10–BOB
Butlar haqida
1 Ey Isroil xalqi, Egamiz sizlarga aytayotgan soʻzlarga quloq soling. 2 Egamiz shunday demoqda:
“Boshqa xalqlarga taqlid qilmanglar,
Boshqa xalqlar singari,
Osmondagi alomatlardan qoʻrqmanglar.
3 Xalqlarning udumlari behuda!
Ular oʻrmondan daraxt kesadi,
Hunarmand boltasi bilan unga shakl berib,
4 Kumushu oltin bilan bezatadi.
Yiqilib ketmasin deya, mix bilan mahkamlaydi,
5 Butlari polizdagi qoʻriqchilarga oʻxshaydi.
Ular gapira olmaydi.
Ularni koʻtarib yurish kerak boʻladi,
Oʻzlari yura olmaydi.
Ulardan qoʻrqmanglar,
Ularning qoʻlidan hech qanday yomonlik kelmaydi,
Yaxshilik ham qila olmaydi.”
Yeremiyo Xudoning shaʼniga hamdu sanolar aytadi
6 Ey Egamiz, Senga oʻxshashi yoʻq!
Sen buyukdirsan,
Sening noming ulugʻ va qudratlidir.
7 Ey ellarning Shohi,
Sendan qoʻrqmaydigan biror zot bormi?!
Sen bunga loyiqdirsan.
Xalqlarning donishmandlari orasida,
Ularning shohlari orasida
Senga oʻxshashi yoʻq.
8 Donishmandlariyu shohlari ahmoq va befarosat.
Ular betayin yogʻoch butlaridan maslahat olishadi.
9 Butlarini yasash uchun kumushni Tarshishdan,
Oltinni Ufazdan keltirishadi.
Butlarni hunarmandu zargarlar yasagan.
Koʻk va safsar liboslar bilan bezagan,
Hammasi — mohir ustalarning ishidir.
10 Ammo Egamiz haq Xudodir.
U barhayot Xudo va abadiy Shohdir.
Gʻazablanganda yer silkinadi,
Uning qahriga xalqlar dosh bera olmaydi.
11 Egamiz shunday dedi: “Boshqa xalqlarga ayt: «Bu xudolar yeru osmonni yaratmagan. Ular yer yuzidan va osmon ostidan yoʻq boʻlib ketadi.»”
12 Egamiz qudrati ila yerni yaratdi,
Donoligi ila dunyoni bunyod etdi,
Idroki ila osmon gumbazini oʻrnatdi.
13 Uning ovozidan osmondagi suvlar gulduraydi,
U dunyoning toʻrt burchidan bulutlarni olib keladi.
Yomgʻir yogʻdirganda chaqmoq chaqtiradi,
Omborlaridagi shamollardan estiradi.
14 Uning oldida hamma odamlar ahmoq va nodondir.
Zargarlar yasagan butlari tufayli sharmanda boʻlishadi.
Yasagan sanamlari soxtadir, ularning joni yoʻq.
15 Bu betayin butlar aldamchidir.
Ularni jazolaganim zahoti yoʻq boʻlishadi.
16 Yoqubning Xudosi esa unday emas.
Butun borliqni U yaratgan,
Isroil qabilasini Oʻziga mulk qilgan.
Uning nomi Sarvari Olamdir.
Surgun vaqti yaqinlashib kelmoqda
17 Ey qurshovda yashayotganlar!
Bor–budingizni yigʻishtirib oling.
18 Zero, Egamiz shunday demoqda:
“Men sizlarni Isroil yurtidan uloqtirib tashlayman,
Boshingizga kulfat yogʻdiraman,
Toki sizlar buni sezinglar.”
19 Shoʻrim qursin! Shunchalik azoblarga qoldim!
Ogʻir yaralangan ekanman.
Ammo oʻzimga oʻzim: “Boshimda shu dard bor ekan,
Unga chidashim kerak”, dedim.
20 Chodirim yiqitilgan, iplari uzib tashlangan.
Farzandlarim ketdi, ular yoʻq boʻldi.
Endi chodirimni kim tikadi?!
Chodirimning pardalarini kim osadi?!
21 Axir, choʻponlar ahmoq,
Ular Egamizdan maslahat olmadilar.
Shuning uchun ham ishlari oʻngidan kelmadi,
Qoʻylari har yoqqa tarqalib ketdi.
22 Eshitinglar! Bir xabar kelmoqda!
Ana, shimoldan shovqin–suron koʻtarilmoqda!
Lashkarlar Yahudo shaharlarini xarob qilar emish,
Chiyaboʻrilar yashaydigan makonga aylantirar emish.
Yeremiyo ibodat qiladi
23 Ey Egam, bilaman,
Odam zoti oʻz taqdirini oʻzi belgilay olmaydi,
Oʻz qadami oʻzining ixtiyorida emas.
24 Ey Egam, meni jahl ustida jazolamagin.
Adolating ila haq yoʻlga solgin,
Aks holda, meni yoʻq qilib yuborasan.
25 Seni tan olmaydigan xalqlar ustiga qahringni soch,
Senga sajda qilmaydigan ellar ustiga soch,
Axir, ular Yoqub naslining boshini yedilar.
Hammasini halok etib, yoʻq qildilar,
Yurtini xarobazorga aylantirdilar.
