24–BOB
Dovud Shoulning joniga qasd qilmaydi
1 Dovud u joylarni ham tark etib, En–Gedidagi pana joylarda yashay boshladi. 2 Shoul Filistlarni quvlab yuborib qaytib kelgach, Dovud En–Gedi yonidagi dasht–choʻllarda yuribdi degan xabarni eshitdi. 3 Shoul odamlari bilan Dovudni qidirmoqqa otlandi. Isroilning eng sara sipohlaridan uch mingtasini tanlab olib, qoyalari va yovvoyi echkilari bilan mashhur boʻlgan joyga ketishdi.
4 Yoʻlda qoʻy qoʻrasi boʻlib, uning yaqinida bir gʻor bor edi. Shoul ehtiyojini qondirmoqchi boʻlib gʻorga kirdi. Gʻorning eng ichkarisida esa Dovud odamlari bilan oʻtirgan edi. 5 Odamlari Dovudga aytdilar:
— Egamiz senga: “Gʻanimingni qoʻlingga beraman, unga bilganingni qilaver”, degan edi. Oʻsha kun shu bugundir!
Dovud sekin borib, Shoulning ridosi etagidan bilintirmay bir parcha kesib oldi. 6 Lekin Shoulning etagidan bir parcha kesib olgani uchun yuragida oʻkinch paydo boʻldi. 7 Keyin odamlariga dedi:
— Xudo saqlasin! Men Egamiz moy surtib tanlagan shohga — janobi oliylariga bunday qilolmayman. Unga qarshi qoʻlimni koʻtarmayman, chunki u Egamizning moy surtib tanlaganidir.
8 Dovud shunday deb odamlariga tanbeh berdi, Shoulga tegishlariga ijozat bermadi. Shoul gʻordan chiqib, yoʻliga ketdi. 9 Uning ortidan Dovud ham gʻordan chiqdi–da:
— Shoh hazratlari! — deb Shoulni chaqirdi. Shoul orqasiga oʻgirildi, Dovud egilib taʼzim qildi va yer oʻpib 10 dedi:
— Dovud senga yomonlik qilmoqchi degan odamlarning gaplariga nima uchun quloq solyapsiz? 11 Oʻz koʻzingiz bilan koʻrib turibsizki, hozir Egamiz gʻorda sizni qoʻlimga bergan edi. Odamlarim sizni oʻldirmoqchi boʻlishgan edi, lekin mening koʻzim qiymadi, “Janoblariga qoʻl tekkizmayman, chunki u Egamizning moy surtib tanlaganidir”, dedim. 12 Qarang, ey otam! Qoʻlimdagi manavi parchaga qarang! Ridoingizning etagidan kesib oldim. Ridoingizdan bir parchani kesib oldim–u, lekin sizni oʻldirmadim. Koʻnglimda yomonlik va makkorlikdan asar yoʻqligini yaxshi bilib oling. Men sizga gunoh qilmaganman–u, siz esa mening jonimga qasd qilish payiga tushgansiz. 13 Xudoga soldim, men uchun U sizdan oʻch olsin. Men sizga qoʻl koʻtarmayman. 14 Eskilar: “Yomonlik yomon odamlardan kelar”, deyishgan, shunga koʻra, men sizga qoʻlimni koʻtarmayman. 15 Isroil shohi kimning payiga tushgan, axir? Siz kimni taʼqib qilyapsiz? Oʻlgan itday yoki burgaday arzimas boʻlgan menimi? 16 Xudoga soldim, qay birimizning haq ekanimizni Xudo hukm qilsin, dodimni Oʻzi eshitsin. Egamiz mening yoʻlimni berib, sizning qoʻlingizdan xalos etsin.
17 Dovud gapini tugatgan ham ediki, Shoul:
— Dovud, oʻgʻlim, bu sening ovozingmi? — dedi–yu, uvvos solib yigʻlay boshladi.
18 — Sen haqsan, men notoʻgʻri qildim, — dedi Shoul Dovudga. — Sen menga yaxshilik qilgan eding, men yomonlik bilan javob qaytardim. 19 Bugun menga boʻlgan munosabatingni aniq–ravshan isbotlading. Egamiz meni sening qoʻlingga beribdi–yu, lekin sen meni oʻldirmabsan. 20 Qaniydi, hammayam senga oʻxshab dushmanini tutib olganda, oq yoʻl tilab qoʻyib yuboraversa?! Bugun menga qilgan yaxshiliging uchun senga Egamizdan qaytsin! 21 Endi men anglab yetdim: sen albatta shoh boʻlasan, Isroil shohligi sening qoʻlingda mustahkam boʻladi. 22 Endi menga, sizdan keyin avlodingizni yoʻq qilmayman, otangiz xonadonidan nomingizni oʻchirmayman, deb Egamiz oldida ont ich.
23 Dovud Shoulning oldida ont ichdi. Shundan soʻng Shoul uyiga qaytib ketdi. Dovud esa odamlari bilan adirlardagi qarorgohiga qaytdi.
