48–BOB
Yer qabilalar orasida boʻlinadi
1 Egamiz dedi: “Quyida Isroil qabilalarining nomlari va ularning ulush qilib olgan yerlari qayd etilgan. Dan qabilasining hududi Isroil yurtining shimolida joylashgan. Uning chegarasi Xetlon yoʻli boʻylab Levo–Xomatga , soʻng Xazor–Enanga boradi. Xazor–Enan shahri janubdagi Damashq va shimoldagi Xomat hududlari orasida joylashgan. Dan qabilasining hududi Isroil yurtining gʻarbiy chegarasidan sharqiy chegarasigacha choʻziladi. 2 Dan qabilasi hududidan janubda Osher qabilasi joylashadi, uning hududi ham Isroil yurtining gʻarbiy chegarasidan sharqiy chegarasigacha choʻziladi. 3 Osher hududidan janubda Naftali qabilasi joylashadi, ularning hududi ham gʻarbdan sharqqacha choʻziladi. 4-7 Naftalidan janubda Manashe qabilasi, Manashedan janubda Efrayim, soʻng Ruben, soʻng Yahudo qabilalari joylashadi. Hamma qabilalarning hududlari Isroil yurtining gʻarbiy chegarasidan sharqiy chegarasigacha choʻziladi.
Maxsus ajratilgan yer
8 Yahudo hududidan janubda maxsus ajratilgan yer boʻladi. Bu yerning gʻarbdan sharqqa choʻzilgan uzunligi har bir qabilaga ajratilgan yerning uzunligi bilan teng, yaʼni gʻarbdagi Oʻrta yer dengizidan to sharqdagi Iordan daryosigacha boʻladi. Shimoldan janubga choʻzilgan eni esa 25.000 tirsak boʻladi. Bu maxsus ajratilgan yerning oʻrtasida Maʼbad joylashadi.
9 Bu hududning bir qismi Men, Egangizga ajratilgan boʻlib, gʻarbdan sharqqa 25.000 tirsakni, shimoldan janubga 20.000 tirsakni tashkil qiladi. 10 Men bu muqaddas yerimning yarmini ruhoniylarga beraman. Ularga ajratilgan yerning gʻarbdan sharqqa boʻlgan uzunligi 25.000 tirsak, shimoldan janubga choʻzilgan eni 10.000 tirsak boʻladi. Ruhoniylarga ajratilgan yerning markazida Mening Maʼbadim joylashadi. 11 Bu yer faqat Zodoʻx avlodidan tayinlangan ruhoniylarga tegishli boʻladi, chunki ular Mening talablarimni bajardilar. Isroil xalqi va boshqa levilar Mendan yuz oʻgirganlarida, ular Mendan yuz oʻgirmadilar. 12 Menga ajratilgan hududning eng muqaddas joyi ruhoniylarning maxsus ulushi boʻladi. Ruhoniylarning bu yeri levilarning yerlariga tutashgan boʻladi. 13 Men muqaddas yerimning ikkinchi yarmini levilarga beraman. Ularga beriladigan yerning gʻarbdan sharqqa boʻlgan uzunligi 25.000 tirsak, shimoldan janubga choʻzilgan eni 10.000 tirsak boʻladi. Xullas, ruhoniy va levilarga beriladigan yerning umumiy uzunligi 25.000 tirsak, eni 20.000 tirsak boʻladi. 14 Bu yerni sotish, ayirboshlash yoki birovning nomiga oʻtkazish qatʼiyan man etiladi. Axir, bu yer Meniki, u muqaddasdir.
