18–BOB
Ruhoniylar va levilarning burchlari
1 Egamiz Horunga dedi: “Sen, oʻgʻillaring va butun Levi qabilasi Muqaddas chodirga nisbatan qilingan har qanday ayb uchun javobgar boʻlasizlar. Ruhoniylik xizmatida yoʻl qoʻyilgan ayblar uchun esa faqatgina sen va oʻgʻillaring javobgar boʻlasizlar. 2 Qabiladosh levi birodarlaringni yoningga ol. Sen oʻgʻillaring bilan Muqaddas ahd chodirida xizmat qilayotganingda, ular sizlarga yordam berishadi. 3 Levilar sizlarning nazoratingiz ostida xizmat qilib, Muqaddas chodirga oid barcha yumushlarni bajarishadi. Lekin ular muqaddas jihozlarga va qurbongohga zinhor yaqinlashmasinlar, aks holda, ular ham, sizlar ham halok boʻlasizlar. 4 Levilar sizlarga qoʻshilishib, Uchrashuv chodiridagi barcha vazifalarni bajarishsin. Levilardan boshqa birortasi sizlar bilan birga xizmat qilmasin. 5 Mening gʻazabim Isroil xalqiga qarshi yana avj olmasligi uchun Chodirning Muqaddas xonalarida va qurbongohda faqatgina sen oʻgʻillaring bilan xizmat qilgin. 6 Levi birodarlaringni Men Oʻzim senga yordamchi qilib, Isroil xalqi orasidan tanlab olganman. Ular Uchrashuv chodirida xizmat qilishlari uchun Men, Egangizga bagʻishlangan. 7 Shunday boʻlsa–da, qurbongoh va ichki parda orqasidagi Eng muqaddas xona bilan bogʻliq boʻlgan barcha ruhoniylik xizmatini faqat sen oʻgʻillaring bilan bajar. Ruhoniylikni Men sizlarga hadya qilib berdim. Muqaddas buyumlar oldiga kelgan boshqa har qanday odamning jazosi oʻlimdir.”
Ruhoniylarning ulushi
8 Egamiz yana Horunga dedi: “Isroil xalqi Menga olib kelgan hamma muqaddas nazrlarni nazorat qilishni senga topshirdim. Bu nazrlarni senga va oʻgʻillaringga doimiy ulush qilib berdim. 9 Isroil xalqi Menga beradigan eng muqaddas nazrlarning, yaʼni don nazri, gunoh qurbonligi va ayb qurbonliklarining kuydirilmaydigan qismi sen bilan oʻgʻillaringga tegishlidir. 10 Bularni muqaddas joyda tanovul qilinglar. Bu nazrlarni faqat erkaklar tanovul qilishlari mumkin. Bu nazrlarni gʻoyat muqaddas deb bilinglar.
11 Qurbongoh oldida Isroil xalqi yuqoriga koʻtarib, Menga bergan boshqa hamma nazrlar ham sen bilan oʻgʻil–qizlaringning doimiy ulushidir. Xonadoningdagi har bir pok odam bu nazrlarni tanovul qilishi mumkin.
12 Odamlar Men, Egangizga nazr qilgan ilk hosilning eng sifatli zaytun moyini, sharobini va donini ham Men sizlarga berdim. 13 Menga nazr qilingan butun yurtning ilk hosili sizlarniki boʻladi. Xonadoningizdagi har bir pok odam bu nazrlarni tanovul qilishi mumkin. 14 Isroilda Menga tamomila bagʻishlangan har bir narsa sizlarniki boʻladi. 15 Isroil xalqi Menga nazr qilgan har bir toʻngʻich oʻgʻil va hayvonlarining birinchi erkak bolasi ham sizlarnikidir. Lekin sizlar ularning har bir toʻngʻich oʻgʻli evaziga hamda harom hayvonning birinchi erkak bolasi evaziga ulardan kumush olishlaringiz shart. 16 Har bir toʻngʻich oʻgʻil bir oylik boʻlganda, ularning evaziga besh boʻlakdan kumush olinglar. Har bir kumush boʻlakning ogʻirligi 2,5 misqol boʻlsin .
