4–BOB
Ruhlarni sinovdan oʻtkazing
1 Ey azizlarim, menda Xudoning Ruhi bor degan har qanday odamga ishonib ketavermanglar. Har bir odamni sinanglar, u Xudodan yoki Xudodan emasligini bilinglar, chunki dunyoda soxta paygʻambarlar koʻpayib ketgan. 2 Odamda Xudoning Ruhi borligini shundan bilib olsangiz boʻladi: Iso Masih inson boʻlib kelganini tan oladigan har bir odam Xudodandir. 3 Buni tan olmaydigan odam esa Xudodan emas. Bunday odamdagi ruh Masihning dushmanida boʻladigan ruhdir. Masihning dushmani kelishi haqida eshitgansizlar. Mana, unda boʻladigan ruh hozirdanoq shu dunyodadir.
4 Sizlar esa, aziz bolalarim , Xudodansizlar va soxta paygʻambarlarni yengdingizlar. Axir, ichingizdagi Ruh dunyodagi shaytondan ustundir. 5 Oʻsha soxta paygʻambarlar bu dunyodan, ularning gapi ham bu dunyoga tegishli, shuning uchun dunyo ularga quloq soladi. 6 Biz esa Xudodanmiz. Xudoni tanigan odam bizga quloq soladi, Xudodan boʻlmagan esa quloq solmaydi. Haqiqat Ruhi bilan yolgʻon ruhini biz ana shundan farqlay olamiz.
Sevgi Xudodandir
7 Ey azizlarim, bir–birimizni yaxshi koʻraylik, chunki sevgi Xudodandir. Sevadigan har bir odam Xudoning farzandidir va Xudoni biladi. 8 Sevmaydigan odam esa Xudoni hech qachon bilmagan. Axir, Xudo sevgidir. 9 Xudo bizga boʻlgan sevgisini shunday namoyon qildi: U bizga hayot berish uchun yagona Oʻgʻlini dunyoga yubordi. 10 Haqiqiy sevgi — bizning Xudoga boʻlgan sevgimiz emas, balki Xudoning bizga koʻrsatgan sevgisidir. Zero, Xudo bizni gunohlarimizdan poklash uchun Oʻz Oʻgʻlini qurbon qildi.
11 Azizlarim, Xudo bizni shu qadar sevgani uchun biz ham bir–birimizni yaxshi koʻrishimiz kerak. 12 Hech kim hech qachon Xudoni koʻrgan emas. Agar biz bir–birimizni yaxshi koʻrsak, demak, Xudo biz bilan birga va Uning sevgisi bizda oʻzining mukammal ifodasini topgan. 13 Xudo har birimizga Oʻz Ruhini bergan. Shundan bilamizki, Xudo biz bilan va biz Xudo bilan birga yashamoqdamiz. 14 Otamiz Xudo Oʻz Oʻgʻlini dunyoning Najotkori qilib yuborganini biz koʻrdik va bu haqda guvohlik beryapmiz. 15 Isoni Xudoning Oʻgʻli deb tan olgan har bir odam Xudo bilan birga yashaydi va Xudo u bilan birga yashaydi. 16 Xudoning bizga boʻlgan mehr–muhabbatini biz tatib koʻrib, Xudo bizni yaxshi koʻrishiga ishonch hosil qildik.
Xudo sevgidir. Sevgini diliga jo qilgan kishi Xudo bilan birga yashaydi va Xudo u bilan birga yashaydi. 17 Shu tariqa Uning sevgisi bizda mukammal ifodasini topadi. Shunda biz qiyomat kunini dadillik bilan qarshilab olamiz, chunki hozirdanoq Masih singari, Xudo bilan birga yashamoqdamiz. 18 Xudoning sevgisini ardoqlagan kishi qiyomat kunidan qoʻrqmaydi, chunki qalbini toʻldirgan Xudoning sevgisi bu qoʻrquvni quvib chiqaradi. Qoʻrqoq kishining qalbi esa Xudoning sevgisiga toʻlmagan. Shuning uchun u qiyomat kunidan qoʻrqib yashaydi.
19 Biz sevamiz , chunki Xudo bizni birinchi boʻlib sevdi. 20 Agar biror kishi Xudoni sevaman desa–yu, birodaridan nafratlansa, u yolgʻonchidir. Koʻrib turgan birodarini seva olmagan odam koʻrmagan Xudoni ham seva olmaydi. 21 Xudoni sevgan odam birodarini ham yaxshi koʻrishi kerak! Bu amrni bizga Xudo bergan.
