бобилнинг
Шаҳвоний ҳирси шаробидан ичганди.
3 Ер юзи шоҳлари у билан зино қилганди,
Ер юзи савдогарлари
Унинг чексиз шаҳвати туфайли бойлик орттирганди.”
4 Шу пайт мен самодан келаётган бошқа бир овозни эшитдим. У шундай деди:
“Эй халқим, Бобилдан чиқиб кетинг!
Тағин гуноҳларига шерик бўлиб қолманг,
Тағин сизлар ҳам Бобилнинг балоларига дучор бўлманг!
5 Зеро, унинг гуноҳлари уйилиб кўкка етди,
Худо унинг жиноятларини ёдга олди.
6 Бобил сизга нима қилган бўлса,
Худо ҳам унга шуни қилсин!
Қилмишига яраша икки баробар жазосини берсин!
Ўзи тайёрлаган ичимликдан унга икки баробар ичирсин!
7 Бобил қай даражада кеккайиб, кайф–сафо сурган бўлса,
Унга шу даражада азобу изтироб берилсин!
Ахир, у дилида шундай демоқда:
«Мен маликаман, бева эмасман,
Асло қайғу чекмайман.»
8 Шу боис унинг бошига балолар келади,
У бир куннинг ичида ўлат, қайғу, қаҳатчиликка дучор бўлади.
Уни оловда ёндиришади.
Ахир, уни ҳукм қилувчи Эгамиз Худо қудратлидир!”
9 Бобил билан зино қилиб, кайф–сафо сурган ер юзи шоҳлари ёнаётган Бобилнинг тутунини кўриб, унинг ҳолига ҳўнграб йиғлайдилар. 10 Бобилнинг азоб–уқубатидан даҳшатга тушиб, узоқдан туриб, дейдилар:
“Эй буюк шаҳар, ҳолингга вой!
Эй қудратли Бобил, ҳолингга вой!
Сен бир соатдаёқ жазоингни олдинг!”
11 Ер юзи савдогарлари ҳам унинг ҳолига йиғлаб, мотам тутадилар. Чунки уларнинг молини энди ҳеч ким сотиб олмайди. 12 Олтин, кумуш, жавоҳирлару марваридларни, майин зиғир матоси, шойи, сафсару қирмизи газламаларни, турли хил хушбўй ёғочларни, фил суягидан ясалган ҳар хил буюмларни, энг қимматбаҳо ёғочдан, бронзадан, темирдан ва мармардан ясалган буюмларни, 13 долчин, зираворлар, хушбўй тутатқилар ва миррани , шароб, зайтун мойини, олий навли ун ва буғдойни, мол–қўйларни, отлару араваларни, одамларнинг жонини, танасини ҳам сотиб оладиган бошқа ҳеч ким бўлмайди. 14 Савдогарлар шундай деб айтишади: “Эй Бобил, сен орзу қилган неъматларинг йўқ бўлди. Ҳашамату савлатинг ном–нишонсиз ғойиб бўлди.” 15 Ҳа, ўша молларини Бобилга сотиб, бойиб кетган савдогарлар Бобилнинг азоб–уқубатидан даҳшатга тушиб, қайғуриб йиғлайдилар:
16 “Ҳолингга вой!
Эй буюк шаҳар, ҳолингга вой!
Сен майин зиғир матосидан кийим кияр эдинг,
Сафсару қирмизи либослар ила ясанардинг.
Олтин, жавоҳирлару марваридлар ила безанардинг.
17 Шундай бойлигинг бир соатдаёқ нобуд бўлди–я!”
Ҳар бир кема дарғаси, кемадаги йўловчилар, денгизчилар ва денгизда савдо–сотиқ қилувчиларнинг ҳаммаси узоқдан Бобилга қараб турадилар. 18 Шаҳардаги ёнғиндан чиқаётган тутунни кўриб, шундай фарёд қиладилар: “Бу буюк шаҳарга тенг келадигани йўқ!” 19 Улар бошларига кул сочиб, фарёд чекиб, қайғуриб, дод соладилар:
“Ҳолингга вой!
Эй буюк шаҳар, ҳолингга вой!
Денгиздаги кемаларга эга бўлганлар
Сенинг зийнатларинг туфайли бойлик орттирдилар.
Энди эса сен бир соатдаёқ хароб бўлдинг!
20 Эй само, унинг ҳолидан шодлангин,
Эй Худонинг азизлари, хурсанд бўлинг,
Ҳаворийлару пайғамбарлар, севининг!
Зеро, Худо сизларни деб, Бобилни жазолади.”
21 Кейин кучли бир фаришта тегирмон тошига ўхшаш катта тошни кўтариб, денгизга улоқтирди–да, шундай деди:
“Мана шундай шиддат билан
Буюк шаҳар Бобил қулайди!
Энди у асло қад кўтармайди.
22 Арфачилару ашулачиларнинг овозлари сенда эшитилмас,
Найчию карнайчиларнинг куйи сенда янграмас.
Энди биронта ҳунарманд сенда устахона очмайди.
Тегирмон тошининг товуши кўчаларингда эшитилмайди.
23 Энди кўчаларингдаги чироқлар шуъла сочмайди,
Куёв билан келиннинг овози эшитилмайди.
Зеро, савдогарларинг бутун дунёга сўзини ўтказарди,
Сеҳр–жодуларинг дастидан жамики халқлар алданган эди.
24 Пайғамбарлар ва Худо азизларининг қони кўчаларингда тўкилди,
Ҳа, ер юзида қирғинга дучор бўлганлар сенда ўлдирилди.”
