8–BOB
Shohga itoat etinglar
1 Kim dono kishiga oʻxshaydi? Kim biror narsaning maʼnosini biladi?
Donolik kishining yuzini yashnatadi,
Yuz qattiqligini yumshatadi.
2 Xudoga bergan qasamingni bajarganingday, shohning ham amriga itoat qil . 3 Uning oldida qoʻrqib turavermasdan, borib aytganini qil. Yomon ishlarning tarafdori boʻlma, chunki shoh oʻzi xohlagan ishni qiladi. 4 Shohning soʻzi eʼtiborlidir, hech kim unga: “Nima qilyapsiz?” — deb ayta olmaydi. 5 Farmonlarga itoat qilganlarga zarar yetmaydi.
Dono kishi hamma narsaning, hatto hukmning ham oʻz vaqti borliginiyu 6 insonning qilgan yovuzliklari uni toshdek bosib turishini biladi. 7 Dono kishi yana shuni biladi: hech kim kelajakda nima boʻlishini, qachon sodir boʻlishini bilmaydi. 8 Hech kimning shamolni ushlashga kuchi yetmaganiday, oʻlim kunini orqaga surishga ham hech kimning kuchi yetmaydi. Jangchi oʻrniga birovni qoʻyib, urushdan qocha olmaganday, fosiqlar ham fosiqlikdan qochib qutulolmaydi.
Fosiqlar va solihlar
9 Bu dunyoda boʻlayotgan hamma narsa haqida chuqur oʻylab, bularning hammasini koʻrdim, bir kishi ikkinchisining ustidan zulm oʻtkazib, hukmronlik qiladigan bir zamon bu. 10 Yana shu narsani koʻrdim, fosiq kishining jasadi muqaddas joydan olib chiqildi. Orqasidan olomon borardi, oʻsha fosiq kishi hurmat bilan koʻmildi. Solihlarning jasadlari esa sochilib yotardi. Bu ham behudadir .
11 Jinoyatga tez jazo berilmagani uchun insonlarning yuragi yovuzliklar qilishga doim tayyor. 12-13 Gunohkorlar yuz marta jinoyat qilsalar ham, uzoq umr koʻrishlari mumkin. Ha, “Xudodan qoʻrqadiganlarga undan ham yaxshiroq boʻladi, chunki ular Xudodan qoʻrqadilar. Fosiqlarga esa yaxshi boʻlmaydi, hayotlari soyaday tez oʻtib ketadi, chunki ular Xudodan qoʻrqmaydilar” degan gapni bilaman. 14 Qaranglar–a, bu dunyoda mana shunday bemaʼni narsalar ham sodir boʻladi, solihlar fosiqlarga loyiq boʻlgan jazoni oladilar, fosiqlarga esa xuddi solihlarday munosabatda boʻladilar. Men: “Bu ham behudadir”, — dedim.
15 Shuning uchun men bu hayotdan rohat olishni maslahat beraman. Bu dunyoda odamlarga yeyish, ichish va xursand boʻlishdan boshqa yaxshiroq narsa yoʻqdir. Xudo insonga bergan bu dunyodagi hayoti davomida qiladigan mehnatida shodlik u bilan boʻladi.
16-17 Donolikni bilishga, yer yuzida boʻlayotgan ishlarni oʻrganishga oʻzimni bagʻishladim. Xudoning hamma ishlarini koʻrdim, haqiqatan ham hech kim bu dunyoda Xudo nima qilayotganini tushunmaydi. Hatto uyqudan voz kechib ham, qancha harakat qilmaylik, bilolmaymiz, maʼnosini topa olmaymiz. Donolar: “Bilamiz”, deb aytadi, ammo ular ham haqiqatan tushunmaydilar.
8–БОБ
Шоҳга итоат этинглар
1 Ким доно кишига ўхшайди? Ким бирор нарсанинг маъносини билади?
Донолик кишининг юзини яшнатади,
Юз қаттиқлигини юмшатади.
2 Худога берган қасамингни бажарганингдай, шоҳнинг ҳам амрига итоат қил . 3 Унинг олдида қўрқиб туравермасдан, бориб айтганини қил. Ёмон ишларнинг тарафдори бўлма, чунки шоҳ ўзи хоҳлаган ишни қилади. 4 Шоҳнинг сўзи эътиборлидир, ҳеч ким унга: “Нима қиляпсиз?” — деб айта олмайди. 5 Фармонларга итоат қилганларга зарар етмайди.
Доно киши ҳамма нарсанинг, ҳатто ҳукмнинг ҳам ўз вақти борлигинию 6 инсоннинг қилган ёвузликлари уни тошдек босиб туришини билади. 7 Доно киши яна шуни билади: ҳеч ким келажакда нима бўлишини, қачон содир бўлишини билмайди. 8 Ҳеч кимнинг шамолни ушлашга кучи етмаганидай, ўлим кунини орқага суришга ҳам ҳеч кимнинг кучи етмайди. Жангчи ўрнига бировни қўйиб, урушдан қоча олмагандай, фосиқлар ҳам фосиқликдан қочиб қутулолмайди.
Фосиқлар ва солиҳлар
9 Бу дунёда бўлаётган ҳамма нарса ҳақида чуқур ўйлаб, буларнинг ҳаммасини кўрдим, бир киши иккинчисининг устидан зулм ўтказиб, ҳукмронлик қиладиган бир замон бу. 10 Яна шу нарсани кўрдим, фосиқ кишининг жасади муқаддас жойдан олиб чиқилди. Орқасидан оломон борарди, ўша фосиқ киши ҳурмат билан кўмилди. Солиҳларнинг жасадлари эса сочилиб ётарди. Бу ҳам беҳудадир .
11 Жиноятга тез жазо берилмагани учун инсонларнинг юраги ёвузликлар қилишга доим тайёр. 12-13 Гуноҳкорлар юз марта жиноят қилсалар ҳам, узоқ умр кўришлари мумкин. Ҳа, “Худодан қўрқадиганларга ундан ҳам яхшироқ бўлади, чунки улар Худодан қўрқадилар. Фосиқларга эса яхши бўлмайди, ҳаётлари соядай тез ўтиб кетади, чунки улар Худодан қўрқмайдилар” деган гапни биламан. 14 Қаранглар–а, бу дунёда мана шундай бемаъни нарсалар ҳам содир бўлади, солиҳлар фосиқларга лойиқ бўлган жазони оладилар, фосиқларга эса худди солиҳлардай муносабатда бўладилар. Мен: “Бу ҳам беҳудадир”, — дедим.
15 Шунинг учун мен бу ҳаётдан роҳат олишни маслаҳат бераман. Бу дунёда одамларга ейиш, ичиш ва хурсанд бўлишдан бошқа яхшироқ нарса йўқдир. Худо инсонга берган бу дунёдаги ҳаёти давомида қиладиган меҳнатида шодлик у билан бўлади.
16-17 Доноликни билишга, ер юзида бўлаётган ишларни ўрганишга ўзимни бағишладим. Худонинг ҳамма ишларини кўрдим, ҳақиқатан ҳам ҳеч ким бу дунёда Худо нима қилаётганини тушунмайди. Ҳатто уйқудан воз кечиб ҳам, қанча ҳаракат қилмайлик, билолмаймиз, маъносини топа олмаймиз. Донолар: “Биламиз”, деб айтади, аммо улар ҳам ҳақиқатан тушунмайдилар.
