1–BOB
Duoyi salom
1 Otamiz Xudo va Rabbimiz Iso Masihning Salonika shahridagi imonlilar jamoatiga Pavlus, Silas va Timoʻtiydan salom! Xudoning inoyati va tinchligi sizlarga yor boʻlsin.
Salonikaliklarning hayoti va imoni
2 Biz doim sizlar uchun ibodat qilib, hammangiz uchun Xudoga shukurlar aytamiz. 3 Imon va sevgi bilan qilgan ishlaringiz uchun, Rabbimiz Iso Masihga bogʻlagan sobit umidingiz uchun doimo Otamiz Xudoga minnatdorchiligimizni bildiramiz.
4 Ey Xudo sevgan birodarlarimiz, Xudo sizlarni tanlab olganini bilamiz. 5 Axir, biz Xushxabarni sizlarga quruq soʻzlar bilan emas, balki toʻliq ishonch va Muqaddas Ruhning qudrati bilan keltirdik. Orangizda boʻlganimizda, sizlarning manfaatingizni koʻzlab, qanday yashaganimizni bilasiz.
6 Sizlar bizdan va Rabbimiz Isodan oʻrnak oldingiz. Axir, koʻp azob–uqubat chekkaningizga qaramay, Muqaddas Ruh beradigan quvonch bilan Xudoning soʻzini qabul qildingiz. 7 Shunday qilib, Makedoniya va Axaya viloyatlaridagi barcha imonlilarga oʻrnak boʻldingiz. 8 Rabbimizning kalomi sizlardan faqatgina Makedoniya va Axayaga yoyilib qolmadi, balki sizlarning Xudoga boʻlgan imoningiz hamma joyda maʼlum boʻldi. Shuning uchun endi bizning biror narsa gapirishimizga hojat qolmadi. 9 Bizni yaxshi qabul qilganingiz haqida, barhayot va haqiqiy Xudoga xizmat qilaylik, deya butlardan yuz oʻgirib, Xudoga yuz burganingiz haqida hamma gapiryapti. 10 Xudoning Oʻgʻli Isoning samodan tushishini kutayotganingiz haqida ham gapiryaptilar. Xudo Oʻz Oʻgʻli Isoni tiriltirgan, Iso bizni kelajakda Xudoning gʻazabidan qutqaradi.
1–БОБ
Дуойи салом
1 Отамиз Худо ва Раббимиз Исо Масиҳнинг Салоника шаҳридаги имонлилар жамоатига Павлус, Силас ва Тимўтийдан салом! Худонинг инояти ва тинчлиги сизларга ёр бўлсин.
Салоникаликларнинг ҳаёти ва имони
2 Биз доим сизлар учун ибодат қилиб, ҳаммангиз учун Худога шукурлар айтамиз. 3 Имон ва севги билан қилган ишларингиз учун, Раббимиз Исо Масиҳга боғлаган собит умидингиз учун доимо Отамиз Худога миннатдорчилигимизни билдирамиз.
4 Эй Худо севган биродарларимиз, Худо сизларни танлаб олганини биламиз. 5 Ахир, биз Хушхабарни сизларга қуруқ сўзлар билан эмас, балки тўлиқ ишонч ва Муқаддас Руҳнинг қудрати билан келтирдик. Орангизда бўлганимизда, сизларнинг манфаатингизни кўзлаб, қандай яшаганимизни биласиз.
6 Сизлар биздан ва Раббимиз Исодан ўрнак олдингиз. Ахир, кўп азоб–уқубат чекканингизга қарамай, Муқаддас Руҳ берадиган қувонч билан Худонинг сўзини қабул қилдингиз. 7 Шундай қилиб, Македония ва Ахая вилоятларидаги барча имонлиларга ўрнак бўлдингиз. 8 Раббимизнинг каломи сизлардан фақатгина Македония ва Ахаяга ёйилиб қолмади, балки сизларнинг Худога бўлган имонингиз ҳамма жойда маълум бўлди. Шунинг учун энди бизнинг бирор нарса гапиришимизга ҳожат қолмади. 9 Бизни яхши қабул қилганингиз ҳақида, барҳаёт ва ҳақиқий Худога хизмат қилайлик, дея бутлардан юз ўгириб, Худога юз бурганингиз ҳақида ҳамма гапиряпти. 10 Худонинг Ўғли Исонинг самодан тушишини кутаётганингиз ҳақида ҳам гапиряптилар. Худо Ўз Ўғли Исони тирилтирган, Исо бизни келажакда Худонинг ғазабидан қутқаради.
