5–BOB
1 Oʻsha davrda Xaggey va Iddo oʻgʻli Zakariyo paygʻambarlar Yahudo yurtidagi va Quddusdagi yahudiylarga Isroil xalqining Xudosi nomidan bashorat qila boshladilar. 2 Shunda Shaltiyol oʻgʻli Zarubabel va Yohuzadax oʻgʻli Yoshua Xudoning Quddusdagi uyini qayta qurishga yana kirishdilar. Xudoning paygʻambarlari ularning ishini qoʻllab–quvvatlab turdilar.
3 Oʻsha zahoti Furot daryosining gʻarbidagi viloyat hokimi Tattanay bilan Shatarboʻzanay hamda ularning sheriklari yahudiylarning oldiga kelib: “Bu uyni koʻtarishga, uni qayta qurishga kim sizlarga ijozat berdi?” deb soʻrashdi. 4 Binoni qurayotgan odamlarning ismlarini aytishni talab qilishdi . 5 Lekin Xudo yahudiy oqsoqollariga nazarini solgan edi. Shuning uchun Fors amaldorlari shoh Doroga maktub yuborishga qaror qildilar. “Maktubga javob kelmaguncha yahudiylarni toʻxtatmaymiz”, deb kelishib oldilar.
Shoh Doroga yuborilgan maktub
6 Furot daryosining gʻarbidagi viloyat hokimi Tattanay, Shatarboʻzanay va ularning sheriklari — viloyat amaldorlari shoh Doroga maktub yubordilar. 7 Ular yuborgan maktubning mazmuni quyidagicha edi:
“Shoh Doro janobi oliylariga tinchlik–omonlik boʻlsin!
8 Shoh janoblariga maʼlum boʻlsinki, biz Yahudo viloyatida ulugʻ Xudoga atab qurilayotgan uyga borgan edik. Bu uy yoʻnilgan toshlardan va sadr yogʻochidan qurilyapti. Ish qunt bilan qilinyapti, qurilish bir maromda ilgarilab boryapti. 9 Biz oʻsha yerdagi oqsoqollar bilan gaplashdik, ulardan: «Bu uyni koʻtarishga, uni qayta qurishga kim sizlarga ijozat berdi?» deb soʻradik. 10 Sizni xabardor qilib qoʻyaylik deb, ularga boshchilik qilayotgan odamlarning ismlarini ham soʻradik.
11 Ularning bizga bergan javobi shu boʻldi: «Biz Samoviy Xudoning qullarimiz. Biz tiklayotgan Xudoning bu uyi ancha yillar oldin Isroilning ulugʻ bir shohi tomonidan qurib bitkazilgan edi . 12 Lekin ota–bobolarimiz Samoviy Xudoni gʻazablantirdilar. Shuning uchun Xudo ularni Xaldey qabilasidan boʻlgan Bobil shohi Navuxadnazarning qoʻliga berdi . Navuxadnazar bu uyni vayron qilib, xalqni Bobilga surgun qildi. 13-14 Xudoning uyidan oltin va kumush buyumlarni olib, Bobildagi maʼbadga olib ketdi. Lekin Bobil shohi Kurush oʻz hukmronligining birinchi yilida, Xudoning uyi qayta qurilsin, deb farmon chiqardi. U hatto Quddusdagi Maʼbadga qarashli oʻsha oltin va kumush buyumlarni Bobildagi maʼbaddan olib kelishni buyurib, Shashbazzar degan odamga berdi. Shoh Kurushning oʻzi Shashbazzarni Yahudoning hokimi qilib tayinladi. 15 U Shashbazzarga shunday dedi: ‘Bu buyumlarni Quddusga olib bor. Xudoning uyini oldingi oʻrnida qurdirib, buyumlarni Maʼbadga joylashtir.’ 16 Shunda Shashbazzar kelib, Xudoning Quddusdagi uyi poydevorini yotqizdirdi . Oʻshandan buyon hozirgacha qurilish davom etmoqda, hali tugagani yoʻq.»
17 Endi, shohimizga maʼqul boʻlsa, Bobildagi shohlik yilnomalarini sinchiklab qarab chiqsalar. Oʻshanda shoh Kurush Xudoning Quddusdagi oʻsha uyini qayta qurish uchun farmon chiqarganmi yoki yoʻqmi, koʻradilar. Shohimiz bu ishga oid qarorlarini bizga maʼlum qilishlarini soʻraymiz.”