24–БОБ
Довуд Шоулнинг жонига қасд қилмайди
1 Довуд у жойларни ҳам тарк этиб, Эн–Гедидаги пана жойларда яшай бошлади. 2 Шоул Филистларни қувлаб юбориб қайтиб келгач, Довуд Эн–Геди ёнидаги дашт–чўлларда юрибди деган хабарни эшитди. 3 Шоул одамлари билан Довудни қидирмоққа отланди. Исроилнинг энг сара сипоҳларидан уч мингтасини танлаб олиб, қоялари ва ёввойи эчкилари билан машҳур бўлган жойга кетишди.
4 Йўлда қўй қўраси бўлиб, унинг яқинида бир ғор бор эди. Шоул эҳтиёжини қондирмоқчи бўлиб ғорга кирди. Ғорнинг энг ичкарисида эса Довуд одамлари билан ўтирган эди. 5 Одамлари Довудга айтдилар:
— Эгамиз сенга: “Ғанимингни қўлингга бераман, унга билганингни қилавер”, деган эди. Ўша кун шу бугундир!
Довуд секин бориб, Шоулнинг ридоси этагидан билинтирмай бир парча кесиб олди. 6 Лекин Шоулнинг этагидан бир парча кесиб олгани учун юрагида ўкинч пайдо бўлди. 7 Кейин одамларига деди:
— Худо сақласин! Мен Эгамиз мой суртиб танлаган шоҳга — жаноби олийларига бундай қилолмайман. Унга қарши қўлимни кўтармайман, чунки у Эгамизнинг мой суртиб танлаганидир.
8 Довуд шундай деб одамларига танбеҳ берди, Шоулга тегишларига ижозат бермади. Шоул ғордан чиқиб, йўлига кетди. 9 Унинг ортидан Довуд ҳам ғордан чиқди–да:
— Шоҳ ҳазратлари! — деб Шоулни чақирди. Шоул орқасига ўгирилди, Довуд эгилиб таъзим қилди ва ер ўпиб 10 деди:
— Довуд сенга ёмонлик қилмоқчи деган одамларнинг гапларига нима учун қулоқ соляпсиз? 11 Ўз кўзингиз билан кўриб турибсизки, ҳозир Эгамиз ғорда сизни қўлимга берган эди. Одамларим сизни ўлдирмоқчи бўлишган эди, лекин менинг кўзим қиймади, “Жанобларига қўл теккизмайман, чунки у Эгамизнинг мой суртиб танлаганидир”, дедим. 12 Қаранг, эй отам! Қўлимдаги манави парчага қаранг! Ридоингизнинг этагидан кесиб олдим. Ридоингиздан бир парчани кесиб олдим–у, лекин сизни ўлдирмадим. Кўнглимда ёмонлик ва маккорликдан асар йўқлигини яхши билиб олинг. Мен сизга гуноҳ қилмаганман–у, сиз эса менинг жонимга қасд қилиш пайига тушгансиз. 13 Худога солдим, мен учун У сиздан ўч олсин. Мен сизга қўл кўтармайман. 14 Эскилар: “Ёмонлик ёмон одамлардан келар”, дейишган, шунга кўра, мен сизга қўлимни кўтармайман. 15 Исроил шоҳи кимнинг пайига тушган, ахир? Сиз кимни таъқиб қиляпсиз? Ўлган итдай ёки бургадай арзимас бўлган меними? 16 Худога солдим, қай биримизнинг ҳақ эканимизни Худо ҳукм қилсин, додимни Ўзи эшитсин. Эгамиз менинг йўлимни бериб, сизнинг қўлингиздан халос этсин.
17 Довуд гапини тугатган ҳам эдики, Шоул:
— Довуд, ўғлим, бу сенинг овозингми? — деди–ю, уввос солиб йиғлай бошлади.
18 — Сен ҳақсан, мен нотўғри қилдим, — деди Шоул Довудга. — Сен менга яхшилик қилган эдинг, мен ёмонлик билан жавоб қайтардим. 19 Бугун менга бўлган муносабатингни аниқ–равшан исботладинг. Эгамиз мени сенинг қўлингга берибди–ю, лекин сен мени ўлдирмабсан. 20 Қанийди, ҳаммаям сенга ўхшаб душманини тутиб олганда, оқ йўл тилаб қўйиб юбораверса?! Бугун менга қилган яхшилигинг учун сенга Эгамиздан қайтсин! 21 Энди мен англаб етдим: сен албатта шоҳ бўласан, Исроил шоҳлиги сенинг қўлингда мустаҳкам бўлади. 22 Энди менга, сиздан кейин авлодингизни йўқ қилмайман, отангиз хонадонидан номингизни ўчирмайман, деб Эгамиз олдида онт ич.
23 Довуд Шоулнинг олдида онт ичди. Шундан сўнг Шоул уйига қайтиб кетди. Довуд эса одамлари билан адирлардаги қароргоҳига қайтди.
