50–BOB
Isroil xalqining gunohi
1 Egamiz shunday aytmoqda:
“Men onangizni haydab yuborgan edim,
Uning taloq xati qani?
Xoʻsh, sizni qaysi qarz beruvchimga sotibman?
Mana, gunohlaringiz tufayli sotildingiz,
Itoatsizligingiz dastidan onangiz haydaldi.
2 Kelganimda nega biron kimsa yoʻq edi?
Chaqirganimda nega hech kim javob bermadi?
Sizni qutqarishga Mening qoʻlim qisqami?
Yoki sizni ozod qilishga kuchim yetmasmi?
Bir tahdid qilsam dengiz quriydi,
Daryolarni choʻlga aylantiraman.
Suvlar qurib, baliqlari sasiydi,
Suv yoʻqligidan baliqlar oʻlib ketadi.
3 Samolarga qora kiydiraman,
Qanorni ularning yopinchigʻi qilaman.”
Egamizning itoatkor quli
4 Toliqqanlarga soʻz bilan madad bersin deb,
Egam Rabbiy menga dono til berdi.
Har tong U meni uygʻotadi,
Donolarday tinglasin deb, qulogʻimni ochadi.
5 Egam Rabbiy qulogʻimni ochdi,
Men itoatsizlik qilmadim,
Men Undan yuz oʻgirib ketmadim.
6 Meni urganlarga kiftimni ochdim,
Soqolimni yulganlarga yuzimni tutdim,
Haqorat, tupurishlardan yuzimni yashirmadim.
7 Egam Rabbiy menga madad beradi,
Shu bois men hech sharmanda boʻlmadim.
Azoblarga bardosh berishga qaror qildim,
Bilaman, sharmanda boʻlmayman.
8 Meni oqlaydigan yaqinimdadir,
Men bilan daʼvolashadigan kim, yuzlashaylik–chi!
Qani raqiblarim? Menga qarshi chiqsin!
9 Mana, Egam Rabbiy menga madad beradi,
Qani, kim meni aybdor deb ayta oladi?!
Qarang, ularning hammasi kiyim kabi eskiradi,
Ularni kuya yeb tamom qiladi.
10 Orangizdan kim Egamizdan qoʻrqadi?
Kim qulining ovoziga quloq soladi?
Zulmatda yurganlar, nurdan mahrum boʻlganlar
Egamizning nomiga umid bogʻlasin,
Ha, oʻzining Xudosiga tayansin!
11 Axir, hammangiz alanga yoqyapsiz,
Mashʼallar yoqyapsiz.
Alangangiz yorugʻida yuravering,
Oʻzingiz yoqqan mashʼala yorugʻida yuravering.
Qarang, Xudo sizlarni ne koʻyga soladi:
U boshingizga azob–uqubat keltiradi.
50–БОБ
Исроил халқининг гуноҳи
1 Эгамиз шундай айтмоқда:
“Мен онангизни ҳайдаб юборган эдим,
Унинг талоқ хати қани?
Хўш, сизни қайси қарз берувчимга сотибман?
Мана, гуноҳларингиз туфайли сотилдингиз,
Итоатсизлигингиз дастидан онангиз ҳайдалди.
2 Келганимда нега бирон кимса йўқ эди?
Чақирганимда нега ҳеч ким жавоб бермади?
Сизни қутқаришга Менинг қўлим қисқами?
Ёки сизни озод қилишга кучим етмасми?
Бир таҳдид қилсам денгиз қурийди,
Дарёларни чўлга айлантираман.
Сувлар қуриб, балиқлари сасийди,
Сув йўқлигидан балиқлар ўлиб кетади.
3 Самоларга қора кийдираман,
Қанорни уларнинг ёпинчиғи қиламан.”
Эгамизнинг итоаткор қули
4 Толиққанларга сўз билан мадад берсин деб,
Эгам Раббий менга доно тил берди.
Ҳар тонг У мени уйғотади,
Донолардай тингласин деб, қулоғимни очади.
5 Эгам Раббий қулоғимни очди,
Мен итоатсизлик қилмадим,
Мен Ундан юз ўгириб кетмадим.
6 Мени урганларга кифтимни очдим,
Соқолимни юлганларга юзимни тутдим,
Ҳақорат, тупуришлардан юзимни яширмадим.
7 Эгам Раббий менга мадад беради,
Шу боис мен ҳеч шарманда бўлмадим.
Азобларга бардош беришга қарор қилдим,
Биламан, шарманда бўлмайман.
8 Мени оқлайдиган яқинимдадир,
Мен билан даъволашадиган ким, юзлашайлик–чи!
Қани рақибларим? Менга қарши чиқсин!
9 Мана, Эгам Раббий менга мадад беради,
Қани, ким мени айбдор деб айта олади?!
Қаранг, уларнинг ҳаммаси кийим каби эскиради,
Уларни куя еб тамом қилади.
10 Орангиздан ким Эгамиздан қўрқади?
Ким қулининг овозига қулоқ солади?
Зулматда юрганлар, нурдан маҳрум бўлганлар
Эгамизнинг номига умид боғласин,
Ҳа, ўзининг Худосига таянсин!
11 Ахир, ҳаммангиз аланга ёқяпсиз,
Машъаллар ёқяпсиз.
Алангангиз ёруғида юраверинг,
Ўзингиз ёққан машъала ёруғида юраверинг.
Қаранг, Худо сизларни не кўйга солади:
У бошингизга азоб–уқубат келтиради.