5–БОБ
1 Ўша даврда Хаггей ва Иддо ўғли Закариё пайғамбарлар Яҳудо юртидаги ва Қуддусдаги яҳудийларга Исроил халқининг Худоси номидан башорат қила бошладилар. 2 Шунда Шалтиёл ўғли Зарубабел ва Ёҳузадах ўғли Ёшуа Худонинг Қуддусдаги уйини қайта қуришга яна киришдилар. Худонинг пайғамбарлари уларнинг ишини қўллаб–қувватлаб турдилар.
3 Ўша заҳоти Фурот дарёсининг ғарбидаги вилоят ҳокими Таттанай билан Шатарбўзанай ҳамда уларнинг шериклари яҳудийларнинг олдига келиб: “Бу уйни кўтаришга, уни қайта қуришга ким сизларга ижозат берди?” деб сўрашди. 4 Бинони қураётган одамларнинг исмларини айтишни талаб қилишди . 5 Лекин Худо яҳудий оқсоқолларига назарини солган эди. Шунинг учун Форс амалдорлари шоҳ Дорога мактуб юборишга қарор қилдилар. “Мактубга жавоб келмагунча яҳудийларни тўхтатмаймиз”, деб келишиб олдилар.
Шоҳ Дорога юборилган мактуб
6 Фурот дарёсининг ғарбидаги вилоят ҳокими Таттанай, Шатарбўзанай ва уларнинг шериклари — вилоят амалдорлари шоҳ Дорога мактуб юбордилар. 7 Улар юборган мактубнинг мазмуни қуйидагича эди:
“Шоҳ Доро жаноби олийларига тинчлик–омонлик бўлсин!
8 Шоҳ жанобларига маълум бўлсинки, биз Яҳудо вилоятида улуғ Худога атаб қурилаётган уйга борган эдик. Бу уй йўнилган тошлардан ва садр ёғочидан қуриляпти. Иш қунт билан қилиняпти, қурилиш бир маромда илгарилаб боряпти. 9 Биз ўша ердаги оқсоқоллар билан гаплашдик, улардан: «Бу уйни кўтаришга, уни қайта қуришга ким сизларга ижозат берди?» деб сўрадик. 10 Сизни хабардор қилиб қўяйлик деб, уларга бошчилик қилаётган одамларнинг исмларини ҳам сўрадик.
11 Уларнинг бизга берган жавоби шу бўлди: «Биз Самовий Худонинг қулларимиз. Биз тиклаётган Худонинг бу уйи анча йиллар олдин Исроилнинг улуғ бир шоҳи томонидан қуриб битказилган эди . 12 Лекин ота–боболаримиз Самовий Худони ғазаблантирдилар. Шунинг учун Худо уларни Халдей қабиласидан бўлган Бобил шоҳи Навухадназарнинг қўлига берди . Навухадназар бу уйни вайрон қилиб, халқни Бобилга сургун қилди. 13-14 Худонинг уйидан олтин ва кумуш буюмларни олиб, Бобилдаги маъбадга олиб кетди. Лекин Бобил шоҳи Куруш ўз ҳукмронлигининг биринчи йилида, Худонинг уйи қайта қурилсин, деб фармон чиқарди. У ҳатто Қуддусдаги Маъбадга қарашли ўша олтин ва кумуш буюмларни Бобилдаги маъбаддан олиб келишни буюриб, Шашбаззар деган одамга берди. Шоҳ Курушнинг ўзи Шашбаззарни Яҳудонинг ҳокими қилиб тайинлади. 15 У Шашбаззарга шундай деди: ‘Бу буюмларни Қуддусга олиб бор. Худонинг уйини олдинги ўрнида қурдириб, буюмларни Маъбадга жойлаштир.’ 16 Шунда Шашбаззар келиб, Худонинг Қуддусдаги уйи пойдеворини ётқиздирди . Ўшандан буён ҳозиргача қурилиш давом этмоқда, ҳали тугагани йўқ.»
17 Энди, шоҳимизга маъқул бўлса, Бобилдаги шоҳлик йилномаларини синчиклаб қараб чиқсалар. Ўшанда шоҳ Куруш Худонинг Қуддусдаги ўша уйини қайта қуриш учун фармон чиқарганми ёки йўқми, кўрадилар. Шоҳимиз бу ишга оид қарорларини бизга маълум қилишларини сўраймиз.”
