15–BOB
Shoh Osoning islohotlari
1 Odod oʻgʻli Ozariyoni Xudoning Ruhi qamrab oldi. 2 Ozariyo Osoning huzuriga borib dedi:
— Ey shoh Oso! Ey Yahudo va Benyamin xalqi! Gapimga quloq solinglar. Sizlar Egamiz bilan boʻlar ekansiz, U ham sizlar bilan birga boʻladi. Agar sizlar Egamizni izlasangizlar, Uni topasizlar. Agar Uni tark etsangizlar, U ham sizlarni tark etadi. 3 Isroil xalqi uzoq vaqt davomida haqiqiy Xudosiz yashadi. Ularga taʼlim beradigan ruhoniy yoʻq edi, ular qonundan mahrum edilar. 4 Lekin boshlariga ogʻir kulfat tushganda, ular Isroil xalqining Xudosiga — Egamizga yuz burdilar, Uni izladilar, shunda topdilar. 5 Oʻsha notinch davrda yoʻlga chiqish xatarli edi, chunki hamma joyda tartibsizlik va behalovatlik hukmron edi. 6 Bir xalq ikkinchisini yakson qilardi, bir shahar boshqasini vayron etar edi, chunki Xudo ularni iztirobga solib, behalovat qilib qoʻygan edi. 7 Lekin sizlar dadil boʻlinglar! Tushkunlikka tushmanglar! Sizlar qilgan ishlaringiz uchun mukofot olasizlar.
8 Shoh Oso Odod oʻgʻli Ozariyo paygʻambarning aytgan bashoratini eshitgach , dadillashdi. U Yahudo va Benyamin yerlaridan, shuningdek, Efrayim qirlarida qoʻlga kiritgan shaharlardan makruh butlarni yoʻq qildi. Maʼbad hovlisidagi Egamizning qurbongohini tuzatdi. 9 U Yahudo va Benyamin xalqini, shuningdek, oralarida istiqomat qilayotgan Efrayim, Manashe va Shimoʻn qabilasidan boʻlgan musofirlarni toʻpladi. Ularning koʻpchiligi Oso hukmronligi davrida Yahudoga koʻchib kelgan edilar, chunki Egasi Xudo Oso bilan birga boʻlganini koʻrgan edilar. 10 Ular Oso hukmronligining oʻn beshinchi yili uchinchi oyida Quddusda toʻplandilar. 11 Oʻsha kuni oʻzlari olib kelgan oʻljalardan 700 ta buqa va 7000 ta qoʻyni Egamizga qurbonlik qildilar. 12 Soʻng ota–bobolarining Xudosiga — Egamizga butun qalbi bilan, jonu dili bilan intilishga ahd qildilar. 13 Kimki Isroil xalqining Xudosiga — Egamizga intilmasa, xoh yosh boʻlsin, xoh qari, xoh erkak boʻlsin, xoh ayol, oʻldiriladigan boʻldi. 14 Ular baland ovozda Egamizga qasamyod qildilar, hayqirdilar, karnay va burgʻular chaldilar. 15 Jamiki Yahudo xalqi chin dildan qasamyod qilgani uchun xursand boʻldi. Ular Egamizni astoydil izlaganlari uchun Uni topdilar. Egamiz ularga har tarafdan osoyishtalik ato qildi.
16 Shoh Osoning buvisi Maxo Asheraning makruh tasvirini yasattirgan edi, shuning uchun Oso buvisini malikalik martabasidan mahrum qildi. U buvisi yasattirgan butni qoʻporib tashlab, parcha–parcha qilgandan keyin, Qidron soyligida yoqib yubordi. 17 Oso Isroildagi sajdagohlarni yoʻq qilmagan boʻlsa ham, umr boʻyi Egamizga sodiq qoldi. 18 Otasi va oʻzi Xudoga atab nazr etgan oltinu kumushlarni, idishlarni Xudoning uyiga olib keldi. 19 Oso hukmronligining oʻttiz beshinchi yiliga qadar urush boʻlmadi.
