8–BOB
Shoh yahudiylarni himoya qiladi
1 Oʻsha kuni shoh Axashverash yahudiylar dushmani Xomonning mol–mulkini malika Esterga inʼom qildi. Mardoxay shoh huzuriga kirib chiqadigan boʻldi. Chunki malika Mardoxayning oʻziga qarindosh ekanini aytgan edi.
2 Shoh Xomondan qaytarib olgan muhr uzugini barmogʻidan chiqarib Mardoxayga berdi. Ester esa Mardoxayni Xomonning mol–mulki ustidan boshqaruvchi qilib tayinladi.
3 Ester shoh bilan yana gaplashdi. Shohning oyogʻiga yiqilib: “Oʻgax naslidan boʻlgan Xomonning yahudiylarga qarshi oʻylagan xusumatini va rejasini daf qiling”, deb yigʻlab yolvordi. 4 Shoh saltanatning oltin hassasini Ester tomon uzatgan edi, Ester oʻrnidan turib, shohning qarshisiga keldi 5 va aytdi:
— Agar shohimiz maʼqul koʻrib, mendan mamnun boʻlsalar, bu ishni oʻrinli deb bilsalar, oʻzlariga yoqqan boʻlsam, Oʻgax naslidan Xamadoto oʻgʻli Xomonning shohlik hududidagi hamma yahudiylarni qirib tashlash toʻgʻrisida qasddan yozgan maktubini bekor qilish uchun boshqa maktub yozilsin. 6 Axir, xalqimning boshiga tushadigan kulfatni tomosha qilib chidab tura olamanmi?! Qabiladoshlarim oʻldirilayotganda, guvoh boʻlib tura olamanmi?!
7 Shunda shoh Axashverash malika Esterga va yahudiy Mardoxayga aytdi:
— Xomonning mol–mulkini Esterga berdim. Xomon esa yahudiylarni qirib tashlamoqchi boʻlgani uchun uni dorga ostirdim . 8 Endi shoh nomidan yahudiylar toʻgʻrisidagi maktubni oʻzlaringizga maʼqul keladigan tarzda yozib, shohning uzugi bilan muhrlanglar. Shoh nomidan yozilib, shohning uzugi bilan muhrlangan maktubni hech kim oʻzgartirishi mumkin emas.
9 Shundan soʻng uchinchi oyda — Shavon oyining yigirma uchinchi kuni shohning mirzalari chaqirildi. Hindistondan Habashistongacha boʻlgan bir yuz yigirma yetti viloyatdagi yahudiylarga, noiblarga, hokimlarga, viloyatlarning beklariga xuddi Mardoxay buyurganiday maktub yozildi. Maktub har bir viloyat xalqining yozuvi va tilida, yahudiylarga ham oʻzlarining yozuvida va tilida yozildi. 10 Mardoxay shoh Axashverash nomidan maktubni yozdirgach, shohning uzugi bilan muhrladi va shohning yilqisidagi uchqur otlarga choparlarni oʻtqazib joʻnatdi.
11 Shoh maktubda yahudiylarga hamma shaharlarda toʻplanib, oʻzlarini himoya qilishlariga huquq berdi. Bundan tashqari, yahudiylarga hujum qiladigan har qanday dushman xalqning yoki yurtning qurolli kuchlarini, bolalarini va ayollarini yoʻq qilishga, oʻldirishga, mol–mulkini talon–taroj qilishga, qirib tashlashga ijozat berdi. 12 Buning uchun shoh Axashverashning qoʻli ostidagi hamma yurtlarda bir kun — oʻn ikkinchi oyning, yaʼni Adar oyining oʻn uchinchi kuni belgilandi. 13 Ushbu farmon matni har bir viloyatga, barcha xalqlarga qonun oʻrnida eʼlon qilindi. Shunday qilib, yahudiylar oʻsha kuni oʻz dushmanlaridan qasos olishga tayyor turishlari kerak edi.
14 Choparlar shohning uchqur otlariga mindilar–u, uning farmoniga koʻra, toʻrt tomonga yelib ketdilar.
Shushandagi qalʼada ham farmon eʼlon qilindi. 15 Mardoxay koʻk va oq rangli shohona liboslarga burkanib, katta oltin tojni kiyib, safsar rangli zigʻir ridoga oʻranib, shoh huzuridan chiqdi. Shushanda xursandchilik, shodu xurramlik hukm surardi. 16 Bundan yahudiylarning qalbi umidga toʻldi, shodu xurram, vaqti chogʻ boʻldi, ular uchun sharafli kunlar boshlangan edi. 17 Hamma viloyatlarda, har bir shaharda, shohning amru farmoni yetib borgan har qanday joyda yahudiylar shodu xurram boʻlib, oʻynab–kuldilar, ziyofatlar uyushtirdilar, bayram qildilar. Shohlikdagi koʻp xalqlar yahudiy boʻldi, chunki hammani yahudiylardan qoʻrquv hissi qamrab olgan edi.
