26–BOB
Xudo Oʻz xalqiga gʻalaba ato qiladi
1 Oʻsha kuni Yahudo yurtida ushbu qoʻshiq kuylanar:
“Mana, shahrimiz qudratlidir!
Egamiz bizning qalʼamizdir,
Uning Oʻzi bizga najot beradi.
2 Oching shahar darvozalarini!
Sadoqatli solih xalq ichkari kirsin!
3 Ey Egamiz, Senga ishonib,
Fikri–zikri Sendan uzilmaydiganga
Oʻzing komil tinchlik ato qilasan.
4 Egamizga to abad ishon,
Uning Oʻzi abadiy Qoyamizdir.
5 Yuksalganlarni U yiqitdi,
Takabbur shaharni vayron qilib,
Yer bilan bitta qildi.
6 Oʻsha shaharni mazlumlar oyoq osti qildi,
U bechoralarning qadamlari ostida ezildi.”
7 Solihning yoʻli tekisdir,
Toʻgʻri yoʻlni Sen unga tayyorlaysan.
8 Ey Egamiz, yoʻl–yoʻriqlaring ila
Senga umid qilamiz.
Sening nomingni sharaflash
Koʻnglimiz istagidir.
9 Tun boʻyi yuragim Seni qoʻmsaydi,
Ha, men Senga intilaman.
Yer yuzida Sening hukming boʻlganda,
Olam ahli adolatni biladi.
10 Fosiqlar marhamat koʻrganda
Ular aslo solihlikni oʻrganmas.
Haqqoniylik oʻrniga ular egrilik qilaveradi,
Sening ulugʻvorligingni ular koʻrmaydi.
11 Ey Egamiz, qoʻling koʻtarilgan,
Jazolashga tayyor,
Ammo ular buni koʻrmaydi.
Xalqingni deb jon kuydirganingni koʻrib,
Ular sharmanda boʻlsin.
Gʻanimlaringga atalgan olov ularni yutsin.
12 Ey Egamiz, bizga Sen tinchlik ato etasan,
Qilgan ishlarimizning barchasiga
Yetishganmiz Sening qudrating ila.
13 Ey Egamiz Xudo, Sendan boshqalar
Ustimizdan hukmronlik qildilar,
Ammo biz yolgʻiz Sening nomingni tilga olamiz.
14 Oʻliklar yashamas,
Ular aslo qaytib kelmas.
Ularni Sen jazolab, qirib tashlading,
Ularni tamomila xotiradan oʻchirding.
15 Ey Egamiz, xalqimizni Sen koʻpaytirding,
Xalqni koʻpaytirib, Oʻzing yuksalding,
Yurtning barcha chegaralarini kengaytirding.
16 Ey Egamiz, kulfatda qolganlarida
Ular Senga yuz burdilar,
Sening tanqidlaring ostida egildilar.
17 Toʻlgʻoq tutayotgan ayol ogʻriqdan qichqirganday,
Toʻlgʻonib, dod–faryod qilganday,
Biz ham Sening oldingda shunday boʻldik, ey Egamiz!
18 Homilador boʻlib, dard chekdik,
Ammo shamoldan boshqa hech narsa koʻrmadik.
Na yer yuzida biz gʻolib boʻldik,
Na avlodlar dunyoga keltirdik.
19 Ammo Sening oʻlik xalqing tiriladi,
Tanalari oʻrnidan turadi.
Ey tuproq ostida yotganlar, qoʻzgʻaling,
Shodlikdan hayqiring!
Ey Egamiz, shabnaming tonggi shabnamga oʻxshaydi,
Zamin murdalariga hayot bagʻishlaydi.
Hukm va qayta tiklanish
20 Keling, ey xalqim, bir oz yashirinib turing!
Egamizning gʻazabi bosilguncha,
Kiring ichkariga,
Ortingizdan eshiklarni yopib qoʻying!
21 Ana, Egamiz kelayotir maskanidan
Zamin ahlini gunohlari uchun jazolagani.
Yer toʻkilgan qonlarni fosh etadi,
Qotillikning qurbonlarini endi yashirmaydi.
