6–BOB
Imonlilar orasidagi daʼvolarni hal qilish haqida
1 Orangizda bittasining boshqa birovga daʼvosi bor ekan. Bu daʼvoni hal qilib bersin deb, u kishi Xudoning azizlari oldiga emas, balki imonsizlar oldiga borishga qanday jurʼat qilyapti? 2 Xudoning azizlari hatto dunyoni hukm qilishini nahotki sizlar bilmasangiz?! Modomiki, sizlar dunyoni hukm qilar ekansiz, nahotki ahamiyatsiz ikir–chikir ishlarni hukm qila olmasangiz? 3 Biz hatto farishtalarni ham hukm qilamiz–ku! Shuni bilmaysizlarmi?! Shunday ekan, turmush ikir–chikirlari nima boʻlibdi?! 4 Nima uchun endi bir–biringizga daʼvoingiz boʻlsa, jamoatga daxli boʻlmagan hakamlarning oldiga boryapsiz?! 5 Nahotki orangizda oʻz birodarlarining daʼvosini ajrim qila oladigan birorta dono odam topilmasa?! Uyalmaysizlarmi, axir?! 6 Imonli birodar yana boshqa bir imonli birodari bilan daʼvolashmoqda, qolaversa buni imonsiz hakamlarning oldida qilyapti–ya!
7 Undan koʻra, haqsizlikka chidab turganingiz sizlar uchun yaxshiroq boʻlmasmidi? Hatto hiyla–nayranglardan zarar koʻrish sizlar uchun afzalroq boʻlmasmidi? Bir–biringiz bilan daʼvolashishning oʻzi sizlar uchun tamoman magʻlubiyat–ku! 8 Shunisi yetmaganday, sizlar hiyla–nayranglar bilan oʻz birodaringizga nohaqlik qilyapsizlar.
9 Nahotki bilmasangizlar?! Nohaqlik qiluvchilar Xudoning Shohligidan bahramand boʻlmaydilar–ku! Adashmanglar, jinsiy tomondan axloqsiz boʻlganlar, butparastlar, zinokorlar, bachchabozlaru bachchalar, 10 oʻgʻrilar, tamagirlar, mayxoʻrlar, gʻiybatchilar va tovlamachilar Xudoning Shohligidan bahramand boʻlmaydilar. 11 Baʼzilaringiz oldin shunday edingiz. Endi esa sizlar Rabbimiz Iso Masihning nomi bilan va Xudoning Ruhi orqali poklandingiz, Xudoga bagʻishlandingiz, oqlandingiz.
Aʼzoyi badaningiz bilan Xudoni ulugʻlang
12 Baʼzilaringiz: “Xohlaganimni qilishga haqim bor”, deb aytyapsizlar. Toʻgʻri, lekin hamma narsa ham foydali emas. Xohlaganimizni qilishga haqimiz bor, lekin hech bir narsa bizning ustimizdan hokimlik qilmasligi kerak. 13 Baʼzilaringiz yana: “Ovqat qorin uchun, qorin esa ovqat uchun, Xudo ikkalasini ham yoʻq qiladi–ku” , deb aytyapsizlar. Toʻgʻri, ammo badanimiz zino uchun xizmat qilmasligi kerak, aksincha, badanimiz bilan Rabbimiz Isoga xizmat qilishimiz kerak. Rabbimiz badanimiz ustidan hokimlik qilishi kerak. 14 Rabbimizni tiriltirgan Xudo Oʻz qudrati bilan bizlarni ham tiriltiradi.
15 Bilmaysizlarmi, axir?! Aʼzoyi badaningiz Masih tanasining aʼzosi–ku! Shunday ekan, men Masih tanasining aʼzolarini olib, fohisha tanasining aʼzolari qilib qoʻyarmikanman? Yoʻq, aslo! 16 Fohisha bilan qovushgan u bilan bir tan boʻlishini bilmaysizlarmi?! Muqaddas bitiklarda: “Ikkalasi bir tan boʻladilar” , deb yozilgan–ku! 17 Rabbimiz Iso bilan birga boʻlgan esa U bilan bir ruhda boʻladi.
18 Jinsiy axloqsizlikdan oʻzingizni olib qochinglar! Jinsiy axloqsizlik bilan gunoh qilgan oʻz tanasiga qarshi gunoh qilgan boʻladi, qolgan hamma gunohlar esa tanaga bevosita bogʻlanmagan holda qilinadi. 19 Nahot bilmasangiz?! Qalbingizda maskan qilgan Muqaddas Ruhni Xudo sizlarga bergan. Tanangiz Muqaddas Ruhning maʼbadidir. Sizlar oʻzlaringizga tegishli emassizlar. 20 Sizlar qimmat bahoga sotib olingansizlar. Shuning uchun oʻz tanangiz bilan Xudoni ulugʻlanglar .
