27–BOB
Egamizga keltiriladigan inʼomlar toʻgʻrisidagi qonun
1 Egamiz Muso orqali 2 Isroil xalqiga quyidagi qoidalarni berdi: agar birortangiz ont ichib, Egamizga biror odamni bagʻishlagan boʻlsangiz, ontingizni ado etish uchun quyidagi qiymatni toʻlang:
3 20 dan 60 yoshgacha boʻlgan erkak uchun 50 boʻlak kumush ,
4 20 dan 60 yoshgacha boʻlgan ayol uchun 30 boʻlak kumush ,
5 5 dan 20 yoshgacha boʻlgan oʻgʻil bola uchun 20 boʻlak kumush ,
5 dan 20 yoshgacha boʻlgan qiz bola uchun 10 boʻlak kumush ,
6 1 oylikdan 5 yoshgacha boʻlgan oʻgʻil bola uchun 5 boʻlak kumush ,
1 oylikdan 5 yoshgacha boʻlgan qiz bola uchun 3 boʻlak kumush ,
7 60 va undan yuqori yoshdagi erkak uchun 15 boʻlak kumush ,
60 va undan yuqori yoshdagi ayol uchun 10 boʻlak kumush.
8 Agar ont ichgan odam nochorligidan belgilangan qiymatni toʻlay olmasa, u Egamizga bagʻishlagan odamini ruhoniyning oldiga olib kelsin. Ruhoniy ont ichgan odamning ahvoliga yarasha qiymatni belgilasin.
9 Agar siz ont ichib, qurbonlik qilishga yaraydigan jonivorni Egamizga bagʻishlagan boʻlsangiz, Egamizga atalgan bu jonivor muqaddas hisoblansin. 10 Bunday jonivorni boshqasiga almashtirib boʻlmaydi. Yaxshisini yomoniga yoki yomonini yaxshisiga ayirboshlamang. Jonivorning birini boshqasiga almashtiradigan boʻlsangiz, jonivorlarning ikkalasi ham muqaddas hisoblansin. 11 Agar Egamizga qurbonlik qilishga yaramaydigan, harom hayvonni atagan boʻlsangiz, oʻsha hayvonni ruhoniy oldiga olib keling. 12 Ruhoniy hayvonning yaxshi yoki yomon ahvoliga qarab bahosini belgilasin va uning qiymati ruhoniy belgilaganday boʻlsin. 13 Bordi–yu, siz atagan hayvoningizni qaytarib olmoqchi boʻlsangiz, ruhoniy tomonidan belgilangan qiymat ustiga oʻsha qiymatning beshdan bir qismini qoʻshib bering.
14 Agar odam Egamizga oʻz uyini bagʻishlasa, ruhoniy uyni baholasin, uyning yaxshi yoki yomon ahvoliga qarab qiymatini belgilasin va uning qiymati ruhoniy belgilaganday boʻlsin. 15 Mabodo uyni bagʻishlagan odam uyini qaytarib olmoqchi boʻlsa, u ruhoniy belgilagan qiymat ustiga qiymatning beshdan bir qismini qoʻshib bersin. Shunda uy yana uniki boʻladi.
16 Agar odam meros qilib olgan yerini Egamizga bagʻishlamoqchi boʻlsa, yerning qiymati u yerga ekiladigan urugʻning miqdoriga koʻra belgilansin. Oʻn savat urugʻlik arpaning bahosi ellik boʻlak kumush boʻlsin. 17 Agar dala Qutlugʻ yili bagʻishlangan boʻlsa, dalaning qiymati belgilangan bahoda qolsin. 18 Bordi–yu, dala Qutlugʻ yildan keyin bagʻishlangan boʻlsa, ruhoniy dalaning qiymatini keyingi Qutlugʻ yilgacha qolgan yillarning soniga koʻra, belgilasin. Dalaning asl qiymati kamaytirilsin. 19 Dalani bagʻishlagan odam dalasini qaytarib olmoqchi boʻlsa, u belgilangan qiymat ustiga dala qiymatining beshdan bir qismini qoʻshib bersin. Shunda dala yana uniki boʻladi. 20 Bordi–yu, u dalasini qaytarib sotib olmasa va dala boshqa birovga sotilgan boʻlsa, dalaning egasi oʻz dalasini qaytarib sotib olish huquqidan mahrum qilinsin. 21 Keyingi Qutlugʻ yil kelganda bu dala Egamizga tamomila bagʻishlangan boʻlib, muqaddas hisoblanadi. Dala ruhoniylarga qarashli boʻladi.