15 Menga ajratilgan yerdan janubda shaharga qarashli yerlar boʻladi. Bu yerning gʻarbdan sharqqa boʻlgan uzunligi 25.000 tirsak, shimoldan janubga choʻzilgan eni 5000 tirsak boʻlib, bu yerlarda odamlarning uylari va yaylovlari boʻladi. Shahar oʻsha yerning markazida joylashadi. 16 Shaharning eni va uzunligi bir xil 4500 tirsak boʻladi. 17 Shahar har tomondan eni 250 tirsak boʻlgan yaylovlar bilan oʻralgan boʻladi. 18 Shahardan ortib qolgan gʻarbdagi va sharqdagi 10.000 tirsakka 5000 tirsak boʻlgan yer maydoni dalalar uchun moʻljallangan. U yerda shahardagi ishchilar uchun ozuqa yetishtiriladi. 19 Shaharda yashaydigan har qanday odam, qaysi qabiladan boʻlmasin, oʻsha dalalarga ekin ekishi mumkin. 20 Demak, maxsus ajratilgan yer toʻrtburchak shaklda, har bir tomoni 25.000 tirsak uzunlikda boʻladi. Bu yer muqaddas yerlarni va shahar qaramogʻidagi yerlarni oʻz ichiga oladi.
21 Maxsus ajratilgan yerning gʻarb va sharq tomonidagi ortgan yerlar Isroil hukmdoriga qarashli boʻladi. Hukmdorning sharqdagi yerlari Iordan daryosiga, gʻarbdagi yerlari Oʻrta yer dengiziga borib taqaladi. Gʻarbdagi yerning ham, sharqdagi yerning ham uzunligi 25.000 tirsak boʻladi. Ularning oʻrtasida Mening muqaddas ulushim, Maʼbadim, 22 Levilarning ulushi va Quddus shahri joylashadi. Hukmdorning yerlari shimolda Yahudo qabilasining yerlariga, janubda Benyamin qabilasining yerlariga chegaradosh boʻladi.
Janubdagi qabilalarning yerlari
23 Qolgan qabilalarga quyidagi yerlar ulush qilib beriladi: maxsus ajratilgan yerdan janubda Benyamin qabilasining hududi boʻlib, Isroil yurtining sharqiy chegarasidan gʻarbiy chegarasigacha choʻziladi. 24 Benyamin hududidan janubda Shimoʻn qabilasining hududi boʻlib, yurtning sharqiy chegarasidan gʻarbiy chegarasigacha choʻziladi. 25 Shimoʻn hududidan janubda Issaxor qabilasining hududi boʻlib, sharqiy chegaradan gʻarbiy chegaragacha choʻziladi. 26 Issaxor hududidan janubda Zabulun qabilasining hududi boʻlib, sharqiy chegaradan gʻarbiy chegaragacha choʻziladi. 27 Zabulun hududidan janubda Gad qabilasining hududi boʻlib, sharqiy chegaradan gʻarbiy chegaragacha choʻziladi.
28 Gad hududining janubiy chegarasi Tamar shahridan to Kadeshdagi Mariva suvlarigacha boradi, keyin Misr chegarasidagi irmoq boʻylab oʻtib, Oʻrta yer dengizigacha yetadi. 29 Shunday qilib, Isroil yurti oʻn ikki qabilaga boʻlib beriladi, olgan yerlari ularning ulushi boʻladi.” Egamiz Rabbiyning kalomi shudir.
Quddus darvozalari
30 Egamiz dedi: “Shaharning darvozalari quyidagicha boʻlsin: shaharning shimoliy devori 4500 tirsak uzunlikda boʻlib, 31 uning uchta darvozasi boʻladi. Shahar darvozalariga Isroil qabilalarining nomlari beriladi. Bu tomondagi darvozalarning nomlari Ruben, Yahudo va Levi boʻladi. 32 Sharqiy devorning uzunligi ham 4500 tirsak boʻladi, uning uchta darvozasi Yusuf, Benyamin va Dan qabilalari nomlari bilan ataladi. 33 Janubiy devorning uzunligi ham 4500 tirsak boʻladi, uning uchta darvozasi Shimoʻn, Issaxor va Zabulun deb nomlanadi. 34 Gʻarbiy devorning uzunligi ham 4500 tirsak boʻladi, uning uchta darvozasi Gad, Osher va Naftali deb nomlanadi. 35 Shaharni oʻrab turgan devorning umumiy uzunligi 18.000 tirsak boʻladi. Oʻsha vaqtdan boshlab shaharning nomi «Egamiz shu yerdadir» boʻladi.”
