17–BOB
1 Nuqsoni yoki kamchiligi bor mol–qoʻylarni Egangiz Xudoga qurbonlik qilmanglar. Bu Egangiz Xudoga jirkanchdir.
2 Egangiz Xudo sizga berayotgan shaharlarning birida orangizdan birorta erkak yoki ayol Egangiz oldida qabihlik qilib, Uning ahdini buzsa, 3 begona xudolarga xizmat qilsa, oʻsha xudolarga yoki quyoshga, oyga va samoviy jismlarga topinsa, taqiqlangan bu ishlarni qilsa, 4 bu voqeadan sizlar xabardor boʻlsangiz, eshitganlaringizni yaxshilab tekshiringlar. Isroil xalqi orasida haqiqatan ham bunday jirkanch ish qilingan boʻlsa, 5 oʻsha gunohkor erkak yoki ayolni shahar darvozasidan tashqariga olib chiqib, toshboʻron qilib oʻldiringlar. 6 Odam faqat ikkita yoki uchta guvohning soʻzi bilan oʻlimga hukm qilinishi mumkin, bitta guvohning soʻzi bilan oʻldirilmasin. 7 Gunohkorga birinchi boʻlib guvohlar tosh otsin, keyin butun xalq uni toshboʻron qilsin. Shunday qilib, orangizdan yomonlikni yoʻq qilinglar.
8 Agar shahringizda qon toʻkish, haq–huquq talashish va zoʻravonlik kabi mojarolarni hukm qilish qiyin boʻlsa, Egangiz Xudo tanlaydigan joyga boringlar. 9 Levi ruhoniylarining va oʻsha vaqtda xizmatda boʻlgan hakamning oldiga borib, ulardan soʻranglar. Ular hukm chiqaradi. 10 Ular chiqargan hukm boʻyicha ish tutinglar, oʻrgatganlarini bitta qoldirmay bajaringlar. 11 Tushuntirgan qonunni va qonunga asosan chiqargan hukmni toʻliq bajaringlar. Ularning aytganlaridan chapga ham, oʻngga ham ogʻmanglar. 12 Egangiz Xudoning xizmatida turgan ruhoniy va hakamning gapiga quloq solmay, oʻzboshimcha ish tutgan odam oʻlishi kerak. Shunday qilsangiz, Isroil xalqi orasidan yomonlikni yoʻq qilgan boʻlasizlar. 13 Butun xalq bu voqeani eshitib qoʻrqadi, bundan keyin oʻzboshimcha ish qilmaydigan boʻladi.
Shoh haqida koʻrsatmalar
14 Egangiz Xudo sizlarga beradigan yurtga borib, u yerga joylashib, egalik qilasizlar. Shundan keyin, “Atrofimizdagi xalqlarga oʻxshab biz ham ustimizdan shoh qoʻyaylik”, deysiz. 15 Koʻtaradigan shohingiz albatta Egangiz Xudo tomonidan tanlangan boʻlsin. Shoh oʻz xalqingizdan boʻlsin. Begona boʻlgan musofirni ustingizdan shoh qilishingiz mumkin emas. 16 Shoh oʻzi uchun ot koʻpaytirmasin, ot sotib olish uchun odamlarni Misrga joʻnatmasin. Chunki Egamiz sizlarga: “U yerga qaytib bormanglar”, degan. 17 Tayinlangan shoh xotinlarni koʻpaytirmasin, aks holda, Egamizdan yuragi soviydi . Oʻzi uchun koʻp miqdorda oltin va kumushni yigʻmasin. 18 U shohlik taxtiga oʻtirganda, levi ruhoniylari saqlagan qonunlardan oʻzi uchun bir nusxa koʻchirtirib olsin. 19 Qonunlarning oʻsha nusxasi doimo shohning yonida boʻlsin. Shoh uni har kuni, umri davomida oʻqisin, toki oʻzining Egasi Xudodan qoʻrqishni oʻrgansin, qonun va farmonlarning soʻzlarini bitta qoldirmay bajarsin. 20 Oʻzini birodarlaridan ustun qoʻymasin, amrlardan chapga ham, oʻngga ham ogʻmasin. Shunda oʻzi ham, oʻgʻillari ham Isroil ustidan uzoq yillar hukmronlik qiladilar.
