14–BOB
Xalq zorlanadi
1 Keyin butun jamoa figʻon chekib, tun boʻyi yigʻi–sigʻi qilib chiqdi. 2 Jamiki Isroil xalqi Muso va Horundan mingʻirlab nolib, ularga shunday dedi:
— Qaniydi, Misrda oʻlib ketganimizda yoki shu sahroda jon berganimizda edi! 3 Agar jangda qirilib ketadigan boʻlsak, nima uchun Egamiz bizni oʻsha yurtga olib boryapti? Bizning xotinu bola–chaqalarimiz dushmanga oʻlja boʻladi–ku! Bundan koʻra, Misrga qaytib ketganimiz yaxshiroq emasmi?!
4 Shundan soʻng ular oʻzaro: “Oʻzimizga bir yoʻlboshchi tanlaymiz–u, Misrga qaytib ketamiz”, deb kelishib olishdi. 5 Muso bilan Horun esa butun Isroil jamoasi oldida muk tushishdi. 6 Yurtni koʻrib kelgan aygʻoqchilarning ikkitasi Nun oʻgʻli Yoshua va Yafunax oʻgʻli Xolib qaygʻudan kiyimlarini yirtishdi. 7 Ikkovi jamiki Isroil jamoasiga deyishdi:
— Biz koʻrib kelgan yurt — juda ham yaxshi joy! 8 Agar Egamiz bizdan mamnun boʻlsa, U bizni oʻsha yurtga olib kiradi, sut va asal oqib yotgan oʻsha yurtni bizga beradi. 9 Faqat Egamizga qarshi isyon qilmanglar! U yurtning xalqidan qoʻrqmanglar! Ular biz uchun oson oʻlja boʻlishadi. Ular pushti panohidan ayrilgan, Egamiz esa biz bilan boʻladi. Ulardan qoʻrqmanglar!
10 Lekin butun jamoa: “Yoshua va Xolibni toshboʻron qilamiz!” deb poʻpisa qildi.
Shunda Egamiz ulugʻvorligini Uchrashuv chodirida jamiki Isroil xalqiga zohir qildi.
Muso xalq uchun iltijo qiladi
11 Egamiz Musoga dedi:
— Qachongacha bu xalq Meni xoʻrlaydi?! Ularning orasida qancha moʻjiza koʻrsatgan boʻlsam–u, qachongacha Menga ishonmay yuradi?! 12 Men oʻlat yuborib bu xalqni qirib tashlayman. Sendan esa ulardan ham kuchliroq va buyukroq bir xalq yarataman.
13 Ammo Muso Egamizga shunday javob berdi:
— Sen bu xalqni Oʻz qudrating bilan Misrliklar orasidan olib chiqqan eding–ku! Agar xalqingni qirib tashlasang, Misrliklar bu haqda eshitishadi. 14 Ular bu yurtda istiqomat qilayotgan xalqlarga ham bu haqda xabar berishadi. Ey Egam, oʻsha xalqlar Sen biz bilan ekaningni bilishadi. Sen biz bilan yuzma–yuz koʻrishganingni, Sening buluting doimo bizning tepamizda turganini, Sen bizni kunduzi ustun shaklidagi bulut ichida, kechasi ustun shaklidagi alanga ichida yoʻlga boshlaganingni ular bilishadi, axir! 15-16 Bordi–yu, Sen xalqingning hammasini birday qirib tashlasang, Sening ulugʻvorliging haqida eshitgan xalqlar: “Isroil xalqining Egasi qasam ichib vaʼda bergan yurtga Oʻz xalqini olib kira olmagani uchun ularni sahroda nobud qilib yuboribdi”, deb aytishmaydimi?! 17 Yo Rabbiy, iltijo qilaman, Oʻz matonatingni koʻrsat. Sen Oʻzing aytgansan : 18 “Men, Egangizning jahli tez emas, sodiq sevgim moʻldir. Fosiqlikni, isyonni kechiraman. Lekin aybdorni aslo jazosiz qoldirmayman. Men ularni jazolayman, ularning gunohlari oqibatidan farzandlari, nabiralari va chevaralari ham qochib qutulmaydi.” 19 Oʻtinaman, cheksiz sevging tufayli bu xalqning gunohidan oʻt. Axir, Sen ularni Misrdan chiqqanlaridan beri kechirib kelyapsan.