48–БОБ
Ер қабилалар орасида бўлинади
1 Эгамиз деди: “Қуйида Исроил қабилаларининг номлари ва уларнинг улуш қилиб олган ерлари қайд этилган. Дан қабиласининг ҳудуди Исроил юртининг шимолида жойлашган. Унинг чегараси Хетлон йўли бўйлаб Лево–Хоматга , сўнг Хазор–Энанга боради. Хазор–Энан шаҳри жанубдаги Дамашқ ва шимолдаги Хомат ҳудудлари орасида жойлашган. Дан қабиласининг ҳудуди Исроил юртининг ғарбий чегарасидан шарқий чегарасигача чўзилади. 2 Дан қабиласи ҳудудидан жанубда Ошер қабиласи жойлашади, унинг ҳудуди ҳам Исроил юртининг ғарбий чегарасидан шарқий чегарасигача чўзилади. 3 Ошер ҳудудидан жанубда Нафтали қабиласи жойлашади, уларнинг ҳудуди ҳам ғарбдан шарққача чўзилади. 4-7 Нафталидан жанубда Манаше қабиласи, Манашедан жанубда Эфрайим, сўнг Рубен, сўнг Яҳудо қабилалари жойлашади. Ҳамма қабилаларнинг ҳудудлари Исроил юртининг ғарбий чегарасидан шарқий чегарасигача чўзилади.
Махсус ажратилган ер
8 Яҳудо ҳудудидан жанубда махсус ажратилган ер бўлади. Бу ернинг ғарбдан шарққа чўзилган узунлиги ҳар бир қабилага ажратилган ернинг узунлиги билан тенг, яъни ғарбдаги Ўрта ер денгизидан то шарқдаги Иордан дарёсигача бўлади. Шимолдан жанубга чўзилган эни эса 25.000 тирсак бўлади. Бу махсус ажратилган ернинг ўртасида Маъбад жойлашади.
9 Бу ҳудуднинг бир қисми Мен, Эгангизга ажратилган бўлиб, ғарбдан шарққа 25.000 тирсакни, шимолдан жанубга 20.000 тирсакни ташкил қилади. 10 Мен бу муқаддас еримнинг ярмини руҳонийларга бераман. Уларга ажратилган ернинг ғарбдан шарққа бўлган узунлиги 25.000 тирсак, шимолдан жанубга чўзилган эни 10.000 тирсак бўлади. Руҳонийларга ажратилган ернинг марказида Менинг Маъбадим жойлашади. 11 Бу ер фақат Зодўх авлодидан тайинланган руҳонийларга тегишли бўлади, чунки улар Менинг талабларимни бажардилар. Исроил халқи ва бошқа левилар Мендан юз ўгирганларида, улар Мендан юз ўгирмадилар. 12 Менга ажратилган ҳудуднинг энг муқаддас жойи руҳонийларнинг махсус улуши бўлади. Руҳонийларнинг бу ери левиларнинг ерларига туташган бўлади. 13 Мен муқаддас еримнинг иккинчи ярмини левиларга бераман. Уларга бериладиган ернинг ғарбдан шарққа бўлган узунлиги 25.000 тирсак, шимолдан жанубга чўзилган эни 10.000 тирсак бўлади. Хуллас, руҳоний ва левиларга бериладиган ернинг умумий узунлиги 25.000 тирсак, эни 20.000 тирсак бўлади. 14 Бу ерни сотиш, айирбошлаш ёки бировнинг номига ўтказиш қатъиян ман этилади. Ахир, бу ер Меники, у муқаддасдир.