22 Agar biror odam sotib olgan, yaʼni meros boʻlib qolmagan dalasini Egamizga bagʻishlasa, 23 ruhoniy dalaning qiymatini Qutlugʻ yilgacha qolgan yillar soni asosida belgilasin. U odam ruhoniy belgilagan qiymatni oʻsha kuniyoq Egamizga ehson sifatida keltirsin. 24 Qutlugʻ yil esa dala merosxoʻrga — kimdan sotib olingan boʻlsa, oʻsha odamga qaytarib berilsin. 25 Har qanday narsaning qiymatini belgilashda Muqaddas chodirda ishlatiladigan kumush birligi asos qilib olinsin. Har bir kumush boʻlagining ogʻirligi 2,5 misqol boʻlsin.
26 Molu qoʻylaringizning birinchi tugʻilgan bolalarini Egamizga bagʻishlamang, ular shusiz ham Egamizga tegishlidir. 27 Harom hayvonning toʻngʻich bolasini qaytarib sotib olishingiz mumkin. Buning uchun belgilangan qiymatni toʻlab, buning ustiga qiymatning beshdan bir qismini qoʻshib bering. Agar uni qaytarib sotib olmasangiz, ruhoniy uni boshqa birovga belgilagan qiymatga sotib yuborishi mumkin.
28 Egamizga tamomila bagʻishlangan har qanday odamni, jonivor yoki meros qilib olingan yerni qaytarib sotib olish yoki sotib yuborish mumkin emas. Egamizga tamomila bagʻishlangan har qanday narsa Egamizga abadiy tegishli hisoblanadi. 29 Hatto Egamizga tamomila bagʻishlangan odamni ham qaytarib sotib olishingiz mumkin emas. Uni oʻldirishingiz lozim.
30 Yer hosilidan va daraxt mevalaridan olingan ushr ham Egamiznikidir. Bular Egamiz uchun muqaddasdir. 31 Agar birortasi ushrini qaytarib sotib olmoqchi boʻlsa, ushrning qiymati ustiga qiymatning beshdan bir qismini qoʻshib bersin. 32 Poda va suruvingizdan olingan ushrni — sanalgan har oʻninchi jonivorni Egamizga bagʻishlang. 33 Ushr qilib olingan jonivorni tanlamang, uni yaxshisi yoki yomoniga almashtirmang. Agar almashtiradigan boʻlsangiz, jonivorlarning ikkalasi ham muqaddas hisoblansin, ularni qaytarib sotib olishingiz mumkin emas.
34 Egamiz Muso orqali Isroil xalqiga Sinay togʻida bergan amrlar shulardan iborat edi.
27–БОБ
Эгамизга келтириладиган инъомлар тўғрисидаги қонун
1 Эгамиз Мусо орқали 2 Исроил халқига қуйидаги қоидаларни берди: агар бирортангиз онт ичиб, Эгамизга бирор одамни бағишлаган бўлсангиз, онтингизни адо этиш учун қуйидаги қийматни тўланг:
3 20 дан 60 ёшгача бўлган эркак учун 50 бўлак кумуш ,
4 20 дан 60 ёшгача бўлган аёл учун 30 бўлак кумуш ,
5 5 дан 20 ёшгача бўлган ўғил бола учун 20 бўлак кумуш ,
5 дан 20 ёшгача бўлган қиз бола учун 10 бўлак кумуш ,
6 1 ойликдан 5 ёшгача бўлган ўғил бола учун 5 бўлак кумуш ,
1 ойликдан 5 ёшгача бўлган қиз бола учун 3 бўлак кумуш ,
7 60 ва ундан юқори ёшдаги эркак учун 15 бўлак кумуш ,
60 ва ундан юқори ёшдаги аёл учун 10 бўлак кумуш.
8 Агар онт ичган одам ночорлигидан белгиланган қийматни тўлай олмаса, у Эгамизга бағишлаган одамини руҳонийнинг олдига олиб келсин. Руҳоний онт ичган одамнинг аҳволига яраша қийматни белгиласин.
9 Агар сиз онт ичиб, қурбонлик қилишга ярайдиган жониворни Эгамизга бағишлаган бўлсангиз, Эгамизга аталган бу жонивор муқаддас ҳисоблансин. 10 Бундай жониворни бошқасига алмаштириб бўлмайди. Яхшисини ёмонига ёки ёмонини яхшисига айирбошламанг. Жониворнинг бирини бошқасига алмаштирадиган бўлсангиз, жониворларнинг иккаласи ҳам муқаддас ҳисоблансин. 11 Агар Эгамизга қурбонлик қилишга ярамайдиган, ҳаром ҳайвонни атаган бўлсангиз, ўша ҳайвонни руҳоний олдига олиб келинг. 12 Руҳоний ҳайвоннинг яхши ёки ёмон аҳволига қараб баҳосини белгиласин ва унинг қиймати руҳоний белгилагандай бўлсин. 13 Борди–ю, сиз атаган ҳайвонингизни қайтариб олмоқчи бўлсангиз, руҳоний томонидан белгиланган қиймат устига ўша қийматнинг бешдан бир қисмини қўшиб беринг.