20 — Iltimosingga muvofiq ularni kechiraman, — dedi Musoga Egamiz. 21 — Lekin Men barhayot Xudo boʻlganim haqi, yer yuzini toʻldirgan ulugʻvorligim haqi, ont ichib aytamanki, 22-23 bu odamlarning birortasi Men otalariga vaʼda qilgan yurtga kirmaydi. Ular Mening buyuk qudratimni, Misrda va sahroda qilgan moʻjizalarimni koʻra turib Menga quloq solmadilar, Meni qayta–qayta sinadilar. Meni xoʻrlagan bu odamlar Kanʼon yurtini koʻrmaydilar. 24 Lekin qulim Xolib bundaylardan emas. U Menga sodiq qoldi. Shuning uchun Men uni oʻzi koʻrib kelgan oʻsha yurtga olib kiraman. Uning nasli yurtni egallaydi. 25 Endi esa Omolek va Kanʼon xalqlari yashaydigan vodiylarga bora koʻrmanglar. Ertagayoq orqaga qaytinglar, Qizil dengiz yoʻlidagi sahroga boringlar.
Egamiz xalqni shikoyat qilgani uchun jazolaydi
26 Egamiz Muso bilan Horunga dedi:
27 — Qachongacha bu qabih jamoa Mendan noliyveradi?! Men Isroil xalqining mingʻirlab nolishini eshitdim, 28 borib ularga Mening bu gapimni ayt: “Barhayot Xudo boʻlganim haqi, ont ichib aytamanki, mingʻirlab noliganlaringizni Men boshingizga solaman. Men, Egangiz, aytdim. 29 Jasadlaringiz mana shu sahroda qoladi. Roʻyxatga kirgan yigirma va undan yuqori yoshdagilar — Mendan mingʻirlab noliganlarning hammasi 30 Men ont ichib, sizlarga yashash uchun bermoqchi boʻlgan yurtga kirishmaydi. U yurtga faqat Yafunax oʻgʻli Xolib bilan Nun oʻgʻli Yoshua kirishadi. 31 Sizlar, bolalarimiz u yerda dushmanga oʻlja boʻladi, deb aytdingiz. Ammo Men bolalaringizni oʻsha yerga olib kiraman. Sizlar rad etgan oʻsha yurtdan ular bahra olishadi. 32 Sizlarning jasadlaringiz esa mana shu sahroda qolib ketadi. 33 Bolalaringiz sahroda qirq yil tentirab yuradi. Hammangiz mana shu sahroda nobud boʻlmaguningizcha, bolalaringiz sizning sadoqatsizligingiz uchun azob tortishadi. 34 Sizlar oʻsha yurtni qirq kun davomida koʻrib qaytib kelgan edingizlar. Endi gunohingiz uchun qirq yil, har bir kun evaziga bir yildan jazo tortib yurasizlar. Menga qarshi chiqqanlarning holi ne kechishini ana shunda bilasizlar! 35 Menga qarshi yigʻilgan mana shu qabih jamoaning hammasini Men shunday ahvolga solamanki, ular mana shu sahroda qirilib, yoʻq boʻlib ketishadi. Buni Men, Egangiz, aytdim.”
36 Muso Kanʼon yurtiga aygʻoqchi qilib yuborgan oʻnta odam boʻlmagʻur gaplar tarqatib, jamoaning Egamizdan mingʻirlab nolishiga sababchi boʻlgan edi. 37 Oʻsha yurt haqida noxush xabar olib kelgan bu odamlar oʻlatga chalinib, Egamizning oldida jon berishdi. 38 Aygʻoqchilardan faqat Nun oʻgʻli Yoshua bilan Yafunax oʻgʻli Xolib tirik qoldi.
Kanʼon yurtini bosib olishga birinchi urinish
39 Muso jamiki Isroil xalqiga shu gaplarni aytganda, xalq chuqur qaygʻuga botdi. 40 Ertasiga ular tong saharda turdilar, Kanʼondagi qirlarga tomon joʻnayotib shunday dedilar:
— Qani, ketdik, gunoh qilganimizni anglab yetdik. Mana endi Egamiz bizga vaʼda qilgan oʻsha yurtga kirishga tayyormiz.
41 Lekin Muso:
— Nima uchun Egamizning amriga yana itoatsizlik qilyapsizlar? — dedi. — Bu bilan hech narsaga erisholmaysizlar–ku! 42 U yerga bormanglar. Egamiz sizlar bilan emas! Dushmanlaringiz oldida magʻlub boʻlasizlar! 43 Omolek va Kanʼon xalqlari sizlarga qarshilik koʻrsatishadi. Qirilib ketasizlar. Sizlar Egamizdan yuz oʻgirganingiz uchun, U sizlar bilan birga boʻlmaydi.
44 Biroq Isroil xalqi bilganidan qolmay oʻsha yerdagi qirlarga chiqdi. Egamizning Ahd sandigʻi bilan Muso esa qarorgohda qolishdi. 45 Oʻsha qirlarda yashaydigan Omolek va Kanʼon xalqlari pastga tushib, Isroil xalqiga hujum qilishdi, ularni Xoʻrmaxgacha quvib borishdi.