10–БОБ
Бутлар ҳақида
1 Эй Исроил халқи, Эгамиз сизларга айтаётган сўзларга қулоқ солинг. 2 Эгамиз шундай демоқда:
“Бошқа халқларга тақлид қилманглар,
Бошқа халқлар сингари,
Осмондаги аломатлардан қўрқманглар.
3 Халқларнинг удумлари беҳуда!
Улар ўрмондан дарахт кесади,
Ҳунарманд болтаси билан унга шакл бериб,
4 Кумушу олтин билан безатади.
Йиқилиб кетмасин дея, мих билан маҳкамлайди,
5 Бутлари полиздаги қўриқчиларга ўхшайди.
Улар гапира олмайди.
Уларни кўтариб юриш керак бўлади,
Ўзлари юра олмайди.
Улардан қўрқманглар,
Уларнинг қўлидан ҳеч қандай ёмонлик келмайди,
Яхшилик ҳам қила олмайди.”
Еремиё Худонинг шаънига ҳамду санолар айтади
6 Эй Эгамиз, Сенга ўхшаши йўқ!
Сен буюкдирсан,
Сенинг номинг улуғ ва қудратлидир.
7 Эй элларнинг Шоҳи,
Сендан қўрқмайдиган бирор зот борми?!
Сен бунга лойиқдирсан.
Халқларнинг донишмандлари орасида,
Уларнинг шоҳлари орасида
Сенга ўхшаши йўқ.
8 Донишмандларию шоҳлари аҳмоқ ва бефаросат.
Улар бетайин ёғоч бутларидан маслаҳат олишади.
9 Бутларини ясаш учун кумушни Таршишдан,
Олтинни Уфаздан келтиришади.
Бутларни ҳунарманду заргарлар ясаган.
Кўк ва сафсар либослар билан безаган,
Ҳаммаси — моҳир усталарнинг ишидир.
10 Аммо Эгамиз ҳақ Худодир.
У барҳаёт Худо ва абадий Шоҳдир.
Ғазабланганда ер силкинади,
Унинг қаҳрига халқлар дош бера олмайди.
11 Эгамиз шундай деди: “Бошқа халқларга айт: «Бу худолар еру осмонни яратмаган. Улар ер юзидан ва осмон остидан йўқ бўлиб кетади.»”
12 Эгамиз қудрати ила ерни яратди,
Донолиги ила дунёни бунёд этди,
Идроки ила осмон гумбазини ўрнатди.
13 Унинг овозидан осмондаги сувлар гулдурайди,
У дунёнинг тўрт бурчидан булутларни олиб келади.
Ёмғир ёғдирганда чақмоқ чақтиради,
Омборларидаги шамоллардан эстиради.
14 Унинг олдида ҳамма одамлар аҳмоқ ва нодондир.
Заргарлар ясаган бутлари туфайли шарманда бўлишади.
Ясаган санамлари сохтадир, уларнинг жони йўқ.
15 Бу бетайин бутлар алдамчидир.
Уларни жазолаганим заҳоти йўқ бўлишади.
16 Ёқубнинг Худоси эса ундай эмас.
Бутун борлиқни У яратган,
Исроил қабиласини Ўзига мулк қилган.
Унинг номи Сарвари Оламдир.
Сургун вақти яқинлашиб келмоқда
17 Эй қуршовда яшаётганлар!
Бор–будингизни йиғиштириб олинг.
18 Зеро, Эгамиз шундай демоқда:
“Мен сизларни Исроил юртидан улоқтириб ташлайман,
Бошингизга кулфат ёғдираман,
Токи сизлар буни сезинглар.”
19 Шўрим қурсин! Шунчалик азобларга қолдим!
Оғир яраланган эканман.
Аммо ўзимга ўзим: “Бошимда шу дард бор экан,
Унга чидашим керак”, дедим.
20 Чодирим йиқитилган, иплари узиб ташланган.
Фарзандларим кетди, улар йўқ бўлди.
Энди чодиримни ким тикади?!
Чодиримнинг пардаларини ким осади?!
21 Ахир, чўпонлар аҳмоқ,
Улар Эгамиздан маслаҳат олмадилар.
Шунинг учун ҳам ишлари ўнгидан келмади,
Қўйлари ҳар ёққа тарқалиб кетди.
22 Эшитинглар! Бир хабар келмоқда!
Ана, шимолдан шовқин–сурон кўтарилмоқда!
Лашкарлар Яҳудо шаҳарларини хароб қилар эмиш,
Чиябўрилар яшайдиган маконга айлантирар эмиш.
Еремиё ибодат қилади
23 Эй Эгам, биламан,
Одам зоти ўз тақдирини ўзи белгилай олмайди,
Ўз қадами ўзининг ихтиёрида эмас.
24 Эй Эгам, мени жаҳл устида жазоламагин.
Адолатинг ила ҳақ йўлга солгин,
Акс ҳолда, мени йўқ қилиб юборасан.
25 Сени тан олмайдиган халқлар устига қаҳрингни соч,
Сенга сажда қилмайдиган эллар устига соч,
Ахир, улар Ёқуб наслининг бошини едилар.
Ҳаммасини ҳалок этиб, йўқ қилдилар,
Юртини харобазорга айлантирдилар.