4–БОБ
Руҳларни синовдан ўтказинг
1 Эй азизларим, менда Худонинг Руҳи бор деган ҳар қандай одамга ишониб кетаверманглар. Ҳар бир одамни синанглар, у Худодан ёки Худодан эмаслигини билинглар, чунки дунёда сохта пайғамбарлар кўпайиб кетган. 2 Одамда Худонинг Руҳи борлигини шундан билиб олсангиз бўлади: Исо Масиҳ инсон бўлиб келганини тан оладиган ҳар бир одам Худодандир. 3 Буни тан олмайдиган одам эса Худодан эмас. Бундай одамдаги руҳ Масиҳнинг душманида бўладиган руҳдир. Масиҳнинг душмани келиши ҳақида эшитгансизлар. Мана, унда бўладиган руҳ ҳозирданоқ шу дунёдадир.
4 Сизлар эса, азиз болаларим , Худодансизлар ва сохта пайғамбарларни енгдингизлар. Ахир, ичингиздаги Руҳ дунёдаги шайтондан устундир. 5 Ўша сохта пайғамбарлар бу дунёдан, уларнинг гапи ҳам бу дунёга тегишли, шунинг учун дунё уларга қулоқ солади. 6 Биз эса Худоданмиз. Худони таниган одам бизга қулоқ солади, Худодан бўлмаган эса қулоқ солмайди. Ҳақиқат Руҳи билан ёлғон руҳини биз ана шундан фарқлай оламиз.
Севги Худодандир
7 Эй азизларим, бир–биримизни яхши кўрайлик, чунки севги Худодандир. Севадиган ҳар бир одам Худонинг фарзандидир ва Худони билади. 8 Севмайдиган одам эса Худони ҳеч қачон билмаган. Ахир, Худо севгидир. 9 Худо бизга бўлган севгисини шундай намоён қилди: У бизга ҳаёт бериш учун ягона Ўғлини дунёга юборди. 10 Ҳақиқий севги — бизнинг Худога бўлган севгимиз эмас, балки Худонинг бизга кўрсатган севгисидир. Зеро, Худо бизни гуноҳларимиздан поклаш учун Ўз Ўғлини қурбон қилди.
11 Азизларим, Худо бизни шу қадар севгани учун биз ҳам бир–биримизни яхши кўришимиз керак. 12 Ҳеч ким ҳеч қачон Худони кўрган эмас. Агар биз бир–биримизни яхши кўрсак, демак, Худо биз билан бирга ва Унинг севгиси бизда ўзининг мукаммал ифодасини топган. 13 Худо ҳар биримизга Ўз Руҳини берган. Шундан биламизки, Худо биз билан ва биз Худо билан бирга яшамоқдамиз. 14 Отамиз Худо Ўз Ўғлини дунёнинг Нажоткори қилиб юборганини биз кўрдик ва бу ҳақда гувоҳлик беряпмиз. 15 Исони Худонинг Ўғли деб тан олган ҳар бир одам Худо билан бирга яшайди ва Худо у билан бирга яшайди. 16 Худонинг бизга бўлган меҳр–муҳаббатини биз татиб кўриб, Худо бизни яхши кўришига ишонч ҳосил қилдик.
Худо севгидир. Севгини дилига жо қилган киши Худо билан бирга яшайди ва Худо у билан бирга яшайди. 17 Шу тариқа Унинг севгиси бизда мукаммал ифодасини топади. Шунда биз қиёмат кунини дадиллик билан қаршилаб оламиз, чунки ҳозирданоқ Масиҳ сингари, Худо билан бирга яшамоқдамиз. 18 Худонинг севгисини ардоқлаган киши қиёмат кунидан қўрқмайди, чунки қалбини тўлдирган Худонинг севгиси бу қўрқувни қувиб чиқаради. Қўрқоқ кишининг қалби эса Худонинг севгисига тўлмаган. Шунинг учун у қиёмат кунидан қўрқиб яшайди.
19 Биз севамиз , чунки Худо бизни биринчи бўлиб севди. 20 Агар бирор киши Худони севаман деса–ю, биродаридан нафратланса, у ёлғончидир. Кўриб турган биродарини сева олмаган одам кўрмаган Худони ҳам сева олмайди. 21 Худони севган одам биродарини ҳам яхши кўриши керак! Бу амрни бизга Худо берган.