14–БОБ
Халқ зорланади
1 Кейин бутун жамоа фиғон чекиб, тун бўйи йиғи–сиғи қилиб чиқди. 2 Жамики Исроил халқи Мусо ва Ҳорундан минғирлаб нолиб, уларга шундай деди:
— Қанийди, Мисрда ўлиб кетганимизда ёки шу саҳрода жон берганимизда эди! 3 Агар жангда қирилиб кетадиган бўлсак, нима учун Эгамиз бизни ўша юртга олиб боряпти? Бизнинг хотину бола–чақаларимиз душманга ўлжа бўлади–ку! Бундан кўра, Мисрга қайтиб кетганимиз яхшироқ эмасми?!
4 Шундан сўнг улар ўзаро: “Ўзимизга бир йўлбошчи танлаймиз–у, Мисрга қайтиб кетамиз”, деб келишиб олишди. 5 Мусо билан Ҳорун эса бутун Исроил жамоаси олдида мук тушишди. 6 Юртни кўриб келган айғоқчиларнинг иккитаси Нун ўғли Ёшуа ва Яфунах ўғли Холиб қайғудан кийимларини йиртишди. 7 Иккови жамики Исроил жамоасига дейишди:
— Биз кўриб келган юрт — жуда ҳам яхши жой! 8 Агар Эгамиз биздан мамнун бўлса, У бизни ўша юртга олиб киради, сут ва асал оқиб ётган ўша юртни бизга беради. 9 Фақат Эгамизга қарши исён қилманглар! У юртнинг халқидан қўрқманглар! Улар биз учун осон ўлжа бўлишади. Улар пушти паноҳидан айрилган, Эгамиз эса биз билан бўлади. Улардан қўрқманглар!
10 Лекин бутун жамоа: “Ёшуа ва Холибни тошбўрон қиламиз!” деб пўписа қилди.
Шунда Эгамиз улуғворлигини Учрашув чодирида жамики Исроил халқига зоҳир қилди.
Мусо халқ учун илтижо қилади
11 Эгамиз Мусога деди:
— Қачонгача бу халқ Мени хўрлайди?! Уларнинг орасида қанча мўъжиза кўрсатган бўлсам–у, қачонгача Менга ишонмай юради?! 12 Мен ўлат юбориб бу халқни қириб ташлайман. Сендан эса улардан ҳам кучлироқ ва буюкроқ бир халқ яратаман.
13 Аммо Мусо Эгамизга шундай жавоб берди:
— Сен бу халқни Ўз қудратинг билан Мисрликлар орасидан олиб чиққан эдинг–ку! Агар халқингни қириб ташласанг, Мисрликлар бу ҳақда эшитишади. 14 Улар бу юртда истиқомат қилаётган халқларга ҳам бу ҳақда хабар беришади. Эй Эгам, ўша халқлар Сен биз билан эканингни билишади. Сен биз билан юзма–юз кўришганингни, Сенинг булутинг доимо бизнинг тепамизда турганини, Сен бизни кундузи устун шаклидаги булут ичида, кечаси устун шаклидаги аланга ичида йўлга бошлаганингни улар билишади, ахир! 15-16 Борди–ю, Сен халқингнинг ҳаммасини бирдай қириб ташласанг, Сенинг улуғворлигинг ҳақида эшитган халқлар: “Исроил халқининг Эгаси қасам ичиб ваъда берган юртга Ўз халқини олиб кира олмагани учун уларни саҳрода нобуд қилиб юборибди”, деб айтишмайдими?! 17 Ё Раббий, илтижо қиламан, Ўз матонатингни кўрсат. Сен Ўзинг айтгансан : 18 “Мен, Эгангизнинг жаҳли тез эмас, содиқ севгим мўлдир. Фосиқликни, исённи кечираман. Лекин айбдорни асло жазосиз қолдирмайман. Мен уларни жазолайман, уларнинг гуноҳлари оқибатидан фарзандлари, набиралари ва чеваралари ҳам қочиб қутулмайди.” 19 Ўтинаман, чексиз севгинг туфайли бу халқнинг гуноҳидан ўт. Ахир, Сен уларни Мисрдан чиққанларидан бери кечириб келяпсан.