15 Менга ажратилган ердан жанубда шаҳарга қарашли ерлар бўлади. Бу ернинг ғарбдан шарққа бўлган узунлиги 25.000 тирсак, шимолдан жанубга чўзилган эни 5000 тирсак бўлиб, бу ерларда одамларнинг уйлари ва яйловлари бўлади. Шаҳар ўша ернинг марказида жойлашади. 16 Шаҳарнинг эни ва узунлиги бир хил 4500 тирсак бўлади. 17 Шаҳар ҳар томондан эни 250 тирсак бўлган яйловлар билан ўралган бўлади. 18 Шаҳардан ортиб қолган ғарбдаги ва шарқдаги 10.000 тирсакка 5000 тирсак бўлган ер майдони далалар учун мўлжалланган. У ерда шаҳардаги ишчилар учун озуқа етиштирилади. 19 Шаҳарда яшайдиган ҳар қандай одам, қайси қабиладан бўлмасин, ўша далаларга экин экиши мумкин. 20 Демак, махсус ажратилган ер тўртбурчак шаклда, ҳар бир томони 25.000 тирсак узунликда бўлади. Бу ер муқаддас ерларни ва шаҳар қарамоғидаги ерларни ўз ичига олади.
21 Махсус ажратилган ернинг ғарб ва шарқ томонидаги ортган ерлар Исроил ҳукмдорига қарашли бўлади. Ҳукмдорнинг шарқдаги ерлари Иордан дарёсига, ғарбдаги ерлари Ўрта ер денгизига бориб тақалади. Ғарбдаги ернинг ҳам, шарқдаги ернинг ҳам узунлиги 25.000 тирсак бўлади. Уларнинг ўртасида Менинг муқаддас улушим, Маъбадим, 22 Левиларнинг улуши ва Қуддус шаҳри жойлашади. Ҳукмдорнинг ерлари шимолда Яҳудо қабиласининг ерларига, жанубда Бенямин қабиласининг ерларига чегарадош бўлади.
Жанубдаги қабилаларнинг ерлари
23 Қолган қабилаларга қуйидаги ерлар улуш қилиб берилади: махсус ажратилган ердан жанубда Бенямин қабиласининг ҳудуди бўлиб, Исроил юртининг шарқий чегарасидан ғарбий чегарасигача чўзилади. 24 Бенямин ҳудудидан жанубда Шимўн қабиласининг ҳудуди бўлиб, юртнинг шарқий чегарасидан ғарбий чегарасигача чўзилади. 25 Шимўн ҳудудидан жанубда Иссахор қабиласининг ҳудуди бўлиб, шарқий чегарадан ғарбий чегарагача чўзилади. 26 Иссахор ҳудудидан жанубда Забулун қабиласининг ҳудуди бўлиб, шарқий чегарадан ғарбий чегарагача чўзилади. 27 Забулун ҳудудидан жанубда Гад қабиласининг ҳудуди бўлиб, шарқий чегарадан ғарбий чегарагача чўзилади.
28 Гад ҳудудининг жанубий чегараси Тамар шаҳридан то Кадешдаги Марива сувларигача боради, кейин Миср чегарасидаги ирмоқ бўйлаб ўтиб, Ўрта ер денгизигача етади. 29 Шундай қилиб, Исроил юрти ўн икки қабилага бўлиб берилади, олган ерлари уларнинг улуши бўлади.” Эгамиз Раббийнинг каломи шудир.
Қуддус дарвозалари
30 Эгамиз деди: “Шаҳарнинг дарвозалари қуйидагича бўлсин: шаҳарнинг шимолий девори 4500 тирсак узунликда бўлиб, 31 унинг учта дарвозаси бўлади. Шаҳар дарвозаларига Исроил қабилаларининг номлари берилади. Бу томондаги дарвозаларнинг номлари Рубен, Яҳудо ва Леви бўлади. 32 Шарқий деворнинг узунлиги ҳам 4500 тирсак бўлади, унинг учта дарвозаси Юсуф, Бенямин ва Дан қабилалари номлари билан аталади. 33 Жанубий деворнинг узунлиги ҳам 4500 тирсак бўлади, унинг учта дарвозаси Шимўн, Иссахор ва Забулун деб номланади. 34 Ғарбий деворнинг узунлиги ҳам 4500 тирсак бўлади, унинг учта дарвозаси Гад, Ошер ва Нафтали деб номланади. 35 Шаҳарни ўраб турган деворнинг умумий узунлиги 18.000 тирсак бўлади. Ўша вақтдан бошлаб шаҳарнинг номи «Эгамиз шу ердадир» бўлади.”