17 Lekin sigirning, qoʻyning va echkining birinchi bolasi evaziga hech qanday toʻlov olma. Bu jonivorlar faqat Menga tegishlidir. Ularning qonini qurbongohga sep, yogʻini esa Men, Egangizga yoqimli hid kelishi uchun olovda kuydir. 18 Qoʻchqorning yuqoriga koʻtarilgan toʻshi va oʻng soni seniki boʻlgani kabi, bu jonivorlarning goʻshti ham seniki boʻladi. 19 Isroil xalqi Menga keltiradigan ehsonlarning hammasini Men senga va oʻgʻil–qizlaringga doimiy ulush qilib beraman. Bu sen va sening nasling bilan Mening oʻrtamdagi qatʼiy ahddir.”
20 Soʻng Egamiz Horunga yana dedi: “Sizlar Isroil yurtida ulush olmaysizlar, xalqingiz orasida sizlarga bir boʻlak yer ham berilmaydi. Zotan, Isroil xalqi orasidagi ulushingiz ham, mulkingiz ham Menman.
Levilarning ulushi
21 Levilarning Uchrashuv chodirida qilgan xizmati evaziga Men ularga Isroil yurtidagi hamma ushrlarni xizmat haqi qilib beraman. 22 Bundan buyon Isroil xalqi Uchrashuv chodiriga yaqin kelmasin. Aks holda, ular qilgan gunohi uchun jazo tortib oʻladilar. 23 Levilar esa Uchrashuv chodirida xizmat qilib, Chodirga nisbatan qilingan har qanday ayb ish uchun javobgar boʻlishadi. Bu avlodlaringiz osha abadiy qonun–qoida boʻlsin. Levilar Isroil xalqi orasida yerni ulush qilib olishmaydi. 24 Buning oʻrniga, Men ularga Isroil xalqining Menga nazr qilgan barcha ushrlarini beraman. Shu sababli Men, levilar Isroil xalqi orasida ulush olmaydi, deb aytgan edim.”
Levilarning ushri
25 Egamiz yana Musoga dedi:
26 — Levilarga Mening shu gapimni yetkaz: “Egamiz Isroil xalqining ushrini sizlarga ulush qilib bergan. Sizlar ushrni olganingizda, shu ushrning oʻndan bir qismini Egamizga nazr qilib beringlar. 27 Egamiz bu nazringizni don bilan sharobning ilk hosili oʻrnida qabul qilib oladi. 28 Demak, sizlar Isroil xalqidan oladigan jamiki ushringizning oʻndan bir qismini Egamizga nazr qilishingiz shart. Oʻsha nazrni ruhoniy Horunga beringlar. 29 Isroil xalqidan qabul qilgan ushrning faqatgina eng sifatlisini Egamizga nazr qilinglar. 30 Isroil xalqi Egamizga don bilan sharob nazrlarini keltirgandan keyin hosilning qolganini oʻzlariga qoldiradilar. Shu singari, sizlar ham ushrlarning eng sifatlisini Egamizga bagʻishlaganingizdan keyin, qolganini oʻzingizga olinglar. 31 Qolganini oʻzingiz oilangiz bilan har qanday joyda yeb–ichishingiz mumkin. Bular Uchrashuv chodirida qilgan xizmatingiz uchun toʻlovdir. 32 Egamizga ushrning eng sifatlisini bagʻishlaganingizdan keyingina ushrning qolganini yeyishingiz mumkin, shunda sizlar aybdor hisoblanmaysizlar. Shunday yoʻl tutsangiz, Isroil xalqining muqaddas hadyalarini bulgʻamagan boʻlasizlar, oʻzlaringiz nobud boʻlmaysizlar.”