17–БОБ
1 Нуқсони ёки камчилиги бор мол–қўйларни Эгангиз Худога қурбонлик қилманглар. Бу Эгангиз Худога жирканчдир.
2 Эгангиз Худо сизга бераётган шаҳарларнинг бирида орангиздан бирорта эркак ёки аёл Эгангиз олдида қабиҳлик қилиб, Унинг аҳдини бузса, 3 бегона худоларга хизмат қилса, ўша худоларга ёки қуёшга, ойга ва самовий жисмларга топинса, тақиқланган бу ишларни қилса, 4 бу воқеадан сизлар хабардор бўлсангиз, эшитганларингизни яхшилаб текширинглар. Исроил халқи орасида ҳақиқатан ҳам бундай жирканч иш қилинган бўлса, 5 ўша гуноҳкор эркак ёки аёлни шаҳар дарвозасидан ташқарига олиб чиқиб, тошбўрон қилиб ўлдиринглар. 6 Одам фақат иккита ёки учта гувоҳнинг сўзи билан ўлимга ҳукм қилиниши мумкин, битта гувоҳнинг сўзи билан ўлдирилмасин. 7 Гуноҳкорга биринчи бўлиб гувоҳлар тош отсин, кейин бутун халқ уни тошбўрон қилсин. Шундай қилиб, орангиздан ёмонликни йўқ қилинглар.
8 Агар шаҳрингизда қон тўкиш, ҳақ–ҳуқуқ талашиш ва зўравонлик каби можароларни ҳукм қилиш қийин бўлса, Эгангиз Худо танлайдиган жойга боринглар. 9 Леви руҳонийларининг ва ўша вақтда хизматда бўлган ҳакамнинг олдига бориб, улардан сўранглар. Улар ҳукм чиқаради. 10 Улар чиқарган ҳукм бўйича иш тутинглар, ўргатганларини битта қолдирмай бажаринглар. 11 Тушунтирган қонунни ва қонунга асосан чиқарган ҳукмни тўлиқ бажаринглар. Уларнинг айтганларидан чапга ҳам, ўнгга ҳам оғманглар. 12 Эгангиз Худонинг хизматида турган руҳоний ва ҳакамнинг гапига қулоқ солмай, ўзбошимча иш тутган одам ўлиши керак. Шундай қилсангиз, Исроил халқи орасидан ёмонликни йўқ қилган бўласизлар. 13 Бутун халқ бу воқеани эшитиб қўрқади, бундан кейин ўзбошимча иш қилмайдиган бўлади.
Шоҳ ҳақида кўрсатмалар
14 Эгангиз Худо сизларга берадиган юртга бориб, у ерга жойлашиб, эгалик қиласизлар. Шундан кейин, “Атрофимиздаги халқларга ўхшаб биз ҳам устимиздан шоҳ қўяйлик”, дейсиз. 15 Кўтарадиган шоҳингиз албатта Эгангиз Худо томонидан танланган бўлсин. Шоҳ ўз халқингиздан бўлсин. Бегона бўлган мусофирни устингиздан шоҳ қилишингиз мумкин эмас. 16 Шоҳ ўзи учун от кўпайтирмасин, от сотиб олиш учун одамларни Мисрга жўнатмасин. Чунки Эгамиз сизларга: “У ерга қайтиб борманглар”, деган. 17 Тайинланган шоҳ хотинларни кўпайтирмасин, акс ҳолда, Эгамиздан юраги совийди . Ўзи учун кўп миқдорда олтин ва кумушни йиғмасин. 18 У шоҳлик тахтига ўтирганда, леви руҳонийлари сақлаган қонунлардан ўзи учун бир нусха кўчиртириб олсин. 19 Қонунларнинг ўша нусхаси доимо шоҳнинг ёнида бўлсин. Шоҳ уни ҳар куни, умри давомида ўқисин, токи ўзининг Эгаси Худодан қўрқишни ўргансин, қонун ва фармонларнинг сўзларини битта қолдирмай бажарсин. 20 Ўзини биродарларидан устун қўймасин, амрлардан чапга ҳам, ўнгга ҳам оғмасин. Шунда ўзи ҳам, ўғиллари ҳам Исроил устидан узоқ йиллар ҳукмронлик қиладилар.