26–БОБ
Худо Ўз халқига ғалаба ато қилади
1 Ўша куни Яҳудо юртида ушбу қўшиқ куйланар:
“Мана, шаҳримиз қудратлидир!
Эгамиз бизнинг қалъамиздир,
Унинг Ўзи бизга нажот беради.
2 Очинг шаҳар дарвозаларини!
Садоқатли солиҳ халқ ичкари кирсин!
3 Эй Эгамиз, Сенга ишониб,
Фикри–зикри Сендан узилмайдиганга
Ўзинг комил тинчлик ато қиласан.
4 Эгамизга то абад ишон,
Унинг Ўзи абадий Қоямиздир.
5 Юксалганларни У йиқитди,
Такаббур шаҳарни вайрон қилиб,
Ер билан битта қилди.
6 Ўша шаҳарни мазлумлар оёқ ости қилди,
У бечораларнинг қадамлари остида эзилди.”
7 Солиҳнинг йўли текисдир,
Тўғри йўлни Сен унга тайёрлайсан.
8 Эй Эгамиз, йўл–йўриқларинг ила
Сенга умид қиламиз.
Сенинг номингни шарафлаш
Кўнглимиз истагидир.
9 Тун бўйи юрагим Сени қўмсайди,
Ҳа, мен Сенга интиламан.
Ер юзида Сенинг ҳукминг бўлганда,
Олам аҳли адолатни билади.
10 Фосиқлар марҳамат кўрганда
Улар асло солиҳликни ўрганмас.
Ҳаққонийлик ўрнига улар эгрилик қилаверади,
Сенинг улуғворлигингни улар кўрмайди.
11 Эй Эгамиз, қўлинг кўтарилган,
Жазолашга тайёр,
Аммо улар буни кўрмайди.
Халқингни деб жон куйдирганингни кўриб,
Улар шарманда бўлсин.
Ғанимларингга аталган олов уларни ютсин.
12 Эй Эгамиз, бизга Сен тинчлик ато этасан,
Қилган ишларимизнинг барчасига
Етишганмиз Сенинг қудратинг ила.
13 Эй Эгамиз Худо, Сендан бошқалар
Устимиздан ҳукмронлик қилдилар,
Аммо биз ёлғиз Сенинг номингни тилга оламиз.
14 Ўликлар яшамас,
Улар асло қайтиб келмас.
Уларни Сен жазолаб, қириб ташладинг,
Уларни тамомила хотирадан ўчирдинг.
15 Эй Эгамиз, халқимизни Сен кўпайтирдинг,
Халқни кўпайтириб, Ўзинг юксалдинг,
Юртнинг барча чегараларини кенгайтирдинг.
16 Эй Эгамиз, кулфатда қолганларида
Улар Сенга юз бурдилар,
Сенинг танқидларинг остида эгилдилар.
17 Тўлғоқ тутаётган аёл оғриқдан қичқиргандай,
Тўлғониб, дод–фарёд қилгандай,
Биз ҳам Сенинг олдингда шундай бўлдик, эй Эгамиз!
18 Ҳомиладор бўлиб, дард чекдик,
Аммо шамолдан бошқа ҳеч нарса кўрмадик.
На ер юзида биз ғолиб бўлдик,
На авлодлар дунёга келтирдик.
19 Аммо Сенинг ўлик халқинг тирилади,
Таналари ўрнидан туради.
Эй тупроқ остида ётганлар, қўзғалинг,
Шодликдан ҳайқиринг!
Эй Эгамиз, шабнаминг тонгги шабнамга ўхшайди,
Замин мурдаларига ҳаёт бағишлайди.
Ҳукм ва қайта тикланиш
20 Келинг, эй халқим, бир оз яшириниб туринг!
Эгамизнинг ғазаби босилгунча,
Киринг ичкарига,
Ортингиздан эшикларни ёпиб қўйинг!
21 Ана, Эгамиз келаётир масканидан
Замин аҳлини гуноҳлари учун жазолагани.
Ер тўкилган қонларни фош этади,
Қотилликнинг қурбонларини энди яширмайди.
