16–BOB
Hojar va Ismoil
1 Ibromning xotini Soray hamon bola koʻrmas edi. Soray Misrlik Hojar degan bir ayolni choʻri qilib olgan edi. 2 Bir kuni Soray Ibromga aytdi:
— Egamiz meni farzanddan qisdi. Endi choʻrimning yoniga kiravering. Balki u orqali farzandli boʻlarman .
Ibrom Sorayning taklifiga rozi boʻldi. 3 Shunday qilib, Ibromning xotini Soray Misrlik choʻrisi Hojarni eriga xotin qilib olib berdi. Bu voqea yuz berganda, Ibrom Kanʼon yurtiga kirganiga oʻn yil boʻlgan edi. 4 Ibrom Hojarning yoniga kirdi. Hojar homilador boʻldi. Hojar homiladorligini bilgach, bekasi Sorayni nazar–pisand qilmay qoʻydi. 5 Shunda Soray Ibromga dedi:
— Choʻrimga imtiyoz berib, oʻzim uni sizning qoʻyningizga solib qoʻydim. Endi u homilador boʻlib, meni nazariga ilmay qoʻydi–ya. Bularning hammasiga siz aybdorsiz! Xudoga soldim, qay birimizning haq ekanimizni Xudo hal qilsin!
6 Ibrom Sorayga:
— Hozir ham u sening choʻring, unga istaganingni qilaver, — deb javob berdi. Soray Hojarga shunaqangi shafqatsizlik qildiki, Hojar qochib ketishga majbur boʻldi.
7 Egamizning farishtasi sahrodagi buloq yonida — Shurga boradigan yoʻl boʻyida Hojarni topdi.
8 — Ey Hojar, Sorayning choʻrisi! Qayerdan kelib, qayerga ketyapsan? — deb soʻradi.
— Bekam Soraydan qochib kelyapman, — deb javob berdi Hojar.
9 — Bekangning yoniga qayt, unga itoat et, — dedi Egamizning farishtasi Hojarga. 10 — Sening naslingni shu qadar koʻp qilamanki, koʻpligidan hech kim sanay olmaydi.
11 Egamizning farishtasi Hojarga yana gapirdi:
“Sen homiladorsan va tuqqaysan oʻgʻil,
Egamiz eshitdi jafolaringni,
Uning ismini qoʻygaysan Ismoil .
12 Oʻgʻling boʻlgʻay asov eshakday,
Uning qoʻli koʻtarilgay hammaga qarshi
Va hammaning qoʻli — unga qarshi,
Qarindoshlari bilan dushman boʻlib yashagay .”
13 Hojar: “Meni koʻradigan Xudoni koʻrdim–a!” dedi. Shuning uchun u oʻziga gapirgan Egamizga: “Meni koʻradigan Xudosan” deb nom berdi. 14 Shuning uchun bu quduqqa Ber–Laxay–Ruy deb nom berilgan. Quduq Kadesh bilan Barid orasida joylashgan.
15 Hojar Ibromga oʻgʻil tugʻib berdi, Ibrom bu bolaga Ismoil deb ism qoʻydi. 16 Bu paytda Ibrom sakson olti yoshda edi.
16–БОБ
Ҳожар ва Исмоил
1 Ибромнинг хотини Сорай ҳамон бола кўрмас эди. Сорай Мисрлик Ҳожар деган бир аёлни чўри қилиб олган эди. 2 Бир куни Сорай Ибромга айтди:
— Эгамиз мени фарзанддан қисди. Энди чўримнинг ёнига кираверинг. Балки у орқали фарзандли бўларман .
Ибром Сорайнинг таклифига рози бўлди. 3 Шундай қилиб, Ибромнинг хотини Сорай Мисрлик чўриси Ҳожарни эрига хотин қилиб олиб берди. Бу воқеа юз берганда, Ибром Канъон юртига кирганига ўн йил бўлган эди. 4 Ибром Ҳожарнинг ёнига кирди. Ҳожар ҳомиладор бўлди. Ҳожар ҳомиладорлигини билгач, бекаси Сорайни назар–писанд қилмай қўйди. 5 Шунда Сорай Ибромга деди:
— Чўримга имтиёз бериб, ўзим уни сизнинг қўйнингизга солиб қўйдим. Энди у ҳомиладор бўлиб, мени назарига илмай қўйди–я. Буларнинг ҳаммасига сиз айбдорсиз! Худога солдим, қай биримизнинг ҳақ эканимизни Худо ҳал қилсин!
6 Ибром Сорайга:
— Ҳозир ҳам у сенинг чўринг, унга истаганингни қилавер, — деб жавоб берди. Сорай Ҳожарга шунақанги шафқатсизлик қилдики, Ҳожар қочиб кетишга мажбур бўлди.
7 Эгамизнинг фариштаси саҳродаги булоқ ёнида — Шурга борадиган йўл бўйида Ҳожарни топди.
8 — Эй Ҳожар, Сорайнинг чўриси! Қаердан келиб, қаерга кетяпсан? — деб сўради.
— Бекам Сорайдан қочиб келяпман, — деб жавоб берди Ҳожар.
9 — Бекангнинг ёнига қайт, унга итоат эт, — деди Эгамизнинг фариштаси Ҳожарга. 10 — Сенинг наслингни шу қадар кўп қиламанки, кўплигидан ҳеч ким санай олмайди.
11 Эгамизнинг фариштаси Ҳожарга яна гапирди:
“Сен ҳомиладорсан ва туққайсан ўғил,
Эгамиз эшитди жафоларингни,
Унинг исмини қўйгайсан Исмоил .
12 Ўғлинг бўлғай асов эшакдай,
Унинг қўли кўтарилгай ҳаммага қарши
Ва ҳамманинг қўли — унга қарши,
Қариндошлари билан душман бўлиб яшагай .”
13 Ҳожар: “Мени кўрадиган Худони кўрдим–а!” деди. Шунинг учун у ўзига гапирган Эгамизга: “Мени кўрадиган Худосан” деб ном берди. 14 Шунинг учун бу қудуққа Бэр–Лахай–Руй деб ном берилган. Қудуқ Кадеш билан Барид орасида жойлашган.
15 Ҳожар Ибромга ўғил туғиб берди, Ибром бу болага Исмоил деб исм қўйди. 16 Бу пайтда Ибром саксон олти ёшда эди.