15–БОБ
Шоҳ Осонинг ислоҳотлари
1 Одод ўғли Озариёни Худонинг Руҳи қамраб олди. 2 Озариё Осонинг ҳузурига бориб деди:
— Эй шоҳ Осо! Эй Яҳудо ва Бенямин халқи! Гапимга қулоқ солинглар. Сизлар Эгамиз билан бўлар экансиз, У ҳам сизлар билан бирга бўлади. Агар сизлар Эгамизни изласангизлар, Уни топасизлар. Агар Уни тарк этсангизлар, У ҳам сизларни тарк этади. 3 Исроил халқи узоқ вақт давомида ҳақиқий Худосиз яшади. Уларга таълим берадиган руҳоний йўқ эди, улар қонундан маҳрум эдилар. 4 Лекин бошларига оғир кулфат тушганда, улар Исроил халқининг Худосига — Эгамизга юз бурдилар, Уни изладилар, шунда топдилар. 5 Ўша нотинч даврда йўлга чиқиш хатарли эди, чунки ҳамма жойда тартибсизлик ва беҳаловатлик ҳукмрон эди. 6 Бир халқ иккинчисини яксон қиларди, бир шаҳар бошқасини вайрон этар эди, чунки Худо уларни изтиробга солиб, беҳаловат қилиб қўйган эди. 7 Лекин сизлар дадил бўлинглар! Тушкунликка тушманглар! Сизлар қилган ишларингиз учун мукофот оласизлар.
8 Шоҳ Осо Одод ўғли Озариё пайғамбарнинг айтган башоратини эшитгач , дадиллашди. У Яҳудо ва Бенямин ерларидан, шунингдек, Эфрайим қирларида қўлга киритган шаҳарлардан макруҳ бутларни йўқ қилди. Маъбад ҳовлисидаги Эгамизнинг қурбонгоҳини тузатди. 9 У Яҳудо ва Бенямин халқини, шунингдек, ораларида истиқомат қилаётган Эфрайим, Манаше ва Шимўн қабиласидан бўлган мусофирларни тўплади. Уларнинг кўпчилиги Осо ҳукмронлиги даврида Яҳудога кўчиб келган эдилар, чунки Эгаси Худо Осо билан бирга бўлганини кўрган эдилар. 10 Улар Осо ҳукмронлигининг ўн бешинчи йили учинчи ойида Қуддусда тўпландилар. 11 Ўша куни ўзлари олиб келган ўлжалардан 700 та буқа ва 7000 та қўйни Эгамизга қурбонлик қилдилар. 12 Сўнг ота–боболарининг Худосига — Эгамизга бутун қалби билан, жону дили билан интилишга аҳд қилдилар. 13 Кимки Исроил халқининг Худосига — Эгамизга интилмаса, хоҳ ёш бўлсин, хоҳ қари, хоҳ эркак бўлсин, хоҳ аёл, ўлдириладиган бўлди. 14 Улар баланд овозда Эгамизга қасамёд қилдилар, ҳайқирдилар, карнай ва бурғулар чалдилар. 15 Жамики Яҳудо халқи чин дилдан қасамёд қилгани учун хурсанд бўлди. Улар Эгамизни астойдил излаганлари учун Уни топдилар. Эгамиз уларга ҳар тарафдан осойишталик ато қилди.
16 Шоҳ Осонинг бувиси Махо Ашеранинг макруҳ тасвирини ясаттирган эди, шунинг учун Осо бувисини маликалик мартабасидан маҳрум қилди. У бувиси ясаттирган бутни қўпориб ташлаб, парча–парча қилгандан кейин, Қидрон сойлигида ёқиб юборди. 17 Осо Исроилдаги саждагоҳларни йўқ қилмаган бўлса ҳам, умр бўйи Эгамизга содиқ қолди. 18 Отаси ва ўзи Худога атаб назр этган олтину кумушларни, идишларни Худонинг уйига олиб келди. 19 Осо ҳукмронлигининг ўттиз бешинчи йилига қадар уруш бўлмади.