6–БОБ
Имонлилар орасидаги даъволарни ҳал қилиш ҳақида
1 Орангизда биттасининг бошқа бировга даъвоси бор экан. Бу даъвони ҳал қилиб берсин деб, у киши Худонинг азизлари олдига эмас, балки имонсизлар олдига боришга қандай журъат қиляпти? 2 Худонинг азизлари ҳатто дунёни ҳукм қилишини наҳотки сизлар билмасангиз?! Модомики, сизлар дунёни ҳукм қилар экансиз, наҳотки аҳамиятсиз икир–чикир ишларни ҳукм қила олмасангиз? 3 Биз ҳатто фаришталарни ҳам ҳукм қиламиз–ку! Шуни билмайсизларми?! Шундай экан, турмуш икир–чикирлари нима бўлибди?! 4 Нима учун энди бир–бирингизга даъвоингиз бўлса, жамоатга дахли бўлмаган ҳакамларнинг олдига боряпсиз?! 5 Наҳотки орангизда ўз биродарларининг даъвосини ажрим қила оладиган бирорта доно одам топилмаса?! Уялмайсизларми, ахир?! 6 Имонли биродар яна бошқа бир имонли биродари билан даъволашмоқда, қолаверса буни имонсиз ҳакамларнинг олдида қиляпти–я!
7 Ундан кўра, ҳақсизликка чидаб турганингиз сизлар учун яхшироқ бўлмасмиди? Ҳатто ҳийла–найранглардан зарар кўриш сизлар учун афзалроқ бўлмасмиди? Бир–бирингиз билан даъволашишнинг ўзи сизлар учун тамоман мағлубият–ку! 8 Шуниси етмагандай, сизлар ҳийла–найранглар билан ўз биродарингизга ноҳақлик қиляпсизлар.
9 Наҳотки билмасангизлар?! Ноҳақлик қилувчилар Худонинг Шоҳлигидан баҳраманд бўлмайдилар–ку! Адашманглар, жинсий томондан ахлоқсиз бўлганлар, бутпарастлар, зинокорлар, баччабозлару баччалар, 10 ўғрилар, тамагирлар, майхўрлар, ғийбатчилар ва товламачилар Худонинг Шоҳлигидан баҳраманд бўлмайдилар. 11 Баъзиларингиз олдин шундай эдингиз. Энди эса сизлар Раббимиз Исо Масиҳнинг номи билан ва Худонинг Руҳи орқали покландингиз, Худога бағишландингиз, оқландингиз.
Аъзойи баданингиз билан Худони улуғланг
12 Баъзиларингиз: “Хоҳлаганимни қилишга ҳақим бор”, деб айтяпсизлар. Тўғри, лекин ҳамма нарса ҳам фойдали эмас. Хоҳлаганимизни қилишга ҳақимиз бор, лекин ҳеч бир нарса бизнинг устимиздан ҳокимлик қилмаслиги керак. 13 Баъзиларингиз яна: “Овқат қорин учун, қорин эса овқат учун, Худо иккаласини ҳам йўқ қилади–ку” , деб айтяпсизлар. Тўғри, аммо баданимиз зино учун хизмат қилмаслиги керак, аксинча, баданимиз билан Раббимиз Исога хизмат қилишимиз керак. Раббимиз баданимиз устидан ҳокимлик қилиши керак. 14 Раббимизни тирилтирган Худо Ўз қудрати билан бизларни ҳам тирилтиради.
15 Билмайсизларми, ахир?! Аъзойи баданингиз Масиҳ танасининг аъзоси–ку! Шундай экан, мен Масиҳ танасининг аъзоларини олиб, фоҳиша танасининг аъзолари қилиб қўярмиканман? Йўқ, асло! 16 Фоҳиша билан қовушган у билан бир тан бўлишини билмайсизларми?! Муқаддас битикларда: “Иккаласи бир тан бўладилар” , деб ёзилган–ку! 17 Раббимиз Исо билан бирга бўлган эса У билан бир руҳда бўлади.
18 Жинсий ахлоқсизликдан ўзингизни олиб қочинглар! Жинсий ахлоқсизлик билан гуноҳ қилган ўз танасига қарши гуноҳ қилган бўлади, қолган ҳамма гуноҳлар эса танага бевосита боғланмаган ҳолда қилинади. 19 Наҳот билмасангиз?! Қалбингизда маскан қилган Муқаддас Руҳни Худо сизларга берган. Танангиз Муқаддас Руҳнинг маъбадидир. Сизлар ўзларингизга тегишли эмассизлар. 20 Сизлар қиммат баҳога сотиб олингансизлар. Шунинг учун ўз танангиз билан Худони улуғланглар .