18–БОБ
Руҳонийлар ва левиларнинг бурчлари
1 Эгамиз Ҳорунга деди: “Сен, ўғилларинг ва бутун Леви қабиласи Муқаддас чодирга нисбатан қилинган ҳар қандай айб учун жавобгар бўласизлар. Руҳонийлик хизматида йўл қўйилган айблар учун эса фақатгина сен ва ўғилларинг жавобгар бўласизлар. 2 Қабиладош леви биродарларингни ёнингга ол. Сен ўғилларинг билан Муқаддас аҳд чодирида хизмат қилаётганингда, улар сизларга ёрдам беришади. 3 Левилар сизларнинг назоратингиз остида хизмат қилиб, Муқаддас чодирга оид барча юмушларни бажаришади. Лекин улар муқаддас жиҳозларга ва қурбонгоҳга зинҳор яқинлашмасинлар, акс ҳолда, улар ҳам, сизлар ҳам ҳалок бўласизлар. 4 Левилар сизларга қўшилишиб, Учрашув чодиридаги барча вазифаларни бажаришсин. Левилардан бошқа бирортаси сизлар билан бирга хизмат қилмасин. 5 Менинг ғазабим Исроил халқига қарши яна авж олмаслиги учун Чодирнинг Муқаддас хоналарида ва қурбонгоҳда фақатгина сен ўғилларинг билан хизмат қилгин. 6 Леви биродарларингни Мен Ўзим сенга ёрдамчи қилиб, Исроил халқи орасидан танлаб олганман. Улар Учрашув чодирида хизмат қилишлари учун Мен, Эгангизга бағишланган. 7 Шундай бўлса–да, қурбонгоҳ ва ички парда орқасидаги Энг муқаддас хона билан боғлиқ бўлган барча руҳонийлик хизматини фақат сен ўғилларинг билан бажар. Руҳонийликни Мен сизларга ҳадя қилиб бердим. Муқаддас буюмлар олдига келган бошқа ҳар қандай одамнинг жазоси ўлимдир.”
Руҳонийларнинг улуши
8 Эгамиз яна Ҳорунга деди: “Исроил халқи Менга олиб келган ҳамма муқаддас назрларни назорат қилишни сенга топширдим. Бу назрларни сенга ва ўғилларингга доимий улуш қилиб бердим. 9 Исроил халқи Менга берадиган энг муқаддас назрларнинг, яъни дон назри, гуноҳ қурбонлиги ва айб қурбонликларининг куйдирилмайдиган қисми сен билан ўғилларингга тегишлидир. 10 Буларни муқаддас жойда тановул қилинглар. Бу назрларни фақат эркаклар тановул қилишлари мумкин. Бу назрларни ғоят муқаддас деб билинглар.
11 Қурбонгоҳ олдида Исроил халқи юқорига кўтариб, Менга берган бошқа ҳамма назрлар ҳам сен билан ўғил–қизларингнинг доимий улушидир. Хонадонингдаги ҳар бир пок одам бу назрларни тановул қилиши мумкин.
12 Одамлар Мен, Эгангизга назр қилган илк ҳосилнинг энг сифатли зайтун мойини, шаробини ва донини ҳам Мен сизларга бердим. 13 Менга назр қилинган бутун юртнинг илк ҳосили сизларники бўлади. Хонадонингиздаги ҳар бир пок одам бу назрларни тановул қилиши мумкин. 14 Исроилда Менга тамомила бағишланган ҳар бир нарса сизларники бўлади. 15 Исроил халқи Менга назр қилган ҳар бир тўнғич ўғил ва ҳайвонларининг биринчи эркак боласи ҳам сизларникидир. Лекин сизлар уларнинг ҳар бир тўнғич ўғли эвазига ҳамда ҳаром ҳайвоннинг биринчи эркак боласи эвазига улардан кумуш олишларингиз шарт. 16 Ҳар бир тўнғич ўғил бир ойлик бўлганда, уларнинг эвазига беш бўлакдан кумуш олинглар. Ҳар бир кумуш бўлакнинг оғирлиги 2,5 мисқол бўлсин .