20 — Илтимосингга мувофиқ уларни кечираман, — деди Мусога Эгамиз. 21 — Лекин Мен барҳаёт Худо бўлганим ҳақи, ер юзини тўлдирган улуғворлигим ҳақи, онт ичиб айтаманки, 22-23 бу одамларнинг бирортаси Мен оталарига ваъда қилган юртга кирмайди. Улар Менинг буюк қудратимни, Мисрда ва саҳрода қилган мўъжизаларимни кўра туриб Менга қулоқ солмадилар, Мени қайта–қайта синадилар. Мени хўрлаган бу одамлар Канъон юртини кўрмайдилар. 24 Лекин қулим Холиб бундайлардан эмас. У Менга содиқ қолди. Шунинг учун Мен уни ўзи кўриб келган ўша юртга олиб кираман. Унинг насли юртни эгаллайди. 25 Энди эса Омолек ва Канъон халқлари яшайдиган водийларга бора кўрманглар. Эртагаёқ орқага қайтинглар, Қизил денгиз йўлидаги саҳрога боринглар.
Эгамиз халқни шикоят қилгани учун жазолайди
26 Эгамиз Мусо билан Ҳорунга деди:
27 — Қачонгача бу қабиҳ жамоа Мендан нолийверади?! Мен Исроил халқининг минғирлаб нолишини эшитдим, 28 бориб уларга Менинг бу гапимни айт: “Барҳаёт Худо бўлганим ҳақи, онт ичиб айтаманки, минғирлаб нолиганларингизни Мен бошингизга соламан. Мен, Эгангиз, айтдим. 29 Жасадларингиз мана шу саҳрода қолади. Рўйхатга кирган йигирма ва ундан юқори ёшдагилар — Мендан минғирлаб нолиганларнинг ҳаммаси 30 Мен онт ичиб, сизларга яшаш учун бермоқчи бўлган юртга киришмайди. У юртга фақат Яфунах ўғли Холиб билан Нун ўғли Ёшуа киришади. 31 Сизлар, болаларимиз у ерда душманга ўлжа бўлади, деб айтдингиз. Аммо Мен болаларингизни ўша ерга олиб кираман. Сизлар рад этган ўша юртдан улар баҳра олишади. 32 Сизларнинг жасадларингиз эса мана шу саҳрода қолиб кетади. 33 Болаларингиз саҳрода қирқ йил тентираб юради. Ҳаммангиз мана шу саҳрода нобуд бўлмагунингизча, болаларингиз сизнинг садоқатсизлигингиз учун азоб тортишади. 34 Сизлар ўша юртни қирқ кун давомида кўриб қайтиб келган эдингизлар. Энди гуноҳингиз учун қирқ йил, ҳар бир кун эвазига бир йилдан жазо тортиб юрасизлар. Менга қарши чиққанларнинг ҳоли не кечишини ана шунда биласизлар! 35 Менга қарши йиғилган мана шу қабиҳ жамоанинг ҳаммасини Мен шундай аҳволга соламанки, улар мана шу саҳрода қирилиб, йўқ бўлиб кетишади. Буни Мен, Эгангиз, айтдим.”
36 Мусо Канъон юртига айғоқчи қилиб юборган ўнта одам бўлмағур гаплар тарқатиб, жамоанинг Эгамиздан минғирлаб нолишига сабабчи бўлган эди. 37 Ўша юрт ҳақида нохуш хабар олиб келган бу одамлар ўлатга чалиниб, Эгамизнинг олдида жон беришди. 38 Айғоқчилардан фақат Нун ўғли Ёшуа билан Яфунах ўғли Холиб тирик қолди.
Канъон юртини босиб олишга биринчи уриниш
39 Мусо жамики Исроил халқига шу гапларни айтганда, халқ чуқур қайғуга ботди. 40 Эртасига улар тонг саҳарда турдилар, Канъондаги қирларга томон жўнаётиб шундай дедилар:
— Қани, кетдик, гуноҳ қилганимизни англаб етдик. Мана энди Эгамиз бизга ваъда қилган ўша юртга киришга тайёрмиз.
41 Лекин Мусо:
— Нима учун Эгамизнинг амрига яна итоатсизлик қиляпсизлар? — деди. — Бу билан ҳеч нарсага эришолмайсизлар–ку! 42 У ерга борманглар. Эгамиз сизлар билан эмас! Душманларингиз олдида мағлуб бўласизлар! 43 Омолек ва Канъон халқлари сизларга қаршилик кўрсатишади. Қирилиб кетасизлар. Сизлар Эгамиздан юз ўгирганингиз учун, У сизлар билан бирга бўлмайди.
44 Бироқ Исроил халқи билганидан қолмай ўша ердаги қирларга чиқди. Эгамизнинг Аҳд сандиғи билан Мусо эса қароргоҳда қолишди. 45 Ўша қирларда яшайдиган Омолек ва Канъон халқлари пастга тушиб, Исроил халқига ҳужум қилишди, уларни Хўрмахгача қувиб боришди.