8–БОБ
Шоҳ яҳудийларни ҳимоя қилади
1 Ўша куни шоҳ Ахашвераш яҳудийлар душмани Хомоннинг мол–мулкини малика Эстерга инъом қилди. Мардохай шоҳ ҳузурига кириб чиқадиган бўлди. Чунки малика Мардохайнинг ўзига қариндош эканини айтган эди.
2 Шоҳ Хомондан қайтариб олган муҳр узугини бармоғидан чиқариб Мардохайга берди. Эстер эса Мардохайни Хомоннинг мол–мулки устидан бошқарувчи қилиб тайинлади.
3 Эстер шоҳ билан яна гаплашди. Шоҳнинг оёғига йиқилиб: “Ўгах наслидан бўлган Хомоннинг яҳудийларга қарши ўйлаган хусуматини ва режасини даф қилинг”, деб йиғлаб ёлворди. 4 Шоҳ салтанатнинг олтин ҳассасини Эстер томон узатган эди, Эстер ўрнидан туриб, шоҳнинг қаршисига келди 5 ва айтди:
— Агар шоҳимиз маъқул кўриб, мендан мамнун бўлсалар, бу ишни ўринли деб билсалар, ўзларига ёққан бўлсам, Ўгах наслидан Хамадото ўғли Хомоннинг шоҳлик ҳудудидаги ҳамма яҳудийларни қириб ташлаш тўғрисида қасддан ёзган мактубини бекор қилиш учун бошқа мактуб ёзилсин. 6 Ахир, халқимнинг бошига тушадиган кулфатни томоша қилиб чидаб тура оламанми?! Қабиладошларим ўлдирилаётганда, гувоҳ бўлиб тура оламанми?!
7 Шунда шоҳ Ахашвераш малика Эстерга ва яҳудий Мардохайга айтди:
— Хомоннинг мол–мулкини Эстерга бердим. Хомон эса яҳудийларни қириб ташламоқчи бўлгани учун уни дорга остирдим . 8 Энди шоҳ номидан яҳудийлар тўғрисидаги мактубни ўзларингизга маъқул келадиган тарзда ёзиб, шоҳнинг узуги билан муҳрланглар. Шоҳ номидан ёзилиб, шоҳнинг узуги билан муҳрланган мактубни ҳеч ким ўзгартириши мумкин эмас.
9 Шундан сўнг учинчи ойда — Шавон ойининг йигирма учинчи куни шоҳнинг мирзалари чақирилди. Ҳиндистондан Ҳабашистонгача бўлган бир юз йигирма етти вилоятдаги яҳудийларга, ноибларга, ҳокимларга, вилоятларнинг бекларига худди Мардохай буюрганидай мактуб ёзилди. Мактуб ҳар бир вилоят халқининг ёзуви ва тилида, яҳудийларга ҳам ўзларининг ёзувида ва тилида ёзилди. 10 Мардохай шоҳ Ахашвераш номидан мактубни ёздиргач, шоҳнинг узуги билан муҳрлади ва шоҳнинг йилқисидаги учқур отларга чопарларни ўтқазиб жўнатди.
11 Шоҳ мактубда яҳудийларга ҳамма шаҳарларда тўпланиб, ўзларини ҳимоя қилишларига ҳуқуқ берди. Бундан ташқари, яҳудийларга ҳужум қиладиган ҳар қандай душман халқнинг ёки юртнинг қуролли кучларини, болаларини ва аёлларини йўқ қилишга, ўлдиришга, мол–мулкини талон–тарож қилишга, қириб ташлашга ижозат берди. 12 Бунинг учун шоҳ Ахашверашнинг қўли остидаги ҳамма юртларда бир кун — ўн иккинчи ойнинг, яъни Адар ойининг ўн учинчи куни белгиланди. 13 Ушбу фармон матни ҳар бир вилоятга, барча халқларга қонун ўрнида эълон қилинди. Шундай қилиб, яҳудийлар ўша куни ўз душманларидан қасос олишга тайёр туришлари керак эди.
14 Чопарлар шоҳнинг учқур отларига миндилар–у, унинг фармонига кўра, тўрт томонга елиб кетдилар.
Шушандаги қалъада ҳам фармон эълон қилинди. 15 Мардохай кўк ва оқ рангли шоҳона либосларга бурканиб, катта олтин тожни кийиб, сафсар рангли зиғир ридога ўраниб, шоҳ ҳузуридан чиқди. Шушанда хурсандчилик, шоду хуррамлик ҳукм сурарди. 16 Бундан яҳудийларнинг қалби умидга тўлди, шоду хуррам, вақти чоғ бўлди, улар учун шарафли кунлар бошланган эди. 17 Ҳамма вилоятларда, ҳар бир шаҳарда, шоҳнинг амру фармони етиб борган ҳар қандай жойда яҳудийлар шоду хуррам бўлиб, ўйнаб–кулдилар, зиёфатлар уюштирдилар, байрам қилдилар. Шоҳликдаги кўп халқлар яҳудий бўлди, чунки ҳаммани яҳудийлардан қўрқув ҳисси қамраб олган эди.