14 Агар одам Эгамизга ўз уйини бағишласа, руҳоний уйни баҳоласин, уйнинг яхши ёки ёмон аҳволига қараб қийматини белгиласин ва унинг қиймати руҳоний белгилагандай бўлсин. 15 Мабодо уйни бағишлаган одам уйини қайтариб олмоқчи бўлса, у руҳоний белгилаган қиймат устига қийматнинг бешдан бир қисмини қўшиб берсин. Шунда уй яна уники бўлади.
16 Агар одам мерос қилиб олган ерини Эгамизга бағишламоқчи бўлса, ернинг қиймати у ерга экиладиган уруғнинг миқдорига кўра белгилансин. Ўн сават уруғлик арпанинг баҳоси эллик бўлак кумуш бўлсин. 17 Агар дала Қутлуғ йили бағишланган бўлса, даланинг қиймати белгиланган баҳода қолсин. 18 Борди–ю, дала Қутлуғ йилдан кейин бағишланган бўлса, руҳоний даланинг қийматини кейинги Қутлуғ йилгача қолган йилларнинг сонига кўра, белгиласин. Даланинг асл қиймати камайтирилсин. 19 Далани бағишлаган одам даласини қайтариб олмоқчи бўлса, у белгиланган қиймат устига дала қийматининг бешдан бир қисмини қўшиб берсин. Шунда дала яна уники бўлади. 20 Борди–ю, у даласини қайтариб сотиб олмаса ва дала бошқа бировга сотилган бўлса, даланинг эгаси ўз даласини қайтариб сотиб олиш ҳуқуқидан маҳрум қилинсин. 21 Кейинги Қутлуғ йил келганда бу дала Эгамизга тамомила бағишланган бўлиб, муқаддас ҳисобланади. Дала руҳонийларга қарашли бўлади.
22 Агар бирор одам сотиб олган, яъни мерос бўлиб қолмаган даласини Эгамизга бағишласа, 23 руҳоний даланинг қийматини Қутлуғ йилгача қолган йиллар сони асосида белгиласин. У одам руҳоний белгилаган қийматни ўша куниёқ Эгамизга эҳсон сифатида келтирсин. 24 Қутлуғ йил эса дала меросхўрга — кимдан сотиб олинган бўлса, ўша одамга қайтариб берилсин. 25 Ҳар қандай нарсанинг қийматини белгилашда Муқаддас чодирда ишлатиладиган кумуш бирлиги асос қилиб олинсин. Ҳар бир кумуш бўлагининг оғирлиги 2,5 мисқол бўлсин.
26 Молу қўйларингизнинг биринчи туғилган болаларини Эгамизга бағишламанг, улар шусиз ҳам Эгамизга тегишлидир. 27 Ҳаром ҳайвоннинг тўнғич боласини қайтариб сотиб олишингиз мумкин. Бунинг учун белгиланган қийматни тўлаб, бунинг устига қийматнинг бешдан бир қисмини қўшиб беринг. Агар уни қайтариб сотиб олмасангиз, руҳоний уни бошқа бировга белгилаган қийматга сотиб юбориши мумкин.
28 Эгамизга тамомила бағишланган ҳар қандай одамни, жонивор ёки мерос қилиб олинган ерни қайтариб сотиб олиш ёки сотиб юбориш мумкин эмас. Эгамизга тамомила бағишланган ҳар қандай нарса Эгамизга абадий тегишли ҳисобланади. 29 Ҳатто Эгамизга тамомила бағишланган одамни ҳам қайтариб сотиб олишингиз мумкин эмас. Уни ўлдиришингиз лозим.
30 Ер ҳосилидан ва дарахт меваларидан олинган ушр ҳам Эгамизникидир. Булар Эгамиз учун муқаддасдир. 31 Агар бирортаси ушрини қайтариб сотиб олмоқчи бўлса, ушрнинг қиймати устига қийматнинг бешдан бир қисмини қўшиб берсин. 32 Пода ва сурувингиздан олинган ушрни — саналган ҳар ўнинчи жониворни Эгамизга бағишланг. 33 Ушр қилиб олинган жониворни танламанг, уни яхшиси ёки ёмонига алмаштирманг. Агар алмаштирадиган бўлсангиз, жониворларнинг иккаласи ҳам муқаддас ҳисоблансин, уларни қайтариб сотиб олишингиз мумкин эмас.
34 Эгамиз Мусо орқали Исроил халқига Синай тоғида берган амрлар шулардан иборат эди.