17 Лекин сигирнинг, қўйнинг ва эчкининг биринчи боласи эвазига ҳеч қандай тўлов олма. Бу жониворлар фақат Менга тегишлидир. Уларнинг қонини қурбонгоҳга сеп, ёғини эса Мен, Эгангизга ёқимли ҳид келиши учун оловда куйдир. 18 Қўчқорнинг юқорига кўтарилган тўши ва ўнг сони сеники бўлгани каби, бу жониворларнинг гўшти ҳам сеники бўлади. 19 Исроил халқи Менга келтирадиган эҳсонларнинг ҳаммасини Мен сенга ва ўғил–қизларингга доимий улуш қилиб бераман. Бу сен ва сенинг наслинг билан Менинг ўртамдаги қатъий аҳддир.”
20 Сўнг Эгамиз Ҳорунга яна деди: “Сизлар Исроил юртида улуш олмайсизлар, халқингиз орасида сизларга бир бўлак ер ҳам берилмайди. Зотан, Исроил халқи орасидаги улушингиз ҳам, мулкингиз ҳам Менман.
Левиларнинг улуши
21 Левиларнинг Учрашув чодирида қилган хизмати эвазига Мен уларга Исроил юртидаги ҳамма ушрларни хизмат ҳақи қилиб бераман. 22 Бундан буён Исроил халқи Учрашув чодирига яқин келмасин. Акс ҳолда, улар қилган гуноҳи учун жазо тортиб ўладилар. 23 Левилар эса Учрашув чодирида хизмат қилиб, Чодирга нисбатан қилинган ҳар қандай айб иш учун жавобгар бўлишади. Бу авлодларингиз оша абадий қонун–қоида бўлсин. Левилар Исроил халқи орасида ерни улуш қилиб олишмайди. 24 Бунинг ўрнига, Мен уларга Исроил халқининг Менга назр қилган барча ушрларини бераман. Шу сабабли Мен, левилар Исроил халқи орасида улуш олмайди, деб айтган эдим.”
Левиларнинг ушри
25 Эгамиз яна Мусога деди:
26 — Левиларга Менинг шу гапимни етказ: “Эгамиз Исроил халқининг ушрини сизларга улуш қилиб берган. Сизлар ушрни олганингизда, шу ушрнинг ўндан бир қисмини Эгамизга назр қилиб беринглар. 27 Эгамиз бу назрингизни дон билан шаробнинг илк ҳосили ўрнида қабул қилиб олади. 28 Демак, сизлар Исроил халқидан оладиган жамики ушрингизнинг ўндан бир қисмини Эгамизга назр қилишингиз шарт. Ўша назрни руҳоний Ҳорунга беринглар. 29 Исроил халқидан қабул қилган ушрнинг фақатгина энг сифатлисини Эгамизга назр қилинглар. 30 Исроил халқи Эгамизга дон билан шароб назрларини келтиргандан кейин ҳосилнинг қолганини ўзларига қолдирадилар. Шу сингари, сизлар ҳам ушрларнинг энг сифатлисини Эгамизга бағишлаганингиздан кейин, қолганини ўзингизга олинглар. 31 Қолганини ўзингиз оилангиз билан ҳар қандай жойда еб–ичишингиз мумкин. Булар Учрашув чодирида қилган хизматингиз учун тўловдир. 32 Эгамизга ушрнинг энг сифатлисини бағишлаганингиздан кейингина ушрнинг қолганини ейишингиз мумкин, шунда сизлар айбдор ҳисобланмайсизлар. Шундай йўл тутсангиз, Исроил халқининг муқаддас ҳадяларини булғамаган бўласизлар, ўзларингиз нобуд бўлмайсизлар.”
